MEKI wi go luku san a wani taki dati wan sma e dyarusu tapu wan trawan. Kande a pasa wan leisi dati sma e taki dati wan trawan bun, taki a moi, noso taki a koni. A sani disi ben meki en muilek gi yu fu lobi a sma dati? *— We, dati kan pasa te yu e dyarusu tapu wan sma.

Pikin kan dyarusu te papa nanga mama lobi a wan pikin moro a trawan. Bijbel e taki fu wan osofamiri pe wan bigi problema ben kon de fu di sma ben e dyarusu. Meki wi go luku sortu problema dati ben tyari kon èn san wi kan leri fu a sani dati.

Yosef ben de a di fu 11 manpikin fu Yakob, èn den afu-brada fu Yosef ben dyarusu tapu en. Yu sabi fu san ede?— Fu di a papa fu den, Yakob, ben lobi Yosef moro. Fu eksempre, Yakob ben gi Yosef wan moi strepistrepi dyakti. Yakob ben lobi Yosef moro leki den trawan „bika a ben kisi Yosef di a ben owru kaba”, èn Yosef ben de a fosi pikin di a meki nanga en wefi Rakel, di a ben lobi srefisrefi.

Bijbel e taki dati ’di den brada fu Yosef kon si taki den papa ben lobi Yosef moro den, dan den ben kisi bita-ati gi en’. Ne wan dei Yosef taigi en famiri taki a ben dren dati den alamala, sosrefi en eigi papa, ben boigi gi en. Bijbel e taki dati „den brada fu en kon dyarusu na en tapu”, èn srefi en papa piri-ai gi en fu di a fruteri san a ben dren.—Genesis 37:1-11.

Wan pisi ten baka dati, di Yosef ben abi 17 yari, den brada fu en ben de na wan farawe presi pe den ben luku den skapu nanga krabita fu a famiri. Fu dati ede, Yakob seni Yosef fu go luku fa a e go nanga den brada fu en. Yu sabi san furu fu den ben  wani du di den si taki a e kon?— Den ben wani kiri en! Ma tu fu den brada fu en, Ruben nanga Yuda, no ben wani du dati.

Di wan tu bisnisman ben de na pasi fu go na Egepte, èn den ben pasa drape, dan Yuda taki: „Kon meki wi seri en.” Na so den seri Yosef. Baka dati, den kiri wan bokoboko èn den dopu a dyakti fu Yosef na ini a brudu fu a bokoboko. Bakaten, di den sori den papa a dyakti, dan a bari: ’A musu de taki wan ogri meti nyan Yosef!’—Genesis 37:12-36.

Baka wan pisi ten, Farao, a tiriman fu Egepte, ben kon lobi Yosef. Disi ben pasa fu di Gado ben gi Yosef a koni fu fruteri Farao san den tu dren fu Farao wani taki. Na ini a fosi dren, Farao ben si seibi fatu kaw èn baka dati seibi mangri kaw. Na ini a di fu tu dren, a ben si seibi span taki nanga aleisi èn baka dati seibi fini taki nanga aleisi. Yosef ben taki dati den tu dren wani taki dati seibi yari langa den ben o koti bun furu nyanyan, èn baka dati seibi yari angriten ben o de. Fu dati ede, Farao gi Yosef a frantwortu fu sorgu taki den kibri nyanyan na ini den yari te furu nyanyan ben de. Na so fasi, den ben o abi nyanyan na ini na angriten.

Di na angriten ben de, Yosef en famiri di ben libi farawe, ben abi nyanyan fanowdu. Fu dati ede, Yakob seni den tin bigi brada fu Yosef go na Egepte fu suku nyanyan. Den ben kon na fesi Yosef, ma den no ben sabi taki na en. Sondro fu taigi den suma na en, Yosef du wan tu sani fu luku efu den brada fu en ben kenki. A ben kon si taki a ben hati den taki den no handri bun nanga en. Baka dati, Yosef taigi den suma na en. Den ben brasa makandra fu di den ben breiti srefisrefi fu miti densrefi baka!—Genesis, kapitel 40 te go miti 45.

San a Bijbel tori disi e leri yu fu a dyarusu di sma e dyarusu?— Te wan sma e dyarusu tapu wan trawan, dan dati kan tyari bigi problema kon. Iya, a kan meki srefi taki wan sma wani du ogri nanga en eigi brada! Meki wi leisi Tori fu den Apostel 5:17, 18 nanga Tori fu den Apostel 7:54-59, èn meki wi luku san sma ben du nanga den disipel fu Yesus fu di den ben dyarusu.— Baka di yu leisi a pisi disi, yu kan si fu san ede wi musu luku bun taki wi no e dyarusu tapu trawan?—

Yosef ben kon abi 110 yari. A ben kisi pikin, granpikin, èn den granpikin ben kisi pikin tu. A no de fu taki dati nofo tron Yosef ben leri den pikin nanga bakapikin fu en fu lobi makandra èn fu luku bun taki den no e dyarusu tapu makandra.—Genesis 50:22, 23, 26.