Fa fu tron wan pikin fu Gado

SOWAN 30 yari baka a feti fu Korea, na organisâsi di e panya boskopu na telefisi nanga radio na ini Korea, ben seti wan programa fu yepi sma feni den famiriman fu den di den no si sensi a feti. San ben de a bakapisi? Moro leki 11.000 sma miti baka nanga den lobiwan fu den. Iya, den ben e krei, èn den ben e brasa makandra di den miti baka. Wan koranti ben taki: „Noiti ete na ini Korea, a pasa na a srefi ten taki sma krei so furu fu prisiri ede” (The Korea Times).

Di Cézar, fu Brasyonkondre, ben de wan beibi ete, dan en papa nanga mama ben gi en na tra sma fu pai wan paiman. Sowan tin yari baka dati, Cézar ben breiti so te fu feni en mama, taki a gowe libi a gudu kwekipapa nanga kwekimama fu en, fu go libi nanga en mama.

Te famiriman prati fu wan langa pisi ten èn den feni makandra baka, dan den e prisiri trutru! Bijbel e fruteri wi fa a ben de wan sari sani di libisma ben prati fu Gado osofamiri. A e fruteri wi tu fa den e breiti now fu kon makandra baka leki wán osofamiri. Fa disi pasa? Èn fa yu kan abi a prisiri dati tu?

A fasi fa na osofamiri fu Gado kon prati

A psalm skrifiman ben taki fu Yehovah Gado, a Mekiman: „Na yu na a Sma pe a libi komoto” (Psalm 36:9). Yehovah na a Papa fu wan bigi famiri fu getrow wan. Na ini a famiri fu En yu abi engel na ini hemel, di de en yeye manpikin, èn yu abi libisma na grontapu, di musu tron en pikin na grontapu.

Di Adam, a fosi manpikin fu Gado na grontapu, opo ensrefi teige Gado, soleki fa wi ben taki na ini na artikel na fesi, dan a ben de wan sari sani taki libisma prati fu a lobi-ati Papa èn Mekiman fu den (Lukas 3:38). Disi de so, fu di Adam opo ensrefi teige Gado, èn a lasi a grani di a ben abi gi ensrefi èn gi den bakapikin fu en di ben musu kon ete. A grani dati ben de taki den alamala ben o de pikin fu Gado. Nanga yepi fu en futuboi Moses, Gado ben taki san ben de a bakapisi fu san ben pasa: „Den fu den sei, handri na wan pori fasi; Den no de en pikin, a mankeri didon na densrefi.” „A mankeri”, noso a sondu fasi fu libisma, e meki taki den no sabi Gado, di santa èn di bun dorodoro (Deuteronomium 32:4, 5; Yesaya 6:3). Yu kan  taki dati, na so libisma no ben abi wan papa.—Efeisesma 2:12.

Bijbel e sori krin o takru a situwâsi fu libisma kon de, te a e taki dati den wan di no de memre fu na osofamiri fu Gado na „feanti” fu en (Romesma 5:8, 10). Fu di libisma kon prati fu Gado, meki den e pina na ondro a tiri fu Satan èn den e dede leki bakapisi fu a sondu di den kisi fu Adam (Romesma 5:12; 1 Yohanes 5:19). Sondu libisma kan tron memre fu Gado en osofamiri? Sondu libisma kan tron trutru pikin fu Gado, neleki fa Adam nanga Eva ben de En pikin bifo den sondu?

Gado e tyari den pikin fu en kon na wán

Na wan lobi-ati fasi, Yehovah seti sani gi a bun fu sondusma di lobi en (1 Korentesma 2:9). Na apostel Paulus e taki: „Gado meki a libisma famiri kon bun baka nanga en nanga yepi fu Krestes, èn taki a no hori den sondu fu den na prakseri” (2 Korentesma 5:19). Soleki fa wi ben taki na ini na artikel na fesi, dan Yehovah gebroiki Yesus fu pai a lusu-paiman gi den sondu fu wi (Mateyus 20:28; Yohanes 3:16). Nanga tangi na ati, na apostel Yohanes ben skrifi: „Luku fa a Tata lobi wi, èn dati meki wi musu tyari a nen taki wi na pikin fu Gado” (1 Yohanes 3:1). Na so fasi libisma di e gi yesi na en, kisi na okasi fu tron memre baka fu Yehovah en osofamiri.

Aladi ala libisma di Gado e tyari kon makandra na ini a famiri fu en de na ini wánfasi èn den Papa na ini hemel e sorgu gi den, toku Bijbel e taki dati Gado e tyari den kon makandra na ini tu grupu. Wi e leisi na ini Bijbel: „A santa kibritori disi e plisi Gado èn a feni en bun; a teki a bosroiti fu du disi, fu di a wani seti wan tiri na a kaba fu a reti ten èn a tiri disi musu tyari ala sani kon makandra baka na ondro Krestes, namku den sani di de na ini hemel nanga den sani di de na grontapu” (Efeisesma 1:9, 10). Fu san ede Gado e seti sani na so wan fasi?

