Fa yu kan abi wan koloku osofamiri libi?

Te yu trowpatna abi spesrutu yepi fanowdu

Sensi datra kon si taki mi abi wan siki di e meki mi weri srefisrefi, dan na mi masra wawan musu wroko fu sorgu gi na osofamiri. Ma noiti a e taki nanga mi fu den moni afersi fu na osofamiri. Fu san ede a no e taki nanga mi fu a sani disi? A musu de so taki wi abi so furu kostu, taki a e frede taki mi o broko mi ede tumusi efu a taigi mi.—Nancy. *

A KAN muilek son leisi na ini a trowlibi. Ma te wan fu den patna siki seryusu fu wan langa pisi ten, aladi a trawan gosontu, dan a situwâsi kan kon moro hebi. * Yu e sorgu gi yu trowpatna di kon siki? Efu dati de so, dan yu e broko yu ede nanga wan tu fu den sani disi: ’Fa mi o du efu mi trowpatna kon moro siki? O langa mi o man tan sorgu gi mi trowpatna, aladi na a srefi ten mi musu bori, krin oso, èn du grontapuwroko? Fu san ede mi e firi fruferi taki mi na a wan di gosontu?’

Na a tra sei, efu yu na a sma di e siki, dan kande yu e aksi yusrefi: ’Fa mi kan abi lespeki gi misrefi te mi no man tyari mi frantwortu na ini na osofamiri? Mi trowpatna e fruferi fu mi, fu di mi siki? Wi o man de koloku ete leki trowpaar?’

A de wan sari sani taki son trowpaar broko trow, fu di a siki fu wan fu den patna ben kon hebi tumusi gi den. Ma disi no wani taki dati sani no kan waka bun moro na ini yu trowlibi te yu patna kon siki.

Furu trowpaar tan nanga makandra èn a trowlibi go moro bun srefi, aladi wan fu den patna kon siki seryusu. Luku na eksempre fu Yoshiaki nanga Kazuko. Fu di Yoshiaki ben kisi mankeri na en baka, meki a abi yepi fanowdu nanga ala sani di a e du, srefi efu na wan pikin sani nomo. Kazuko e taki: „Mi masra abi yepi fanowdu nanga ala sani di a e du. Fu di mi musu du ala sani gi en, meki mi neki, mi skowru, nanga mi anu e hati mi srefisrefi. Fu dati ede mi musu go doronomo fu kisi datrayepi gi a sani disi. Nofo tron mi e firi taki a hebi tumusi gi mi fu sorgu gi mi masra.” Aladi a muilek srefisrefi, toku Kazuko e taki: „Mi nanga mi masra kon moro bun nanga makandra leki trowpaar.”

San kan meki trowpaar de koloku na ini so wan situwâsi? Den trowpaar di tan abi prisiri na ini a trowlibi fu den, na den wan di e si a siki leki wan sani di abi krakti tapu a patna di e siki  èn sosrefi tapu a wan di gosontu. Fu taki en leti, efu wan trowpatna siki, dan a sani dati abi furu krakti tapu den ala tu, aladi a situwâsi fu den e difrenti. Disi e sori taki masra nanga wefi abi makandra fanowdu. A sani disi e kon na krin na ini Genesis 2:24, pe skrifi: „Wan man o gowe libi en papa nanga en mama. A musu tai hori na en wefi èn den musu tron wán skin.” Sobun, te wan fu den trowpatna abi wan siki di e tan fu wan langa pisi ten, dan a de tumusi prenspari taki a masra nanga a wefi e wroko makandra na ini a muilek situwâsi disi.

Boiti dati, ondrosuku e sori taki trowpaar di tan abi wan bun matifasi nanga makandra, aladi wan fu den e siki seryusu, na den wan di teki a situwâsi leki fa a de èn den leri fa fu fiti densrefi so taki a e go moro bun. Furu fu den sani di yepi den, de a srefi leki den Bijbel rai di bun ala ten. Luku dri sani di e kon now.

Hori makandra na prakseri

„Tu moro bun leki wán”, na so Preikiman 4:9 e taki. Fu san ede? Vers 10 e taki: „Efu wan fu den ben sa fadon, dan a trawan kan opo en patna.” Yu e ’opo yu patna’, fu di yu e taki sani di e sori taki yu abi warderi gi en?

Unu man luku na sortu fasi unu kan yepi makandra? Yong, di abi wan wefi di lan na wan sei, e taki: „Mi e pruberi fu hori mi wefi na prakseri na ibri okasi. Te watra e kiri mi, dan mi e prakseri taki watra kan kiri en tu. Efu mi wani go na dorosei fu luku wan tu moi sani, mi e aksi en efu a wani kon nanga mi. Wi ala tu e tyari a hebi lai na ini a muilek situwâsi disi, èn wi e yepi makandra fu horidoro.”

Na a tra sei, efu yu trowpatna e sorgu gi yu, dan sani de di yu kan du gi yusrefi sondro fu yu kon siki moro? Efu yu kan du wan tu sani gi yusrefi, dan dati kan meki yu denki moro bun fu yusrefi, èn dati kan de wan yepi gi yu trowpatna fu tan sorgu gi yu.

No denki taki yu sabi san na a moro bun fasi fa yu kan sori taki yu e hori yu trowpatna na prakseri. Na presi fu dati, yu kan aksi en san a ben o wani yu du. Nancy, di wi ben taki fu en na a bigin, ben taigi en masra bakaten fa a ben e firi taki a no sabi noti fu den moni afersi fu na osofamiri. Now en masra e du muiti fu fruteri en moro fu na afersi disi.

