1. Fu san ede wi kan taki dati Satan de leki wan ontiman?

 WAN ontiman abi wán sani nomo na prakseri. Dati na fu kisi wan meti noso fu kiri en. A e gebroiki difrenti trapu, neleki fa wan fu den falsi mati fu Yob ben taki (Yob 18:8-10). Fa wan ontiman e kisi wan meti na ini a trapu fu en? A e luku san a meti e du. Pe a e go? Sortu sani a lobi? Fa a kan kisi en makelek? Satan de leki na ontiman dati. A e luku san wi e du. A e si pe wi e go èn sortu sani wi lobi. Dan a e poti wan trapu èn a e howpu taki a o kisi wi. Ma Bijbel e taigi wi taki awinsi a kisi wi, toku wi man komopo na ini a trapu fu en. Bijbel e leri wi tu fa wi kan sorgu taki wi no fadon na ini den trapu fu en.

2. San na tu sani di Satan e gebroiki fu kisi furu sma?

² Tu sani di Satan gebroiki fu kisi furu sma na heimemre nanga bigi-ai. * Dusundusun yari kaba, Satan kisi furu sma nanga den takru fasi disi. A de leki wan sma di e fanga fowru. A e poti wan beti so taki a kan kisi a fowru na ini a trapu noso a net fu en (Ps. 91:3). Ma Satan no abi fu kisi wi. Fu san ede? Fu di Yehovah sori wi sortu triki Satan e gebroiki fu kisi sma.​—2 Kor. 2:11.

3. Fu san ede Yehovah meki sma skrifi na eksempre fu trawan di ben kisi heimemre nanga bigi-ai?

³ Fu di Yehovah sabi sortu ogri kan miti wi te wi kisi heimemre èn te wi kon abi bigi-ai, meki a e fruteri wi san ben  miti sonwan fu den futuboi fu en. Disi o yepi wi fu no meki den srefi fowtu leki den. Wi o si fa Satan ben man kori srefi sma di ben e dini Yehovah langa ten kaba. Ma disi wani taki dati awinsi san wi o du, toku wi o kisi heimemre noso bigi-ai? Nôno. Yehovah skrifi na eksempre fu den sma disi na ini Bijbel „leki wan warskow gi wi” (1 Kor. 10:11). A sabi taki den eksempre disi kan leri wi fa wi kan wai pasi gi den trapu fu Satan èn fa wi kan komopo na ini den.

4. San kan pasa nanga wi te wi kisi heimemre?

⁴ Satan wani taki wi kisi heimemre. A sabi taki efu wi kon kisi heimemre, dan wi o kon de leki en èn wi no o kisi têgo libi (Odo 16:18). Dati meki na apostel Paulus ben warskow taki wan sma „kan kisi bigimemre èn Gado kan strafu en soleki fa a strafu Didibri” (1 Tim. 3:6, 7). A sani disi kan pasa nanga iniwan fu wi, awinsi wi de na ini waarheid no so langa ete noso awinsi wi e dini Yehovah omeni yari kaba.

5. Na sortu fasi wan sma e sori taki a abi heimemre, soleki fa Preikiman 7:16, 20 e taki?

⁵ Sma di abi heimemre e denki densrefi nomo. Satan e pruberi fu meki wi denki wisrefi nomo na presi fu Yehovah, spesrutu te wi abi problema. Fu eksempre, oiti wan sma taki dati yu du wan sani di yu sabi taki yu no du? Noso wan sma no libi bun nanga yu? Satan ben o breiti efu yu ben o kisi atibron nanga Yehovah noso yu brada nanga sisa. Èn Didibri wani taki yu denki dati a wan-enkri fasi fu lusu a problema, na fu du san soleki fa yu denki na presi fu teki a rai di Yehovah e gi yu na ini en Wortu.​—Leisi Preikiman 7:16, 20.

