1. Yini levame kulawula buntfu betfu?

 NGISHO nobe sekuphele iminyaka leminyenti sibhajatisiwe nobe sisandza kubhajatiswa, sonkhe sifuna kuba nebuntfu lobutsandvwa nguJehova. Kuze sibe nabo, kufanele silawule indlela lesicabanga ngayo. Leni? Ngobe buntfu betfu buvame kulawulwa nguloko lesikucabangako. Nangabe sivame kucabanga tintfo letifiswa yinyama yetfu, sitawukhuluma tintfo letimbi futsi sitente. (Ef. 4:17-19) Kodvwa nangabe sicabanga tintfo letinhle, sitawukhuluma futsi sente tintfo letijabulisa Babe wetfu, lokunguJehova.—Gal. 5:16.

2. Ngumiphi imibuto lesitawucoca ngayo kulesihloko?

² Njengobe sivetile esihlokweni lesendlulile, sitawuhle siba nayo imicabango lemibi. Kodvwa singakhetsa kutsi sitakwenta yini loko lesikucabangako. Ngaphambi kwekutsi sibhajatiswe, kufanele siyekele kukhuluma ngendlela Jehova langayitsandzi nekwenta tintfo langatitsandzi. Lesi sinyatselo sekucala nalesibalulekile sekukhumula buntfu lobudzala. Kodvwa kuze sijabulise Jehova, kufanele siwulalele nemyalo lotsi: ‘Gcokani buntfu lobusha.’ (Khol. 3:10) Kulesihloko, sitawuphendvula nayi imibuto lelandzelako: Buyini “buntfu lobusha”? Singabugcoka njani buntfu lobusha futsi sihlale sibugcokile?

3. Ngekusho kwaKubaseGalathiya 5:22, 23, buyini “buntfu lobusha,” futsi umuntfu ubugcoka njani?

³ “Buntfu lobusha” yindlela umuntfu lacabanga ngayo nalenta ngayo leveta buntfu baJehova. Umuntfu ugcoka buntfu  lobusha nakaveta titselo temoya waNkulunkulu, avumele lomoya longcwele kutsi ulawule indlela lacabanga ngayo, lativa ngayo nalenta ngayo. (Fundza KubaseGalathiya 5:22, 23.) Nasi sibonelo, uyamtsandza Jehova kanye nebantfu bakhe. (Mat. 22:36-39) Umuntfu lonjalo uchubeka ajabula ngisho nobe anetinkinga. (Jak. 1:2-4) Utsandza kutsi kube nekuthula emkhatsini wakhe nalabanye. (Mat. 5:9) Uyabeketela futsi ubakhombisa umusa labanye. (Khol. 3:13) Uyakutsandza lokuhle futsi uyakwenta. (Luk. 6:35) Ukhombisa ngaloko lakwentako kutsi unekukholwa lokucinile kuBabe wakhe wasezulwini. (Jak. 2:18) Akatfukutseli nangabe labanye bamtfukutselisa futsi uyatibamba nakalingwa.—1 Khor. 9:25, 27; Thit. 3:2.

4. Kuze sigcoke buntfu lobusha, yini leyenta kudzingeke kutsi sibuvete bonkhe lobuntfu lokukhulunywa ngabo KubaseGalathiya 5:22, 23 nakulamanye emavesi eliBhayibheli?

⁴ Kuze sigcoke buntfu lobusha, kufanele sibe nabo bonkhe lobuntfu lokukhulunywa ngabo KubaseGalathiya 5:22, 23 nakulamanye emavesi eliBhayibheli. * Lobuntfu abufani netimphahla, tona lotigcoka ngayinye ngayinye. Kuze ukhone kuveta buntfu lobutsite, kufanele uvete nalobunye. Sibonelo nje, nangabe umtsandza mbamba makhelwane wakho, utambeketelela futsi ube nemusa kuye. Kuze ube ngumuntfu lokahle, kufanele ube nemoya lophansi futsi utibambe.

