San kan yepi yu te yu e sari?

„Den manpikin nanga umapikin fu [Yakob] ben e du muiti fu trowstu en, ma a no ben wani meki den trowstu en. A taki: ’Nanga sari mi o saka go na mi manpikin na ini a grebi.’ Ibri dei Yosef papa ben e krei gi en.”—GENESIS 37:35.

 A FAMIRI-EDEMAN Yakob ben e sari srefisrefi di a manpikin fu en dede. A ben taki dati a ben o sari te na a dede fu en. Neleki fa a ben de nanga Yakob, na so a dede fu wan lobiwan kan hati yu so te, taki yu e firi leki noiti yu o kaba sari fu a sani dati. Ma disi wani taki dati wan sma di e sari srefisrefi no abi wan tranga bribi na ini Gado? Kwetikweti!

Bijbel e taki dati Yakob ben abi wan tranga bribi. Bijbel e prèise Yakob, en granpapa Abraham, nanga en papa Isak, fu di den ben abi wan tranga bribi (Hebrewsma 11:8, 9, 13). Wan leisi, Yakob ben feti heri neti srefi nanga wan engel, soso fu di a ben wani taki Gado blesi en! (Genesis 32:24-30) Soleki fa a sori, dan Yakob ben abi wan heri bun matifasi nanga Gado. We dan, san wi kan leri fu Yakob te wi e luku a fasi fa a ben e sari? Awinsi wan sma abi wan tranga bribi na ini Gado, toku a kan de nanga bigi sari te wan lobiwan fu en dede. Ala sma e sari te wan lobiwan fu den dede, fu di na so Gado meki wi.

Te wan sma e sari

Furu sma e sari srefisrefi te wan lobiwan fu den dede. Leonardo ben abi 14 yari di en papa dede wantronso, fu di a ben e siki na en ati. Leonardo noiti no sa frigiti a dei di en tanta taigi en san pasa. Di a yere a nyunsu, dan a no ben wani bribi. Aladi a si a dedeskin fu en papa na a beri, toku a no ben wani bribi taki en papa dede trutru. Sowan siksi mun langa, Leonardo no ben man krei. Nofo tron a ben e wakti en papa fu kon na oso baka wroko. A teki pikinmoro wán yari fosi a kon frustan krin taki en papa dede trutru. Di a kon frustan dati, dan a ben e firi leki a no ben abi nowan sma. Aladei sani ben e memre en taki en papa no de moro. Fu eksempre, te a ben e kon na oso dan a ben e si taki na oso ben leigi. Na den momenti dati, a ben e firi brokosaka srefisrefi èn a ben e krei. A ben e misi en papa trutru!

Soleki fa na ondrofenitori fu Leonardo e sori, dan sma kan sari srefisrefi te wan lobiwan fu den dede. Ma san moi fu sabi, na taki wan sma kan du wan sani so taki a no e sari fu ala ten. A sani disi e teki ten. Neleki fa a e teki ten fosi wan bigi soro dresi, na so a e teki ten fosi wan sma di e sari e bigin firi bun baka. A sani disi kan teki omeni mun, wan tu yari, noso moro langa leki dati. Ma safrisafri yu no sa firi so sari moro leki na ini a bigin, èn te fu kaba yu sa kon abi prisiri baka na ini a libi.

Ma soleki fa sma e taki, dan a de fanowdu taki wi e sari, fu di dati sa yepi wi fu firi bun baka èn fu fiti wisrefi na a nyun situwâsi. A lobiwan fu wi no de na libi moro. Wi musu libi go doro sondro a sma dati. Te wi e sari, dan dati kan gi wi okasi fu sori fa wi e firi. A no de fu taki, dati a no ala sma e sari na a srefi fasi. Ma toku wi musu hori a prenspari sani disi na prakseri: Te wan sma di e sari no wani sori fa a e firi, dan te fu kaba a kan kon bruya, a kan lasi-ati srefisrefi, noso a kan kon siki. We, te yu e sari, dan fa yu kan sori dati na wan fasi di fiti? Bijbel e gi wi wan tu bun rai. *

 San kan yepi yu te yu e sari?

Furu sma di e sari fu di wan lobiwan fu den dede, kon si taki den e firi moro bun te den e taki fa den e firi. Fu eksempre, luku san Yob, wan sma na ini Bijbel, ben taki. Boiti taki ala den tin pikin fu a man disi ben dede, tra rampu ben miti en tu. A ben taki: „Mi sili e firi tegu srefisrefi gi a libi fu mi. Mi sa taki fri fu den broko-ede di mi abi. Mi sa taki fu di mi sili abi bita-ati!” (Yob 1:2, 18, 19; 10:1) Luku taki Yob ben feni en fanowdu fu „taki fri” fu den broko-ede fu en.

