Cabanga ngetimo letenta labanye bacabange ngalendlela. Lomunye umzalwane lobekanendvodzana leyatibulala wabuta nayi imibuto watsi: ‘Jehova ukuhlele kusengaphambili yini kutsi mine nemkami sitawukhona kukwetfwala lokutibulala kwendvodzana yetfu? Loku ngabe kwenteke ngoba Jehova abone kutsi sitawukhona yini kukukhutsatelela?’ Kunengcondvo yini kukholelwa kutsi ngandlela tsite, Jehova uyatikala tintfo letisehlelako?

Kucabangisisa ngemavi aPawula labhalwe ku-1 Khorinte 10:13 kusiletsa kulesiphetfo lesitsi: Kute sizatfu lesiseBhayibhelini lesikhombisa kutsi Jehova utikala kusengaphambili tintfo lesingatetfwala, bese uyakhetsa kutsi ngutiphi tilingo letingasehlela. Asesicoce ngetizatfu letine letisenta siphetse kanjalo.

Kwekucala, Jehova waniketa bantfu inkhululeko yekutikhetsela. Ufuna sitikhetsele indlela lesiphila ngayo. (Dut. 30:19, 20; Josh. 24:15) Nangabe sikhetsa indlela lekahle, singalindzela kutsi Jehova acondzise tinyatselo lesititsatsako. (Taga 16:9) Kodvwa nangabe sikhetsa indlela lembi, sitawubhekana nemiphumela yaloko. (Gal. 6:7) Kube Jehova bekasikhetsela tilingo lesingalingwa ngato, loku bekungeke yini kuphikisane nesipho lasiphe sona sekutikhetsela?

Kwesibili, Jehova akasivimbeli kutsi sihlangane ‘nesikhatsi nematfuba.’ (Shu. 9:11) Tingoti tingasehlela ngenca yekutsi sisendzaweni lekabi ngesikhatsi lesikabi. Jesu wakhuluma ngesehlakalo lesabulala bantfu labangu-18 ngesikhatsi umbhoshongo uwela etikwabo, futsi wachaza kutsi leyo ngoti beyingasiyo intsandvo yaNkulunkulu. (Luk. 13:1-5) Kunengcondvo yini kucabanga kutsi Nkulunkulu angahlela kusengaphambili kutsi umuntfu lotsite utakufa ngesehlakalo lesitsite?

Kwesitsatfu, sonkhe kufanele sikhombise kutsi setsembekile yini. Khumbula kutsi Sathane watibekela insayeya tikhonti taJehova, wagomela ngekutsi ngeke sihlale setsembekile kuJehova nangabe sibhekene nebumatima. (Jobe 1:9-11; 2:4; Semb. 12:10) Nangabe Jehova angasivikela kutsi singabhekani netinkinga letitsite ngoba nje abona kutsi ngeke sikhone kutetfwala, loko bekungawenta abe liciniso emavi aSathane latsi sikhonta Jehova nangabe kukhona lesitakutfola.

 Kwesine, akusho kutsi Jehova kufanele ati kusengaphambili konkhe lokutakwenteka kitsi. Lomcondvo wekutsi Nkulunkulu usikhetsela kusengaphambili kutsi ngutiphi tilingo lesitawubhekana nato, ungasho kutsi ukwati konkhe lokutakwenteka kitsi esikhatsini lesitako. Kodvwa umbono lonjengalona awukho eBhayibhelini. Kuliciniso kutsi Nkulunkulu angakhona kwati loko lokutakwenteka. (Isa. 46:10) Nome kunjalo, liBhayibheli lisitjela kutsi uyakukhetsa loko lafuna kukwati ngelikusasa. (Gen. 18:20, 21; 22:12) Ngako, emandla akhe ekwati ngelikusasa uwasebentisa kahle futsi uyayihlonipha inkhululeko yetfu yekutikhetsela. Akusiko yini loko lesingakulindzela kuNkulunkulu loyihloniphako inkhululeko yetfu yekutikhetsela futsi lohlala awasebentisa kahle emandla akhe?—Dut. 32:4; 2 Khor. 3:17.

