Leisiman e aksi

Gado feni en bun te wan sma abi moro leki wán trowpatna?

Nôno, na ini Eden, Gado ben sori taki wan sma musu abi wán trowpatna nomo. Bakaten, Yesus Krestes taigi den bakaman fu en a srefi sani disi.​—Genesis 2:18-24; Mateyus 19:4-6.

Ma den man leki Abraham, Yakob, David, nanga Salomo di ben e libi na ini a ten bifo den Kresten, ben abi moro leki wán wefi, a no so? Dati de so, ma san Bijbel e taki fu a sani disi? Bijbel e sori taki problema nanga trobi ben de na ini na osofamiri fu Abraham nanga Yakob, fu di den ben abi moro leki wán wefi (Genesis 16:1-4; 29:18–30:24). Bakaten, a Wet fu Gado ben taki dati ibri kownu ben musu hori ensrefi na a sani disi: „A kownu no musu teki furu wefi . . . bika den wefi kan meki taki a drai baka gi Gado” (Deuteronomium 17:15, 17). Salomo no ben hori ensrefi na a wet disi, fu di a ben trow nanga moro leki 700 uma! A de wan sari sani taki Salomo trutru ben drai baka gi Yehovah, fu di den furu wefi fu en ben abi takru krakti na en tapu (1 Kownu 11:1-4). A de krin fu si taki Bijbel no feni en bun te wan sma abi moro leki wán trowpatna.

Toku son sma kan aksi densrefi fu san ede Gado ben gi pasi taki en pipel ben du a sani dati. Fu eksempre, a pasa wan leisi kaba taki fu wan pisi ten yu tan du wan wroko di yu no lobi? Kande yu du dati fu di yu ben feni taki yu no man libi a wroko noso taki yu no man suku wan tra wroko na a momenti dati, bika dati ben kan abi takru bakapisi gi yu osofamiri. Na a srefi fasi, Yehovah ben abi bun reide fu san ede a ben gi pasi taki a pipel fu en du son sani di a no lobi. A no de fu taki dati den prakseri fu Gado hei moro di fu wi (Yesaya 55:8, 9). Ma wi kan kon frustan wan tu bun reide fu san ede Gado ben gi pasi fu wan pisi ten, taki sma ben kan abi moro leki wán trowpatna.

Memre taki na ini Eden, Yehovah ben pramisi taki wan „pikin” ben o gebore di ben o pori Satan te fu kaba. Bakaten, Yehovah taigi Abraham taki a ben o tron a papa fu wan bigi pipel, èn taki fu en famiri a Pikin ben o gebore di Gado ben pramisi (Genesis 3:15; 22:18). Satan ben o du ala san a man fu sorgu taki a Pikin dati no gebore. Fu dati ede, a ben de nomonomo fu pori a pipel fu Israel fu owruten. Furu leisi, a ben kori den Israelsma fu du sondu, so taki Gado no ben o feni den bun moro èn a no ben o kibri den moro.

Fu yepi den Israelsma fu no fadon na ini den triki fu Satan, dan doronomo Yehovah ben e seni en profeiti fu warskow en pipel te den ben bigin drai baka gi den bun wet fu en. Ma a ben sabi na fesi taki nofo tron a pipel fu en no ben o gi yesi na den prenspari komando fu en, soleki a wan di e taki dati den no mag anbegi kruktugado (Exodus 32:9). Efu a ben de so muilek gi den fu gi yesi na so wan prenspari wet, dan fa den ben o man gi yesi na wan wet di e taki dati den no mag abi moro leki wán trowpatna? Fu di Yehovah sabi heri bun fa libisma de, meki a ben si taki a ten no ben doro ete fu gi wan komando teige a gwenti disi, di sma ben abi fu wan langa pisi ten kaba. Efu a ben du dati, dan Satan ben o feni wan moro makriki fasi fu kori den Israelsma fu du sondu.

A gi di Gado ben gi pasi fu wan pisi ten taki sma ben kan abi moro leki wán trowpatna, ben abi tra wini tu. A ben meki taki a pipel ben kon moro bigi esi-esi. Fu di a pipel ben bigi so, meki na so fasi den ben o tan teleki a ten fu a Mesias. Boiti dati, a seti dati ben de wan kibri tu gi son umasma. Fu di a ben meki taki na ini ten te ogri ben kan miti den, den abi wan presi fu kibri èn wan tanpe.

Ma hori na prakseri taki a seti disi no kon fu Yehovah. Aladi a ben gi pasi taki sma du dati fu wan pisi ten, toku a ben poti krinkrin wet di abi fu du nanga a sani disi, so taki sma no handri na wan fowtu fasi nanga trawan (Exodus 21:10, 11; Deuteronomium 21:15-17). Di Yehovah bosroiti fu tyari wan kaba kon na a gwenti disi di ben de na mindri den anbegiman fu en, dan a gebroiki en eigi Manpikin fu sori sma baka taki den musu abi wán trowpatna nomo, soleki fa Gado ben seti dati na ini Eden. Na so fasi Yesus ben sori krin taki den bakaman fu en no ben mag abi moro leki wán trowpatna (Markus 10:8). Na so a tru tori disi kon moro krin: A Wet di Gado ben gi Moses ben bun gi a ten dati, ma „a wet fu Krestes”, moro bun srefi.​—Galasiasma 6:2.