1-2. San Yakob du na a kba fu en libi, èn fu san ede a du dati? (Luku a kafti.)

 DI YAKOB ben owru srefsrefi, dan a gwe libi Kanan nanga en heri osofamiri èn den go na Egepte. Drape a tan dini Yehovah getrow 17 yari langa (Gen. 47:28). Yakob ben breiti srefsrefi fu si en manpkin Yosef baka, fu di a ben denki taki Yosef ben dede. Yakob ben de makandra baka nanga ala den manpkin fu en. Ma Yakob ben sabi tu taki a no ben o libi langa moro. Dati meki a taigi ala den manpkin fu en fu kon na en fu di den sani di a ben musu ferteri den ben prenspari srefsrefi.​—Gen. 49:28.

² Na a ten dati, wan p’pa di ben de fu dede, nofo tron ben e aksi en osofamiri fu kon makandra so taki a ben kan taigi den san den musu du (Yes. 38:1). Kande a ben e taigi den tu suma ben musu de a nyun edeman fu a famiri baka te a dede.

3. San wi e leri fu Genesis 49:1, 2?

³ Leisi Genesis 49:1, 2. Ma disi leisi di na osofamiri ben kon makandra, dan sani ben de heri tra fasi. Yakob ben de wan profeiti. Yehovah meki Yakob taigi den manpkin fu en sortu prenspari sani ben o psa nanga den èn nanga den famiri fu den. Dati meki den sani di Yakob ben taigi den manpkin fu en fosi a dede ben de wan profeititori.

4. San wi musu hori na prakseri te wi e luku a profeititori fu Yakob? (Luku a faki „Yakob en osofamiri”.)

⁴ Na ini na artikel disi, wi o poti prakseri na den sani di  Yakob ben taigi fo fu den manpkin fu en. Dati na Ruben, Simeon, Leifi, nanga Yuda. Na ini a tra artikel, wi o taki fu den sani di Yakob ben taigi den tra aiti manpkin fu en. Soleki fa wi o si, dan Yakob ben taki san ben o psa nanga den manpkin fu en èn nanga den osofamiri fu den. Te fu kba, den osofamiri dati ben o tron a bigi pipel Israel. Te wi o poti prakseri baka na san ben psa nanga a pipel Israel na ini owruten, dan wi o si fa a profeititori fu Yakob kon tru. Èn te wi e poti prakseri na den sani di a taki, dan wi o leri prenspari les di kan yepi wi fu plisi Yehovah, wi P’pa na hemel.

RUBEN

5. San Ruben kande ben e ferwakti fu kisi fu en p’pa?

⁵ Yakob e taki nanga Ruben fosi, èn a e taigi en: „Yu na mi fosi pikin” (Gen. 49:3). Fu di Ruben ben de a fosi pkin fu Yakob, meki a kan taki a ben e ferwakti taki en p’pa ben o gi en tu tron moro fu  a famirigudu leki san a ben o gi den tra brada. Kande a ben e ferwakti tu taki a ben o tron na edeman fu na famiri baka te en p’pa dede èn taki wan sma fu a lo fu en ala ten ben o de edeman fu a heri famiri.

6. Fu san ede Ruben no kisi a famirigudu di a fosi manpkin ben musu kisi? (Genesis 49:3, 4)

⁶ Ma Ruben no kisi a famirigudu di a fosi manpkin ben musu kisi (1 Kron. 5:1). Fu san ede? Wan tu yari na fesi, a ben abi seks nanga Bilha, a tra wefi fu Yakob. Bilha ben de na umasrafu fu Rakel, Yakob en lobi wefi di ben kon dede (Gen. 35:19, 22). Ruben ben de a manpkin fu Lea, a tra wefi fu Yakob. Kande na lostu ben meki taki Ruben du na ogri disi. Noso kande a ben abi seks nanga Bilha fu di a no ben wani taki Yakob kon lobi Bilha moro leki fa a ben lobi en m’ma. Awinsi fa a no fa, Yehovah nanga en p’pa no ben lobi a sani di a du kwetkweti.​—Leisi Genesis 49:3, 4.

7. San psa nanga Ruben nanga den bakapkin fu en? (Luku a faki „ A profeititori di Yakob taki fosi a dede”.)

⁷ Yakob taigi Ruben: „Yu no o kon bigi moro den brada fu yu.” Den wortu dati kon tru. Na nowan presi na ini Bijbel wi e leisi taki wan bakapkin fu Ruben tron wan kownu, wan priester, noso wan profeiti. Tòg Yakob gi a manpkin fu en wan famirigudu, èn Ruben en famiri tron wan fu den lo na ini Israel (Yos. 12:6). Ruben ben sori na tra okasi taki a ben abi bun fasi, èn soleki fa a sori, dan a no du hurudu noiti moro.​—Gen. 37:20-22; 42:37.