Ngako kufanele siwacondze njani lamavi aPawula latsi: “Nkulunkulu . . . ngeke avume kutsi nilingwe ngalokungetulu kwaloko leningakhona kukwetfwala”? Kulelivesi Pawula uchaza kutsi yini Jehova layentako nangabe silingwa, hhayi loko lakwentako nasisengakalingwa. * Emavi alomphostoli ayasicinisekisa kutsi noma ngabe ngutiphi tilingo letisehlelako ekuphileni kwetfu, Jehova utawusisekela yingci nje nasetsembele kuye. (Hla. 55:22) Lamavi ladvudvutako aPawula akuchaza kahle loko lokushiwo liBhayibheli ngetindlela letimbili.

Kwekucala, letilingo tiyabehlela “nalabanye bantfu.” Ngako tilingo letisehlelako tivamile kubehlela nalabanye. Tilingo letinjengaleti singakhona kutetfwala, yingci nje nasetsembele kuNkulunkulu. (1 Phet. 5:8, 9) Ku-1 Khorinte 10:13, Pawula ukhuluma ngetilingo ema-Israyeli lahlangabetana nato nakasehlane. (1 Khor. 10:6-11) Leto tilingo betingeke tibe ngetulu kwemandla ema-Israyeli letsembekile. Tikhatsi letine, Pawula usho emavi latsi “nalabanye bantfu” abalalelanga. Kuyadzabukisa kutsi lamanye ema-Israyeli atinikela etifisweni letimbi ngenca yekutsi ehluleka kwetsembela kuNkulunkulu.

Kwesibili, “Nkulunkulu wetsembekile.” Indlela Nkulunkulu labaphatsa ngayo bantfu bakhe ikhombisa kutsi wetsembekile kulabo “labamtsandzako bagcine imiyalo yakhe.” (Dut. 7:9) Lamavi aphindze akhombise kutsi Nkulunkulu uhlale atigcina tetsembiso takhe. (Josh. 23:14) Nasibuka umlandvo wekwetsembeka kwakhe, siyabona kutsi bonkhe labo labamtsandzako futsi bamlalele bangetsemba kutsi utawutigcina nati tetsembiso takhe letimbili letimayelana netilingo lesingahle sibhekane nato: (1) Ngeke avumele noma ngusiphi silingo kutsi sibe ngetulu kwemandla etfu, futsi (2) “utawukwenta nendlela yekuphuma” kuze sikwati kutibeketelela.

Jehova ubentela njani indlela yekuphuma labo labatsembele kuye nababhekene netilingo? Kuliciniso kutsi nakatsandza angasisusa leso silingo. Nobe kunjalo khumbula emavi aPawula latsi: “[Jehova] utawukwenta nendlela yekuphuma kuze nikwati kubeketela.” Ngako etikhatsini letinyenti, usentela indlela yekuphuma ngekutsi asinikete loko lesikudzingako kuze sikwati kubeketelela leto tilingo. Asesicoce ngaletinye tindlela Jehova lasisita ngato kuze sikwati kubeketelela leto tilingo:

• Nkulunkulu usidvudvuta “kuko konkhe kuhlupheka kwetfu.” (2 Khor. 1:3, 4) Jehova angasinika kuthula kwengcondvo, simo lesihle senhlitiyo futsi asente sikwati kulawula imiva yetfu asebentisa liVi lakhe, umoya wakhe longcwele kanye netincwadzi letisekelwe eBhayibhelini lesitilungiselelwa sisebenti lesetsembekile.—Mat. 24:45; Joh. 14:16; Rom. 15:4.

• Nkulunkulu angasicondzisa asebentisa umoya longcwele. (Joh. 14:26) Nangabe kuvela tilingo, umoya longcwele ungasisita sikhumbule loko lesikufundze eBhayibhelini kanye netimiso letikulo, lokungasisita kute sente tincumo letihlakaniphile.

• Nkulunkulu angasebentisa tingilosi kute tisisite.—Heb. 1:14.

• Nkulunkulu angasisita ngekusebentisa emakhristu lesikanye nawo kute ‘asidvudvute’ ngemavi nangetento tawo.—Khol. 4:11.

Ngako, yini lesingaphetsa ngayo mayelana nalamavi aPawula labhalwe ku-1 Khorinte 10:13? Jehova akasikhetseli tilingo lesibhekana nato. Kodvwa nangabe kuvela tilingo ekuphileni kwetfu, naku lesingaciniseka ngako: Nangabe simetsemba Jehova ngeke avumele kutsi letilingo lesibhekene nato tibe ngetulu kwaloko lesingakwetfwala; utawusentela nendlela yekuphuma kute sitokhona kutibeketelela. Kwati loku kusidvudvuta kakhulu!