1. Bantfu baNkulunkulu bakhombisa njani kutsi bayatsandzana?

BANTFU baNkulunkulu bangemalunga emndeni munye futsi bayatsandzana. (1 Joh. 4:16, 21) Ngalesinye sikhatsi kudzingeka batidzele ngenca yebazalwane babo, kodvwa sikhatsi lesinyenti bakhombisa kutsi bayatsandzana ngekutsi bentelane tintfo letinyenti. Nangabe siphatsa labanye ngemusa futsi sibanakekela, sisuke ‘silingisa Nkulunkulu njengebantfwana labatsandzekako.’​—Ef. 5:1.

2. Jesu wakhombisa njani kutsi unelutsandvo lolufana nelwaBabe wakhe?

² Jesu bekalingisa Babe wakhe ngalokuphelele. Watsi: “Kotani kimi nonkhe nine lenikhatsele nalenisindvwako, ngitaniphumuta. . . . , ngobe nginemoya lomuhle futsi nginenhlitiyo letfobekile.” (Mat. 11:28, 29) Nangabe silingisa Khristu ngekutsi ‘sinakekele lababutsakatsaka,’ sitawutfola umusa waBabe wetfu losezulwini futsi sitawujabula kakhulu. (Hla. 41:1) Ase sicoce ngekutsi yini lesingayenta kute sikhombise kutsi siyabakhatsalela labanye emndenini, ebandleni kanye nasemsebentini wekushumayela.

3. Indvodza ingamnakekela njani umkayo? (Buka sitfombe lesisekucaleni kwalesihloko.)

³ Emadvodza kufanele abe sibonelo akhombise kutsi ayayitsandza imindeni yawo futsi ayinakekele. (Ef. 5:25; 6:4) Kufanele ahlale nebafati bawo ‘ngekubati,’ lokusho kutsi kufanele abanakekele futsi abati kahle. (1 Phet. 3:7) Indvodza lenekucondza yati kahle kutsi nanobe yehluke kakhulu kumkayo, loko akuyenti ibe ncono kunaye. (Gen. 2:18) Ngako kufanele icabangele indlela lativa ngayo futsi ikhombise kutsi iyamhlonipha. Lomunye umfati waseCanada watsi: “Umyeni wami akayibukeli phasi indlela lengitiva ngayo noma atsi: ‘Kute sidzingo sekutiva ngalendlela.’ Uyangilalelisisa nangikhuluma. Ungisita ngemusa kute ngilungise umbono wami ngendzaba letsite.”

4. Indvodza ingakhombisa njani kutsi iyayicabangela imiva yemkayo ngendlela lephatsa ngayo labanye besifazane?

⁴ Indvodza leyinakekelako imiva yemkayo ayenti tintfo letikhombisa kutsandza labanye besifazane noma ibanake ngendlela lengakafaneli. Loko angeke ikwente etinhlelweni tekuchumana noma ku-internet. (Jobe 31:1) Kufanele ihlale yetsembekile kumkayo ngoba imtsandza, itsandza naJehova futsi ikuzonda lokubi.​—Fundza Tihlabelelo 19:14; 97:10.

5. Yini umfati langayenta kuze akhombise kutsi uyayicabangela indvodza yakhe?

⁵ Umfati utayihlonipha kakhulu indvodza nangabe ilandzela sibonelo saJesu Khristu loyinhloko yayo. (Ef. 5:22-25, 33) Nangabe umfati ayihlonipha indvodza yakhe, utayicabangela nangabe icitsa sikhatsi lesinyenti yenta imisebenti yelibandla noma nayibhekene netinkinga. Lenye indvodza yaseBritain itsi: “Umkami usheshe abone nangabe kukhona lokungikhatsatako bese usebentisa simiso lesikuTaga 20:5. Loko ukwenta ngisho noma kudzingeka alindze sikhatsi lesikahle sekucoca ngako kute atfole loko lengikucabangako nangabe kuyintfo lesingakhona kucoca ngayo.”

