1. Sati njani kutsi Jehova ufuna sisondzelane naye?

 JEHOVA usicela kutsi sisondzelane naye. (Jak. 4:8) Ufuna kuba nguNkulunkulu wetfu, Babe wetfu neMngani wetfu. Uyayiphendvula imithantazo yetfu futsi uyasisita nasibhekene netikhatsi letimatima. Usebentisa nenhlangano yakhe kuze asifundzise futsi asivikele. Kodvwa yini lokufanele siyente kuze sisondzelane naJehova?

2. Singasondzelana njani naJehova?

² Singasondzelana naJehova ngekuthantaza kuye, ngekufundza liVi lakhe nangekucabangisisa ngaloko lesikufundzako kulo. Nasenta njalo, sitamtsandza kakhulu. Sitatimisela kumlalela futsi simnike ludvumo lolumfanele. (Semb. 4:11) Nasichubeka simati Jehova, sitametsemba kakhulu yena nenhlangano yakhe layisebentisako kuze isisite.

3. Develi wetama njani kusehlukanisa naJehova, kodvwa yini letasisita kutsi singamshiyi Nkulunkulu wetfu nenhlangano yakhe? (Tihlabelelo 31:13, 14)

³ Nobe kunjalo, Develi wetama kusehlukanisa naJehova, ikakhulukati nasibhekene netinkinga. Ukwenta njani loko? Wetama kutsi kancane kancane singasametsembi Jehova nenhlangano yakhe. Kodvwa singakhona kumelana naloko. Nangabe kukholwa kwetfu kucinile, futsi simetsemba mbamba Jehova, angeke simshiye Nkulunkulu wetfu nenhlangano yakhe.​—Fundza Tihlabelelo 31:13, 14.

4. Yini lesitawucoca ngayo kulesihloko?

⁴ Kulesihloko, sitawucoca ngetinkinga letintsatfu, futsi ngayinye yato ingasenta singasametsembi Jehova nenhlangano  yakhe. Letinkinga tingasehlukanisa njani naJehova? Yini lesingayenta kuze simelane nemetamo yaSathane?

5. Tinkinga tingenta njani kutsi singasametsembi Jehova nenhlangano yakhe?

⁵ Ngaletinye tikhatsi siyabhekana netinkinga, njengekuphikiswa emndenini nobe kuphelelwa ngumsebenti. Tinkinga letinjena tingasenta njani singasayetsembi inhlangano yaJehova futsi tisehlukanise naye? Nangabe sekuphele sikhatsi lesidze sinetinkinga, singaphelelwa ngemandla futsi sicindzeteleke. Sathane uyalisebentisa lelitfuba futsi etame kusenta sicabange kutsi Jehova akasasitsandzi. Develi ufuna sicabange kutsi nguJehova nenhlangano yakhe labasibangele letinkinga. Kwenteka intfo lefanako kulamanye ema-Israyeli eGibhithe. Acale etsemba kutsi Jehova ukhetse Mosi na-Aroni kutsi bawakhulule ebugcilini. (Eks. 4:29-31) Kodvwa ngesikhatsi Faro enta kuphila kwawo kuba matima, asola Mosi na-Aroni ngebumatima lebekabhekene nabo, atsi: “Nente kutsi Faro netinceku takhe basenyanye kakhulu futsi nyalo batasibulala.” (Eks. 5:19-21) Ema-Israyeli asola tikhonti taNkulunkulu letetsembekile. Loko kwaba kubi! Nangabe sekuphele sikhatsi lesidze ubeketelela tinkinga, yini longayenta kuze uchubeke umetsemba kakhulu Jehova nenhlangano yakhe?

6. Yini lesiyifundza kumphrofethi Habakhuki mayelana nekubhekana netinkinga? (Habakhuki 3:17-19)

⁶ Tjela Jehova indlela lotiva ngayo futsi wetsembele kuye kutsi akusite. Umphrofethi Habakhuki wabhekana netinkinga letinyenti. Ngalesinye sikhatsi, kubonakala ngatsi bekangasetsembi kutsi Jehova unendzaba naye. Ngako watjela Jehova indlela bekativa ngayo. Watsi: “Awu Jehova, kuyawuze kube ngunini solo ngikhalela lusito kodvwa wena ungangiva? . . . Kungani ubabeketelela bantfu labacindzetela labanye?” (Hab. 1:2, 3) Jehova wawuphendvula umthantazo walenceku yakhe leyetsembekile. (Hab. 2:2, 3) Ngemuva kwekucabangisisa ngendlela Jehova bekabasindzise ngayo bantfu bakhe, Habakhuki waphindze wajabula. Waciniseka kutsi Jehova unendzaba naye nekutsi utamsita akhone kubhekana nanobe nguyiphi inkinga. (Fundza Habakhuki 3:17-19.) Yini lesiyifundzako? Nawubhekene netinkinga, thantaza kuJehova umtjele indlela lotiva ngayo, bese wetsembela kuye. Nawenta njalo, ungaciniseka kutsi Jehova utakuniketa emandla lowadzingako kuze ukhone kubeketela. Utametsemba kakhulu nawubona kutsi uyakusita.

