SIHLOKO LESIFUNDVWAKO 21
INGOMA 107 Nkulunkulu Usibonelo Ekukhombiseni Lutsandvo
Ungamtfola Njani Umuntfu Lokahle Longashada Naye
“Ngubani nje longatfola umfati lonebuntfu lobuhle? Uligugu kakhulu kwendlula ematje laligugu aselwandle.”—TAGA 31:10.
LOKUTAWUCOCWA NGAKO
Kulesihloko sitawucoca ngetimiso teliBhayibheli letikhuluma ngekutsi umuntfu angambona njani umuntfu lokahle langashada naye nekutsi labanye ebandleni bangabasita njani labangakashadi labafuna kushada.
1-2. (a) Ngutiphi tintfo umKhristu longakashadi lokufanele acabange ngato ngaphambi kwekutsi atsandzane nalotsite? (b) Sisho kutsini nasitsi “kutsandzana nalotsite”? (Buka “Inchazelo Yeligama.”)
UYAKUFUNA yini kushada? Nanobe kungasiko kushada lokwenta umuntfu ajabule, emaKhristu lamanyenti lasengakashadi, kungaba ngulasemasha nobe lasakhulile, ayakulangatelela kutfola umuntfu langashada naye. Kuliciniso kutsi ngaphambi kwekutsi utsandzane nalotsite kufanele ucale ube nebuhlobo lobuhle naJehova, utati kahle futsi ube sewukulungele ngasetimalini kunakekela umndeni. a (1 Khor. 7:36) Nasewukwentile loko, manyenti ematfuba ekutsi umshado wakho uphumelele.
2 Nobe kunjalo, akuhlali kumelula kutfola umuntfu lokahle longashada naye. (Taga 31:10) Ngisho nalapho sewumtfolile umuntfu longatsandza kumati kancono, kungahle kube matima kutsi nicale nitsandzane. b Kulesihloko sitawucoca ngekutsi yini lengasita emaKhristu langakashadi kuze atfole umuntfu langashada naye futsi bacale kutsandzana. Sitawuphindze sifundze ngekutsi labanye ebandleni bangabasita njani labo labafuna kushada.
KUFUNA UMUNTFU LOKAHLE LONGASHADA NAYE
3. Ngutiphi tintfo lokufanele acabange ngato umKhristu longakashadi nakafuna latawushada naye?
3 Nangabe ufise kushada, kuhle kutsi ukwati loko lokufunako kuloyo lofuna kushada naye ngaphambi kwekutsi ucale kutsandzana nalotsite. Ngale kwaloko, kungenteka unganaki umuntfu lokahle longashada naye nobe ungatsandzana nemuntfu longakulungeli. Kuliciniso kutsi kufanele ushade nemKhristu lobhajatisiwe. (1 Khor. 7:39) Kodvwa akusuye nobe ngubani lobhajatisiwe lokulungelako kutsi ungashada naye. Ngako tibute: ‘Iyini imigomo yami ekuphileni? Ngubuphi buntfu lengibubona bubalulekile kumuntfu lengifuna kushada naye? Ukhona yini vele umuntfu longaba nako loku lengikufunako?’
4. Ngutiphi tintfo labatishoko labanye nabathantaza?
4 Nangabe ufuna kushada, siyaciniseka kutsi ukile wakuthantazela kutfola umuntfu lotawushada naye. (Fil. 4:6) Kuliciniso kutsi Jehova aketsembisi muntfu kumnika loyo latawushada naye. Kodvwa unendzaba naloko lokudzingako nendlela lotiva ngayo, futsi angakusita nawusafuna loyo longashada naye. Ngako chubeka umtjela loko lokufisako nendlela lotiva ngayo. (Hla. 62:8) Thantazela kubeketela nekuhlakanipha. (Jak. 1:5) Lomunye umzalwane waseMelika longakashadi lokutsiwa nguJohn, c usho loko lakufakako emithantazweni yakhe, utsi: “Ngitjela Jehova ngebuntfu lengifise kutsi abe nabo loyo lengingashada naye. Ngithantazela nematfuba ekutsi sihlangane. Ngiphindze ngimcele angisite kutsi ngibe nebuntfu lobutangenta ngibe yindvodza lekahle.” Lomunye dzadze waseSri Lanka lokutsiwa nguTanya utsi: “Njengobe ngisafuna loyo lengitawushada naye, ngicela Jehova kutsi angisite ngihlale ngetsembekile, ngijabulile futsi ngingadvumali.” Ngisho nobe ungamtfoli ngekushesha umuntfu lokahle longashada naye, Jehova wetsembisa kutsi utawuchubeka akunakekela, akutsandza futsi akunaka.—Hla. 55:22.
5. Ngumaphi ematfuba lanawo emaKhristu langakashadi ekuhlangana nalabanye labatsandza Jehova? (1 KubaseKhorinte 15:58) (Buka nesitfombe.)