6. Sonkhe singabakhutsata njani bantfwana kutsi banakekele labanye, futsi loko kungabasita njani?

⁶ Batali babekela bantfwana babo sibonelo lesihle nangabe bakhombisa kutsi bayanakekelana. Kuliciniso kutsi batali banemtfwalo wekufundzisa bantfwana babo kutsi banakekele labanye. Nasi sibonelo, batali bangafundzisa bantfwana babo kutsi bangagijimi eHholweni LeMbuso. Nangabe kunemcimbi, batali bangatjela bantfwana babo kutsi beme kuphakele bantfu labadzala kucala. Onkhe emalunga elibandla angabasita batali. Nasi sibonelo, nangabe umntfwana akhombisa kucabangela ngekutsi asivulele umnyango, kufanele simncome. Loko kungamenta ajabule futsi abone kutsi “kunenjabulo lenyenti ekupheni kunasekwemukeleni.”—Imis. 20:35.

7. Jesu wakhombisa njani kutsi bekayicabangela indvodza lebeyisihhulu, futsi yini lesingayifundza esibonelweni sakhe?

⁷ Ngesikhatsi Jesu aseDekhapholi, “bantfu baletsa kuye indvodza lebeyisihhulu futsi inenkinga yekukhuluma.” (Mak. 7:31-35) Esikhundleni sekutsi ayilaphele embikwebantfu, Jesu “wayitsatsa wayisusa kulesicumbi” futsi wayelapha. Wakwentelani loko? Kungenteka lendvodza beyingakhululeki kuba nebantfu labanyenti ngenca yekukhubateka kwayo. Jesu wakubona loku, kungako angazange ayelaphe embikwebantfu. Kuliciniso kutsi asikwati kwelapha labanye ngalokusimangaliso, kodvwa kufanele sitinakekele tidzingo talabanye kanye nendlela labativa ngayo. Umphostoli Pawula watsi: “Asinakaneni kuze sikhutsatane elutsandvweni nasemisebentini lemihle.” (Heb. 10:24) Jesu bekayicondza indlela beyitiva ngayo lendvodza lebeyisihhulu futsi wakhombisa kuyicabangela.  Lesi sibonelo lesihle kakhulu lesingasilingisa.

8, 9. Singabanakekela njani lasebakhulile nalabagulako? (Shano tibonelo.)

⁸ Banakekele lasebakhulile kanye nalabagulako. Emalunga elibandla lebuKhristu abonakala ngekutsandzana. (Joh. 13:34, 35) Lutsandvo lusenta sisite labakhulile kanye nalabakhubatekile kutsi baye emihlanganweni yebuKhristu kanye nasemsebentini wekushumayela. Loko sikwenta noma timo tingasivumeli, ngisho noma kukuncane labakhona kukwenta. (Mat. 13:23) Michael lohamba nge-wheelchair ulujabulela kakhulu lusito lalutfola emndenini wakhe kanye nakubazalwane labasecenjini lakhe. Utsi: “Ngenca yekutsi bayangisita, ngiyakhona kuya njalo emihlanganweni yebuKhristu kanye nasemsebentini wekushumayela. Ngikutsandza kakhulu kushumayela etindzaweni tawonkhe wonkhe.”

⁹ Imindeni yaseBethel leminyenti inemalunga lasakhulile kanye nalagulako. Babonisi labacabangelako bayawanakekela ngekutsi bawahlelele kutsi ashumayele ngekubhala tincwadzi kanye nekushaya tincingo. Bill loneminyaka lengu-86 futsi lobhalela bantfu labahlala etindzaweni letikhashane tincwadzi utsi: “Ngilijabulela kakhulu lilungelo lekubhala tincwadzi.” Nancy loneminyaka lecishe ibe ngu-90 utsi: “Kubhala tincwadzi ngikutsatsa njengemsebenti wekushumayela. Bantfu kufanele balati liciniso!” Ethel, lowatalwa nga-1921 utsi: “Ngihlala ngisetinhlungwini futsi ngaletinye tikhatsi kumatima ngisho nekugcoka.” Nanobe kunjalo, uyakujabulela kushumayela ngelucingo futsi kunebantfu labakahle lahlale acoca nabo. Barbara loneminyaka lengu-85 utsi: “Ngenca yekutsi ngibutsakatsaka ngikutfola kumatima kuya njalo emsebentini wekushumayela. Kodvwa ngiyakhona kushumayela labanye ngekutsi ngibashayele lucingo. Ngimbonga kakhulu Jehova!” Kungakapheli umnyaka, labanye lesebakhulile bashumayela ema-awa langu-1,228, babhala tincwadzi letingu-6,265, bashaya tincingo tikhatsi letingetulu kwa-2,000 futsi bahambisa tincwadzi letingu-6,315! Siyaciniseka kutsi Jehova ujabula kakhulu ngemetamo labayentako!​—Taga 27:11.

