Di sma ben aksi Yesus san na a moro bigi komando, dan Yesus ben taki: „Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan” (Mateyus 22:37). Ma fosi sma kan lobi Gado, den musu kisi soifri sabi fu en (Yohanes 17:3). Ala sma o kisi na okasi fu kon abi a sabi disi?

A moro prenspari sani di kan yepi wi fu kon leri sabi Gado, prenspari na Bijbel (2 Timoteyus 3:16). Furu sma e libi na presi pe den kan feni wan Bijbel makriki. Kande den srefi sma disi e kisi wan kari furu leisi fu kon leri sabi Gado nanga yepi fu wan Bijbelstudie (Mateyus 28:19). Tra sma gro kon bigi na ini wan Kresten osofamiri, pe den papa nanga mama gi den na okasi ibri dei fu kon leri sabi sani fu Gado.—Deuteronomium 6:6, 7; Efeisesma 6:4.

Ma tra sma no e kisi den srefi okasi disi. Son sma gro kon bigi na ini wan osofamiri pe papa nanga mama du ogri nanga den pikin fu den èn den no sori lobi gi den pikin (2 Timoteyus 3:1-5). Den sma di gro kon bigi na ini so wan osofamiri, kan feni en muilek fu si Gado leki wan lobi-ati hemel Tata. Furu sma no kisi nofo skoroleri, èn disi e meki en muilek gi den fu leisi Bijbel. Trawan baka, meki falsi kerkileri kori den, noso den gro kon bigi na ini wan osofamiri, na ini wan libimakandra, noso na ini wan kondre pe den no mag leri sani fu Bijbel (2 Korentesma 4:4). A situwâsi fu den sortu sma disi e meki taki den no e kisi na okasi fu leri sabi Gado èn fu kon lobi en?

Yesus ben sabi taki son sma o kisi problema di o meki en muilek gi den fu kon lobi Gado èn gi yesi na En (Mateyus 19:23, 24). Ma Yesus ben taigi den disipel fu en fu hori na prakseri taki aladi son problema sori bigi gi libisma, toku „Gado man du ala sani”.—Mateyus 19:25, 26.

Poti prakseri na den sani di e kon now: Yehovah Gado sorgu taki en Wortu, Bijbel, prati na heri grontapu moro leki iniwan tra buku. Bijbel ben taki na fesi dati a bun nyunsu di abi fu du nanga Gado èn nanga den sani di a abi na prakseri gi grontapu, ben o preiki na „heri grontapu” (Mateyus 24:14). Na ini a ten disi, Yehovah Kotoigi e preiki a bun nyunsu dati na ini moro leki 230 kondre èn den e tyari Bijbel publikâsi kon na doro na ini sowan 500 tongo. Srefi den sma di no kisi na okasi fu leisi Bijbel, kan leri furu fu a tru Gado te den e luku den sani di a meki.—Romesma 1:20.

Boiti dati, Gado Wortu e taki: „Yehovah e ondrosuku na ati fu ala sma èn a sabi ibri sani di wan sma e prakseri fu du. Efu yu suku en, a o meki yu feni en” (1 Kroniki 28:9). Sobun, aladi Yehovah no pramisi taki ibri sma o kisi a srefi okasi fu kon sabi en, toku a e sorgu taki ala reti-ati sma e kisi wan okasi fu kon sabi en. A o sorgu srefi taki den sma di noiti no kisi na okasi fu kon leri sabi en, o man kon leri sabi en te den kisi wan opobaka fu libi na ini wan nyun grontapu pe retidu sa de.—Tori fu den Apostel 24:15.