1-2. Yini leyenta Jehova wasidala saba nelikhono lekutfola injabulo ekupheni kunasekwemukeleni?

 NGESIKHATSI Jehova adala bantfu, wabenta bakhona kutfola injabulo lenyenti ekupheni kunasekwemukeleni. (Imis. 20:35) Loku kusho kutsi asijabuli yini nasiphiwa? Cha. Sonkhe siyati kutsi siyajabula nasiphiwa sipho. Nobe kunjalo, sijabula kakhulu nangabe kungitsi lesiphako. Ecinisweni, kuyasisita kutsi Jehova wasidala ngalendlela. Sisho ngani?

² Ngenca yekutsi Jehova wasidala ngalendlela, singakhona kutenta sijabule kakhulu. Loku singakwenta ngekutsi sifune ematfuba lamanyenti ekupha. Akusijabulisi yini kutsi Jehova wasidala ngalendlela?​—Hla. 139:14.

3. Yini leyenta Jehova achazwe ngekutsi ‘unguNkulunkulu lojabulako’?

³ ImiBhalo iyasicinisekisa kutsi kupha kusenta sijabule, ngako asimangali liBhayibheli nalichaza Jehova ngekutsi ‘nguNkulunkulu lojabulako.’ (1 Thim. 1:11) Nguye lowacala kupha futsi unguMuphi lomkhulu. Ngenca yakhe, “siyaphila, siyanyakata, futsi sikhona,” njengobe umphostoli Pawula asho. (Imis. 17:28) “Tonkhe tipho letinhle naletiphelele tivela” kuJehova.​—Jak. 1:17.

4. Yini letasisita kutsi sijabule kakhulu?

⁴ Kungenteka sonkhe siyafuna kuyitfola lenjabulo lenyenti letfolakala ngekupha. Singayitfola ngekutsi sephane njengaJehova.  (Ef. 5:1) Njengobe sitawube sicoca ngaloku, asinake loko lesingakwenta nangabe sibona ngatsi labanye ababongi ngaloko lesibapha kona. Loku kutasisita kutsi sichubeke sijabula ngekupha futsi sikhulise indlela lesijabula ngayo nasipha.

PHANI LABANYE NJENGAJEHOVA

5. Ngutiphi tintfo lesitidzingako Jehova lasipha tona?

⁵ Ngutiphi letinye tindlela Jehova lakhombise ngato kutsi uyephana? Cabanga nganati tibonelo letimbalwa. Jehova usinika loko lesikudzingako. Kungenteka site tintfo letenta kuphila kube ntofontofo kodvwa Jehova uyaciniseka kutsi linyenti letfu linako loko lelikudzingako. Sibonelo nje, usipha kudla, kwekwembatsa nendzawo yekuhlala. (Hla. 4:8; Mat. 6:31-33; 1 Thim. 6:6-8) Jehova usipha letintfo ngobe kufanele yini? Cha! Yini leyenta asentele loku?

6. Yini lesiyifundza kuMatewu 6:25, 26?

⁶ Kamelula nje, Jehova usipha loko lesikudzingako ngenca yekutsi uyasitsandza. Cabanga ngemavi aJesu latfolakala kuMatewu 6:25, 26. (Fundza.) Jesu wasebentisa tibonelo letisendalweni. Nakakhuluma ngetinyoni, watsi: “Atilimi, ativuni futsi tite netinyango.” Kodvwa naka loko labese uyakusho, watsi: “Babe wenu losezulwini uyatondla.” Wabese uyabuta watsi: “Nine anikabaluleki yini kwendlula tona?” Liyini liphuzu? KuJehova, labo labamkhontako babaluleke kakhulu kwendlula tilwane. Nangabe atinakekela tilwane, singaciniseka kutsi utasinakekela natsi! Njengababe longumuntfu lonakekela umndeni wakhe, Jehova unakekela umndeni wakhe ngenca yekutsi uyawutsandza.​—Hla. 145:16; Mat. 6:32.

