Awinsi yu e du wan wroko pe moro furu yu e gebroiki yu ede, yu krakti, noso ala tu, hori na prakseri taki „ala tranga wroko e tyari wini kon” (Odo 14:23). Sortu wini? We, te wi e wroko tranga wi o man sorgu wisrefi. A tru taki Gado pramisi taki a o sorgu gi den wan di e anbegi en nanga den heri ati (Mateyus 6:31, 32). Ma a e fruwakti tu taki wi fu wi sei e wroko tranga fu man sorgu wisrefi.—2 Tesalonikasma 3:10.

Sobun, wi kan si wroko leki wan sani di e yepi wi fu du san wi musu du. Wroko na wan bun sani di e yepi wi fu tyari den frantwortu fu wi. Joshua di abi 25 yari e taki: „A moi te yu man sorgu yusrefi. Te yu man pai gi den sani di yu abi fanowdu, dan yu kan breiti nanga a wroko di yu e du.”

Boiti dati, te yu e wroko tranga, dan yu e kon abi moro lespeki gi yusrefi. Fu taki en leti, tranga wroko, na tranga wroko. Ma te wi e dwengi wisrefi fu tan du a wroko fu wi, awansi a soi, noso awinsi a muilek, dan wi kan prisiri fu di wi sabi taki wi du ala muiti fu du a wroko bun. Wi no lon gi a wroko (Odo 26:14). Na so wroko e gi wi furu prisiri. Aaron di kari na a bigin fu na artikel, e taki: „Mi lobi fa mi e firi baka te mi wroko tranga heri dei. Awinsi mi weri èn awinsi tra sma no si a wroko di mi du, toku mi sabi taki mi du wan bun sani.”

Bijbel e taki bun fu wan man di „sabi du en wroko bun” èn fu wan uma di „e du ala wroko nanga prisiri” (Odo 22:29; 31:13). Ma a no e kon fu ensrefi taki wan sma man du en wroko bun. Boiti dati, furu sma no lobi du sani di den no man du bun. Kande na fu dati ede meki furu sma no lobi a wroko fu den. Den no meki nofo muiti fu leri du a wroko bun.

Fu taki en leti, wan sma kan leri fu lobi iniwan wroko efu a abi a yoisti denki. Disi wani taki dati a musu leri du a wroko bun. „Te yu e du ala muiti fu du wan wroko bun èn te yu e si a bakapisi fu en, dan dati e gi furu prisiri”, na so William di abi 24 yari, e taki. A e taki tu: „Noiti yu o firi prisiri efu yu e du yu wroko afu-afu noso efu yu e kibri skin.”

No luku nomo omeni moni yu e kisi fu a wroko di yu o du. Na presi fu dati, aksi yusrefi: ’Fu san ede mi abi a wroko disi fanowdu? San ben o pasa efu mi no ben o du en noso efu mi no ben o du en bun? Fa trawan e kisi wini fu a wroko fu mi?’

A bun fu poti prakseri na a lasti aksi, fu di wroko e gi moro prisiri te wi e si sortu wini a e tyari kon gi trawan. Yesus srefi ben taki: „Wan sma sa de moro koloku te a e gi sani, leki te a e kisi sani” (Tori fu den apostel 20:35). Boiti den sma di e kisi wini wantewante fu a tranga wroko fu wi, soleki klanti nanga wrokobasi, tra sma e kisi wini tu fu a wroko fu wi. Dati na sma fu wi osofamiri nanga sma di abi yepi fanowdu.

Sma fu wi osofamiri. Te na edeman fu na osofamiri e wroko tranga fu sorgu en osofamiri, dan a e yepi den na tu prenspari fasi. Na a fosi presi, a e sorgu taki den abi den prenspari sani di de fanowdu na ini a libi, èn dati na nyanyan, krosi, nanga wan presi fu tan. Na so a e tyari a frantwortu di Gado gi en fu „sorgu gi den sma fu en” (1 Timoteyus 5:8). Boiti dati, wan sma di e wroko tranga fu sorgu en osofamiri, e leri en osofamiri taki a prenspari fu wroko tranga. Shane di wi ben taki fu en na ini a fosi artikel, e taki: „Mi papa na wan bun eksempre gi mi fu di a lobi wroko. A de wan bun man di wroko tranga en heri libi langa èn furu fu den yari dati a ben e wroko leki temreman. A leri mi o prenspari a de fu wroko nanga yu anu, fu meki sani di tra sma o man gebroiki bun.”

