DEBORA e drai luku ala den srudati di kon makandra na Tabor-bergi. A ben firi bun fu di den alamala de drape. Aladi a son e opo a e prakseri a deki-ati di den srudati disi sori èn a bribi fu Barak, a fesiman fu den. Tide den 10.000 srudati disi o kisi wan bigi tesi pe den musu sori taki den abi bribi nanga deki-ati. Den o feti nanga wan makti feanti, aladi a legre fu den no bigi èn den no abi kefalek fetisani. Ma toku den kon dyaso fu di na uma disi gi den deki-ati.

Yu e si fa a winti e wai a krosi fu Debora èn fa en nanga Barak e luku a heri kontren? Tabor-bergi na wan bigi bergi èn tapusei fu a bergi disi plata. A hei sowan 400 meter èn te yu de na tapusei yu kan si a lagipresi fu Esdralon di e waka go te na a zuidwest-sei. Kison-liba e lon pasa na ini a lagipresi disi, èn a e koti go na a Bigi Se krosibei fu Karmel-bergi. A kan taki a liba ben drei a mamanten dati, ma fu farawe yu ben kan si wan tu brenki sani e kon. A ben de a legre fu Sisera di ben e kon moro krosibei. Sisera ben e kon nanga den 900 fetiwagi fu en di ben abi langa isri nefi na den wiel. A man disi ben wani kiri ala den Israelsma puru a pasi.

Debora ben sabi taki Barak nanga den man fu en e wakti en fu a taigi den san den musu du. A ben de a wan-enkri umasma drape. Fa yu denki taki Debora ben feni en fu tyari so wan bigi frantwortu? Yu denki taki a ben e aksi ensrefi san a kon du drape? A no gersi so. Yehovah, a Gado fu en ben taigi en fu gi Barak deki-ati fu go na a feti disi. Yehovah ben taigi en tu taki a ben o meki wan uma wini a feti (Krutuman 4:9). San wi kan leri fu a bribi fu Debora nanga den deki-ati fetiman disi?

A fosi leisi di Bijbel taki fu Debora, a kari en „na umaprofeiti”. Debora ben abi wan aparti frantwortu, fu di furu umaprofeiti no kari na ini Bijbel. * Debora ben abi wan tra frantwortu tu. Soleki fa a sori, dan te sma ben abi problema, dan na en den ben e go fu yere fa Yehovah wani taki den lusu a problema.—Krutuman 4:4, 5.

Debora ben e libi na Efrayim-bergikontren na mindri den foto Betel nanga Rama. A ben gwenti sidon na ondro wan palmbon fu yepi a pipel soleki fa Yehovah ben sori en. Wi kan de seiker taki a wroko fu en no ben makriki, ma dati no tapu Debora fu du en wroko. A wroko fu en ben de prenspari. Bakaten a skrifi wan singi di de na ini Bijbel èn di e taki fu a pipel fu en di ben trangayesi Gado. „Den bigin dini tra gado. Na a ten dati feti ben de na den portu” (Krutuman 5:8). Fu di den Israelsma ben gowe libi Yehovah go dini tra gado, meki Yehovah no kibri den moro gi den feanti. Yabin, a kownu fu Kanan ben meki wan makti legre-edeman di nen Sisera pina den.

Te den Israelsma ben yere a nen Sisera, dan dati wawan ben meki den beifi kaba. Den Kanansma ben e du wan lo ogri-ati sani na ini na anbegi nanga a kulturu fu den. Den ben e bron den eigi pikin leki ofrandi èn den ben e huru na ini den tempel.  Yu no denki taki a ben hebi gi den Israelsma taki wan legre-edeman fu Kanan ben e pina den? A singi fu Debora e sori taki sma ben frede fu waka na den pasi èn taki sma no ben e libi na ini den dorpu moro (Krutuman 5:6, 7). Prakseri fa sma ben e kibri na ini den busi nanga den bergi fu di den frede fu prani sani noso fu libi na ini den dorpu di no abi skotu. Prakseri fa den frede fu waka tapu den pasi fu di den frede taki sma o du ogri nanga den, taki den o grabu den pikin tyari gowe noso taki den o dwengi den uma fu den fu abi seks nanga den. *

Den Kanansma kwinsi den Israelsma 20 yari langa, teleki Yehovah si taki a pipel fu en ben abi berow. Noso soleki fa a singi fu Debora nanga Barak e taki: „Teleki mi, Debora, opo, teleki mi opo leki wan mama na ini Israel.” Wi no sabi efu Debora, a wefi fu Lapidot, ben de wan mama di ben abi pikin. Ma a kari ensrefi wan mama fu di Yehovah ben gi en a frantwortu fu kibri a pipel fu en leki fa wan mama e du dati. A ben taigi en fu seni kari Krutuman Barak, wan man di ben abi wan tranga bribi èn fu gi en deki-ati fu go feti nanga Sisera.—Krutuman 4:3, 6, 7; 5:7.