5. Kusho kutsini ‘kwati imicabango yaKhristu,’ futsi kubaluleke ngani kutsi sifundze ngemphilo yaJesu? (1 KubaseKhorinte 2:16)

⁵ Fundza 1 KubaseKhorinte 2:16. Kuze sigcoke buntfu lobusha, kufanele ‘siyati imicabango yaKhristu.’ Ngalamanye emavi, kufanele siyati indlela Jesu lacabanga ngayo futsi simlingise. Jesu utikhombisa kahle titselo temoya waNkulunkulu. Njengesibuko, ubukhombisa njengobe bunjalo buntfu baJehova. (Heb. 1:3) Nasichubeka sicabanga njengaJesu, sitakwenta njengaye, futsi sitabukhombisa buntfu bakhe.—Fil. 2:5.

6. Yini lokufanele sihlale siyikhumbula nasetama kugcoka buntfu lobusha?

⁶ Singakhona yini vele kulingisa sibonelo saJesu? Ungahle ucabange: ‘Jesu ute sono. Angeke ngikhone kumlingisa ncamashi!’ Nangabe utiva ngaleyondlela, khumbula naku:  Kwekucala, wentiwe waba ngumfanekiso waJehova newaJesu. Ngako ungakhona kumlingisa ngelizinga lelitsite. (Gen. 1:26) Kwesibili, umoya longcwele waNkulunkulu ungemandla lamakhulu kakhulu. Usitwa ngiwo, ungakhona kwenta tintfo lebewungeke ukhone kutenta ngemandla akho. Kwesitsatfu, Jehova akalindzeli kutsi sitikhombise ngalokuphelele nyalo titselo temoya. Ecinisweni, Babe wetfu lositsandzako utawunika labo labanelitsemba lekuphila emhlabeni iminyaka lengu-1 000 yekutsi bagcine bete sono. (Semb. 20:1-3) Nyalo Jehova ulindzele kutsi sente konkhe lesingakhona kukwenta futsi setsembele kuye kutsi asisite.

7. Sitawucoca ngani nyalo?

⁷ Singamlingisa njani Jesu? Nyalo sitawucoca kafishane ngetitselo temoya letine. Njengobe sicoca ngesitselo ngasinye, sitawubona kutsi yini lesingayifundza endleleni Jesu latikhombisa ngayo letitselo. Sitawucoca nangebuntfu lobungasisita kutsi sitfutfukise buntfu betfu lobusha.

8. Jesu wakhombisa njani kutsi uyamtsandza Nkulunkulu kanye nebantfu?

⁸ Jesu bekamtsandza kakhulu Jehova futsi loko kwenta kutsi atidzele ngenca yakhe nangenca yetfu. (Joh. 14:31; 15:13) Jesu wakhombisa kutsi bekabatsandza kakhulu bantfu ngendlela lebekaphila ngayo nakalamhlabeni. Bekahlale anelutsandvo neluvelo ngisho nobe labanye bamphikisa. Indlela lehamba embili lakhombisa ngayo kutsi uyabatsandza bantfu kubafundzisa ngeMbuso waNkulunkulu. (Luk. 4:43, 44) Jesu waphindze wakhombisa kutsi uyamtsandza Nkulunkulu kanye nebantfu ngekutsi avume kuhlushwa bantfu labanesono futsi bambulale kabuhlungu. Loko lakwenta kwasivulela litfuba lekutsi sitfole kuphila lokuphakadze.

9. Singalukhombisa njani lutsandvo njengaJesu?

⁹ Satinikela kuJehova futsi sabhajatiswa ngobe siyamtsandza Babe wetfu wasezulwini. NjengaJesu, indlela lesibaphatsa ngayo labanye kufanele ikhombise kutsi siyamtsandza Jehova. Umphostoli Johane wabhala watsi: “Loyo longamtsandzi umzalwane wakhe lambonile, ngeke amtsandze Nkulunkulu langakamboni.” (1 Joh. 4:20) Singatibuta: ‘Ngibatsandza mbamba yini bantfu? Ngibaphatsa kahle yini labanye, ngisho nobe bona bangiphatsa kabi? Lutsandvo luyangenta yini kutsi ngisebentise sikhatsi sami netintfo lenginato kuze ngisite labanye bafundze ngaJehova? Ngiyatimisela yini kukwenta loku ngisho nobe labanyenti bangabongi ngemetamo yami nobe bangiphikisa? Tikhona yini tindlela lengingatisebentisa kuze ngicitse sikhatsi lesinyenti ngenta umsebenti wekushumayela?’—Ef. 5:15, 16.

