Leisiman e aksi . . .

A de so taki ala reti-ati Kresten e go na hemel?

▪ Furu sma leisi den wortu disi fu Yesus di e gi trowstu: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). A de so taki Yesus ben wani sori taki ala reti-ati anbegiman fu en Tata, Yehovah Gado, ben o go na hemel fu libi drape fu têgo èn fu de koloku?

Luku a prenspari sani di Yesus ben taki: „Nowan sma opo go na hemel, boiti a sma di saka komoto fu hemel, namku a Manpikin fu libisma” (Yohanes 3:13). A sani disi wani taki dati reti-ati anbegiman fu owruten soleki Noa, Abraham, Moses nanga David no go na hemel (Tori fu den Apostel 2:34). Pe den alamala go dan? Fu taki en syatu: Den reti-ati anbegiman disi di dede, de na ini a grebi pe den no sabi notinoti èn den e wakti wan opobaka.​—Preikiman 9:5, 6; Tori fu den Apostel 24:15.

Yesus na a fosiwan di ben taki dati son sma ben o libi na ini hemel baka te den dede. A ben taigi den apostel fu en taki a ben o sreka wan presi gi den na hemel (Yohanes 14:2, 3). A sani disi ben de wan nyun sani gi a pipel fu Gado. Bakaten, na apostel Paulus fruklari taki baka di Yesus dede èn kisi wan opobaka fu go na hemel, dan Yesus ’opo wan nyun pasi gi den disipel fu en di ben o tyari den go na libi’. Disi na wan pasi pe nowan sma ben go na tapu ete.​—Hebrewsma 10:19, 20.

Ma disi wani taki dati sensi a ten dati, ala reti-ati sma ben o go na hemel? Nôno, bika na opobaka fu go na hemel abi fu du nanga wan spesrutu wroko di wan tu libisma nomo kisi fu du. A lasti neti di Yesus ben de makandra nanga den apostel fu en, a taigi den taki den ben o „sidon na tapu kownusturu fu krutu” na ini a hemel Kownukondre fu en. Sobun, a wroko di den ben o kisi fu du, na fu tiri makandra nanga Yesus na ini hemel.​—Lukas 22:28-30.

Boiti den apostel, tra sma ben o kisi a tumusi moi wroko disi tu. Na ini wan fisyun, na apostel Yohanes ben si Yesus na ini hemel nanga wan grupu sma di kisi wan opobaka. Bijbel e kari den sma disi ’kownu nanga priester di o tiri grontapu’ (Openbaring 3:21; 5:10). Omeni fu den sma disi ben de drape? Soleki fa a de na ini ibri tirimakti, dan wan pikin grupu nomo abi a frantwortu fu tiri. Na so a de tu nanga a hemel Kownukondre disi. Yesus, a Pikin Skapu fu Gado, e tiri makandra nanga 144.000 tra sma „di bai puru na mindri libisma”.​—Openbaring 14:1, 4, 5.

A tru taki a nomru fu 144.000 sma no bigi te yu e agersi en nanga a nomru fu ala den reti-ati futuboi fu Gado, di ben libi fositen èn di e libi now. Ma a sani disi no muilek fu frustan te wi e hori na prakseri taki den 144.000 sma kisi wan opobaka na ini hemel fu du wan spesrutu santa wroko drape. Efu yu ben o bow wan oso, dan yu ben o yuru ala den temreman di e libi na ini a kontren fu yu? Nôno. Yu ben o teki someni temreman leki yu ben o abi fanowdu gi a wroko dati. Na so a de tu taki Gado no e gi ala reti-ati sma a spesrutu grani fu tiri makandra nanga Krestes na ini hemel.

A hemel tirimakti disi o meki den sani kon tru di Gado ben abi na prakseri di a meki libisma. Yesus nanga den 144.000 sma di o tiri makandra nanga en, o sorgu taki heri grontapu tron wan paradijs pe bun furu reti-ati sma o libi fu têgo èn pe den o de koloku (Yesaya 45:18; Openbaring 21:3, 4). Den sma di de na ini Gado en prakseri, o kisi wan opobaka tu.​—Yohanes 5:28, 29.

Ibri reti-ati anbegiman fu Yehovah, iya, den wan fu fositen èn den wan na ini a ten disi, o kisi a tumusi moi presenti fu libi fu têgo (Romesma 6:23). Wan tu sma o kisi libi na ini hemel fu du wan spesrutu wroko èn a moro bigi pisi fu sma o libi na ini wan paradijs na grontapu.