Yehovah meki Debora taigi Barak fu „go na Tabor-bergi”. Barak ben musu teki 10.000 man fu tu lo na ini Israel. Debora taigi den taki Gado o meki den wini a makti legre fu Sisera nanga den 900 fetiwagi fu en. A sani dati ben musu fu fruwondru Barak, fu di Israel no ben abi wan legre nanga fetisani. Toku Barak pramisi taki a o go na Tabor-bergi efu Debora go nanga en.—Krutuman 4:6-8; 5:6-8.

Son sma feni taki Barak no ben abi bribi fu di a aksi Debora fu go nanga en, ma dati no tru. Barak no aksi Gado fu gi en moro fetisani. Ma fu di Barak ben abi bribi, meki a ben si taki a de prenspari fu meki a profeiti fu Yehovah go nanga en fu tranga a bribi fu en nanga den man fu en (Hebrewsma 11:32, 33). Yehovah ben feni a sani dati bun. A meki Debora go nanga Barak. Ma Yehovah meki Debora taigi Barak taki a no wan man ben o kisi a grani fu wini a feti disi (Krutuman 4:9). Gado ben bosroiti taki na wan uma ben o kiri na ogriman Sisera.

Na ini a grontapu disi, sma e du furu ogri nanga umasma èn nofo tron umasma no e kisi san den abi reti na tapu. Furu leisi a e pasa taki den no e kisi a grani di Gado wani taki den musu kisi. Ma Gado no lobi mansma moro umasma. Gi en  den alamala prenspari (Romesma 2:11; Galasiasma 3:28). Na eksempre fu Debora e sori wi taki Gado e gi umasma grani tu èn taki a e frutrow den. Wi musu luku bun taki noiti wi e si umasma soleki fa a grontapu disi e si den.

Barak bigin seti a legre fu en. A teki 10.000 man di ben abi nofo deki-ati fu go feti nanga a makti legre fu Sisera. Barak nanga den man fu en ben e go na Tabor-bergi, èn a ben breiti taki a ben abi wan sma fu gi den deki-ati. Bijbel e taki: „Debora go tu nanga en” (Krutuman 4:10). Prakseri fa den srudati disi ben musu firi bun di den si taki wan deki-ati uma e waka nanga den go na Tabor-bergi. A bribi di na uma disi ben abi na ini Yehovah Gado, meki taki a no ben frede fu lasi en libi.

Di Sisera yere taki den Israelsma ben abi a deki-ati fu kon feti nanga en, dan a du wan sani wantewante. Wan tu kownu fu Kanan go yepi a legre fu Yabin, di ben de a moro makti kownu fu a kontren dati. Yu ben kan yere a babari fu den fetiwagi fu a makti legre fu Sisera di ben e hari kon fu feti. Den Kanansma ben de seiker taki a legre fu den ben tranga moro a di fu Israel èn taki esi-esi den ben o puru den na pasi.—Krutuman 4:12, 13; 5:19.

San Barak nanga Debora ben o du te a feanti ben o doro moro krosibei? Efu den ben tan na tapu Tabor-bergi, dan kande den ben o man feti ete nanga a legre fu Kanan, fu di den srudati dati no man feti bun nanga den fetiwagi fu den na tapu wan bergi. Ma Barak ben o feti soleki fa Yehovah ben wani, èn dati meki a wakti fu yere san Debora ben o taki. Ne te fu kaba, Debora taki: „Opo, bika disi na a dei di Yehovah o meki yu wini Sisera. A no Yehovah srefi hari go na yu fesi?” San Barak du? „Barak saka komoto fu Tabor-bergi, makandra nanga tin dusun man di ben e waka na en baka.”—Krutuman 4:14. *

A legre fu Israel saka komoto fu a bergi go na gron, èn den hari go miti a makti legre fu Kanan. Yehovah hari go na den fesi soleki fa Debora ben pramisi? A no teki langa fosi den kisi a piki. Bijbel e taki: „Grontapu seki èn watra saka komoto fu hemel.” A heri legre fu Sisera kon bruya. Alen bigin fadon bun tranga! A ben fadon so tranga taki a heri presi sungu. Te fu kaba den kon si taki den hebi isri wagi fu den no ben man yepi den. Den wagi fasi na ini a tokotoko èn den no ben man go na fesi.—Krutuman 4:14, 15; 5:4.

Na alen no ben bruya Barak nanga den man fu en. Den ben sabi suma meki na alen fadon. Den lon go tapu a legre fu Kanan, èn Gado meki den kiri ala den srudati fu Sisera. A watra fu Kison-liba kon hei èn a wasi ala den dedeskin go na ini a Bigi Se.—Krutuman 4:16; 5:21.

