1. San kan meki taki futuboi fu Yehovah e firi leki den de den wawan?

 SON LEISI furu fu wi kan firi leki wi de wi wawan. Gi son sma a firi disi e gowe baka wan syatu pisi ten. Ma gi trawan a firi disi e tan langa. Wi kan firi leki wi de wi wawan srefi efu trawan de na wi lontu. A muilek gi son sma fu feni mati na ini wan nyun gemeente. Trawan di gro kon na ini wan famiri pe den ben gwenti du sani makandra, e misi den famiri srefisrefi te den go tan na wan farawe presi. Tra sma e misi wan lobiwan fu den di dede. Èn son Kresten, spesrutu den wan di kon na ini waarheid no so langa pasa, e firi leki den de den wawan fu di den famiriman nanga mati di no e anbegi Yehovah e frufolgu den èn no wani bumui moro nanga den.

2. Sortu aksi wi o piki?

² Yehovah sabi ala sani fu wi èn a e frustan fa wi e firi. Te wi e firi leki wi de wi wawan, dan a sabi dati èn a wani yepi wi. Fa Yehovah e yepi wi? San wi kan du fu yepi wisrefi te wi e firi so? Fa wi kan yepi trawan na ini wi gemeente di e firi leki den de den wawan? Meki wi piki den aksi disi.

3. Fa Yehovah sori taki a ben e broko en ede nanga Elia?

³ Yehovah wani taki ala den anbegiman fu en de koloku. A de krosibei fu ibriwan fu wi èn a e si te wi e firi sari èn te wi lasi-ati (Ps. 145:18, 19). Luku fa Yehovah sori taki a ben e broko en ede nanga a profeiti Elia. A profeiti disi di tan gi yesi na Gado ben e libi na ini wan pisi ten di a ben muilek gi den Israelsma. Makti sma na ini Israel di no ben lobi Yehovah ben e frufolgu den anbegiman fu En èn spesrutu Elia den ben e suku fu kiri (1 Kow. 19:1, 2). Wan tra sani di ben kan trobi Elia tu, na taki a ben denki dati en  ben de a wan-enkri profeiti di ben e dini Yehovah ete (1 Kow. 19:10). Wantewante Gado du wan sani fu yepi Elia. Yehovah seni wan engel fu gi a profeiti fu en a dyaranti taki a no ben de en wawan. Furu tra sma na ini Israel ben e dini Gado ete.​—1 Kow. 19:5, 18.

4. Fa Markus 10:29, 30 e sori taki Yehovah e broko en ede nanga den futuboi fu en di abi yepi fanowdu fu trawan?

⁴ Yehovah sabi taki te wi bosroiti fu dini en, dan sonwan fu wi e lasi furu. Wan fu den sani na taki famiri nanga mati di no e dini Yehovah, no e horibaka moro gi wi. Kande fu di na apostel Petrus ben broko en ede nanga a sani disi, meki wan leisi a aksi Yesus: „Wi gowe libi ala sani èn wi kon waka na yu baka. San wi o kisi dan?” (Mat. 19:27) Na wan switi fasi Yesus taigi den disipel fu en taki a gemeente ben o de leki wan famiri gi den. (Leisi Markus 10:29, 30.) Yehovah di de na Ede fu a famiri disi, e pramisi taki a o yepi den sma di wani dini en (Ps. 9:10). Luku wan tu sani di yu kan du fu kisi a yepi disi fu Yehovah te yu e firi leki yu wawan de.

5. Fu san ede a bun fu prakseri fa Yehovah e yepi yu?

⁵ Prakseri fa Yehovah e yepi yu (Ps. 55:22). Disi o yepi yu fu si taki yu no de yu wawan. Luku san wan sisa di nen Carol * e taki. A sisa disi no trow èn a no abi nowan famiri ini waarheid. A e taki: „Te mi prakseri fa Yehovah yepi mi fu horidoro na ini muilek ten, dan dati e yepi mi fu no firi leki mi de mi wawan. Disi e yepi mi tu fu de seiker taki Yehovah o yepi mi ala ten.”

