Mi ben dren fu wroko na ini wan circus

Soleki fa Zoya Dimitrova fruteri

Di mi ben abi 15 yari, mi ben e du a sani di mi dren fu du èn mi ben de koloku, iya, mi ben e gi show na ini wan circus di ben go na difrenti presi. Ne tapu 4 september 1970, wan ogri sani miti mi. Di mi ben e drai salto hei na loktu, dan wantronso mi fadon kon na gron.

MI GEBORE tapu 16 december 1952, èn mi ben e libi nanga mi papa, mama, èn mi sisa na ini Sofia, na Bulgaria. Na a ten dati, Bulgaria ben de wan Communist kondre pe sma ben mag go na kerki, ma lanti no ben gi sma deki-ati fu du dati. Moro furu sma no ben e bribi na ini Gado, èn furu fu den sma di ben bribi na ini Gado no ben meki tra sma sabi dati. Aladi mi famiri ben taki dati den na fu na Orthodox kerki, toku den no kweki mi na ini a bribi dati èn mi no ben poti prakseri na Gado.

Di mi ben yongu ete, a ben de fu si taki mi ben lobi ala sortu sport, ma spesrutu gymnastiek. Di mi ben abi 13 yari, wan man kon na wi skoro fu suku wan meisje di a ben wani gi leri fu go na ini wan circus te fu kaba. A skoromeester di ben gi mi gymnastiek, ben taigi a man fu teki mi. Mi ben breiti srefisrefi fu rèi na ini a kefalek Amerkan oto fu a man disi di ben e tyari mi go na fesi difrenti grupu leriman di taki nanga mi èn di ben luku o bun mi man du gymnastiek. Mi ben breiti srefisrefi di den teki mi. Na so mi bigin oefen hebi èn mi ben musu du disi moro leki tu yari langa. Di mi ben kaba nanga dati, mi ben abi 15 yari èn na so mi bigin wroko na ini wan circus di ben go na difrenti presi. Na a bigin, mi ben go na heri Bulgaria, èn bakaten mi ben go na kondre di ben de wan pisi fosi fu Sovyet-Unie, èn mi ben go srefi na Algaria, Hungaria, nanga a kondre di ben nen Yugoslafia fosi.

Dri yari langa mi ben de koloku srefisrefi fu di mi ben du san mi ben dren fu du. Ne a kon pasa taki di mi ben e gi wan show na ini Titov Veles, na Masedonia, na ongoloku di skrifi na a bigin, pasa. Mi ben drai salto hei na loktu, aladi a publiki ben sidon na ondrosei e luku mi. A man nanga suma mi ben du a show disi, ben anga nanga en ede go na gron, èn a ben trowe mi go na loktu. Na so mi ben drai na loktu èn a ben fanga mi te mi ben fadon kon. Mi misi fu grabu en anu, èn a titei di ben musu hori mi, koti. Na so mi fadon fu 6 meter hei kon na gron. Den lon tyari mi go esi-esi na ati-oso, pe datra kon si taki mi anu, wan tu lebriki, nanga mi bakabonyo ben broko. Fu di mi ben kisi hebi mankeri, meki mi no ben sabi noti wan tu dei langa èn mi no ben man memre san ben pasa. Di mi kisi misrefi baka, mi kon si taki mi lan. Ma fu di mi ben yongu meki mi ben e howpu taki te mi ben o oefen èn te mi ben o du wan oparâsi, dan mi ben o man waka baka. Kande mi ben o man gi show baka na ini a circus.

Na ini den tu nanga afu yari baka dati, mi kisi datrayepi na spesrutu presi èn mi ben e howpu ete taki mi ben o kon betre baka. Te fu kaba, mi  kon si taki mi no ben o man du a sani moro di mi ben lobi fu du. Mi ben dren fu tan wroko na ini a circus, ma now mi heri libi kon kenki fu di mi kon de na ini wan rolsturu.

Mi bigin wan nyun libi

Fu di mi ben gwenti du furu sani, meki mi ben prakseri taki mi no ben o man nanga a kenki disi na ini mi libi. Fu di mi lasi ala howpu, meki mi ben firi brokosaka srefisrefi. Ne na ini 1977, wan yonkuman di nen Stoyan, naki na mi doro. Di mi kon sabi taki en na a brada fu wan fu den sma nanga suma mi ben e wroko fosi, mi kari en kon na inisei wantewante. Di wi ben e taki, dan a aksi mi efu mi ben denki taki mi ben o man kon betre baka. Fu di mi ben brokosaka srefisrefi, meki mi taigi en taki nowan howpu no de. Di a taigi mi taki na Gado wawan ben kan yepi mi, dan nanga bita-ati mi taigi en: „We, efu wan Gado de, dan fu san ede mi de na ini so wan situwâsi?”

