Soleki fa wi si na ini na artikel na fesi, a moro prenspari sani na ini Yesus libi ben de fu „preiki a bun nyunsu fu a Kownukondre èn fu fruteri ala sma” a nyunsu disi (Lukas 8:1). A ben e du furu muiti, a ben e waka hondrohondro kilometer na ini a heri kondre Israel fu gi sma leri fu Gado Kownukondre. Den fo Evangelietori di e taki fu a diniwroko fu Yesus, e taki moro leki 100 leisi fu a Kownukondre. Na Yesus srefi ben taki furu fu den sani dati, ma toku dati na pikinso nomo fu ala den sani di a ben taki fu Gado Kownukondre.—Yohanes 21:25.

Fu san ede a Kownukondre ben prenspari so gi Yesus di a ben de na grontapu? We, Yesus ben sabi taki Gado ben teki en fu tron Tiriman fu a Kownukondre disi (Yesaya 9:6; Lukas 22:28-30). Ma Yesus no ben e suku fu kisi makti noso glori (Mateyus 11:29; Markus 10:17, 18). A no ben e preiki a Kownukondre soso fu kisi wini gi ensrefi. Fu taki en leti Gado Kownukondre * ben prenspari gi Yesus fu di a ben sabi san a Kownukondre disi o du gi en Papa na hemel èn gi den reti-ati futuboi fu en. Teleki now a Kownukondre disi prenspari gi en.

Yesus abi furu lobi gi en Papa na hemel (Odo 8:30; Yohanes 14:31). A lobi den moi fasi fu en Papa, soleki a lobi fu en, a sari-ati fu en, nanga a retidu fu en (Deuteronomium 32:4; Yesaya 49:15; 1 Yohanes 4:8). Dati meki a musu fu hati Yesus fu yere den lei di sma e fruteri fu en Papa. Fu eksempre, sma e taki dati Gado no e broko en ede nanga libisma, èn taki Gado wani taki wi pina. Disi na wán fu den sani di meki taki Yesus ben de fayafaya fu fruteri sma „a bun nyunsu fu a Kownukondre”. A ben sabi taki te fu kaba a Kownukondre ben o krin a nen fu en Papa (Mateyus 4:23; 6:9, 10). Fa a o du dati?

Nanga yepi fu a Kownukondre, Yehovah o du bigi sani di o tyari wini kon gi libisma. „A o figi ala watra puru” na den ai fu reti-ati libisma. Yehovah o tyari wan kaba kon na den sani di e meki libisma krei, fu di a o sorgu taki „dede no o de moro. Nowan sari, noso krei, noso pen no o de moro” (Openbaring 21:3, 4). Nanga yepi fu a Kownukondre, Gado o tyari wan kaba kon na ala pina di e miti libisma. *

 Dati meki a no e fruwondru wi taki Yesus ben lobi fruteri sma fu a Kownukondre. A ben sabi taki a Kownukondre ben o sori o furu makti nanga sari-ati en Papa abi (Yakobus 5:11). Yesus ben sabi tu taki a Kownukondre ben o tyari wini kon gi tra sma di a lobi. Dati na reti-ati libisma.

Langa ten bifo Yesus kon na grontapu, a ben e libi na hemel makandra nanga en Papa. A Tata gebroiki a Manpikin fu en fu meki ala sani, a meki den tumusi moi hemel nanga den someni stari nanga starisistema, sosrefi a moi planeiti fu wi nanga den meti di e libi na tapu (Kolosesma 1:15, 16). Ma fu ala den sani dati Yesus kon abi moro „lobi” gi libisma.—Odo 8:31.

A wroko di Yesus ben e du, ben e sori krin taki a lobi libisma. Biginbigin a sori taki a ben kon na grontapu fu „fruteri” den pôtiwan „bun nyunsu” (Lukas 4:18). Ma Yesus no ben e taki nomo taki a ben o yepi sma. Ibri leisi baka, a sori lobi gi libisma. Fu eksempre, di wan bigi ipi sma ben kon makandra fu arki san a ben abi fu taki, dan Yesus ’sari den èn a meki den siki sma fu den kon betre’ (Mateyus 14:14). Di wan man di ben abi wan takru siki taki dati a ben e bribi taki Yesus ben kan dresi en efu a ben wani dati, dan Yesus firi lobi gi a man. A dresi a man fu di a ben e firi sari gi en, èn a taigi en: „Mi wani. Kon krin” (Lukas 5:12, 13). Di Yesus si taki en mati Maria ben e sari fu di en brada Lasarus dede, dan Yesus „soktu dipi”, fu di „a ben kon hebi gi en”, èn a „bigin krei” (Yohanes 11:32-36). Ne a du wan sani di nowan sma ben fruwakti. Yesus gi Lasarus libi baka aladi a ben dede fo dei kaba!—Yohanes 11:38-44.