6. San yu kan leri fu na ondrofenitori fu wan sisa na ini Bakrakondre?

⁶ Luku na eksempre fu wan sisa di e tan na ini Bakrakondre. A ben atibron nanga trawan fu den fowtu di den ben meki. A ben feni taki a no ben wani bumui moro nanga den sma dati. A e taki: „Mi ben  firi leki mi de mi wawan èn mi no ben man kenki a fasi fa mi ben e denki fu den brada nanga sisa. Dati meki mi taigi mi masra taki wi ben musu froisi go na wan tra gemeente.” Ma baka dati a luku a JW Broadcasting^® programa fu maart 2016. A programa dati e sori san wi kan du te trawan e meki fowtu. A sisa e taki: „Mi kon si taki mi musu abi sakafasi èn taki mi musu luku mi eigi fowtu, na presi taki mi e pruberi fu kenki den brada nanga sisa na ini a gemeente. A programa yepi mi fu poti prakseri na Yehovah èn fu hori na prakseri taki en abi a reti fu taigi wi san fu du.” Yu e frustan a tori? Te yu abi wan problema, dan tan poti prakseri na Yehovah. Begi en fu yepi yu fu si trawan soleki fa en e si den. Yu Papa na hemel e si den fowtu di trawan e meki, ma toku a de klariklari fu gi den pardon. A wani taki yu musu du a srefi tu.​—1 Yoh. 4:20.

7. San pasa nanga Kownu Usia?

⁷ Fu di Kownu Usia fu Yuda ben kon kisi heimemre, meki a no ben wani arki rai èn a go du wan sani di a no ben mag du srefisrefi. Usia ben du furu sani na wan bun fasi. A ben wini furu feti, a bow furu foto, èn a ben abi furu gron. „A tru Gado ben meki sani waka bun gi en” (2 Kron. 26:3-7, 10). „Ma di a kisi furu makti, a kon abi bigifasi. Dati meki sani no waka bun gi en”, na so Bijbel e taki. Yehovah ben taki dati den priester wawan ben mag bron switismeri na ini a tempel. Ma Kownu Usia prefuru fu go na ini a tempel fu bron switismeri. Yehovah no ben lobi a sani disi srefisrefi èn a naki a man disi nanga gwasi fu di a ben abi bigifasi. Usia tan wan gwasiman teleki a dede.​—2 Kron. 26:16-21.

8. Fa 1 Korentesma 4:6, 7 kan yepi wi fu no kisi bigimemre?

⁸ Wi kan kisi heimemre èn sondu neleki Usia? Luku na eksempre fu José. A ben de wan bun bisnisman èn a ben de wan gemeente owruman di furu sma ben e lespeki. A ben hori lezing na kring konmakandra, na kongres, èn srefi kring-owruman ben kon suku rai na en. A e taki: „Ma mi ben frutrow tapu mi eigi koni nanga na ondrofeni di mi ben abi. Mi no ben frutrow tapu Yehovah moro. Mi ben denki taki mi ben tranga. Dati meki mi no arki  di Yehovah warskow mi èn gi mi rai.” José du wan seryusu sondu èn den puru en fu a gemeente. Wan tu yari pasa a tron wan Kotoigi baka. A e taki now: „Yehovah leri mi taki a grani di wi abi, a no a moro prenspari sani, ma te wi e du san a e aksi fu wi.” Meki wi hori na prakseri taki iniwan koni èn iniwan grani di wi abi na ini a gemeente, wi e kisi fu Yehovah. (Leisi 1 Korentesma 4:6, 7.) Efu wi abi heimemre, Yehovah no o gebroiki wi moro.

9. San Satan nanga Eva du di den kisi bigi-ai?

⁹ Te wi e taki fu bigi-ai, dan kande wi e denki fu Satan Didibri. Leki wan fu den engel fu Yehovah, Satan ben musu fu abi furu moi grani. Ma a ben wani abi moro. A ben wani na anbegi di Yehovah wawan musu kisi. Satan wani taki wi musu tron leki en. Dati meki a wani gi wi a firi taki wi musu kisi moro. A fosi leisi di a du a sani dati na di a ben taki nanga Eva. Yehovah ben gi Eva nanga en masra furu nyanyan, fu di a ben lobi den. Den ben mag nyan fu „ibri bon na ini a dyari”, boiti wán (Gen. 2:16). Toku Satan ben kori Eva fu denki taki na fu a bon dati a ben musu nyan. Eva no ben de tevrede nanga san a ben abi. A ben wani moro. Èn wi sabi san pasa baka dati. Eva sondu èn te fu kaba a dede.​—Gen. 3:6, 19.

