SIHLOKO LESIFUNDVWAKO 43
INGOMA 90 Khutsatanani
Ungakuncoba Njani Kungabata?
“Cinisekani ngato tonkhe tintfo.”—1 THES. 5:21.
LOKUTAWUCOCWA NGAKO
Singakuncoba njani kungabata lokungatsintsa indlela lesikhonta ngayo Jehova?
1-2. (a) Ngutiphi letinye tintfo letingakhatsata bantfu baJehova? (b) Sitawucoca ngani kulesihloko?
SONKHE sihle singabata, a ngisho nobe singanani ngeminyaka. Cabanga ngalosemusha lotibuta kutsi Jehova unendzaba yini naye. Mhlawumbe akaciniseki kutsi abhajatiswe yini. Cabanga nangemzalwane lowakhetsa kwenta umsebenti waJehova ngesikhatsi asemusha kunekutsi atakhele imali lenyenti. Nyalo sewukhulile, futsi sewunemali yekutsi nje anakekele umndeni wakhe kuphela. Kungenteka uyatibuta kutsi wenta sincumo lesikahle yini ngesikhatsi asemusha. Cabanga nangadzadze losakhulile losekanemandla lamancane. Mhlawumbe kuyamdvumata kutsi akasakhoni kwenta loko bekakhona kukwenta. Ukile yini watibuta umbuto lonjengalotsi: ‘Jehova uyanginaka yini? Ngenta kahle yini ngekukhetsa kudzela lokutsite kuze ngentele Jehova lokunyenti? Jehova usengangisebentisa yini?’
2 Nangabe singatifuni timphendvulo talemibuto, loko kungayitsintsa kakhulu indlela lesikhonta ngayo Nkulunkulu. Kulesihloko, sitawucoca ngekutsi kunaka timiso teliBhayibheli kungasisita njani nangabe singabata kutsi (1) Jehova unendzaba natsi, (2) senta tincumo letikahle yini esikhatsini lesendlulile, nobe (3) Jehova usengasisebentisa yini.
UNGAKUNCOBA NJANI KUNGABATA?
3. Yini lesingayenta kuze sincobe kungabata?
3 Lokunye lesingakwenta kuze sincobe kungabata kutsi sifune timphendvulo temibuto yetfu eBhayibhelini. Nasenta njalo, kukholwa kwetfu kanye nebungani betfu naJehova butawucina futsi sitawukhona kuma ‘sicine ekukholweni.’—1 Khor. 16:13.
4. Yini lesingayenta kuze ‘siciniseke ngato tonkhe tintfo’? (1 KubaseThesalonika 5:21)
4 Fundza 1 KubaseThesalonika 5:21. Naka kutsi liBhayibheli lisikhutsata kutsi ‘siciniseke ngato tonkhe tintfo.’ Singakwenta njani loko? Nangabe singaciniseki ngentfo letsite, kufanele sibuke loko liBhayibheli lelikushoko ngayo. Sibonelo nje, cabanga ngalona losemusha lotibuta kutsi uligugu yini kuNkulunkulu. Kufanele akutsatse ngekutsi kuliciniso yini loko lakucabangako? Cha, kufanele ‘aciniseke ngato tonkhe tintfo’ ngekutsi adadishe liBhayibheli kuze abone kutsi yini Jehova layicabangako ngaye.
5. Yini lesingayenta kuze “sive” livi laJehova liphendvula imibuto lesinayo?
5 Njengobe sifundza liVi laNkulunkulu, kuba shengatsi “siva” livi laJehova likhuluma natsi. Kodvwa kunalokufanele sikwente kuze sitfole loko Jehova lakucabangako ngembuto lotsite. Kufanele sifundze futsi sidadishe imiBhalo letasisita siphendvule lombuto lesinawo. Singacwaninga ngalendzaba sisebentisa emathulusi lesiwalungiselelwe yinhlangano yaJehova. (Taga 2:3-6) Singaphindze sithantaze sicele Jehova asicondzise njengobe sisacwaninga futsi asisite sitfole loko lakucabangako ngalombuto. Ngemuva kwaloko singabese sifuna timiso letiseBhayibhelini kanye nemininingwane letsite lesingayisebentisa kulesimo lesikuso. Kungasisita nekufundza tindzaba letiseBhayibhelini tebantfu lababhekana nesimo lesifana nesetfu.