A fasi fa Yehovah seti sani fu tyari den pikin fu en kon na wán na ini tu grupu, e meki taki na osofamiri fu en de na ini wánfasi. A no muilek fu frustan fu san ede Gado seti sani so. Na osofamiri fu Gado bigi so kefalek, taki yu kan agersi en nanga wan pipel. Na ini ibri kondre, a de so taki wan tu sma poti fu tiri a kondre so taki den tra sma fu a kondre kan libi na ini vrede èn sani kan waka na wan orga fasi. A tru taki nowan libisma tirimakti man tyari trutru vrede kon, ma Gado e sorgu taki en osofamiri abi wan tirimakti di bun dorodoro. A fosi grupu, namku „den sani di de na ini hemel”, na den pikin fu Gado di Yehovah teki fu seti wan tirimakti noso wan Kownukondre, na ini hemel. Komoto fu hemel „den o tiri grontapu leki kownu”.—Openbaring 5:10.

Den pikin fu Gado na grontapu

Yehovah e tyari „den sani di de na grontapu” kon na wán sosrefi, èn dati na den milyunmilyun sma na heri grontapu. A e du dati, so taki te fu kaba, den kan tron den pikin fu en na grontapu. Neleki wan lobi-ati Papa, a e leri den fu lobi trawan, so taki den kan de na ini wánfasi, aladi den de fu difrenti pipel. Srefi sma di lobi du ogri, sma di e denki densrefi nomo, sma di e libi wan yayo libi, nanga sma di no e gi yesi na Gado e kisi a kari fu „kon bun baka nanga Gado”.—2 Korentesma 5:20.

Ma san o pasa nanga den wan di no wani teki a kari di Gado e gi den fu kon bun baka nanga en leki en pikin? Fu sorgu taki vrede nanga wánfasi de na ini en osofamiri, Yehovah sa du wan sani nanga den sma dati. Wan ’dei sa de te a o krutu èn pori den ogrisma’ (2 Petrus 3:7). Gado sa pori ala sma di e opo densrefi teige en na grontapu. Dati sa de wan frulekti trutru gi den wan di e gi yesi na en!—Psalm 37:10, 11.

Baka dati, wán dusun yari fu vrede sa kon, èn na a ten dati ala den sma di e sori lobi gi Gado, safrisafri sa kon de volmaakti. Sobun, den sa kisi a libi baka di Adam lasi. Srefi den dedewan sa kisi wan opobaka (Yohanes 5:28, 29; Openbaring 20:6; 21:3, 4). Na so fasi Gado sa meki a pramisi fu en kon tru: „Den sani [noso libisma] srefi di Gado meki, o komoto na ini a katibo di e tyari pori kon, èn na so fasi den o tron pikin  fu Gado èn den o kisi kefalek bigi fri.”—Romesma 8:21.

Fa yu kan kon tron wan pikin fu yu Papa

Cézar nanga den dusundusun Koreasma, di wi ben taki fu den na a bigin fu na artikel disi, ben musu du wan sani fu man miti den famiriman fu den baka. Den sma fu Korea ben musu go na a organisâsi di ben seti a programa èn Cézar ben musu gowe libi a kwekipapa nanga kwekimama fu en. Na a srefi fasi, yu no musu draidrai fu meki en kon bun baka nanga Yehovah Gado, yu Papa na hemel, so taki yu kan kon de wan memre fu en osofamiri. San yu musu du?

Fu man kon krosibei na Gado leki yu Papa, dan yu musu studeri en Wortu, Bijbel, so taki yu kan kon abi wan tranga bribi na ini en èn na ini den pramisi fu en. Yu sa abi a frutrow taki den sani di Gado e taigi yu fu du, na sani di o tyari wini kon gi yu. Yu sa musu gi yesi na Gado tu te a e gi yu piri-ai nanga trangaleri, bika Bijbel e taigi Kresten: „Gado e si unu leki manpikin. Bika sortu manpikin no e kisi strafu fu en papa?”—Hebrewsma 12:7.

Te yu e du den sani dati, dan dati sa kenki yu heri libi. Bijbel e taki: „A krakti di e pusu un frustan musu meki unu kon nyun, èn un musu tron wan nyun sma di de soleki fa Gado wani, nanga trutru regtfardikifasi èn loyaalfasi” (Efeisesma 4:23, 24). Baka dati, teki a rai fu na apostel Petrus, di ben taki: „Un no mus de trangayesi pikin. Un no mus meki den takru lostu hari unu, di un ben abi ini a ten di un no ben sabi moro betre.”—1 Petrus 1:14, Nyun Testamenti.

Fa yu kan feni yu trutru famiri

Di Cézar feni en mama, dan a ben breiti srefisrefi fu yere taki a abi wan brada nanga wan sisa tu. Na so a de tu te yu e kon krosibei na yu Papa na ini hemel. Yu sa kon si taki yu abi furu brada nanga sisa na ini a Kresten gemeente. Te yu abi demakandra nanga den, dan yu sa si taki den o de moro krosibei fu yu leki yu eigi famiri.—Tori fu den Apostel 28:14, 15; Hebrewsma 10:24, 25.

Yu e kisi a kari fu tron wan pikin fu yu trutru Papa, Yehovah, èn fu kon sabi yu trutru brada nanga sisa, namku den sma na ini Gado en osofamiri. A prisiri di yu sa abi sa de neleki a prisiri di Cézar nanga den dusundusun Koreasma ben abi di den miti baka nanga den famiriman fu den.

[Prenki na tapu bladzijde 8]

Cézar, di a ben abi 19 yari, makandra nanga en mama

[Prenki na tapu bladzijde 10]

Du san de fanowdu fu kon krosibei na Gado