Na so Stoyan bigin taki nanga mi na wan switi fasi èn a fruteri mi a tumusi moi pramisi di Bijbel e gi fu a ten di e kon. No so langa na fesi, Stoyan tron wan fu den Kotoigi fu Yehovah di a ben e wroko na ini wan circus na Amerkankondre. Mi ben breiti fu kon sabi taki heri esi grontapu o tron wan paradijs. A pramisi taki „dede no sa de moro; nowan sari, noso krei, noso pen no sa de moro”, naki mi ati trutru (Openbaring 21:4). Mi ben angri trutru fu kon betre baka! Wantewante mi agri fu studeri Bijbel ibri wiki. Na so mi bigin wan nyun libi. Now fosi mi feni a sani di e gi howpu trutru!

Ibri wiki mi ben angri fu studeri Bijbel. Na a bigin mi ben e studeri nanga Stoyan èn baka dati nanga Totka, wan sisa di abi switifasi trutru. A yepi mi fu kon sabi moro fu den tru tori fu Bijbel. Mi go na fesi heri esi, èn mi gi mi libi abra na Yehovah Gado. Na a ten dati, nowan sma ben de na ini Sofia di ben man dopu mi. Fu dati ede mi ben abi fu wakti teleki wan brada ben kon fu Masedonia. Tapu 11 september 1978, pikinmoro wán yari baka di mi bigin studeri Bijbel, mi teki dopu na ini mi oso, na ini wan bigi tobo pe sma e wasi na ini. Di mi teki dopu leki wan fu den Kotoigi fu Yehovah, dan dati gi mi bigi prisiri èn mi kon abi wan marki na ini mi libi.

Den tru tori fu Bijbel di mi ben leri, ben bron neleki wan faya na ini mi. Mi ben de fayafaya fu fruteri ala sma di ben kon na mi oso, fu a nyun howpu di mi kon abi. A de wan sari sani taki nowan sma ben poti seryusu prakseri na san mi ben taki, fu di den ben denki kande taki a mankeri di mi kisi meki taki wan sani no bun nanga mi.

Wan fowtu di meki mi sari srefisrefi

Na a ten dati, lanti ben tapu a wroko fu Yehovah Kotoigi na ini Bulgaria, èn wan tu Kotoigi nomo ben de na ini a kondre. Nowan gemeente konmakandra ben hori pe mi ben kan go èn pikinmoro mi no ben abi demakandra nanga  trawan di abi a srefi bribi leki mi. Mi no ben frustan taki a no bun fu abi krosibei demakandra nanga sma di no ben e libi soleki fa Bijbel markitiki e sori. Den sani disi meki taki mi meki wan fowtu, èn disi meki mi sari srefisrefi.

Mi konsensi ben tan fon mi èn a ben hati mi srefisrefi taki mi no ben abi wan bun matifasi moro nanga Yehovah Gado. Mi ben brokosaka srefisrefi èn mi ben e syen. Na so mi fruteri Yehovah ala sani di de tapu mi ati èn mi begi en pardon. Bakaten, den lobi-ati Kresten owruman yepi mi fu kon kisi wan bun matifasi baka nanga Yehovah. Na so mi kon abi a prisiri baka fu dini Yehovah. Mi e warderi en trutru fu abi a grani fu dini Yehovah nanga wan krin konsensi èn fu abi demakandra nanga a krin organisâsi fu en!

Mi de koloku aladi mi lan

Na ongoloku di mi kisi 40 yari pasa, meki taki mi kon de na ini wan rolsturu èn mi no ben man gi show moro na ini a circus di ben go na difrenti presi. Ma toku mi no e sari te mi e prakseri a ten dati, èn mi no feni taki mi no doro nowan marki na ini mi libi. Mi ben denki taki mi ben o de koloku te mi ben o wroko na ini a circus. Ma den tru tori fu Bijbel yepi mi fu frustan taki den sani dati no ben o meki mi de koloku fu ala ten. Mi si fa den sma di mi ben e wroko nanga den fosi, meki en na ini a circus, ma den ondrofeni furu sari sani na ini den libi. Na a tra sei mi feni a moro bigi gudu di de, iya, mi abi wan matifasi nanga mi Mekiman, Yehovah Gado. Disi gi mi moro bigi prisiri leki san mi ben o kisi te mi ben o tan wroko na ini a circus.