7. Yini sihlobo saShirley lesetama kumenta kutsi ayicabange, futsi yini leyamenta kutsi achubeke ametsemba Jehova?

⁷ Chubeka neluhlelo lwakho lwekukhonta Nkulunkulu. Nguloko kanye lokwasita Shirley, dzadze wasePapua New Guinea, ngesikhatsi abhekene netinkinga. b Umndeni waShirley beweswele futsi ngaletinye tikhatsi bekuba matima kutsi batfole kudla lokwenele. Lesinye sihlobo sakhe setama kumenta kutsi angasametsembi Jehova. Satsi: “Uhlale utsi umoya longcwele waNkulunkulu uyakusita, ukusita njani nje nakunje? Umndeni wakho solo uphuyile. Udlala ngesikhatsi ngalokushumayela.” Shirley utsi: “Ngatibuta: ‘Nkulunkulu unendzaba yini natsi nobe cha?’ Ngekushesha ngathantaza kuJehova ngamtjela konkhe lobekusengcondvweni yami. Ngachubeka ngifundza liBhayibheli netincwadzi tetfu futsi angizange ngiyekele kushumayela nekuya emihlanganweni.” Ngekushesha wabona kutsi Jehova bekawunakekela umndeni  wakhe. Abazange balambe futsi bebajabulile. Shirley utsi: “Ngabona kutsi Jehova bekayiphendvula imithantazo yami.” (1 Thim. 6:6-8) Nangabe uchubeka neluhlelo lwakho lwekukhonta Nkulunkulu, nawe angeke uvumele tinkinga nobe kungabata kukwehlukanise naJehova.

8. Yini lengenteka kubazalwane labaholako enhlanganweni yaJehova?

⁸ Titsa tetfu tingasebentisa betindzaba netinhlelo tekuchumana kuze tisakate emanga ngebazalwane labaholako enhlanganweni yaJehova. (Hla. 31:13) Labanye bazalwane baboshiwe futsi kwatsiwa batigebengu. EmaKhristu ekucala abhekana nesimo lesifanako ngesikhatsi umphostoli Pawula abekwa licala lelingemanga futsi aboshwa. Enta njani?

9. Yini lamanye emaKhristu layenta ngesikhatsi umphostoli Pawula aboshwa?

⁹ Lamanye emaKhristu ekucala ayekela kusekela umphostoli Pawula ngesikhatsi aboshiwe eRoma. (2 Thim. 1:8, 15) Ngasiphi sizatfu? Kungenteka yini kutsi bekanemahloni ngaPawula ngenca yekutsi labanye bantfu bebamtsatsa njengesigebengu? (2 Thim. 2:8, 9) Kungenteka yini kutsi bebesaba kutsi nabo batawuphatfwa kabi? Kunobe ngusiphi sizatfu, cabanga nje kutsi Pawula bekativa njani. Bekabeketelele tinkinga letinyenti futsi bekabeke kuphila kwakhe engotini ngenca yabo. (Imis. 20:18-21; 2 Khor. 1:8) Shengatsi singete safana nalabo labashiya Pawula ngesikhatsi lebekabadzinga ngaso kakhulu! Yini lokufanele sihlale siyikhumbula nangabe bazalwane labaholako baphatfwa kabi?

10. Yini lokufanele siyikhumbule nangabe bazalwane labaholako baphatfwa kabi, futsi leni?

¹⁰ Khumbula sizatfu lesenta siphatfwe kabi nekutsi ngubani lokubangelako. Umbhalo wa-2 KuThimothi 3:12 utsi: “Bonkhe labafuna kuphila ngekutinikela kuNkulunkulu ebunyeni naKhristu Jesu, nabo batawuphatfwa kabi.” Ngako akukafaneli simangale nangabe Sathane ahlasela kakhulu bazalwane labaholako.  Ufuna kutsi labazalwane bayekele kuba cotfo kuNkulunkulu futsi ufuna kusesabisa.—1 Phet. 5:8.