10. Jesu wakhombisa njani kutsi uyakutsandza kuthula?

¹⁰ Jesu bekakutsandza kuthula. Ngesikhatsi bantfu bamphatsa kabi, bekangabuyiseli lokubi ngalokubi. Kodvwa wenta lokwehlukile. Bekakha kuthula nalabanye futsi bekakhutsata nalabanye kutsi balungise kungevani. Sibonelo nje, Jesu wabafundzisa kutsi kuze Jehova emukele kukhonta kwabo, bekufanele bakhe kuthula nalabanye. (Mat. 5:9, 23, 24) Ngetulu kwaloko, bekachubeka ekhuta baphostoli bakhe kutsi bayekele kuphikisana ngekutsi ngubani lomkhulu emkhatsini wabo.—Luk. 9:46-48; 22:24-27.

11. Singakwakha njani kuthula?

¹¹ Nasikutsandza kuthula, kufanele singagcini nje ngekubalekela tintfo letitawubangela kungevani. Kufanele sakhe kuthula nalabanye futsi sikhutsate bazalwane nabodzadze kutsi balungise kungevani. (Fil. 4:2, 3; Jak. 3:17, 18) Singatibuta: ‘Yini lengitimisele kuyidzela  kuze ngakhe kuthula nalabanye? Nangabe umzalwane nobe dzadze angiphetse kabi, ngimbambela ligcubu yini? Ngimi yini lengiya kulomunye kuze ngiyowakha kuthula naye nobe ngimela kutsi kube ngulona lengicabanga kutsi ubange lenkinga kutsi ete kimi? Nangabe kukahle, ngiyabakhutsata yini labangevani kutsi bakhe kuthula?’

12. Jesu wakhombisa njani kutsi unemusa?

¹² Jesu bekanemusa. (Mat. 11:28-30) Wakhombisa kutsi unemusa ngekutsi abe nesineke futsi ayilalele imibono yalabanye ngisho nobe abhekene netimo letimatima. Nasi sibonelo, ngesikhatsi umfati longumFenisiya amncenga kutsi elaphe umntfwana wakhe, Jesu wacale wala, kodvwa ngesikhatsi lomfati akhombisa kukholwa lokucinile, wamelapha lomntfwana wakhe. (Mat. 15:22-28) Nanobe Jesu bekanemusa, kepha bekasikhipha seluleko nakudzingekile. Ngaletinye tikhatsi wakhombisa kutsi unemusa ngekutsi angakuvumi konkhe lebekushiwo bantfu bekabatsandza. Nasi sibonelo, ngesikhatsi Phetro etama kwenta Jesu kutsi angayenti intsandvo yaJehova, Jesu wamekhuta embikwalabanye bafundzi. (Mak. 8:32, 33) Loku akakwentanga kuze ahlaze Phetro, kodvwa wakwenta kuze amceceshe futsi ecwayise nalabanye bafundzi kutsi bayati indzawo yabo. Siyaciniseka kutsi Phetro wahlazeka, kodvwa wasitakala ngaleseluleko.

13. Singakhombisa njani kutsi sinemusa kulabanye?

¹³ Ngaletinye tikhatsi, kuze ukhombise kutsi unemusa kulabo lobatsandzako kudzingeka ubatjele tintfo njengobe tinjalo. Nawukwenta loko, kufanele ulingise Jesu ngekutsi usekele seluleko sakho etimisweni letitfolakala eVini laNkulunkulu. Loko ukwente ngemusa. Yetsemba kutsi bayafuna kwenta lokulungile, uciniseke kutsi labo labatsandza Jehova futsi labakutsandzako batasilalela seluleko sakho lesikhombisa kutsi uyabakhatsalela. Tibute: ‘Nginaso yini sibindzi sekukhuluma nangibona umuntfu lengimtsandzako enta intfo lembi? Nangabe kufanele ngeluleke lotsite, ngikhuluma kahle yini naye nobe ngikhuluma kabi? Yini lengenta ngeluleke lotsite? Ngimeluleka ngobe angitfukutselisile yini nobe ngimeluleka ngenca yekutsi ngifuna kumsita?’