10. Yini lesingayenta kuze bazalwane betfu bazuze ngalokugcwele emihlanganweni yebuKhristu?

¹⁰ Khombisa kutsi uyabacabangela labanye nawusemihlanganweni yebuKhristu. Sifisa kutsi bazalwane betfu bazuze ngalokugcwele nabasemihlanganweni. Singakhombisa njani kutsi siyabacabangela kuze bazuze lokunyenti? Lokunye lesingakwenta kutsi sisheshe sifike kuze singaphazamisi labanye. Kuliciniso kutsi ngaletinye tikhatsi tiba khona timo letingasenta kutsi sifike sekwephutile, kodvwa nangabe loko sekungumkhuba, kufanele sicabangisise kutsi yini lesingayenta kuze sikhombise kutsi siyabacabangela labanye. Kufanele sikhumbule nekutsi nasisemihlanganweni sisuke simenywe nguJehova kanye neNdvodzana yakhe. (Mat. 18:20) Kubaluleke kakhulu kutsi sibahloniphe.

11. Kungani bazalwane labanetinkhulumo kufanele balandzele sicondziso lesiku-1 Khorinte 14:40?

¹¹ Singakhombisa kutsi siyabacabangela bazalwane betfu ngekutsi silalele sicondziso lesitsi: “Tonkhe tintfo atenteke ngendlela lefanele nangekuhleleka.” (1 Khor. 14:40) Bazalwane labanetinkhulumo bangakhombisa kutsi bayasilalela lesicondziso ngekutsi bangasidli sikhatsi nababeka tinkhulumo. Nabenta njalo basuke bakhombisa kutsi bayasicabangela sikhulumi lesilandzelako kanye nelibandla. Labanye bazalwane bahamba emabanga lamadze nabaya emihlanganweni kantsi labanye basebentisa kwekuhamba kwemphakatsi. Kungenteka labanye banebangani bemshado labangasibo BoFakazi labasuke bagadze kutsi basheshe babuye.

12. Kungani kufanele ‘sibacabangele kakhulu ngelutsandvo’ labadzala belibandla labasebenta kamatima? (Buka libhokisi lelinesihloko lesitsi “Singakhombisa Njani Kutsi Siyabacabangela Labo Labaholako?”)

 ¹² Kufanele sibahloniphe futsi sibatsandze labadzala belibandla labasebenta kamatima ebandleni nasemsebentini wekushumayela. (Fundza 1 Thesalonika 5:12, 13.) Asingabati kutsi uyatijabulela tintfo labadzala belibandla labakwentela tona. Ngako yenta konkhe lokusemandleni akho kute ubambisane nabo futsi ubasekele ngoba ‘balindza umphefumulo wakho njengobe batawulandzisa.’​—Heb. 13:7, 17.

13. Yini lesingayifundza endleleni Jesu bekaphatsa ngayo bantfu?

¹³ Mayelana naJesu, Isaya watsi: “Umhlanga lofecekile ngeke awephule; intsambo yesibane lebhunyako ngeke ayicime.” (Isa. 42:3) Jesu bekabatsandza bantfu futsi loko kwamenta wabahawukela. Bekacondza kutsi bativa njani bantfu labafanana nemhlanga lofecekile noma intsambo yesibane lebhunyako. Kungako Jesu abecabangela, anemusa futsi ababeketelela bantfu. Ngisho nebantfwana bebamtsandza. (Mak. 10:14) Kuliciniso kutsi site kuhlakanipha kanye nelikhono lekufundzisa Jesu lebekanalo. Kodvwa kufanele sibacabangele bantfu lesibashumayelako. Loko kufaka ekhatsi indlela lesibakhulumisa ngayo, kutsi sibakhulumisa nini, kanye nekutsi sibakhulumisa sikhatsi lesingakanani.