11. Yini lesiyifundza esibonelweni sa-Onesiforusi? (2 KuThimothi 1:16-18)

¹¹ Chubeka usita bazalwane bakho, ungabalahli. (Fundza 2 KuThimothi 1:16-18.) Lomunye umKhristu lebekaphila ngesikhatsi semaKhristu ekucala lokutsiwa ngu-Onesiforusi wenta lokwehlukile ngesikhatsi Pawula aboshiwe. ‘Bekete emahloni ngekuboshwa’ kwaPawula. Kunaloko wafuna Pawula, futsi watsi nakamtfola wetama kumsita ngetintfo lebekatidzinga. Ngekwenta njalo, Onesiforusi wabeka kuphila kwakhe engotini. Yini lesiyifundzako? Kufanele singakuvumeli kwesaba bantfu kutsi kusesabise nobe kusivimbe kutsi sisite bazalwane betfu labaphatfwa kabi. Kunaloko, kufanele sibavikele futsi sente konkhe lesingakwenta kuze sibasite. (Taga 17:17) Bayaludzinga lutsandvo lwetfu nekutsi sibasekele.

12. Yini lesiyifundzako kubazalwane betfu nabodzadze baseRussia?

¹² Cabanga ngendlela bazalwane betfu nabodzadze baseRussia lababasite ngayo labanye bazalwane ngesikhatsi baboshiwe. Labanye bazalwane nabatekiswa licala, bazalwane nabodzadze labanyenti babakhona enkantolo kuze babasekele. Yini lesiyifundzako? Nangabe bazalwane labaholako banyundzelwa, baboshwa nobe baphatfwa kabi, ungesabi. Bathantazele, unakekele emalunga emindeni yabo futsi ufune letinye tindlela longabasita ngato.​—Imis. 12:5; 2 Khor. 1:10, 11.

13. Bantfu labahlekisa ngatsi bangasenta njani singasametsembi Jehova nenhlangano yakhe?

¹³ Tihlobo tetfu letingasibo boFakazi, lesisebenta nabo nobe lesifundza nabo bangahle bahlekise ngatsi ngenca yekutsi siyashumayela, nobe ngenca yekutsi siphila ngetimiso taJehova letiphakeme. (1 Phet. 4:4) Bangahle batsi: “Wena ngiyakutsandza, kodvwa inkholo yakho inemitsetfo lecinile futsi isidzala.” Labanye bangahle basisole ngendlela lesibaphatsa ngayo labo labayekelisiwe kuba boFakazi, batsi: “Ungasho njani nje kutsi uyabatsandza labanye?” Emavi lanjengalawa angasenta siyingabate imitsetfo yaJehova. Singahle sicabange: ‘Yini ngatsi Jehova ulindzele lokungetulu kwemandla ami? Yini ngatsi inhlangano yakhe inemincele leminyenti?’ Nawubhekene nalesimo, yini longayenta kuze uhlale usondzelene naJehova nenhlangano yakhe?

14. Yini lokufanele siyente nangabe labanye bahlekisa ngatsi ngenca yekutsi siphila ngetimiso taJehova? (Tihlabelelo 119:50-52)

¹⁴ Timisele kwenta lokulungile. Jobe bekatimisele kwenta lokulungile nanobe labanye bebamhleka ngekwenta kanjalo. Lomunye webangani bakhe mbumbulu wetama kumenta acabange kutsi Nkulunkulu akanendzaba nekutsi wenta lokulungile yini nobe cha. (Jobe 4:17, 18; 22:3) Kodvwa Jobe akazange awakholwe lamanga. Bekati kutsi timiso taJehova talokulungile nalokungakalungi tikahle, futsi bekatimisele kuphila ngato. Akazange avumele labanye kutsi bamente angasetsembeki. (Jobe 27:5, 6) Yini lesiyifundzako? Ungavumeli bantfu labahlekisa ngawe kutsi bakwente ungabate timiso taJehova. Cabanga ngaloko lokwentekile ekuphileni kwakho. Kungenteka ubone tikhatsi letinyenti kutsi kuphila ngetimiso taJehova kukahle, nekutsi kukusitile. Timisele kusekela lenhlangano lesikhutsata kutsi siphile ngaletimiso. Nawenta njalo, ngisho bantfu bahlekisa ngawe, angeke uyekele kukhonta Jehova.​—Fundza Tihlabelelo 119:50-52.