7. Nguyiphi lenye indlela lesingapha ngayo njengaJehova? (Buka nesitfombe.)

⁷ NjengaJehova, natsi singabapha labanye loko labakudzingile ngenca yekutsi siyabatsandza. Sibonelo nje, kungenteka ukhona umzalwane nobe dzadze lesimatiko lodzinga kudla nobe kwekwembatsa. Jehova angakusebentisa kuze umsite. Bantfu baJehova batiwa kakhulu ngekusitana nakuvele sehlakalo. Sibonelo nje, ngesikhatsi se-COVID-19, bazalwane nabodzadze bebapha labanye kudla, timphahla naletinye tintfo labatidzingako. Labanyenti baphindze banikela emsebentini wemhlaba wonkhe. Leminikelo yasetjentiswa kuze kusitwe bazalwane nabodzadze emhlabeni wonkhe. Labazalwane nabodzadze benta  loko lokushiwo ngumbhalo waKumaHebheru 13:16 lotsi: “Ningakukhohlwa kwenta lokuhle nekupha labanye loko leninako, ngobe Nkulunkulu uyajabula ngeminikelo lenjalo.”

8. Asisita njani emandla aJehova? (KubaseFiliphi 2:13)

⁸ Jehova usiniketa emandla. Jehova uyakujabulela kuniketa tikhonti takhe letetsembekile emandla akhe lamakhulu. (Fundza KubaseFiliphi 2:13.) Ukile yini wathantazela emandla ekumelana nesilingo nobe inkinga lematima? Kungenteka futsi ukile wathantaza wacela emandla ekwenta tintfo lokufanele utente ngalelo langa. Ngesikhatsi lomthantazo wakho uphendvulwa, kungenteka wavumelana naloko lokwashiwo ngumphostoli Pawula nakatsi: “Nginemandla ekwenta tonkhe tintfo ngenca yaloyo longipha emandla.”​—Fil. 4:13.

9. Singamlingisa njani Jehova endleleni lesisebentisa ngayo emandla etfu? (Buka nesitfombe.)

⁹ Nanobe sinesono, singamlingisa Jehova endleleni lesisebentisa ngayo emandla. Ngeke sikhone kupha labanye emandla. Kodvwa singasebentisa emandla etfu kuze sibasite. Sibonelo nje, singasita emaKhristu lakhulile nobe lagulako ngekutsi siwayele etitolo nobe siwasite ngemisebenti yasekhaya. Nangabe timo tetfu tivuma, singavolontiya kuze sihlante liHholwa leMbuso nalapho linakekelwa. Nasisebentisa emandla etfu ngaletindlela, sitawube sisita labanye labakhonta Jehova.

10. Singawasebentisa njani emavi kuze sisite labanye?

¹⁰ Ungakhohlwa kutsi emavi anemandla. Ukhona yini lomcabangako longasitwa ngemavi lakhutsatako? Ukhona yini lomatiko lodzinga indvudvuto? Kunobe ngukuphi, kwente loko. Ungamvakashela, umshayele lucingo, umtfumelele likhadi, i-email, nobe umbhalele umlayeto. Ungakhatsateki ngaloko lotakusho. Kungenteka lomzalwane nobe lodzadze udzinga emavi lasuka enhlitiyweni kuze ahlale etsembekile ngalelo langa nobe ngesimo lakuso.​—Taga 12:25; Ef. 4:29.

11. Jehova ukusebentisa njani kuhlakanipha kwakhe?

¹¹ Jehova usinika kuhlakanipha. Umfundzi Jakobe wabhala watsi: “Nangabe lomunye wenu eswele kuhlakanipha, akachubeke akucela kuNkulunkulu . . . ngobe bonkhe ubapha ngesandla lesivulekile futsi ngeke abasole.” (Jak. 1:5; umbhalo longentasi) Njengobe lamavi akhombisa, Jehova akasigodleli kuhlakanipha kwakhe. Usipha kona ngesandla lesivulekile. Naka nekutsi Jehova nakasinika kuhlakanipha, loko akakwenti ‘atfukutsele’ nobe ‘asisola.’ Akasenti sitive sinelicala ngenca yekutsi sidzinga sicondziso sakhe. Ecinisweni uyasikhutsata kutsi sisifune.​—Taga 2:1-6.