14. Kungani kufanele siyinake indlela lesikhulumisana ngayo nalabanye?

¹⁴ Kufanele sibakhulumise njani labanye bantfu? Lamuhla tigidzigidzi tebantfu ‘tiphetfwe kabi futsi tihlakatekile’ ngenca yekukhohlakala lokukutekutsengiselana, kutepolitiki  kanye nakubaholi benkholo. (Mat. 9:36) Ngesizatfu saloko, bantfu labanyenti abetsembi muntfu futsi sebalahle nelitsemba. Kungako kufanele sisebentise emagama lakahle siphindze sikhulume ngendlela letabakhombisa kutsi sinemusa futsi siyabakhatsalela. Bantfu labanyenti balalela umlayeto lesiwushumayelako hhayi ngenca yekutsi sisebentisa liBhayibheli kuphela kodvwa nangenca yekutsi sibakhatsalela mbamba futsi siyabahlonipha.

15. Singakhombisa njani kutsi siyabacabangela bantfu lesibashumayelako?

¹⁵ Tinyenti tintfo lesingatenta kuze sikhombise kutsi siyabacabangela bantfu lesibashumayelako. Nasi sibonelo, kubuta imibuto kungasita kakhulu nasifundzisa. Nasibabuta imibuto, kufanele sibabute ngemusa nangenhlonipho. Lelinye lihlahlandlela belishumayela endzaweni lapho khona bantfu labanyenti banemahloni, ngako belikubalekela kubuta imibuto lengabenta bative bahlazeka nangabe bangayati imphendvulo. Belingababuti imibuto lefaka ekhatsi lotsi: “Uyalati yini libito laNkulunkulu?” noma lotsi “Uyati yini kutsi uyini uMbuso waNkulunkulu?” Esikhundeni saloko belitsi: “EBhayibhelini ngifundze kutsi Nkulunkulu unelibito. Ngicela kukukhombisa kutsi ngubani libito lakhe.” Lendlela yekubuta imibuto ayisebenti yonkhe indzawo ngoba bantfu abafani futsi banemasiko lehlukene. Kodvwa ngaso sonkhe sikhatsi kufanele siphatse bantfu lesibashumayelako ngemusa nangenhlonipho. Kuze sente loko kufanele sibati kahle.

16, 17. Singakhombisa njani kutsi siyabacabangela labanye (a) nasikhetsa sikhatsi lesiya ngaso kubo? (b) nekutsi sihlala sikhatsi lesingakanani?

¹⁶ Kufanele siye nini kubantfu lesibashumayelako? Nasishumayela emtini ngemuti, bantfu basuke bangakasigadzi ngobe basuke bangakasimemi. Ngako kubaluleke kakhulu kutsi siye kubo ngesikhatsi lesibalungelako. (Mat. 7:12) Nasi sibonelo, bantfu labasensimini yetfu bayephuta yini kuvuka ngetimphelasontfo? Mhlawumbe ungacala ngekuya kumagazini noma uye kuyoshumayela etindzaweni tawonkhe wonkhe noma ubuyele kubantfu lowake wacoca nabo lowatiko kutsi utabatfola.

¹⁷ Kufanele sicoce nabo sikhatsi lesinganani? Bantfu labanyenti bamatasatasa, ngako kungaba kuhle kutsi ubavakashele sikhatsi lesincane, ikakhulukati nawusacala kucoca nabo. Kuncono kucoca nabo sikhatsi lesincane kunekucoca nabo sikhatsi lesidze. (1 Khor. 9:20-23) Nangabe bantfu babona kutsi siyanaka kutsi bamatasatasa, bangahle bafune kutsi sibuye sitococa nabo. Kuyacaca kutsi nasishumayela kufanele sikhombise kutsi sinetitselo temoya waNkulunkulu. Nasenta njalo sitawuba “tisebenti letikanye naNkulunkulu” futsi Jehova angasisebentisa kute sisite bantfu bati liciniso.​—1 Khor. 3:6, 7, 9.

18. Nangabe sibacabangela labanye, ngutiphi tibusiso lesingatitfola?

¹⁸ Ngako shengatsi singenta konkhe lesingakwenta kuze sicabangele labanye, kungaba semndenini, ebandleni kanye nalapho senta umsebenti wekushumayela. Nasenta njalo, sitawutfola tibusiso letinyenti nyalo kanye nasesikhatsini lesitako. Tihlabelelo 41:1, 2 titsi: “Ubusisiwe umuntfu lonakekela lobutsakatsaka, Simakadze uyawumsindzisa ngelilanga lekuhlupheka. . . . Uyawumenta [ajabule, NW] emhlabeni.”