10. San pasa di Kownu David kisi bigi-ai?

¹⁰ Yehovah ben gi David furu sani. A ben gi en gudu, a ben meki a tron kownu èn a ben wini furu feti. David ben de nanga tangi èn a ben taki dati den sani di Gado ben gi en ben ’furu so te, taki a no ben man teri den’ (Ps. 40:5). Ma bakaten David kon kisi bigi-ai èn a ben wani moro leki san Yehovah ben gi en. Aladi David ben abi wan tu wefi kaba, toku a ben wani wan tra man en frow, aladi a ben sabi taki Yehovah no feni dati bun. A frow disi ben de Batseiba èn en masra ben de Uria, wan Hètsma. Fu di David ben denki ensrefi nomo, meki a ben abi seks nanga Batseiba èn Batseiba kon de nanga bere. Dan efu dati no ben sari, David seti sani fu meki sma kiri Uria (2 Sam. 11:2-15). San David ben denki? A ben denki taki Yehovah no ben man si en? Aladi David ben e dini Yehovah furu yari kaba, a kon kisi  bigi-ai èn a sani disi tyari furu problema kon gi en. Ma bakaten David taki dati a sondu èn a sori berow. A ben de nanga tangi taki Yehovah gi en pardon.​—2 Sam. 12:7-13.

11. San kan yepi wi fu no kisi bigi-ai, soleki fa Efeisesma 5:3, 4 e sori?

¹¹ San wi e leri fu den sani di miti David? Efu wi tan de nanga tangi gi ala den sani di Yehovah e gi wi, dan dati o yepi wi fu no kisi bigi-ai. (Leisi Efeisesma 5:3, 4.) Wi musu de tevrede nanga sani wi abi. Te wi e bigin studeri Bijbel nanga sma, wi kan leri den fu denki fu wan bun sani di Yehovah gi den èn fu taki en tangi gi dati. Efu a sma e du dati ibri dei na ini a wiki, dan a taki Yehovah tangi gi seibi difrenti sani (1 Tes. 5:18). Yu e du dati tu? Efu yu e denki dipi fu ala den sani di Yehovah du gi yu, dan dati o yepi yu fu de nanga tangi. Èn efu yu de nanga tangi, dan yu o de tevrede. Efu yu de tevrede, dan yu no o kisi bigi-ai.

12. San Yudas Iskariot du di a kisi bigi-ai?

¹² Fu di Yudas Iskariot ben kon kisi bigi-ai, meki a du wan takru sani èn a tori Yesus. Ma na a bigin Yudas ben de wan bun sma (Luk. 6:13, 16). Yesus ben teki en leki wan apostel. Soleki fa a sori, dan Yudas ben sabi du son sani bun èn Yesus ben frutrow en, bika na en ben sorgu gi a monikisi. Yesus nanga den apostel fu en ben e gebroiki a moni dati, fu pai den kostu di den ben meki na ini a preikiwroko. Te yu luku en bun, dan a moni dati de leki den bijdrage di wi e gi na ini a ten disi fu horibaka gi a wroko di e du na heri grontapu. Ma baka wan pisi ten, Yudas bigin fufuru, aladi a ben yere difrenti leisi fa Yesus warskow sma fu no kisi bigi-ai (Mark. 7:22, 23; Luk. 11:39; 12:15). Yudas no arki den warskow dati.