6. Imihlangano isisita njani kuze sincobe kungabata?
6 Siphindze “sive” Jehova akhuluma natsi emihlanganweni yelibandla. Nangabe sihlale siya emihlanganweni, singeva lokutsite enkhulumeni nobe sive lotsite aphendvula futsi asho loko besikudzinga kuze sincobe kungabata. (Taga 27:17) Nyalo ase sicoce ngekutsi yini lesingayenta kuze sincobe lokunye kungabata.
NAWUNGABATA KUTSI JEHOVA UNENDZABA NAWE
7. Ngumuphi umbuto labanye labangatibuta wona?
7 Ukile yini watibuta umbuto lotsi: ‘Jehova uyanginaka yini vele?’ Nangabe ubona ngatsi awukabaluleki, ungahle ucabange kutsi ngeke kwenteke kutsi ungaba ngumngani weMdali wendalo yonkhe. Kungenteka iNkhosi Davide yake yacabanga ngalendlela. Beyicabanga kutsi kuyamangalisa kutsi Jehova unaka ngisho nebantfu, yaze yatsi: “Awu Jehova, uyini nje umuntfu kutsi ungamnaka, iyini nje indvodzana yemuntfu kutsi ungaba nendzaba nayo?” (Hla. 144:3) Singayitfola kuphi imphendvulo yalombuto?
8. Ngekusho kwa-1 Samuweli 16:6, 7, 10-12, yini Jehova layinakako kubantfu?
8 EBhayibhelini, sifundza kutsi Jehova unaka labo lababonakala bangakabaluleki kulabanye. Nasi sibonelo, Jehova watfumela Samuweli endlini yaJese kutsi ayogcoba yinye yemadvodzana akhe kutsi ibe yinkhosi yaka-Israyeli. Jese wabita emadvodzana akhe langu-7 kutsi ete kuSamuweli, kodvwa akazange ambite Davide, indvodzana yakhe lencane. b Kodvwa Jehova bekakhetse Davide. (Fundza 1 Samuweli 16:6, 7, 10-12.) Jehova wabona kutsi Davide bekangumuntfu lonjani ngekhatsi, bekalijaha lelimtsandza kakhulu.
9. Yini lengakwenta uciniseke kutsi Jehova unendzaba nawe? (Buka nesitfombe.)
9 Cabanga ngendlela Jehova lakhombise ngayo kutsi uyakunaka. Ukunika seluleko lesilungele wena kuye ngesimo sakho. (Hla. 32:8) Bekangakhona yini kukwenta loko nangabe angakwati kahle? (Hla. 139:1) Nangabe usisebentisa seluleko saJehova futsi uyibone indlela lesikusita ngayo, utawuciniseka kutsi unendzaba nawe. (1 Khr. 28:9; Imis. 17:26, 27) Uyakunaka loko lokwentako. Uyabubona buntfu bakho lobuhle futsi uyafuna kuba ngumngani wakho. (Jer. 17:10) Angajabula kakhulu nangabe nawe ufuna kuba ngumngani wakhe.—1 Joh. 4:19.
“Nangabe umfuna [Jehova], yena utatenta atfolakale kuwe.”—1 Khr. 28:9 (Buka sigaba 9) c
NAWUNGABATA KUTSI WENTA TINCUMO LETIKAHLE ESIKHATSINI LESENDLULILE
10. Ngumiphi imibuto lesingatibuta yona nasicabanga ngetincumo lesatenta?
10 Ngekuhamba kwesikhatsi ekuphileni, labanye bangahle babuke emuva futsi batibute kutsi benta tincumo letikahle yini. Mhlawumbe bakhetsa kuyekela umsebenti lokahle nobe kungayicalisi ibhizinisi kuze batawukhona kwentela Jehova lokunyenti. Mhlawumbe lesincumo basenta eminyakeni leminyenti leyendlulile. Kodvwa kungenteka nyalo babona bantfu lababatiko labenta sincumo lesehlukile kulesabo futsi babonakala baphila kahle. Ngenca yaloko, kungenteka bayatibuta: ‘Ngenta kahle yini ngekukhetsa kudzela letintfo kuze ngentele Jehova lokunyenti? Loku lengakukhetsa kwente kutsi ngilahlekelwe ngematfuba lamahle yini?’
