Wan Kownukondre zaal na wan presi fu anbegi, pe Yehovah Kotoigi e hori den konmakandra. Dusundusun Kownukondre zaal de na heri grontapu. Ibri wiki, moro leki 105.000 gemeente fu Yehovah Kotoigi e kon makandra na ini den sortu zaal disi.

Ibri Kownukondre zaal abi wan pisi pe den arkiman e sidon arki Bijbelstudie programa nanga lezing. Na ini moro furu fu den zaal, yu abi wan podium fu pe leri e gi. Nofo tron sidonpresi de gi sowan 100 te go miti 300 sma. A Kownukondre zaal kan abi sosrefi wán noso tu tra kamra di de leki klas, a kan abi wan kantoro, nanga wan pikin bibliotheek pe Bijbel publikâsi de nanga tra sortu buku. Drape iniwan memre fu a gemeente kan go efu a wani ondrosuku wan tori.

Ma na ini wan Kownukondre zaal yu no o feni nowan altari, popki, noso kroisi soleki fa a de na ini den kerki fu Krestenhèit. Fu san ede? Yehovah Kotoigi e bribi taki den sortu sani dati de teige a Bijbel komando di e taki dati wi musu „wai pasi gi na anbegi fu kruktugado” (1 Korentesma 10:14; Yohanes 4:24). Furu kerki nanga tempel lai nanga wan lo pranpran. Ma tra fasi leki dati, den Kownukondre zaal meki na so wan fasi taki den kan gebroiki ibri pisi fu a zaal èn den no abi furu pranpran. A moro prenspari sani a no a zaal, ma na a Bijbel leri di e gi drape.

Pe a nen Kownukondre zaal komopo? Na den konmakandra na ini wan Kownukondre zaal, den e poti prakseri na Bijbel leri èn a moro prenspari boskopu fu Bijbel di e taki fu „Gado kownukondre”. Disi ben de a moro prenspari sani fu san Yesus ben e taki na ini en diniwroko (Lukas 4:43). Sobun, a nen Kownukondre zaal di den ben teki na ini den yari baka 1930, fiti. A nen e sori gi san den e gebroiki den zaal disi. Den e gebroiki den zaal disi fu meki a tru anbegi go na fesi èn den zaal na den moro prenspari presi gi a preiki di sma e preiki „a bun nyunsu . . . fu a kownukondre” (Mateyus 24:14). Fu dati ede, den no e gebroiki den Kownukondre zaal gi fesa fu meki prisiri noso fu seri sani. Nanga yepi fu friwani bijdrage di sma e gi, den e bow den zaal disi, den e pai den kostu gi den zaal èn den e horibaka gi a preikiwroko. Noiti den e piki moni na ini den zaal. Na presi fu dati, wan boksu de efu wan sma wani gi wan bijdrage.

Na heri grontapu, den e gebroiki den Kownukondre zaal gi a srefi sani, ma den zaal disi bow na difrenti fasi èn den no bigi a srefi. Den bow den zaal disi nanga sani di den kan feni na ini a kontren dati, den e luku sosrefi fa a weer de, èn omeni moni den Yehovah Kotoigi drape man gi. Sonwan fu den zaal meki fu ston noso fu udu. Tra zaal no abi skotu na sei-sei, èn trawan meki nanga bambu skotu nanga tasi-daki.

Ala ten, fisitiman kan kon na den konmakandra di e hori na den Kownukondre zaal (Hebrewsma 10:25). Fu taki en leti, ibri wiki wan konmakandra e hori spesrutu gi a publiki pe den e taki fu wan Bijbel prakseri di fiti gi den memre fu a gemeente èn sosrefi gi fisitiman. Fu san ede yu no e go na wan fu den konmakandra na ini a Kownukondre zaal na ini yu birti?