Na opobaka fu Yesus ben tranga a bribi fu den disipel èn a meki den du a wroko fu den fayafaya. Spesrutu na apostel Paulus ben teki waka na ini heri Pikin Asia nanga a kontren fu a Mindrikondre Se. Drape a seti gemeente èn a tranga den Kresten fu tan tanapu kánkan te den ben e kisi tesi èn te sma ben e gens den. Aladi den problema dati ben e miti den Kresten, toku a Kresten bribi go na fesi èn a panya na ala sei.

Bakaten sma poti Paulus na strafu-oso. Ma srefi drape a skrifi brifi fu gi a Kresten gemeente deki-ati nanga rai. A warskow den srefi gi wan moro bigi problema. Den ben musu luku bun nanga sma di ben drai baka gi a bribi. Nanga yepi fu Gado en santa yeye, Paulus ben si na fesi taki „ogri busidagu” di ben o taki „sani di no tru”, ben o kon na den mindri èn den ben o „hari den disipel kon na den baka”.—Tori fu den apostel 20:29, 30.

Na a kaba fu a fosi yarihondro, son sma bigin drai baka gi a tru bribi. Pikinmoro na a ten dati, Yesus di ben kisi wan opobaka, gi na apostel Yohanes na Openbaring, di e fruteri na wan agersifasi fa sani o waka na ini a ten di e kon. Soleki fa Yohanes ben skrifi na a ten dati, dan gensman nanga falsi leriman no ben o man tapu Gado fu du den sani di a ben abi na prakseri biginbigin gi libisma nanga grontapu. „Sma fu ala kondre, lo, tongo, nanga pipel” o yere a bun nyunsu fu Gado Kownukondre (Openbaring 14:6). Grontapu o tron wan paradijs, èn iniwan sma di wani du a wani fu Gado o man tan na ini a paradijs disi!

Yu no feni taki a sani disi na „bun nyunsu”? Efu na so, dan a bun fu kon sabi moro fu a Bijbel boskopu di Gado abi gi libisma. Kon sabi tu fa yu kan kisi wini fu en now èn na ini a ten di e kon.

Yu kan leisi Bijbel tapu Internet na www.jw.org/srn. Tapu a Web site dati, yu kan leisi sosrefi den brochure San na a boskopu fu Bijbel nanga Gado abi bun nyunsu gi wi! Sosrefi a buku San Bijbel e leri wi trutru? Yu kan leisi sosrefi tra buku di e sori fu san ede wi kan frutrow Bijbel èn fa wi kan fiti den bun rai fu en na ini wi osofamiri èn na ini wi eigi libi. Noso yu kan aksi iniwan Yehovah Kotoigi fu fruteri yu moro.

—Den tori disi abi fu du nanga Tori fu den Apostel, Efeisesma, Filipisma, Kolosesma, Fileimon, 1 Yohanes, Openbaring.