6. Fa 1 Petrus 5:9, 10 e gi den sma deki-ati di e firi leki den de den wawan?

⁶ Prakseri fa Yehovah e yepi tra brada nanga sisa di e firi leki den de den wawan. (Leisi 1 Petrus 5:9, 10.) Hiroshi, wan brada di de a wan-enkri Kotoigi na ini en famiri furu yari kaba, e taki: „A makriki fu si na ini a gemeente, taki ala sma abi en eigi problema. Te wi sabi taki wi alamala e du ala san wi man fu dini Yehovah, dan  dati kan gi den sma deki-ati di e firi leki den de den wawan na ini waarheid.”

7. Fa begi e yepi yu?

⁷ Tan begi, tan leisi Bijbel èn tan go na den konmakandra. Yu musu fruteri Yehovah finifini fa yu e firi (1 Petr. 5:7). Massiel e taki: „Wan fu den moro prenspari sani di yepi mi te mi e firi leki mi wawan de, na te mi e begi Yehovah fayafaya.” Di a yongu sisa disi bosroiti fu go dini Yehovah, a ben firi leki en wawan de fu di en famiri no ben e dini Yehovah. A e taki tu: „Yehovah ben de leki wan trutru Papa gi mi. Mi ben e begi en ibri dei èn furu leisi na ini wan dei. Dan mi ben fruteri en fa mi ben e firi.”

8. Fa a e yepi yu te yu e leisi Gado Wortu èn e denki dipi fu den sani di yu leisi?

⁸ Leisi Gado Wortu ibri dei èn denki dipi fu den tori di e sori taki Yehovah lobi yu. Bianca, wan sisa di e kisi fu yere ala sortu hati sani fu en famiri, e taki: „Te mi e leisi èn denki dipi fu den Bijbel tori nanga ondrofenitori fu den futuboi fu Yehovah di miti den srefi sortu sani leki mi, dan dati e yepi mi trutru.” Son Kresten e hori son Bijbeltekst na ede di e trowstu den, soleki Psalm 27:10 nanga Yesaya 41:10. Wan tra sani di e yepi trawan, na te den e sreka gi den konmakandra noso te den e leisi Bijbel, dan den e arki a MP3 tapu computer noso tablet. Na so den no e firi moro leki den wawan de.

9. Fa a e yepi yu te yu e go na den konmakandra?

⁹ Du ala san yu man fu go na ala den konmakandra. A programa o gi yu deki-ati èn yu kan kon leri sabi den brada nanga sisa fu yu (Hebr. 10:24, 25). Massiel, di wi ben taki fu en kaba, e taki: „Aladi mi ben e syen srefisrefi, toku mi meki muiti fu go na ala den gemeente konmakandra èn fu gi wan piki. Disi yepi mi fu firi taki mi na wan pisi fu a gemeente.”

10. Fu san ede a prenspari fu tron mati fu lepi brada nanga sisa?

¹⁰ Tron mati fu lepi brada nanga sisa. Suku mati na ini a gemeente di yu kan leri wan sani fu den, srefi efu den moro owru noso moro yongu leki yu, noso efu den de fu wan tra kulturu. Bijbel e taki dati „owru sma abi koni” (Yob 12:12). Owru sma kan leri furu tu fu yongusma na ini a gemeente. David ben de omeni yari moro yongu leki Yonatan, ma toku a no meki dati tapu en fu tron wan bun mati fu en (1 Sam. 18:1). David nanga Yonatan yepi makandra fu dini Yehovah aladi den ben de na ini furu muilek situwâsi (1 Sam. 23:16-18). Wan sisa di nen Irina, èn di de a wan-enkri Kotoigi na ini en famiri, e taki:  „Wi brada nanga sisa kan kon de leki wi papa nanga mama, noso wi famiriman. Yehovah kan gebroiki den fu gi wi a yepi di wi abi fanowdu.”

