Yu ben sabi a sani disi?

Na ini Efeisesma 2:11-15, na apostel Paulus e taki fu wan skotu di ben prati den Dyu fu den sma di no de Dyu. A de so taki Paulus ben taki fu wan trutru skotu?

Na ini a brifi di na apostel Paulus skrifi gi den Efeisesma, a e sori san na a difrenti na mindri den Israelsma nanga den „freimdesma”. A ben taki dati wan „skotu” ben e „prati” den tu grupu dati (Efeisesma 2:11-15). Paulus ben taki fu „a Wet di abi komando na ini” èn di Gado ben gi Moses. Ma a wortu „skotu” di a gebroiki, ben kan meki den leisiman denki fu wan ston skotu di ben de trutru.

Na ini a fosi yarihondro baka Krestes, a tempel fu Yehovah na ini Yerusalem ben abi wan tu fesidyari pe son sma no ben mag go. Iniwan sma ben kan go na ini a Fesidyari fu den sma di no de Dyu, ma soso den Dyu nanga den sma di teki a Dyu bribi ben mag go na ini den tra fesidyari fu a tempel. Wan moi ston skotu ben e prati a pisi pe ala sma ben mag go, fu a pisi pe son sma nomo ben mag go. A skotu disi ben hei sowan 1,3 meter, èn sma ben kari en a Soreg. Soleki fa a Dyu historia skrifiman Flavius Josephus skrifi, dan na tapu a skotu disi sani ben skrifi na ini Grikitongo nanga Latijntongo. Den sani dati di ben skrifi na tapu a skotu, ben warskow den sma di no de Dyu fu no go na ini den santa presi.

Sma feni wan pisi fu a skotu disi, pe sani skrifi na tapu na ini Grikitongo. Na tapu a pisi fu a skotu skrifi: „Nowan trakondre sma musu pasa a skotu disi èn a skotu di de lontu a santa presi. Iniwan sma di du dati sa dede.”

Soleki fa a sori, dan Paulus ben gebroiki a Soreg fu prenki a Wet frubontu di Gado gi Moses. Fu wan langa pisi ten a Wet disi ben e prati den Dyu fu den sma di no de Dyu. A dede di Yesus dede leki wan srakti-ofrandi, tyari wan kaba kon na a Wet frubontu, èn na so fasi „a broko a skotu puru”.

Fu san ede Bijbel e taki nofo tron fu den 12 lo fu Israel, aladi na 13 lo ben de trutru?

Den lo, noso den famiri fu Israel ben de bakapikin fu den manpikin fu Yakob. A nen fu Yakob ben kenki tron Israel. A famiri-edeman disi ben abi 12 manpikin, namku Ruben, Simeon, Leifi, Yuda, Dan, Naftali, Gad, Aser, Isaskar, Seibulon, Yosef, nanga Benyamin (Genesis 29:32–30:24; 35:16-18). Den lo ben kisi a nen fu erfu fu den brada disi, ma nowan enkri lo ben kisi a nen fu Yosef. Na presi fu dati, tu lo ben kisi a nen fu tu fu den manpikin fu Yosef, namku Efraim nanga Manase. Den manpikin disi ben de edeman fu den tu lo dati. Sobun, a nomru fu den lo na ini Israel ben de ala nanga ala 13 lo. Dan fu san ede Bijbel e taki nofo tron fu 12 lo?

Yehovah ben teki den mansma fu a lo Leifi fu dini na a tabernakel fu en, èn bakaten fu dini na a tempel. Fu dati ede, den no ben abi fu go na ini a legre. Yehovah ben taigi Moses: „Yu no musu teri den sma na ini a lo fu Leifi makandra nanga den tra manpikin fu Israel. Yu musu poti den Leifisma fu wroko na ini a tabernakel fu a Kotoigi. Den musu sorgu gi ala den wrokosani nanga ala den tra sani fu a tabernakel.”—Numeri 1:49, 50.

Den Leifisma no ben kisi wan pisi gron sosrefi na ini a Pramisi Kondre. Na presi fu dati, den ben kisi 48 foto di ben de na ala sei fu a kontren fu Israel.—Numeri 18:20-24; Yosua 21:41.

Fu den tu reide disi ede, meki nofo tron sma no ben e teri a lo Leifi makandra nanga den tra lo. Fu dati ede, a de so nofo tron taki a nomru fu den lo fu Israel ben de 12.—Numeri 1:1-15.

[Sma di abi a reti fu a prenki na tapu bladzijde 21]

Archaeological Museum of Istanbul