12. Ngumaphi ematfuba lesinawo ekuhlephulela labanye lwati lesinalo?

 ¹² Kutsiwani ngatsi? Singamlingisa yini Jehova ngekuhlephulela labanye lwati lesinalo? (Hla. 32:8) Bantfu baJehova banematfuba lamanyenti ekufundzisa labanye loko lasebakwati. Sibonelo nje, sivame kucecesha labo labasandza kucala kwenta umsebenti wekushumayela. Ngesineke, labadzala belibandla bafundzisa tinceku letisebentako nebazalwane lababhajatisiwe kutsi bangayenta njani imisebenti labanikwa yona ebandleni. Nalabo lasebanesikhatsi bakha takhiwo tenhlangano futsi batinakekela bacecesha labo labasandza kucala kwenta lomsebenti.

13. Singayilingisa njani indlela Jehova lephana ngayo kuhlakanipha?

¹³ Yetama kulingisa Jehova nawucecesha labanye. Khumbula kutsi Jehova wephana kuhlakanipha ngesandla lesivulekile. Ngendlela lefanako, natsi sibapha ngesandla lesivulekile labo lesibafundzisako lwati lesinalo. Asifuni kubagodlela lona ngenca yekutsi siyesaba kutsi batawubese benta umsebenti lesiwentako. Asifuni nekuba nembono walabanye bantfu labatsi: ‘Nami kute lowangifundzisa! Naye akatifundzele.’ Kute umuntfu waJehova lokufanele acabange ngaleyondlela. Kunaloko, asigcini ngekubapha ngesandla lesivulekile labo lesibaceceshako lwati lesinalo, “kepha [sibanika] nekuphila kwetfu.” (1 Thes. 2:8) Siyetsemba kutsi nasenta njalo, ‘nabo batakufanela kahle kufundzisa labanye.’ (2 Thim. 2:1, 2) Nangabe sonkhe singaba nesandla lesivulekile sekupha labanye lwati lesinalo, sonkhe sitawuhlakanipha kakhulu futsi sijabule kakhulu.

NAKUBONAKALA NGATSI LABANYE ABABONGI

14. Bantfu labanyenti benta njani nasibentele lokutsite?

¹⁴ Nasipha labanye, ikakhulukati bazalwane betfu nabodzadze, bavame kubonga. Kungenteka basitfumelele umlayeto wekubonga nobe basibonge ngalenye indlela. (Khol. 3:15) Nabasibonga, sijabula kakhulu.

15. Yini lokufanele siyikhumbule nangabe labanye bangabongi?

¹⁵ Liciniso kepha likutsi labanye bangahle bangabongi. Ngalesinye sikhatsi singapha ngesikhatsi setfu, emandla nobe tintfo lesinato kodvwa sisale sitibuta kutsi lona lesimsitile unendzaba yini naloko lesimentele kona. Nangabe loko kwenteka, yini lesingayenta kuze sihlale sijabulile futsi singatfukutseli? Khumbula emavi embhalo lokusekelwe kuso lesihloko, lasencwadzini yeMisebenti 20:35. Injabulo lesiyitfola ngekupha ayiyi ngekutsi lomuntfu wenta njani. Singakhetsa kuhlala sijabulile ngisho nobe labanye bangabongi. Kanjani? Cabanga nganati tindlela letimbalwa.

16. Yini lokufanele siyinake kakhulu nasipha?

¹⁶ Naka kakhulu kulingisa Jehova. Ubapha tintfo letinhle bantfu ngisho babonga nobe bangabongi. (Mat. 5:43-48) Jehova wetsembisa kutsi nangabe natsi sipha labanye “ngaphandle kwekulindzela kubuyelwa lutfo, umvuzo [wetfu] utawuba mkhulu.” (Luk. 6:35) Ligama lelitsi “lutfo” lingafaka ekhatsi nemavi ekubonga. Ngisho nobe labanye babonga nobe bangabongi, Jehova utawuhlale asiniketa umvuzo ngalokuhle lesikwentile kuze sisite labanye, ngenca yekutsi ‘sipha sijabulile.’​—Taga 19:17; 2 Khor. 9:7.

17. Ngusiphi sizatfu lesibalulekile lesenta sisite labanye? (Lukha 14:12-14)

¹⁷ Lokunye lesingakwenta kuze silingise Jehova nasipha kutsi sisebentise simiso lesibalulekile lesashiwo nguJesu kuLukha 14:12-14. (Fundza.) Akusikubi kupha nobe kusita lotsite longakhona kusisita natsi. Kodvwa yini lesingayenta nasibona kutsi sivame kusita  lotsite ngenca yekutsi silindzele kutsi kukhona lesitakutfola kuye? Nangabe kunjalo, yetama kwenta loko lokwashiwo nguJesu. Singasita lotsite lesatiko kutsi kute langasibonga ngako. Nasenta njalo, sitawujabula ngobe sitawube silingisa Jehova. Loko kungaphindze kusisite sichubeke sijabula ngisho nobe labanye bangabongi.