5 LiBhayibheli lisikhutsata kutsi sibe ‘nalokunyenti kwekukwenta emsebentini weNkhosi.’ (Fundza 1 KubaseKhorinte 15:58.) Njengobe uchubeka umatasatasa emsebentini waJehova futsi ucitsa sikhatsi nebazalwane nabodzadze labehlukahlukene, utawuba nesikhatsi lesimnandzi nabo kanye nematfuba ekuhlangana nalabanye labangakashadi labanake kukhonta Jehova njengawe. Ngetulu kwaloko, njengobe wenta konkhe lokusemandleni akho kuze ujabulise Jehova, utawutfola injabulo sibili.
Nawuhlale umatasa emsebentini waJehova futsi ucitse sikhatsi nebazalwane nabodzadze labehlukahlukene, ungahlangana nalabanye labafise kushada (Buka sigaba 5)
6. Yini emaKhristu langakashadi lokufanele ayikhumbule nakasafuna langashada naye?
6 Naku lokufanele ukunake: Kufuna umuntfu lotawushada naye akukafaneli kube yintfo leta kucala ekuphileni kwakho. (Fil. 1:10) Injabulo sibili ayiyi ngekutsi ushadile yini nobe awukashadi, kodvwa itfolakala ngekuba nebuhlobo lobuhle naJehova. (Mat. 5:3) Nawusengakashadi, uba nematfuba lamanyenti ekwentela Jehova lokunyenti. (1 Khor. 7:32, 33) Sisebentise kahle lesikhatsi. Lomunye dzadze waseMelika lokutsiwa nguJessica lowashada sekasondzele eminyakeni lengu-40 utsi: “Bengihlale ngimatasa emsebentini wekushumayela, futsi loko kwangisita kutsi ngenetiseke nanobe bengifuna kushada.”
TINIKE SIKHATSI SEKUMBUKA
7. Yini leyenta kube kuhlakanipha kucale umbukele khashane loyo lofisa kushada naye ngaphambi kwekutsi umtjele indlela lotiva ngayo? (Taga 13:16)
7 Yini longayenta nangabe ucabanga kutsi lotsite angakulungela kutsi ushade naye? Kufanele usheshe umtjele yini indlela lotiva ngayo? LiBhayibheli litsi umuntfu lohlakaniphile wenta tintfo ngelwati. (Fundza Taga 13:16.) Ngako kukuhlakanipha kutsi umbukele khashane sikhatsi lesitsite ngaphambi kwekutsi umtjele indlela lotiva ngayo. Aschwin waseNetherlands utsi: “Isheshe yakheke imiva yekutsandza lotsite kantsi futsi isheshe iphele. Ngako nawutinika sikhatsi sekumbuka, ngeke ujakele kutsandzana nemuntfu ngenca yemiva lokungenteka isheshe iphele.” Ngetulu kwaloko, nawutinika sikhatsi sekumbuka umuntfu, ungahle ubone kutsi akakulungeli.
8. Yini longakashadi langayenta nakasabukela khashane loyo lafuna kushada naye? (Buka nesitfombe.)
8 Yini longayenta nawusambukela khashane loyo lofise kushada naye? Emihlanganweni yelibandla nobe nanindzawonye nilicembu, unganaka kutsi bunjani buhlobo bakhe naJehova, unake buntfu bakhe nendlela latiphatsa ngayo. Bobani bangani bakhe, futsi yini lakhuluma ngayo? (Luk. 6:45) Imigomo yakhe iyafana yini neyakho? Ungabuta labadzala belibandla lakulo kutsi unjani nobe ubute emaKhristu lavutsiwe lamati kahle. (Taga 20:18) Ungabuta ngelidvumela lakhe nangebuntfu bakhe. (Rut. 2:11) Nawusambuka, ungamenti ative angakhululeki. Hlonipha indlela lativa ngayo futsi ungahlali umlandzela.
Ngaphambi kwekutsi utjele lotsite kutsi uyamtsandza, tinike sikhatsi sekumbuka (Buka tigaba 7-8)
9. Yini lokufanele ucale uciniseke ngayo ngaphambi kwekutsi utjele lotsite indlela lotiva ngayo?
9 Kufanele utsatse sikhatsi lesingakanani ubuka umuntfu ngaphambi kwekutsi umtjele indlela lotiva ngayo? Nawushesha kumtjela, angahle acabange kutsi wenta tincumo ungakacabangisisi kahle. (Taga 29:20) Kodvwa nangabe sekabonile kutsi ufuna kumati kancono futsi utsatse sikhatsi lesidze solo ungamtjeli loko, angahle acabange kutsi utsatsa sikhatsi lesinyenti ungabata ngaphambi kwekutsi wente sincumo. (Shu. 11:4) Khumbula kutsi ngaphambi kwekutsi ukhulume nemuntfu, loko akusho kutsi kudzingeka ube sewuciniseka kutsi utawushada naye. Kodvwa kufanele uciniseke kutsi ukulungele kushada nekutsi lomuntfu uyakulungela kutsi ungashada naye.