Den wan di abi yepi fanowdu. Na apostel Paulus ben gi Kresten a rai fu „wroko tranga . . . so taki [den] kan prati wan sani nanga sma di de na nowtu” (Efeisesma 4:28). Iya, te wi e wroko tranga fu sorgu wisrefi èn wi osofamiri, dan kande wi o man yepi den wan di no abi en so bun leki wi (Odo 3:27). Sobun, te wi e wroko tranga, dan wi o de koloku fu di wi e gi trawan sani.

Na ini a prenspari lezing di Yesus ben hori, a ben taki: „Efu wan sma di abi makti, e dwengi yu fu waka wán kilometer nanga en, dan waka tu kilometer nanga en” (Mateyus 5:41). Fa yu kan fiti a rai disi te yu e du yu wroko? No du soso san yu musu du, ma luku fa yu kan du moro leki dati. Luku gi yusrefi sortu tra sani yu kan du. Pruberi fu du yu wroko moro bun èn moro esi leki san de fanowdu. Du srefi den pikinpikin sani fu a wroko fu yu nanga prisiri.

Te yu e du moro leki san yu musu du, dan a wroko fu yu o gi moro prisiri. Fu san ede? Fu di na yu srefi wani dati. Yu no e du moro fu di na sma dwengi yu, ma na fu di yu srefi wani (Fileimon 14). A sani disi e meki wi prakseri a rai na Odo 12:24: „A sma di e wroko tranga o de basi, ma wan lesiman o tron a srafu fu trawan.” A tru taki a no o pasa makriki taki sma dwengi wi fu du srafuwroko. Ma wan sma di e du soso san a musu du ben kan firi leki en na wan srafu di musu du san trawan e taigi en. Ma a sma di e du moro leki san a musu du, fu di en srefi wani dati, e firi leki en na basi fu ensrefi. Na en srefi e bosroiti san a e du.

A bun fu wroko tranga, ma toku wi musu hori na prakseri taki dati a no a moro prenspari sani na ini a libi. A tru taki Bijbel e gi wi deki-ati fu wroko tranga (Odo 13:4). Ma a no e gi wi deki-ati fu tron wan srafu fu a wroko fu wi. „Pikinso rostu betre moro furu tranga wroko. A betre moro leki te wan sma ben o feti fu fanga a winti”, na so Preikiman 4:6 e taki. San disi wani taki? Wan sma di de wan srafu fu a wroko fu en, kande noiti no o nyan bun fu a wroko fu en efu en wroko e teki ala en ten nanga en krakti. Fu taki en leti, a e wroko fu soso, fu di a de neleki a e „feti fu fanga a winti”.

Bijbel kan yepi wi fu kon abi a yoisti denki fu wroko. Aladi Bijbel e taki dati wi musu du wi wroko bun, toku a e gi a rai tu fu „kon sabi san na den moro prenspari sani” (Filipisma 1:10). San na den moro prenspari sani? Wan tu fu den, na taki wi musu meki ten gi wi osofamiri nanga mati. San moro prenspari, na den sani di abi fu du nanga na anbegi fu wi, soleki a leisi di wi musu leisi Gado Wortu èn denki dipi fu en.

Den sma di no de wan srafu fu a wroko fu den, o feni moro prisiri fu a wroko fu den. William di wi ben taki fu en kaba, ben taki: „Wan basi di mi ben e wroko gi lobi en wroko, ma a sabi tu san na den moro prenspari sani na ini a libi. A e wroko tranga èn a abi wan bun nen na den klanti fu en fu di a e wroko bun. Ma na a kaba fu a dei, te a du en wroko, a no e prakseri a wroko moro ma a e meki ten gi en osofamiri èn gi na a anbegi fu en. Mi kan taigi yu taki en na wan fu den moro koloku sma di mi sabi!”