Boiti dati, mi breiti fu si fa furu trawan kon kisi sabi fu den tru tori fu Bijbel èn den gi den libi abra na wi lobi-ati Gado, Yehovah. Di mi bigin studeri Bijbel na ini 1977, wan tu Kotoigi fu Yehovah ben de nomo na ini Bulgaria. Srefi na ini 1991, baka di a Communist tirimakti fadon èn di Yehovah Kotoigi kisi primisi fu lanti fu a fosi leisi fu anbegi Gado, no moro leki wán hondro Kotoigi ben de na ini a heri kondre. A gi mi furu prisiri fu si taki a nomru fu Kownukondre preikiman gro te go miti pikinmoro 1800 preikiman now!

Furu wroko de fu du ete na ini Bulgaria. Furu sma e suku fu kisi sabi fu Gado Wortu. Wi kan  si disi na a moi nomru fu 3914 sma di ben kon na a Memrefesa fu a dede fu Krestes na ini 2010. A e gi mi prisiri te mi e prakseri fa a sani disi e sori taki Yehovah blesi a wroko di ben bigin so pikin na ini Bulgaria. Misrefi si fa „a pikin pipel” gro kon tron „wan makti pipel”, soleki fa Yesaya 60:22 taki na fesi.

Wan tra sani di gi mi prisiri èn di ben de wan prenspari sani na ini mi libi, na di a Nyun-Grontapuvertaling fu den Santa Buku fu Bijbel kon na doro na ini Bulgariatongo. A sani disi pasa na ini augustus 2009 na a „Tan na ai!” Distrikt Kongres di ben hori na ini Sofia. Di a Bijbel disi kon na doro na ini mi eigi tongo, dan dati ben de leki wan dren di kon tru! A no de fu taki dati disi o de wan heri bun sani di o yepi moro furu sma na ini Bulgaria fu kisi sabi fu den tru tori fu Bijbel.

Fu di mi lan, meki mi no man du so furu leki san mi ben sa wani na ini a preikiwroko fu a bun nyunsu fu Gado Kownukondre. Ma toku a e gi mi bigi prisiri fu fruteri den birtisma fu mi èn iniwan sma di e kon na mi doro, den tru tori fu Bijbel. Wan leisi di mi ben de na mi balkon, mi kari wan uma fu a birti di a ben e waka pasa. Mi kari en kon na inisei, èn di mi fruteri en wan tu moi sani fu Bijbel, a ben wani studeri Bijbel wantewante. Mi ben breiti srefisrefi di a teki dopu bakaten, èn now a de wan Kresten sisa fu mi. Mi ben abi a grani fu yepi fo sma fu doro den markitiki fu gi densrefi abra na Yehovah.

A moro bigi prisiri di mi abi èn a moro bun deki-ati di mi e kisi, na te mi e go doronomo na den Kresten konmakandra pe moro leki wán hondro brada nanga sisa de di tron leki mi famiri. Na ini a kondre fu mi, owrusma nanga sikisma no e kisi yepi fu go na presi nanga spesrutu wagi noso bus. Disi e meki en muilek gi mi fu go na den gemeente konmakandra. Ma mi de nanga bigi tangi taki wan yongu brada e yepi mi. Ibri konmakandra, a e tyari mi fu mi oso go na ini en wagi, èn fu en wagi go na ini a Kownukondre zaal. Na so a e tyari mi kon baka na oso. Nanga mi heri ati mi e taki Yehovah tangi dati mi abi a grani fu de wan pisi fu so wan lobi-ati famiri fu Kresten brada nanga sisa!

Te mi e denki baka fu fositen, dan mi kan si taki mi libi waka heri tra fasi leki fa mi ben fruwakti di mi ben yongu. Fu di mi e dini Yehovah, meki mi kon abi a moro bigi prisiri di mi ben kan abi èn mi abi wan tumusi moi howpu gi a ten di e kon. Mi lobi a pramisi fu Gado di e taki dati na ini a paradijs na grontapu, den „lansma o kren leki dia na tapu den bergi” (Yesaya 35:6). Mi e angri trutru taki a dei doro te mi o dyompo opo fu mi rolsturu, fu di mi o de gosontu dorodoro èn mi o tranga baka.

[Prenspari pisi na tapu bladzijde 30]

„A moro bigi prisiri di mi abi èn a moro bun deki-ati di mi e kisi, na te mi e go doronomo na den Kresten konmakandra”

[Prenspari pisi na tapu bladzijde 31]

„Wan prenspari sani na ini mi libi, na di a Nyun-Grontapuvertaling fu den Santa Buku fu Bijbel kon na doro na ini Bulgariatongo”

[Prenki na tapu bladzijde 29]

Mi bigin gi show di mi ben abi 15 yari