8. San wi kan leri fu na eksempre fu Ruben?

⁸ San wi kan leri? Wi musu du tranga muiti fu basi den takru lostu fu wi èn wi musu abi a fasti besroiti fu no du hurudu noiti. Efu wi e kisi tesi fu du wan sondu, dan wi musu teki ten fu prakseri fa a sani di wi o du ben o hati Yehovah, a famiri fu wi, nanga tra sma. Wi musu hori na prakseri tu taki „san wan sma e sai, na dati a sa koti tu” (Gal. 6:7). Ma na a tra sei, a sani di psa nanga Ruben e memre wi taki Yehovah abi sar’ati. Aladi Yehovah no o kibri wi gi den bakapisi fu den fowtu di wi e meki, tòg a o blesi wi te wi e sori berow èn te wi e meki muiti fu du san reti.

SIMEON NANGA LEIFI

9. Fu san ede Yakob no ben breiti nanga Simeon nanga Leifi? (Genesis 49:5-7)

⁹ Leisi Genesis 49:5-7. Now, Yakob e taki nanga Simeon nanga Leifi. Ma den sani di a e taigi den e sori taki a no ben breiti nanga den. Wan tu yari na fesi, Sikem, wan man fu Kanan, ben dwengi Yakob en umapkin, Dina, fu abi seks nanga en. Wi kan ferstan taki ala den manpkin fu Yakob ben mandi srefsrefi taki a sani disi ben psa nanga a sisa fu den. Ma Simeon nanga Leifi no basi na atibron fu den. Den kori den man fu Sikem taki den ben o meki freide nanga den, ma den alamala ben musu ben besnèi fosi. Den man fu Sikem agri fu du dati. Di den ben de ete nanga skin-ati baka di den ben besnèi, dan Simeon nanga Leifi „teki den feti-owru, dan den go na ini a foto, sondro fu den sma sabi san den ben kon du. Ne den kiri ala mansma drape.”​—Gen. 34:25-29.

10. Fa den sani di Yakob ben taki fu Simeon nanga Leifi kon tru? (Luku a faki „ A profeititori di Yakob taki fosi a dede”.)

¹⁰ Yakob ben mandi srefsrefi taki den tu manpkin fu en ben kiri someni sma.  A ben taki dati a famiri fu den ben o panya go na ala sei fu a kondre Israel. Den wortu dati kon tru moro leki 200 yari baka dati, di a pipel Israel go na ini a Pramisi kondre. A lo fu Simeon kisi wan tu foto na ini a kontren fu Yuda (Yos. 19:1). Èn a lo fu Leifi kisi 48 foto na difrenti presi na ini Israel.​—Yos. 21:41.

11. Sortu bun sani den lo fu Simeon nanga Leifi du?

¹¹ Den bakapkin fu Simeon nanga Leifi no meki den srefi fowtu di den afo fu den ben meki. Furu fu den Leifisma ben e anbegi Yehovah getrow. Na a ten di Moses kisi a Wet fu Yehovah na Sinai-bergi, furu Israelsma bigin anbegi a pkin mankaw, ma den Leifisma tan horbaka gi Moses èn den yepi en fu puru den sma na pasi di ben anbegi a pkin mankaw (Eks. 32:26-29). Yehovah teki mansma fu a lo fu Leifi fu tron priester na ini Israel (Eks. 40:12-15; Num. 3:11, 12). Bakaten, a lo fu Simeon yepi a lo fu Yuda fu feti teige den Kanansma so taki den ben kan teki a kontren abra di den ben kisi na ini a Pramisi Kondre.​—Krut. 1:3, 17.

12. San wi kan leri fu na eksempre fu Simeon nanga Leifi?

¹² San wi kan leri? Wi musu man dwengi wisrefi te wi e atibron. Efu sma du ogri nanga wan lobiwan fu yu, dan wi kan ferstan taki yu o mandi (Ps. 4:4). Ma wi musu hori na prakseri taki Yehovah no o breiti nanga wi efu wi e taki noso du wan sani fu pai a sma baka di du wan hati sani nanga wi (Yak. 1:20). Te sma du wan hati sani nanga wi, awinsi na wan sma na ini a gemeente noso wan sma di no e dini Yehovah, dan wi e tyari wisrefi na wan fasi di Yehovah feni bun. Disi o yepi wi fu no pai ogri fu ogri (Rom. 12:17, 19; 1 Petr. 3:9). Awinsi yu p’pa nanga m’ma e du sani di Yehovah no feni bun, tòg yu no abi fu teki na eksempre fu den. No denki taki yu no o man meki Yehovah ati prisiri. Yehovah ala ten o yepi yu fu du san reti èn a o blesi yu te yu e du dati.

YUDA

13. Fu san ede a kan taki Yuda ben e broko en ede nanga san en p’pa ben o taigi en?

¹³ Now Yakob ben musu taki nanga Yuda. Baka di Yuda yere san Yakob ben taigi den bigi brada fu en, dan a musu fu de so taki a ben e broko en ede. En srefi ben meki wan tu seryusu fowtu. A ben yepi den brada fu en fu teki ala den sani fu den sma na ini a foto Sikem (Gen. 34:27). A ben agri nanga den brada fu en fu seri Yosef leki srafu èn fu kori a p’pa fu den taki Yosef ben dede (Gen. 37:31-33). Bakaten, a ben abi seks nanga Tamar, a wefi fu a manpkin fu en, fu di a ben denki taki Tamar ben de wan huru-uma.​—Gen. 38:15-18.