14. Jesu wakhombisa njani kutsi uyabutsandza buhle?

¹⁴ Jesu akagcini nje ngekukwati lokuhle, kodvwa uyakwenta. Uyamtsandza Babe wakhe, ngako uhlale enta lokuhle ngobe anetizatfu letinhle. Umuntfu lokahle uhlale afuna tindlela langabasita ngato labanye futsi abentele tintfo letinhle. Akukeneli kwati intfo lenhle lokufanele siyente, kunaloko kufanele siyente sinetizatfu letinhle. Lomunye angatsi: ‘Kungenteka yini vele umuntfu ente intfo lenhle anesisusa lesibi?’ Kungenteka. Nasi sibonelo, Jesu wakhuluma ngalabo labapha labeswele tipho kodvwa babe baciniseka nekutsi labanye bayakubona loko. Lemisebenti lemihle beyingamjabulisi Jehova.—Mat. 6:1-4.

15. Yini lesingayenta kuze sibe bantfu labakahle?

¹⁵ Singaba bantfu labakahle nasenta tintfo letikahle ngetizatfu letinhle. Ungatibuta: ‘Nase ngikwati lokulungile lokufanele ngikwente, ngibese ngiyakwenta yini? Ngutiphi tizatfu letenta kutsi ngente lokulungile?’

16. Yini lokufanele siyente onkhe malanga, futsi leni?

¹⁶ Akukafaneli sicabange kutsi nasesibhajatisiwe sisuke sesicedzile kugcoka buntfu lobusha. Kufanele sichubeke sibugcokile. Loko singakwenta ngekutsi sibuke tindlela lesingakhombisa ngato titselo temoya onkhe  malanga. Leni? Kungobe Jehova uhlala amatasa futsi umoya wakhe ungemandla lasebentako. (Gen. 1:2) Ngako tonkhe letitselo temoya kufanele tisikhutsate kutsi sente lokutsite. Sibonelo nje, umfundzi Jakobe watsi: ‘Kukholwa lokute imisebenti kufile.’ (Jak. 2:26) Kungulokufanako nangato tonkhe leletinye titselo temoya waNkulunkulu. Ngaso sonkhe sikhatsi nasitiveta, sisuke sikhombisa kutsi umoya waNkulunkulu uyasebenta kitsi.

17. Yini lokufanele siyente nangabe sehlulekile kukhombisa sitselo semoya?

¹⁷ Ngisho nemaKhristu lasekanesikhatsi lesidze abhajatisiwe, ngalesinye sikhatsi ayehluleka kukhombisa titselo temoya. Kodvwa lokubalulekile kutsi singapheli emandla. Cabanga nganasi sibonelo. Ase sitsi udzatjukelwa yimphahla yakho loyitsandzako, ungavele uyilahle yini? Cha. Kungenteka wetame kuyitfunga. Ngemuva kwaloko, utawucaphelisisa nawuyigcokile. Ngendlela lefanako, nangabe uhle wehluleka kumkhombisa umusa lotsite, kumbeketelela nobe kumkhombisa lutsandvo, ungadvumateki. Kucolisa ngalokusuka enhlitiyweni kutawusita kutsi nichubeke nibangani naloyo muntfu. Timisele kwenta kancono esikhatsini lesitako.

18. Yini lesingaciniseka ngayo?

¹⁸ Sibonga kakhulu ngekutsi Jesu usibonelo setfu! Nasetama kulingisa indlela lebekacabanga ngayo, kutawuba melula kutsi sente njengaye. Nasichubeka silingisa Jesu, sitawukhona kugcoka buntfu lobusha. Kulesihloko, sicoce ngetitselo letine temoya waNkulunkulu. Kungaba kuhle kutsi ufundze nangaleti letinye titselo temoya futsi ubuke kutsi utiveta kahle yini. Utawutfola luhla lolukhuluma ngalendzaba kubhukwana lotsi Lithulusi Lekucwaninga LaBoFakazi BaJehova, ngephansi kwesihloko lesitsi “Kuphila KwebuKhristu,” bese ubuka lesitsi “Titselo Temoya.” Nawenta konkhe lokusemandleni akho, ungaciniseka kutsi Jehova utakusita kutsi uchubeke ugcoke buntfu lobusha futsi ungabukhumuli.