13. O ten a kon na krin taki Yudas ben kon abi bigi-ai?

¹³ Yudas sori taki a abi bigi-ai syatu fosi sma kiri Yesus. Yesus nanga den disipel fu en, makandra nanga Maria nanga en sisa Marta, ben go nyan na a oso fu Simon di ben abi gwasi fosi. Di den ben e nyan, dan Maria opo èn a kanti wan diri switismeri oli na tapu Yesus en ede. Yudas nanga den tra disipel ben mandi srefisrefi. Kande den tra disipel ben feni taki a ben o moro bun fu gebroiki a moni fu a diri oli disi gi a preikiwroko. Ma Yudas ben mandi fu wan tra sani. A ben de wan fufuruman èn a ben wani fufuru a moni fu a monikisi. Èn fu di Yudas ben kisi bigi-ai, meki bakaten a tori Yesus gi a moni di sma e pai gi wan srafu.​—Yoh. 12:2-6; Mat. 26:6-16; Luk. 22:3-6.

14. Fa wan trowpaar du san Lukas 16:13 e taki?

¹⁴ Yesus ben taigi den bakaman fu en a prenspari sani disi: „Unu no kan dini Gado èn dini Gudu na a srefi ten.” (Leisi Lukas 16:13.) A sani disi tru te na a dei fu tide. Luku fa wan trowpaar na ini Rumeinia du san Yesus taki. Den ben man feni wan wroko fu wan pisi ten na ini wan moro gudu kondre. Den e taki: „Wi ben abi wan bigi paiman na bangi èn dati meki na a bigin wi ben prakseri taki a wroko disi ben de wan blesi fu Yehovah.” Ma wan problema ben de. Efu den ben o teki a wroko disi, dan den no ben o abi so furu ten moro gi a wroko fu Yehovah. Baka di den leisi na artikel „Tan dini Yehovah nanga yu heri ati”, na ini A Waktitoren fu 15 augustus 2008, den teki den bosroiti. Den e taki: „Efu a moro prenspari sani gi wi ben de fu go na wan tra kondre fu meki moro moni, dan Yehovah no ben o de moro na a fosi presi ini wi libi. Wi ben de  seiker taki a sani disi ben o pori a matifasi fu wi nanga Yehovah.” Dati meki den no teki a wroko. San pasa baka dati? A masra feni wan wroko na ini en eigi kondre èn a moni ben nofo gi san den abi fanowdu. A wefi e taki: „Yehovah e yepi den anbegiman fu en ala ten.” A trowpaar disi breiti taki den no tron srafu fu moni, ma fu Yehovah.

15. Fu san ede wi kan de seiker taki wi man komopo na ini den trapu fu Satan?

¹⁵ Ma san wi musu du efu wi kon si taki wi kon kisi heimemre noso bigi-ai? Wi kan kenki. Paulus ben taki dati den sma di Didibri ben kisi libilibi, kan komopo na ini a trapu fu en ete (2 Tim. 2:26). Na disi pasa nanga David. A arki a seryusu rai fu Natan, a ben abi berow, èn a meki sani bun baka nanga Yehovah. No frigiti noiti taki Yehovah tranga moro Satan. Sobun, efu wi e meki Yehovah yepi wi, dan wi o man komopo na ini iniwan trapu di Satan poti gi wi.

16. San o yepi wi fu no fadon na ini den trapu fu Satan?

¹⁶ Ma a ben o moro bun fu no fadon na ini den trapu fu Satan noiti. Wi kan du dati, soso te wi e meki Gado yepi wi. Ma wi no musu denki taki wi tranga nofo taki noiti wi o kisi heimemre noso bigi-ai. Srefi futuboi di ben e dini Yehovah langa ten ben kisi heimemre noso bigi-ai. Dati meki yu musu begi Yehovah ibri dei fu man si efu den takru fasi disi e bigin abi krakti tapu yu denki nanga den sani di yu e du (Ps. 139:23, 24). Du ala san yu man fu no kisi heimemre noso bigi-ai!

17. San o pasa heri esi nanga wi feanti Didibri?

¹⁷ Na dusundusun yari kaba Satan de leki wan ontiman. Ma heri esi den o tai en èn den o kiri en te fu kaba (Openb. 20:1-3, 10). Wi no man wakti te a dei dati doro. Ma now wi musu de na ai fu no fadon na ini den trapu fu Satan. Du tranga muiti fu sorgu taki yu no kisi heimemre noso bigi-ai. Èn du ala san yu man fu ’kakafutu gi Didibri èn a o lon gowe fu yu’.​—Yak. 4:7.