PRUBERI FU DU DISI: Skrifi wan tu sani di yu denki taki yu trowpatna kan du fu meki a situwâsi kon moro makriki, èn meki yu trowpatna du a srefi tu. Luku san a skrifi èn meki en luku san yu skrifi. Ibriwan fu unu musu teki wán, noso tu fu den sani di unu skrifi èn di unu kan du trutru.

Abi wan spesrutu ten fu du son sani

A koni Kownu Salomo ben skrifi: „Gi ala sani wan fasti ten de” (Preikiman 3:1). Ma a kan sori leki a muilek fu tan du son sani na wan spesrutu ten, fu di a siki fu wan fu den patna kan tyari bruya kon na ini den sani di na osofamiri gwenti du. San unu kan du fu tan du son sani di unu ben gwenti du?

Leki trowpaar unu kan teki en leki wan gwenti fu du sani fu puru unu prakseri na den broko-ede di a siki e tyari kon. Unu kan tan du wan tu fu den sani ete di unu ben gwenti du fosi yu trowpatna kon siki? Efu dati no kan, dan sortu tra sani unu kan pruberi fu du? Kande unu kan du wan makriki sani soleki fu leisi gi makandra, noso wan moro muilek sani soleki fu leri wan tra tongo. Te wi e du sani makandra aladi a trawan e siki, dan dati kan meki unu de moro bun nanga makandra leki „wán skin” èn unu kan de moro koloku.

Wan tra sani di unu kan du na fu abi demakandra nanga tra sma. Bijbel e taki na ini Odo 18:1: „Wan sma di e hori ensrefi aparti, sa suku en eigi wini nomo; a sa handri na wan fasi di e sori taki a no e poti prakseri kwetikweti na koni rai.” Yu si na ini a tekst disi taki te wan sma e hori ensrefi aparti, dan dati kan abi krakti tapu en prakseri? Ma na a tra sei te unu abi demakandra nanga tra sma, dati kan meki unu firi bun èn a kan yepi unu fu kisi wan bun denki fu sani. Kande yu kan gi wan sma a kari fu kon na yu.

Son leisi a kan muilek gi a patna di musu sorgu gi a trawan di siki, fu tan du son sani na wan  spesrutu ten. Son sma e teki tumusi furu wroko na den tapu, èn dati e meki den kon weri safrisafri. Na so fasi den kan meki den eigi gosontu go na baka. Te fu kaba, den no o man sorgu moro gi a lobi trowpatna fu den. Sobun, efu yu e sorgu gi yu trowpatna di siki seryusu, dan no frigiti fu poti prakseri na den sani di yusrefi abi fanowdu. Abi a gwenti fu poti ten na wan sei fu kisi krakti baka. * Son sma feni taki te den e taki ten na ten nanga wan bun mati fu den broko-ede fu den, dan dati e yepi den. Efu yu na wan wefi, dan yu kan taki nanga wan sisa, èn efu yu na wan masra, yu kan taki nanga wan brada.

PRUBERI FU DU DISI: Skrifi na tapu papira sortu sani e meki en muilek gi yu fu sorgu gi yu trowpatna di siki. Dan skrifi wan tu sani di yu kan du fu meki en moro makriki gi yu. Na presi fu luku ibri pikinpikin sani, aksi yusrefi: ’San na a moro makriki sani di mi kan du fu meki a situwâsi kon moro bun?’

Pruberi fu tan abi wan bun denki fu sani

Bijbel e warskow: „No taki: ’Fosi, sani ben betre moro now’, bika a no wan koni sani fu taki so” (Preikiman 7:10). Sobun, no go prakseri fa a libi ben o de efu yu trowpatna no ben siki. Hori na prakseri taki na ini a grontapu disi yu no kan de koloku dorodoro. A sani di de prenspari na taki yu musu teki a situwâsi fu yu leki fa a de, èn pruberi fu du ala san yu man so taki sani go bun.

San kan yepi yu nanga yu trowpatna ini a tori disi? Taki nanga makandra fu den blesi di unu kisi. Efu yu si taki a e go pikinso bun nanga a gosontu fu yu, dan breiti nanga dati. Luku sortu prisiri sani unu kan du na ini a ten di e kon, èn poti marki di unu kan doro.

Shoji nanga Akiko, wan trowpaar di fiti a rai disi, ben abi bun bakapisi. Baka di Akiko kisi reuma, dan den ben musu gowe libi a spesrutu furuten diniwroko di den ben e du leki Kresten. Den ben brokosaka? Iya, a no de fu taki dati a sani disi pasa. Toku, Shoji e gi den sma di de na ini a srefi sortu situwâsi disi, a rai: „No broko yu srefi saka, fu di yu e prakseri den sani di yu no man du moro. Tan abi wan bun denki fu sani. Srefi efu unu ala tu abi a howpu taki a situwâsi fu unu kan de baka leki fa a ben de, toku a bun fu poti prakseri na a fasi fa un libi de now. Gi mi dati wani taki dati mi e poti prakseri na mi wefi èn mi e yepi en.” Den bun rai disi kan yepi yu tu efu yu trowpatna abi spesrutu yepi fanowdu.

[Futuwortu]

AKSI YUSREFI . . .

San mi nanga mi trowpatna musu du now?

▪ Wi musu taki moro fu a siki

▪ Wi no musu taki so furu fu a siki

▪ Wi no musu broko wi ede so furu

▪ Wi musu poti moro prakseri na makandra

▪ Wi musu du sani di wi ala tu lobi, aladi a trawan e siki

▪ Wi musu abi moro demakandra nanga trawan

▪ Wi musu poti marki di wi ala tu kan doro

[Prenki na tapu bladzijde 20]

Unu kan du wan prisiri sani makandra so taki unu no e poti prakseri soso na a siki?