10. Yini lokufanele uyente nangabe ubona kutsi lotsite ufuna kukwati kancono kodvwa ube ungativa ngendlela lefanako?
10 Kodvwa yini longayenta nawubona kutsi lotsite angatsandza kukwati kancono? Nangabe ungativa ngendlela lefanako, yetama kukwenta kucace loko ngetento takho. Angeke kube kahle kwenta umuntfu acabange kutsi ningatsandzana ube wati kutsi ngeke kwenteke loko.—1 Khor. 10:24; Ef. 4:25.
11. Emaveni lapho kungulabanye labahlela kutsi labatsite batsandzane nobe bashade, ngutiphi tintfo lokufanele bahlale batikhumbula?
11 Kulamanye emave, batali nobe labanye bantfu labadzala balindzeleke kutsi bakhetsele sihlobo sabo lesingakashadi loyo lesitawushada naye. Kantsi kulamanye emave, emalunga emndeni nobe bangani ngibo labafunela longakashadi loyo langashada naye futsi babese bayahlela kutsi laba lababili bahlangane kuze babone kutsi bayalungelana yini. Nangabe ucelwe kutsi ufunele lotsite loyo latawutsandzana naye nobe latawushada naye, cabanga ngekutsi yini labayitsandzako bobabili kanye netidzingo tabo. Nasewumtfolile loyo langashada naye, yetama kutfola lokunyenti ngaye, kutsi ungumuntfu lonjani nekutsi bunjani buhlobo bakhe naJehova. Buhlobo lobuhle naJehova bubaluleke kakhulu kwendlula imali, imfundvo nobe sigaba umuntfu lanaso emphakatsini. Kodvwa khumbula kutsi ngumzalwane longakashadi nadzadze longakashadi lokufanele batentele sincumo sekutsi batawushada yini.—Gal. 6:5.
YINI LONGAYENTA KUZE UGCINE UTSANDZANA NALOTSITE?
12. Ungamtjela njani umuntfu kutsi ufise kumati kancono?
12 Nangabe ungatsandza kugcine utsandzana nalotsite, ungamtjela njani indlela lotiva ngayo? d Ungahlela kutsi nicoce, kungaba sendzaweni lenebantfu nobe ngelucingo. Mtjele ngalokucacile indlela lotiva ngayo. (1 Khor. 14:9) Nangabe kunesidzingo, mnike sikhatsi sekucabanga kutsi utakuphendvula atsini. (Taga 15:28) Nangabe ete sifiso sekutsandzana nawe, yihloniphe indlela lativa ngayo.
13. Yini longayenta nangabe lotsite akutjela kutsi uyakutsandza? (KubaseKholose 4:6)
13 Yini lokufanele uyente nangabe lotsite akutjela kutsi uyakutsandza? Kusenekwenteka lomuntfu ucunge sibindzi kuze atokhuluma nawe, ngako bani nemusa futsi umhloniphe. (Fundza KubaseKholose 4:6.) Nangabe udzinga sikhatsi sekucabanga ngaloku lakushoko, mtjele. Kodvwa yetama kusheshe umphendvule. (Taga 13:12) Nangabe ute sifiso sekutsandzana naye, mtjele loko ngendlela lenemusa nalecacile. Naka indlela lomunye umzalwane wase-Austria lokutsiwa nguHans lamphendvula ngayo lomunye dzadze nakamtjela kutsi uyamtsandza, utsi: “Ngamphendvula ngendlela lenemusa kodvwa lecacile. Loko ngakwenta ngaleso sikhatsi nakakhuluma nami ngobe bengingafuni kumnika litsemba lelingekho. Ngako besengikunaka loko lebengikusho kuye netintfo lebengitenta kuze angacabangi kutsi sengishintje ingcondvo.” Kodvwa nangabe nawe ufuna kutsandzana nalomuntfu, mtjele indlela lotiva ngayo naloko lokulindzele naseniganene. Kungenteka tintfo lenitilindzele tingafanani, kuye ngemasiko enu nobe letinye tintfo.
LABANYE BANGAWASEKELA NJANI EMAKHRISTU LANGAKASHADI?
