Aksi 3: Fu san ede Gado e gi pasi taki mi e pina?
IAN en papa ben de wan sopiman. Aladi Ian ben abi ala sani di a ben abi fanowdu, toku a no ben feni taki en papa ben lobi en. „Mi no ben abi trutru lobi gi mi papa, fu di a ben dringi so furu sopi èn fu di a no ben libi bun nanga mi mama,” na so Ian taki. Di Ian ben kon moro owru, a ben tweifri efu Gado de trutru. „Mi ben denki: ’Efu Gado de trutru, dan fu san ede a e gi pasi taki sma e pina?’”
Fu san ede a no fowtu fu poti na aksi disi?
Kande yu no abi furu problema na ini yu libi, ma fu di yu sabi san reti, meki yu ati e bron te yu e si fa sma di no du noti e pina. Ma te yusrefi e pina, dan yu e broko yu ede moro nanga a tori disi, neleki fa a ben de nanga Ian. Te yusrefi e pina noso efu wan lobiwan fu yu kon siki noso dede, dan a e kon tron wan prenspari sani gi yu fu sabi fu san ede yu e pina so.
Fa son sma e piki na aksi disi?
Son sma e bribi taki Gado e gi pasi taki wi e pina fu di a wani leri wi fu abi sakafasi èn fu di a wani wi fu abi sari-ati nanga sma di e pina. Trawan e bribi taki sma e pina fu di den musu kisi strafu gi den sondu di den du na ini a fosi libi fu den.
San den piki dati e sori fu den sma disi?
Den feni taki Gado no e firi noti te a si taki libisma e pina èn a muilek fu lobi Gado fu di a no e broko en ede nanga wi. Gi den, en na wan ogri-ati Gado.
San Bijbel e leri wi?
Bijbel e sori krin taki a no Gado e meki taki libisma e pina. „Te tesi e miti wan sma, a no musu taki: ’Na Gado e tesi mi’, bika nowan sma kan tesi Gado nanga ogri sani èn Gado srefi no e tesi sma tu” (Yakobus 1:13). Fu taki en leti, efu wan sma e denki taki na Gado e meki sma e pina, dan dati no e kruderi srefisrefi nanga san Bijbel e taki fu den fasi fu Gado. Fu san ede?
Wan fu den moro prenspari fasi di Gado abi na lobi (1 Yohanes 4:8). Fu sori a tori disi moro krin, Bijbel e taki dati Gado de neleki wan mama di abi wan pikin na bobi. Gado e aksi: „Wan mama sa frigiti en pikin di de na bobi ete? A no sa abi sari-ati gi en pikin di a meki? Kande wan mama sa frigiti en pikin, ma noiti mi sa frigiti yu” (Yesaya 49:15). Yu denki taki wan mama di lobi en pikin, sa du ogri nanga en fu espresi? Na presi fu dati, wan mama noso papa di lobi en pikin, sa du muiti fu yepi a pikin te a e pina. Na so a de tu taki Gado no e meki sma pina.—Genesis 18:25.
Aladi Gado lobi sma, toku den e pina. Yu e aksi yusrefi kande: ’Efu Gado lobi wi èn efu a abi ala makti, dan fu san ede a no e puru den sani di e meki taki wi e pina?’
A no fu soso Gado e gi pasi meki sma e pina te now ete. Luku wan sani fu san ede Gado e gi pasi taki disi pasa: Nofo tron na libisma e du sani di e meki taki trawan e pina. Furu sma di e kwinsi trawan nanga furu ogri-ati tiriman di e pina trawan, no wani kenki a fasi fa den e tyari densrefi. Sobun, efu Gado musu puru wan prenspari sani di e meki taki sma e pina, dan a sa musu pori den sma di e meki trawan e pina.
Na apostel Petrus skrifi fu san ede Gado no pori den sma ete di e du ogri: „Yehovah no e draidrai fu du san a pramisi, soleki fa son sma e prakseri. Ma a abi pasensi nanga unu, bika a no wani taki wan sma lasi libi. A wani taki ala sma musu kisi na okasi fu sori berow” (2 Petrus 3:9). Fu di Yehovah Gado lobi sma èn a abi sari-ati nanga den, meki a abi pasensi nanga den ete.
Ma heri esi Yehovah Gado sa du wan sani. ’Gado o pina den sma baka di e pina’ trawan. Den sma di e pina trawan o kisi strafu èn den „o kisi pori fu têgo”.—2 Tesalonikasma 1:6-9.
Ian di kari na a bigin, feni bun piki tapu den aksi fu en di abi fu du nanga a pina di sma e pina. Den sani di a leri meki a denki tra fasi fu a libi. Leisi a tori fu en na tapu bladzijde 13 fu a tijdschrift disi.