14. Sortu bun sani Yuda ben du? (Genesis 49:8, 9)

¹⁴ Ma Yakob prèise Yuda èn a pramisi en taki bun sani ben o psa nanga en nanga en osofamiri. (Leisi Genesis 49:8, 9.) Yuda ben broko en ede trutru nanga en p’pa di ben kon owru kba. Èn a ben sori tu taki a ben e firi gi en pkin brada, Benyamin.​—Gen. 44:18, 30-34.

15. Fa den sani di Yakob ben taigi Yuda kon tru?

¹⁵ Yakob ben taki dati Yuda ben o tron a fesiman fu den brada fu en. Ma a ben o teki langa fosi a profeititori dati kon tru. Bijbel e sori taki sowan 200 yari baka di a pipel fu Yehovah gwe libi Egepte, dan a lo fu Yuda teki fesi fu tyari a pipel Israel psa na ini a sabana go na ini a Pramisi Kondre (Num. 10:14). Yari baka dati,  Yuda ben de a fosi lo di kisi a frantwortu fu go feti nanga den Kanansma, so taki den ben kan teki a Pramisi Kondre abra (Krut. 1:1, 2). Èn David, di ben de wan bakapkin fu Yuda, ben de a foswan fu den someni kownu di kmoto fu a lo fu Yuda. Ma a profeititori fu Yuda kon tru na tra fasi tu.

16. Fa a profeititori di skrifi na Genesis 49:10 kon tru? (Luku a faki „ A profeititori di Yakob taki fosi a dede”.)

¹⁶ Yakob ben taki dati a Tiriman fu ala libisma ben o de wan bakapkin fu Yuda èn a ben o tiri fu ala ten. (Leisi Genesis 49:10.) A Tiriman dati na Yesus Krestes, a sma di Yakob ben e kari Silo. Wan engel ben taki fu Yesus: „Yehovah Gado o gi en a kownusturu fu en papa David” (Luk. 1:32, 33). Wan tra nen di Bijbel e gi Yesus, na „a Lew fu a lo fu Yuda”.​—Openb. 5:5.

17. Fa wi kan teki na eksempre fu Yehovah te a abi fu du nanga a fasi fa wi e si trawan?

¹⁷ San wi kan leri? Yehovah blesi Yuda aladi a ben meki wan tu seryusu fowtu.  Ma a kan taki den brada fu Yuda ben e aksi densrefi fu san ede Yehovah ben blesi en? Awinsi fa a no fa, Yehovah si den bun fasi fu Yuda èn blesi en gi dati. Fa wi kan teki na eksempre fu Yehovah? Te wan Kresten brada noso sisa fu wi kisi wan grani, dan kande wi o wani poti prakseri na den fowtu fu a sma dati. Ma a bun fu hori na prakseri taki Yehovah breiti srefsrefi nanga den bun fasi fu a sma dati. Yehovah e si a bun na ini den futuboi fu en. Meki wi du muiti fu teki na eksempre fu en.

18. Fu san ede wi musu abi pasensi?

¹⁸ Wan tra sani di wi kan leri fu na ondrofenitori fu Yuda, na taki wi musu abi pasensi. Ala ten Yehovah e du san a pramisi, ma a no ala ten a e du dati na wan fasi noso na wan ten di wi ben ferwakti. Den fesiman fu a pipel fu Gado no ben kmoto fu a lo fu Yuda biginbigin. Ma a lo disi tan horbaka gi den wan di Yehovah ben gi a frantwortu fu teki fesi, awinsi dati ben de Moses a Leifisma, Yosua na Efrayimsma, noso Kownu Saul a Benyaminsma. Meki wi horbaka tu gi iniwan sma di Yehovah e gebroiki fu teki fesi na wi mindri na ini a ten disi.​—Hebr. 6:12.

19. San wi e leri fu Yehovah te wi e luku den lasti sani di Yakob ben taigi den fosi fo manpkin fu en?

¹⁹ San wi leri fu den lasti sani di Yakob taigi den fosi fo manpkin fu en? A de krin taki „Gado no e si sani soleki fa libisma e si sani” (1 Sam. 16:7). Yehovah abi furu pasensi èn a de klarklari fu gi sma pardon. Aladi a no e tapu en ai gi den ogri di sma e du, tòg a no e ferwakti taki den anbegiman fu en e du ala sani sondro fowtu. A kan blesi sma srefi di meki seryusu fowtu na ini a ten di psa, efu den sma disi e sori trutru berow èn e bigin du san bun. Na ini a tra artikel wi o luku san Yakob ben taigi den tra aiti manpkin fu en.