Na ini a ten disi Yehovah no e seni den futuboi fu en go feti nanga wan legre. Ma a wani taki en pipel tan feti so taki Satan nanga den ogri yeye fu en no kisi den (Mateyus 26:52; 2 Korentesma 10:4). Te wi e meki muiti fu gi yesi na Gado na ini a grontapu disi, dan na so wi e feti a feti disi. Wi musu abi deki-ati, fu di sma di e teki a sei fu Gado na ini a ten disi e kisi hebi tesi. Ma Yehovah no kenki. A e feti gi den sma di abi bribi èn di e frutrow na en tapu, neleki fa Debora, Barak, nanga den srudati fu Israel ben du dati.

A moro ogriman fu a legre fu Kanan lowe. Sisera, a man di ben pina Gado pipel, lon gowe fu a feti. A libi den man fu en fu dede na ini a tokotoko. A boro pasa na mindri den srudati fu Israel lon go na a moro krosibei presi pe a ben kan kibri. A lon omeni kilometer fu di a ben frede taki den srudati fu Israel ben kan kisi en. A lon pasa ala den presi pe nowan sma ben e libi, teleki a doro a tenti fu Heiber, a Keniet man. A man disi ben gowe libi a pipel fu en di ben e libi na a zuidsei èn a go meki mati nanga Kownu Yabin.—Krutuman 4:11, 17.

Nanga ala weriskin Sisera doro na ini a kampu fu Heiber. Ma Heiber no ben de na oso. En wefi  Yael wawan ben de. Kande Sisera ben denki taki Yael ben o yepi en fu di en masra ben de wan mati fu Kownu Yabin. A kan taki Sisera no ben prakseri srefi taki Yael ben kan du wan sani di en masra no ben o du. Ma Sisera no ben sabi Yael! Na uma disi ben si krin fa den Kanansma ben du ogri nanga den Israelsma. A kan taki a ben si taki a musu teki wan bosroiti. A ben kan bosroiti fu yepi na ogriman disi noso a ben kan teki a sei fu Yehovah èn kiri a feanti fu En pipel. Ma san a ben o man du? Fa wan uma ben o man kiri so wan tranga fetiman?

Yael no ben abi furu ten fu denki. A gi Sisera wan presi fu rostu. Sisera taigi en taki a no ben musu taigi nowan sma taki a de drape. Di a go didon, dan Yael tapu en nanga wan krosi, èn di a aksi pikinso watra, dan Yael gi en merki. Ne Sisera fadon na ini wan dipi sribi. Yael teki wan pen fu a tenti nanga wan amra, tu sani di ala uma di e tan na ini tenti ben sabi gebroiki. A kindi sei Sisera ede, èn now a ben de fesi a bigi feanti fu Yehovah. A ben o frede fu kiri a man disi? Efu a ben draidrai pikinso, a ben kan kisi bigi problema. Yu denki taki a ben prakseri a pipel fu Gado èn fa a man disi pina den omeni tenti yari? Noso a ben prakseri a grani di a ben abi fu wroko makandra nanga Yehovah? Bijbel no e taki noti fu dati. San wi sabi na taki a kiri Sisera!—Krutuman 4:18-21; 5:24-27.

Bakaten Barak kon suku a feanti fu en. Di Yael sori en a dedeskin fu Sisera, èn a si a pen fu a tenti di ben fasi na en sei-ede, dan a ben sabi taki a profeititori fu Debora ben kon tru. Wan uma ben kiri a tranga fetiman Sisera! Son sma di e krutu Bijbel feni taki Yael ben takru-ati, ma Barak nanga Debora no ben e si Yael so. Na ini a singi fu den di de na ini Bijbel, den kari Yael „a moro blesiwan fu den uma”, fu di a ben abi deki-ati (Krutuman 4:22; 5:24). Yu e si fa Debora ben e denki fu Yael? A no ben dyarusu na en tapu, san ben prenspari gi Debora, na taki a wortu fu Yehovah ben kon tru, èn dati meki a no draidrai fu prèise Yael.

Now di Sisera dede, Kownu Yabin no ben abi makti moro. Den Kanansma no ben man pina Israel moro. Fotenti yari langa freide ben de na ini a heri kondre (Krutuman 4:24; 5:31). Debora, Barak, nanga Yael kisi furu blesi fu di den ben poti bribi na ini Yehovah Gado. Wi kan sori bribi neleki Debora te wi e teki a sei fu Yehovah èn e gi trawan deki-ati fu du a srefi. Te wi e du dati, dan Yehovah o meki wi tron winiman èn wi o abi freide fu ala ten.