15. Yini leyabangela kutsi kuhlekiswe ngaBrizit?

 ¹⁵ Cabanga ngalokwenteka kulomunye dzadze waseNdiya lokutsiwa nguBrizit. Emalunga emndeni wakhe ahlekisa ngaye ngenca yekutsi unguFakazi. Ngemuva nje kwekubhajatiswa nga-1997, indvodza yakhe lengasuye Fakazi yaphelelwa ngumsebenti. Ngako yancuma kutsi yona naBrizit kanye nemadvodzakati abo bahambe bayohlala nebatali bayo lebebahlala kulelinye lidolobha. Kodvwa Brizit bekasetawubhekana naletinye tinkinga letinyenti. Ngenca yekutsi indvodza yakhe beyingasasebenti, kwadzingeka kutsi asebente kuze anakekele umndeni wakhe. Ngetulu kwaloko, libandla belikhashane ngemakhilomitha langaba ngu-350. Lokubuhlungu kutsi basekhakhakhe bebamelene naye ngenca yekutsi unguFakazi. Lesimo saba sibi kakhulu kangangekutsi umndeni waBrizit kwadzingeka kutsi utfutsele kulenye indzawo. Kwatsi kungakalindzeleki, umyeni wakhe washona. Ngekuhamba kwesikhatsi, lenye yemadvodzakati akhe yabulawa ngumdlavuza ineminyaka lengu-12 nje kuphela. Lokwenta lesimo saba sibi kakhulu kutsi tihlobo taBrizit betimsola ngaloku lokwentekile. Tatsi kube bekangasuye Fakazi waJehova, tonkhe letintfo letimbi betingeke tenteke. Kodvwa wachubeka etsembele kuJehova futsi akazange ayishiye inhlangano yakhe.

16. Brizit wabusiswa njani ngekungamshiyi Jehova nenhlangano yakhe?

¹⁶ Ngenca yekutsi Brizit bekahlala khashane nelibandla, umbonisi wesigodzi wamkhutsata kutsi ashumayele lapho bekahlala ngakhona futsi achube nemihlangano yelibandla ekhaya lakhe. Ekucaleni, weva shengatsi loku kumatima. Kodvwa wakwenta loko. Wacocela labanye tindzaba letimnandzi, wachuba imihlangano yelibandla ekhaya lakhe futsi wabeka sikhatsi sekuchuba kukhonta kwemndeni nemadvodzakati akhe. Waba yini umphumela? Brizit wacala kudadisha liBhayibheli nebantfu labanyenti, futsi linyenti labo labhajatiswa. Nga-2005 waba lihlahlandlela lelivamile. Wabusiswa ngekwetsembeka kwakhe kuJehova nangekuhlala enhlanganweni yakhe. Emadvodzakati akhe akhonta Jehova ngekwetsembeka,  futsi nyalo sekunemabandla lamabili kulendzawo! Brizit uyaciniseka kutsi Jehova wamniketa emandla ekubhekana nalesimo newekuchubeka abeketela nanobe umndeni wakhe bewuhlekisa ngaye.

17. Yini lokufanele sitimisele kuyenta?

¹⁷ Sathane ufuna kusenta sikholelwe kutsi Jehova uyasishiya nasibhekene nebumatima nekutsi kusekela inhlangano yaJehova kutawenta kuphila kwetfu kube matima kakhulu. Ufuna sesabe nakwenteka bazalwane labaholako banyundzelwa, baphatfwa kabi nobe nababoshwa. Usebentisa labo labahlekisa ngatsi kuze etame kusenta kutsi singasatetsembi timiso taJehova nenhlangano yakhe. Nanobe kunjalo, siwati kahle emachinga aSathane futsi akasikhohlisi. (2 Khor. 2:11) Timisele kumelana nemanga aSathane futsi uhlale wetsembekile kuJehova nasenhlanganweni yakhe. Khumbula, Jehova akayuze akushiye. (Hla. 28:7) Ngako ungavumeli lutfo lukwehlukanise naJehova!​—Rom. 8:35-39.

18. Sitawucoca ngani esihlokweni lesilandzelako?

¹⁸ Kulesihloko, sicoce ngetinkinga lesingabhekana nato. Kodvwa kwetsembeka kwetfu kuJehova nasehlanganweni yakhe kungavivinywa natinkinga letingavela ebandleni. Yini lesingayenta kuze sikhone kubhekana naletinkinga? Sitawucoca ngaloku esihlokweni lesilandzelako.