11. San wi musu du fu kon abi bun mati?

¹¹ Efu yu e syensyen, dan kande a no makriki fu meki nyun mati. Ratna, wan sisa di e syensyen èn di kon na ini waarheid aladi a kisi gens, e taki krin: „Mi ben musu kon frustan taki mi abi yepi fanowdu fu den brada nanga sisa na ini a gemeente.” A kan muilek fu fruteri wan tra sma fa yu e firi. Ma te yu du dati, dan a sma dati kan tron yu bun mati. Den mati fu yu wani gi yu deki-ati èn den wani yepi yu, ma yu musu fruteri den fosi fa yu e firi so taki den kan sabi fa den kan yepi yu.

12. Fa a preikiwroko kan yepi yu fu kon abi bun mati?

¹² Wan fu den moro bun fasi fa wi kan meki mati na te wi e preiki nanga wi brada nanga sisa. Carol, di wi ben kari kaba, e taki: „Mi kon kisi furu bun mati fu di mi go na ini a preikiwroko nanga sisa èn mi e du tra sani na ini a diniwroko fu Yehovah. Yehovah yepi mi na ini ala den yari disi nanga yepi fu den mati disi.” Ala ten a bun gi wi te wi tron mati fu lepi Kresten. Yehovah e gebroiki den mati disi fu gi yu deki-ati te yu lasi-ati, noso te yu e firi leki yu wawan de.​—Odo 17:17.

13. Sortu frantwortu ala sma na ini a gemeente abi?

¹³ Ala sma na ini a gemeente abi a frantwortu fu sorgu taki freide de èn fu sori lobi gi ala sma. Disi o meki taki nowan sma firi leki a de en wawan (Yoh. 13:35). Den sani di wi e du èn den sani di wi e taki kan gi trawan deki-ati trutru. Luku san wan sisa e taki: „Di mi kon na ini waarheid, a gemeente tron mi famiri. Mi no ben o man tron wan Kotoigi fu Yehovah efu den brada nanga sisa fu mi no ben yepi mi.” San yu kan du fu yepi den sma di no abi famiri na ini waarheid fu firi taki den brada nanga sisa na ini a gemeente lobi den?

14. San yu kan du fu meki mati nanga den nyunwan?

¹⁴ Du muiti fu tron wan mati fu den nyunwan. Fa wi kan du dati? Yu kan bigin gi den nyunwan wan switikon na ini a gemeente (Rom. 15:7). Ma wi musu du moro leki fu taki den odi nomo. Wi wani tron bun mati fu den baka wan pisi ten. Sobun, sori switifasi èn sori taki yu e broko yu ede trutru nanga den nyunwan. Wi no o aksi den sani di kan meki den firi syen, ma wi o pruberi fu kon sabi sortu problema den abi. Fu di sonwan fu den kan feni en muilek fu taki fa den e firi, meki wi musu luku bun taki wi no e dwengi den fu taki. Na presi fu dati, poti aksi na wan switi fasi sondro fu meki a sma firi wan fasi èn arki en nanga pasensi. Fu eksempre, yu kan aksi en fa a kon sabi a waarheid.

15. Fa lepi Kresten kan yepi trawan na ini a gemeente?

¹⁵ A bribi fu ala sma na ini a gemeente e kon tranga te wi e sori taki wi e broko wi ede nanga makandra, spesrutu te owruman nanga tra lepi Kresten e du dati. Luku san Melissa e taki. A sisa disi en mama kweki en na ini waarheid. A e taki: „Mi e warderi den brada trutru di ben de leki papa gi mi, den ben abi ten gi mi èn den ben sori taki den ben e broko den ede nanga mi. Te mi abi wan sma fanowdu fu  arki mi, dan mi sabi pe mi kan go.” Wan yongu brada di nen Mauricio, ben e firi sari èn a ben e firi leki a de en wawan di a brada di ben e studeri nanga en no ben kon na den konmakandra moro. Mauricio e taki: „Den owruman ben sori taki den e broko den ede nanga mi èn dati yepi mi trutru. Den ben abi a gwenti fu taki nanga mi. Den ben wroko nanga mi na ini a preikiwroko, den ben fruteri mi fu den moi gudu di den feni di den ben studeri Bijbel, èn den tyari mi fu plèi sport srefi.” Melissa nanga Mauricio e dini na Betel now.