11. Yini lebeyikhatsata umbhali weTihlabelelo 73?
11 Nangabe nawe unemibuto lenjengalena, cabanga ngendlela bekativa ngayo umbhali weTihlabelelo 73. Wabona labanye lebekubonakala ngatsi baphile saka, bayaphumelela futsi abakhatsatwa ngulutfo ekuphileni. (Hla. 73:3-5, 12) Njengobe ababuka futsi anaka nekutsi kubonakala ngatsi bayaphumelela, wabona ngatsi akusiti ngalutfo kukhonta Jehova. Lemicabango ‘beyihlale imkhatsata.’ (Hla. 73:13, 14) Wayincoba njani lemicabango lebeyimhlupha?
12. Ngekusho kweTihlabelelo 73:16-18, yini leyasita lombhali kutsi ancobe imicabango lebeyimdvumata?
12 Fundza Tihlabelelo 73:16-18. Lomhlabeleli waya endzaweni lengcwele yaJehova lenekuthula. Nakalapho, wafike wacabangisisa kahle. Wabona kutsi ngisho nobe kungabonakala ngatsi labanye kubahambela kahle, kodvwa bete litsemba ngelikusasa. Loko kwamsita waba nekuthula kwengcondvo futsi wabona kutsi kwenta Jehova ete kucala ekuphileni kwakhe bekusincumo lesincono kakhulu. Ngenca yaloko, waphindze watimisela kuchubeka akhonta Jehova.—Hla. 73:23-28.
13. Ungakutfola njani kuthula kwengcondvo nangabe ungabata kutsi wenta tincumo letikahle esikhatsini lesendlulile? (Buka nesitfombe.)
13 Nawe ungakutfola kuthula kwengcondvo ngekusitwa liVi laNkulunkulu. Kanjani? Cabanga ngekutsi kuligugu kangakanani loko lonako, lokufaka ekhatsi umcebo losezulwini, futsi loko ukucatsanise nemphumela lotfolwa ngulabo labanetintfo labatinikwa ngulelive kuphela. Kungenteka betsembele ngalokuphelele etintfweni labatifezile ekuphileni ngenca yekutsi kute lokunye labanelitsemba lekukutfola esikhatsini lesitako. Kodvwa wena Jehova wetsembise kukubusisa kwendlula loko longakucabanga. (Hla. 145:16) Ngetulu kwaloko, cabanga nganaku: Besingati yini vele kutsi kutawuba njani kuphila kwetfu kube senta tincumo letehlukile? Naku lesiciniseka ngako: Kute lokuhle lokubalahlekelako labo labenta tincumo letisekelwe ekutsandzeni Nkulunkulu nabomakhelwane babo.
Cabanga ngetibusiso Jehova lakwetsembise tona (Buka sigaba 13) d
NAWUNGABATA KUTSI JEHOVA ANGAKUSEBENTISA
14. Yini lengenta labanye bangabate, futsi ngumuphi umbuto lokungenteka uyabahlupha?
14 Labanye bantfu baJehova abasakhoni kumentela lokunyenti ngenca yekutsi sebakhulile, bayagula nobe bakhubatekile. Loko kungabenta bangabate kutsi Jehova usengabasebentisa. Kungenteka bayatibuta: ‘Jehova usengangisebentisa yini?’
15. Yini lebekaciniseka ngayo umbhali weTihlabelelo 71?
15 Umbhali weTihlabelelo 71 naye bekativa ngendlela lefanako. Wathantaza watsi: “Ungangishiyi nasengiphelelwa ngemandla.” (Hla. 71:9, 18) Nobe kunjalo, lomhlabeleli wachubeka aciniseka kutsi nangabe akhonta Nkulunkulu ngekwetsembeka, bekatamcondzisa futsi amsekele. Lomhlabeleli wafundza kutsi Jehova uyajabula ngalabo labenta konkhe lokusemandleni abo kuze bamkhonte ngisho nobe kunetintfo letibavimbela kutsi bente loko labafise kukwenta.—Hla. 37:23-25.