Paulo, di ben lasi en mama na ini dede, e taki: „Wan sani di yepi mi, na taki mi ben e taki fu mi mama.” Sobun, te wi e fruteri wan bun mati fa wi e firi, dan dati kan yepi wi fu firi moro bun (Odo 17:17). Baka di a mama fu Yone dede, dan Yone aksi den Kresten brada nanga sisa fu en fu kon moro leisi na en. A ben taki: „Te mi ben e taki nanga trawan, dan dati ben e yepi mi fu no sari so furu”. Kande yu sa ondrofeni tu taki te yu e taki nanga wan sma di e frustan fa yu e firi, dan dati sa yepi yu fu no sari so furu.

A kan de wan yepi tu fu skrifi fa yu e firi. Son sma feni en muilek fu taki fa den e firi. Kande a moro makriki gi den fu skrifi fa den e firi. Baka di Saul nanga Yonatan dede, dan a getrow man David ben skrifi wan trutru sari singi di ben e sori fa a ben e firi. Bakaten, a singi disi tron wan pisi fu a Bijbel buku Tu Samuel.—2 Samuel 1:17–27.

Te wi e krei, dan dati kan yepi wi tu fu firi moro bun. Bijbel e taki: „Gi ala sani wan fasti ten de, iya, . . . wan ten fu krei” (Preikiman 3:1, 4). A no de fu taki dati te wan lobiwan fu wi dede, dan dati na „wan ten fu krei”. Te wi e sari, dan wi no abi fu syen fu krei. Bijbel e taki fu furu getrow man nanga uma di no ben syen fu krei di den ben e sari (Genesis 23:2; 2 Samuel 1:11, 12). Yesus Krestes „bigin krei” di a doro na a grebi fu en bun mati Lasarus di ben dede wan tu dei na fesi.—Yohanes 11:33, 35.

Te wi e sari, dan wi musu abi pasensi nanga wisrefi, fu di wi kan firi bun na a wan momenti,  ma kande wi e firi sari na wan tra momenti. Hori na prakseri taki yu no abi fu syen fu krei. Furu getrowsma kon si taki a de fanowdu fu krei te den e sari, fu di dati e yepi den fu firi moro bun.

Kon krosibei na Gado

Bijbel e taki: „Kon krosibei na Gado, èn a sa kon krosibei na unu” (Yakobus 4:8). Wan prenspari fasi fa wi kan kon krosibei na Gado, na te wi e taki nanga en na ini begi. No si a sani dati leki wan pikin sani! Bijbel e gi wi a pramisi disi di e trowstu wi: „Yehovah de krosibei fu den wan di lasi-ati; èn den wan di e firi brokosaka, a e frulusu” (Psalm 34:18). Bijbel e gi wi a dyaranti disi tu: „Trowe yu hebi tapu Yehovah, èn ensrefi sa horibaka gi yu. Noiti a sa gi pasi taki a regtfardikiwan e degedege” (Psalm 55:22). Denki a tori disi. Soleki fa wi si kaba, dan furu sma ben firi moro bun di den fruteri wan bun mati fu den fa den ben e firi. Fu san ede yu no e fruteri a Gado di pramisi fu trowstu wi, fa yu e firi? A sani dati ben o de wan moro bigi yepi gi yu, a no so?—2 Tesalonikasma 2:16, 17.

Paolo di wi ben kari kaba, ben taki: „Te mi ben e firi taki mi no ben man moro, dan mi ben e saka kindi èn mi ben e begi Gado fu yepi  mi.” Paulo de seiker taki na den begi dati yepi en. Yu kan ondrofeni tu taki te yu e tan begi „a Gado fu ala trowstu”, dan yu sa kisi deki-ati nanga krakti fu horidoro.—2 Korentesma 1:3, 4; Romesma 12:12.

Na opobaka howpu

Yesus ben taki: „Mi na a opobaka nanga a libi. A sma di e bribi na ini mi, sa kon na libi baka, awansi a dede” (Yohanes 11:25). Bijbel e leri taki den dedewan sa libi baka. * Di Yesus ben de na grontapu, dan a ben sori taki a man wiki den dedewan. Wan leisi, a wiki wan meisje fu 12 yari di ben dede. Fa a papa nanga a mama fu a meisje ben e firi? Den ben „prisiri srefisrefi” (Markus 5:42). Te Yesus sa tiri leki Kownu fu en Kownukondre na hemel, dan a sa gi bun furu sma wan opobaka na grontapu. Na a ten dati vrede nanga regtfardikifasi sa de na grontapu (Tori fu den Apostel 24:15; 2 Petrus 3:13). Prakseri fa wi sa prisiri srefisrefi te den dedewan e kisi libi baka èn e miti den lobiwan fu den baka!

Yu e memre Claudete ete? A boi fu en ben dede na ini wan opolani di naki panya. Claudete poti wan fowtow fu a boi disi na tapu na ijskasi fu en. A gwenti luku a fowtow, èn te a e du dati, dan a e taigi ensrefi: ’Wi sa miti makandra baka te yu kisi wan opobaka.’ Èn fa a de nanga Leonardo? We, a yonkuman disi e si kaba fa en papa sa kisi libi baka na ini a nyun grontapu di Gado pramisi libisma. Iya, na opobaka howpu de wan trowstu trutru gi den tu sma disi èn sosrefi gi tra sma di lasi lobiwan fu den na ini dede. A kan de wan trowstu tu gi yu!