14. Singawasekela njani emaKhristu langakashadi ngaloko lesikushoko?
14 Yini sonkhe lesingayenta kuze sisekele emaKhristu langakashadi lafuna kushada? Lokunye lesingakwenta kutsi sikunake loko lesikushoko. (Ef. 4:29) Singatibuta: ‘Lengikushoko nangidlalisa longakashadi kumenta ative acindzeteleke kutsi ashade yini? Nangibona umzalwane longakashadi nadzadze longakashadi bakhuluma, ngijakela ekutseni kukhona yini labakuphekako?’ (1 Thim. 5:13) Ngetulu kwaloko, kufanele singawenti emaKhristu langakashadi ative ngatsi kukhona lapho ashoda khona ngenca nje yekutsi akashadi. Hans, lesike sakhuluma ngaye utsi: “Labanye bazalwane batsi, ‘Awushadi ngani? Awuboni yini kutsi sewukhulile?’ Emagama lanjengalawa angenta labangakashadi babone ngatsi abasilutfo futsi angabenta bative bacindzeteleke kakhulu kutsi bashade.” Lokuncono kakhulu lesingakwenta kufuna ematfuba ekuwancoma emaKhristu langakashadi!—1 Thes. 5:11.
15. (a) Ngekusho kwesimiso lesiKubaseRoma 15:2, yini lokufanele sicabange ngayo ngaphambi kwekusita lotsite kutsi atfole langashada naye? (Buka nesitfombe.) (b) Ngumaphi emaphuzu lowatsandzile kule-video?
15 Yini lokufanele uyente nawucabanga kutsi umzalwane nadzadze bayafanelana? LiBhayibheli lisitjela kutsi sicabangele indlela labanye labativa ngayo. (Fundza KubaseRoma 15:2.) Labanyenti labangakashadi abafuni kutsi ubahlanganise nemuntfu locabanga kutsi bangalungelana naye, futsi kufanele sikuhloniphe loko. (2 Thes. 3:11) Labanye bangakutsandza kusitwa, kodvwa akukafaneli sibasite bangakasiceli. e (Taga 3:27) Labanye labangakashadi bangakujabulela kuhlanganiswa ngendlela lenganakeki. Lomunye dzadze longakashadi waseGermany lokutsitwa nguLydia utsi: “Ungammema lomzalwane nadzadze nawumeme licembu. Yakha ematfuba ekutsi bacitse sikhatsi ndzawonye futsi lokunye ukushiyele kubo.”
Kuba nelicembu lelikhulu kwenta emaKhristu langakashadi abe nelitfuba lekuhlangana (Buka sigaba 15)
16. Yini emaKhristu langakashadi lokufanele ayikhumbule?
16 Sonkhe, ngisho singakashadi nobe sishadile, singaphila imphilo lejabulisako naleyenetisako! (Hla. 128:1) Ngako nangabe ufuna kushada kodvwa usengakamtfoli loyo longashada naye, chubeka unake kukhonta Jehova. Lomunye dzadze waseMacao lokutsiwa nguSin Yi utsi: “Sincane kakhulu sikhatsi lotasicitsa ungakashadi kunaleso lotasicitsa ePharadisi nemuntfu lotawube ushade naye. Asibe ligugu kuwe lesikhatsi futsi sisebentise kahle.” Kodvwa yini longayenta nangabe sewumtfolile longashada naye futsi senitsandzana? Esihlokweni lesilandzelako, sitawucoca ngekutsi yini leningayenta kuze niphumelele.
INGOMA 137 Bodzadze Labetsembekile LabangemaKhristu
a Kuze ubone kutsi sewukulungele yini kushada, buka ku jw.org sihloko lesitsi “Kuganana—Incenye 1: Sengikulungele Yini Kutsandzana Nalotsite?”
b INCHAZELO YELIGAMA: Kulesihloko nakulelesilandzelako, ligama lelitsi “kutsandzana nalotsite” lisho sikhatsi lapho lijaha nentfombi bakhetsa kwatana kancono kuze babone kutsi bayalungelana yini kutsi bangashada. Kulamanye emave kubitwa ngekutsi kuganana nobe kwatana kancono. Kutsandzana nalotsite kucala ngesikhatsi lijaha nentfombi bakwenta kucace kutsi banesifiso sekwatana ngendlela lesondzelene futsi kuchubeka kuze kube ngulapho batsembisana umshado nobe kuze kube ngulapho bancamula lobudlelwane babo.
c Lamanye emagama ashintjiwe.
d Kulamanye emasiko, ngumzalwane lotjela dzadze kutsi uyamtsandza. Kodvwa akusikubi kutsi dzadze aye kumzalwane afike amtjele kutsi uyamtsandza. (Rut. 3:1-13) Kuze utfole imininingwane leyengetiwe, buka sihloko lesitsi “Intsha Iyabuza . . . Ngingamtjela Kanjani Ukuthi Ngizizwa Kanjani Ngaye?” ku-Phaphama! yaNovember 8, 2004.
e Ku jw.org buka i-video letsi Labo Labalwela Kukholwa Kwabo Ngemphumelelo—EmaKhristu Langakashadi.