18. Yini lengasisita kuze sichubeke sibacabangela lokuhle labanye?

¹⁸ Ungabacabangeli lokubi labanye. (1 Khor. 13:7) Nangabe labanye bangabongi, singatibuta: ‘Bakhohliwe yini kubonga nobe vele nje ababongi?’ Mhlawumbe kunaletinye tizatfu letibente bangabongi. Kungenteka labanye babonga kakhulu ngekhatsi enhlitiyweni, kepha abakhoni kukusho. Kungenteka banemahloni ekutsi basitiwe, ikakhulukati nangabe esikhatsini lesendlulile bekungibo lebebasita labanye. Kunobe ngukuphi, lutsandvo lwebuKhristu lutawusenta sibacabangele lokuhle bazalwane betfu nabodzadze, futsi sichubeke sitfola injabulo ngekupha.​—Ef. 4:2.

19-20. Kubaluleke ngani kubeketela nasipha labanye? (Buka nesitfombe.)

¹⁹ Beketela. INkhosi Solomoni lebeyihlakaniphile nayikhuluma ngekupha labanye yabhala yatsi: “Jika sinkhwa sakho emantini, ngobe ngemuva kwemalanga lamanyenti utawuphindze usitfole.” (Shu. 11:1) Njengobe lamavi akhombisa, labanye bangahle babonge “ngemuva kwemalanga lamanyenti.” Cabanga nganasi sibonelo lesikhombisa kutsi loku kuliciniso.

²⁰ Eminyakeni leminyenti leyendlulile, lomunye umfati wembonisi wesigodzi wabhalela lomunye dzadze lebekasandza kubhajatiswa incwadzi lekhutsatako amcela kutsi ahlale etsembekile. Ngemuva kweminyaka lengaba ngu-8, lodzadze wayiphendvula lencwadzi, watsi: “Ngiva shengatsi angikubhalele, ngikutjele kutsi ube lusito lolukhulu kimi kuyo yonkhe leminyaka nanobe wena bewungati.” Wachubeka watsi: “[Incwadzi yakho] beyinemavi lamnandzi, kodvwa ngulombhalo lowayitsintsa kakhulu inhlitiyo yami, futsi  ngihlale ngiwukhumbula.” a Ngemuva kwekuchaza letinye tinkinga labhekana nato, lodzadze watsi: “Ngalesinye sikhatsi bekutsi angishiye, ngishiye liciniso, ngishiye imisebenti lokufanele ngiyente, ngishiye nje konkhe. Kodvwa lombhalo lowangibhalela wona wanginika emandla ekuhlala ngetsembekile, futsi . . . ngingaphelelwa ngemandla.” Wengeta watsi: “Kute ngisho kunye kuleminyaka lengu-8 lokungitsintse kakhulu kwendlula loku.” Cabanga nje kutsi lomfati wembonisi wesigodzi wajabula kangakanani ngekutfola lencwadzi “ngemuva kwemalanga lamanyenti”! Natsi kungenteka sitfole emavi ekubonga ngemuva kwesikhatsi lesidze sisite loyo muntfu.

21. Yini lekwenta utimisele kuchubeka ulingisa Jehova ngekwephana?

²¹ Njengobe sesicocile, Jehova wasidala ngendlela lekhetsekile. Nanobe sikujabulela kuphiwa, sijabula kakhulu nasipha labanye. Siyajabula nasisita bazalwane betfu nabodzadze. Siyajabula nalapho babonga. Nobe kunjalo, ngisho nobe babonga nobe bangabongi, singajabula ngekutsi sente intfo lekahle. Ungakhohlwa kutsi nobe yini loyipha labanye, “Jehova angakhona kukunika lokungetulu.” (2 Khr. 25:9) Ngeke sikhone kwendlula Jehova ngekupha! Ngetulu kwaloko, kute injabulo leyengca kubongwa nguJehova. Ngako shengatsi singachubeka sitimisela kulingisa Babe wetfu lowephanako.