[Futuwortu]

[Faki/Prenki na tapu bladzijde 7]

„A Gado fu ala trowstu”

„Prèise a Gado nanga Tata fu wi Masra Yesus Krestes, bika en na a Tata di abi bigi sari-ati, èn en na a Gado fu ala trowstu.”—2 Korentesma 1:3.

A bijbeltekst disi e sori taki Gado kan yepi den getrow futuboi fu en fu horidoro, awinsi sortu problema noso tesi e miti den. Wán fasi fa Yehovah kan yepi wi, na taki a kan gebroiki wan mati noso wan famiriman di abi a srefi bribi leki wi, fu trowstu wi.

Leonardo di lasi en papa na ini dede, e memre wan sani di gi en deki-ati èn di trowstu en. Wan leisi di a doro na oso, a memre taki nowan sma ben de na oso, ne a bigin krei teleki a no ben man moro. A go na wan presi pe sma gwenti go koiri, èn a go sidon na tapu wan bangi e krei. Aladi a ben e krei, a begi Gado fu yepi en. Wantronso wan oto stop krosibei fu Leonardo, èn a kon si taki a man di ben e rèi na oto ben de wan Kresten brada fu en. A brada disi ben e tyari sani go na difrenti presi, èn na fu di a rèi go na ini wan pasi pe a no ben musu go, meki a miti Leonardo. A ben de wan trowstu kaba gi Leonardo taki a brada ben de drape nanga en.

Wan leisi, wan man di lasi en wefi na ini dede, ben e sari fu di a ben de en wawan, èn a ben brokosaka srefisrefi. A no ben man kaba krei, fu di a ben gersi leki a libi no ben e gi noti. A go didon langalanga na gron èn a begi Gado fu yepi en. A ben e begi ete di a yere a telefon. Na en granpikin ben bel en. A man disi e taki: „Aladi wi no taki langa, toku dati gi mi krakti baka. Gi mi, a sani dati ben de wan piki tapu a begi fu mi.”

 [Faki na tapu bladzijde 9]

Den e trowstu trawan

„[Gado] e trowstu wi na ini ala den banawtu fu wi, so taki nanga yepi fu a trowstu di wisrefi e kisi fu Gado, wi man trowstu den sma di de na ini iniwan sortu banawtu.”—2 Korentesma 1:4.

Furu tru Kresten ondrofeni san den wortu disi wani taki. Di wan lobiwan fu den dede, dan den kisi trowstu di yepi den fu horidoro. Baka dati, den kon si taki den srefi ben man gi trawan deki-ati nanga trowstu.

Luku na eksempre fu Claudete di gwenti go na trawan fu taki nanga den fu Bijbel. Fosi a boi fu en dede, a ben gwenti go na wan uma fu taki nanga en fu Bijbel. A boi fu na uma disi dede fu di a ben abi wan takru brudu-siki. Na uma disi ben lobi te Claudete ben e kon na en, ma a ben feni taki Claudete noiti no ben o man frustan fa a ben e firi trutru. Ma syatu baka di a boi fu Claudete dede, na uma disi go na en èn a taigi Claudete taki a ben kon luku efu a ben e bribi ete na ini Gado, now di a boi fu en dede. Di na uma disi si a tranga bribi di Claudete abi, dan a sani dati naki en ati. A sani disi meki taki na uma disi bigin studeri Bijbel doronomo nanga Claudete, èn a e kisi furu trowstu fu Gado Wortu.

Baka di en papa dede, Leonardo bosroiti fu leri dofusma-tongo so taki a ben kan fruteri dofusma a Bijbel boskopu di e trowstu sma. A kon si taki a muiti di a e du fu yepi dofusma tyari furu wini kon gi en. A e taki: „Wan fu den sani di yepi mi fu no sari so furu, na a angri di mi abi fu yepi dofusma fu kon leri sabi Gado. Mi e gebroiki furu fu mi ten nanga mi krakti fu yepi den. Di a fosi bijbelstudie fu mi teki dopu, dan mi ben prisiri srefisrefi! Fu taki en leti, sensi mi papa dede, dati ben de a fosi leisi di mi ben e firi koloku trutru.”—Tori fu den Apostel 20:35.

[Prenki na tapu bladzijde 5]

Te yu e fruteri trawan fa yu e firi, dan dati kan yepi yu fu firi moro bun

[Prenki na tapu bladzijde 6]

Te yu e sari, dan a kan de wan yepi te yu e skrifi fa yu e firi

[Prenki na tapu bladzijde 6]

Te yu e leisi fu na opobaka howpu, dan dati kan de wan trowstu trutru

[Prenki na tapu bladzijde 8, 9]

Yesus ben pramisi den wan di e bribi na ini en, taki a sa gi den wan opobaka