Yesus ben sabi taki a frulekti di a ben e gi sma, ben o de fu wan pisi ten nomo. A ben sabi taki te fu kaba, ala den sma di a ben dresi, ben o kon siki baka èn ala den sma di a ben gi libi, ben o dede baka. Ma Yesus ben sabi tu taki Gado Kownukondre ben o tyari wan kaba kon na den problema dati fu ala ten. Dati meki Yesus no ben e du wondru nomo, ma a ben e preiki „a bun nyunsu fu a Kownukondre” fayafaya tu (Mateyus 9:35). Den wondru di a ben du ben e sori pikinso kaba sortu sani Gado Kownukondre o du na heri grontapu. Luku san Bijbel e taki fu a ten dati.

•  Ala sma o de gosontu.

  „Na a ten dati den ai fu den breniwan o si èn den yesi fu den dofuwan o yere. Na a ten dati lan sma o kren leki dia na tapu den bergi. A tongo fu den babaw-wan o bari fu prisiri.” Boiti dati, „nowan sma di e tan na ini a kondre o taki: ’Mi siki.’”—Yesaya 33:24; 35:5, 6.

• Dede no o de moro.

  „Na den reti-ati sma o kisi grontapu èn fu têgo den o tan libi drape.”—Psalm 37:29.

  „A Moro Hei Masra Yehovah o swari dede fu têgo èn a o figi den watra-ai fu ala sma puru na den fesi.”—Yesaya 25:8.

• Den wan di dede o kisi libi baka.

  „Ala den sma di de na ini den grebi o yere en sten èn den o komopo drape.”—Yohanes 5:28, 29.

  ’Gado sa gi sma wan opobaka.’—Tori fu den apostel 24:15.

• Ala sma o abi oso nanga wroko.

  „Den o bow oso èn den srefi o tan na ini. Den o prani droifidyari èn den srefi o nyan fu en. Den no o bow oso, dan wan tra sma go tan na ini. Den no o prani sani, dan wan tra sma nyan fu dati. . . . Den wan di mi teki o nyan bun fu a wroko di den du.”—Yesaya 65:21, 22.

•  Feti no o de moro.

  „Na ala sei fu grontapu a e meki feti kon na wan kaba.”—Psalm 46:9.

  „Nowan pipel o teki feti-owru fu go feti nanga wan tra pipel èn den no o leri fu feti moro.”—Yesaya 2:4.

• Nyanyan no o mankeri moro.

  „Grontapu srefi o meki nyanyan. Gado, iya, wi Gado, o blesi wi.”—Psalm 67:6.

  „Furu nyanyan o kon de na grontapu. Srefi na tapu den ede fu den bergi nyanyan o de pasa marki.”—Psalm 72:16.

• Pina no o de moro.

  „A no fu ala ten Gado o frigiti den pôtiwan.” —Psalm 9:18.

  „A o frulusu den pôti sma di e bari suku yepi, Sosrefi ala den mofina sma nanga iniwan sma di no abi yepiman. A o firi sari gi den mofina sma èn gi den pôti sma èn a o frulusu den pôti sma.”—Psalm 72:12, 13.

Te yu e poti prakseri na den pramisi disi di abi fu du nanga Gado Kownukondre, dan yu kan si fu san ede a Kownukondre prenspari so gi Yesus? Di a ben de na grontapu, a ben lobi taki fu a Kownukondre nanga iniwan sma di ben wani arki, fu di a ben sabi taki a Kownukondre ben o tyari wan kaba kon na ala den problema di wi e si na ini a ten disi.

Yu lobi den pramisi disi di e sori san a Kownukondre o du? Efu dati de so, dan san moro yu kan leri fu a Kownukondre dati? San yu kan du fu sorgu taki yu e kisi den blesi di a o tyari kon? A lasti artikel o piki den aksi disi.