16. Ngutiphi tindlela Jehova langabasebentisa ngato lasebakhulile? (Tihlabelelo 92:12-15)
16 Nine lesenikhulile, bukani simo senu ngendlela Jehova lasibuka ngayo. Anganisita kutsi nichubeke nimkhonta ngekwetsembeka ngisho nobe nibutsakatsaka emtimbeni. (Fundza Tihlabelelo 92:12-15.) Kunekutsi unake loko longasakhoni kukwenta, naka kakhulu loko lokhonako kukwenta. Sibonelo nje, ungasita labanye ngesibonelo sakho lesihle sekuchubeka wetsembekile nangekubanaka. Ungabacocela nangendlela Jehova lakusekele ngayo kuyo yonkhe leminyaka, ubacocele nangetetsembiso letiseBhayibhelini lotibuke ngalabovu kutsi tigcwaliseke. Ngetulu kwaloko, ungakhohlwa kutsi loko lokushoko emithantazweni yakho nawuthantazela labanye kunemandla kakhulu. (1 Phet. 3:12) Ngisho nobe sikutiphi timo, sonkhe kukhona lesingamentela kona Jehova kanye nalabanye.
17. Kubaluleke ngani kutsi singaticatsanisi nalabanye?
17 Nangabe kukukhatsata kutsi awukhoni kwenta lokunyenti emsebentini waJehova, ciniseka kutsi kuye kuligugu konkhe lokhona kukwenta. Ungahle uticatsanise naloko lokwentiwa ngulabanye. Ungakwenti loko! Ngasiphi sizatfu? Ngobe Jehova akacatsanisi muntfu. (Gal. 6:4) Nasi sibonelo, Mariya wanika Jesu sipho lesidulile semafutsa lanuka kahle. (Joh. 12:3-5) Kodvwa umfelokati loweswele wanikela ngetinhlavu letimbili temali yelinani lelincane kakhulu. (Luk. 21:1-4) Nobe kunjalo, kuJesu totimbili letipho betiveta kukholwa. Babe wakhe, lokunguJehova, ukutsatsa njengalokuligugu nobe yini lokhona kumentela yona ngenca yekutsi utinikele kuye futsi uyamtsandza ngisho nobe kungabonakala kukuncane kanganani kuwe.
18. Yini lengasisita kutsi sincobe kungabata? (Buka nelibhokisi lelitsi “ LiVi LaJehova Lingakusita Kutsi Uncobe Kungabata.”)
18 Sonkhe sihle singabata. Kodvwa njengobe sesibonile, liVi laNkulunkulu leliliciniso, lokuliBhayibheli, lingasisita kutsi sikuncobe. Ngako yenta konkhe lokusemandleni kuze ucedze kungabata lonako futsi esikhundleni sako uciniseke. Jehova uyakunaka. Uyajabula ngaloko lokudzelile futsi utimisele kukunika umvuzo. Ciniseka kutsi Jehova ubatsandza bonkhe bantfu bakhe labetsembekile futsi uyabanaka.
INGOMA 111 Tizatfu Tetfu Tekujabula
a INCHAZELO YELIGAMA: Kulesihloko, sikhuluma ngekungabata lokusenta singaciniseki kutsi siligugu yini kuJehova nobe kutsi senta tincumo letihlakaniphile yini esikhatsini lesendlulile. Loku akusiko kungabata lokukhulunywa ngako eBhayibhelini lokuveta bufakazi bekutsi umuntfu ute kukholwa kuJehova futsi akatetsembi tetsembiso takhe.
b Nanobe liBhayibheli lingasitjeli ngalokucondzile kutsi Davide bekaneminyaka lemingakhi ngesikhatsi Jehova amkhetsa, kepha kungenteka bekaseminyakeni yekutfomba.—Buka Sicongosekulindza saSeptember 1, 2011, likh. 25, sig. 2.