16-17. Na sortu tra fasi wi kan yepi trawan?

¹⁶ Yepi na tra fasi (Gal. 6:10). Leo, di e dini leki zendeling na ini wan kondre farawe fu en famiri e taki: „Nofo tron a wan-enkri sani di yu abi fanowdu, na wan sma di e sori yu switifasi na a yoisti momenti. Mi e memre wan dei di mi go naki nanga mi wagi. Di mi doro oso te fu kaba, mi ben stress srefisrefi. Ma dan wan trowpaar kari mi kon na den oso fu nyan nanga den. A no ben de wan kefalek nyanyan èn mi no sabi moro san wi nyan, ma san mi sabi na taki den arki mi na wan switi fasi. Na a kaba fu a dei, mi ben firi bun baka.”

¹⁷ Wi alamala lobi fu go na den kring konmakandra nanga den kongres fu wi. Wan reide fu san ede wi lobi go na fu di wi kan de nanga wi brada nanga sisa èn wi kan taki nanga den fu a programa. Ma Carol di wi ben kari kaba, e taki disi: „A hebi gi mi fu de na den kring konmakandra nanga kongres.” Fu san ede? A e taki: „Aladi hondrohondro noso srefi dusundusun brada nanga sisa de na mi lontu, toku mi e firi leki mi de mi wawan fu di nofo tron den e go sidon nanga den famiri. Te mi e si dati, dan a hebi gi mi fu di mi e firi leki mi de mi wawan trutru.” Trawan di lasi den trowpatna na ini dede e feni en muilek fu go na wan kongres noso kring konmakandra fu di dati na a fosi leisi taki den e go den wawan. Yu sabi wan sma di de na ini so wan situwâsi? Kande yu kan aksi en fu sidon makandra nanga yu nanga yu famiri na wan fu den bigi konmakandra di e kon.

18. Fa wi kan fiti a rai na ini 2 Korentesma 6:11-13 te wi e kari trawan kon na wi oso?

 ¹⁸ Du sani makandra nanga trawan. Pruberi fu kari difrenti brada nanga sisa kon te yu o du wan prisiri sani, spesrutu den wan di e firi leki den wawan de. Wi wani „opo wi ati” gi ala sma, ma spesrutu gi den sma disi. (Leisi 2 Korentesma 6:11-13.) Melissa di wi ben taki fu en kaba e memre: „Wi ben breiti te brada nanga sisa ben kari wi kon na den oso fu du wan prisiri sani makandra noso fu go nanga den na wan presi.” Wan sma de na ini yu gemeente di yu kan kari kon na yu oso?

19. Spesrutu na sortu ten wi kan du wan sani makandra nanga wi brada nanga sisa?

¹⁹ Wi brada nanga sisa ben o breiti srefisrefi efu wi e du wan sani makandra nanga den, spesrutu na son momenti. Tapu fesadei son brada nanga sisa feni en muilek fu de nanga den famiriman di no de na bribi. Trawan e firi sari srefisrefi tapu son dei, fu di na a dei dati den lasi a lobiwan fu den na dede. Te wi de makandra nanga wi brada nanga sisa di de ini den muilek situwâsi disi, dan wi e sori taki wi e broko wi ede nanga den fu di wi e „sorgu trutru” taki den no e firi leki den de den wawan.​—Fil. 2:20.

20. Fa den sani di Yesus taki na ini Mateyus 12:48-50 kan yepi wi te wi e firi leki wi wawan de?

²⁰ Furu reide de di e meki taki wan Kresten kan firi leki en wawan de son leisi. Ma toku wi no musu frigiti noiti taki Yehovah sabi fa wi e firi. Nofo tron a e gebroiki tra brada nanga sisa fu gi wi san wi abi fanowdu. (Leisi Mateyus 12:48-50.) Wi kan sori Yehovah tu taki wi de nanga tangi gi a gemeente te wi e du ala san wi man fu yepi wi brada nanga sisa. A no abi trobi fa wi e firi son leisi, ma wi de seiker taki noiti wi de wi wawan fu di Yehovah de nanga wi ala ten!