Haykanush, wan preikiman di no dopu ete èn di e libi na Armeinia, ben feni wan paspoort krosibei fu en oso. Wan tu credit-karta nanga bun furu moni ben de na ini a paspoort. Haykanush taigi en masra san a feni. En masra srefi ben de wan preikiman di no dopu ete.

A trowpaar disi ben abi bigi moni problema èn den ben abi paiman, ma toku den bosroiti fu tyari a moni go na a adres di ben skrifi na ini a paspoort. A man di lasi a paspoort ben fruwondru èn en famiri srefi no ben man bribi tu. Haykanush nanga en masra fruteri a man taki den tyari a moni kon baka fu di den leri na ini Bijbel taki den musu de eerlijk. Den gebroiki na okasi disi tu fu taki fu Yehovah Kotoigi èn den libi wan tu buku gi a famiri.

A famiri ben wani gi Haykanush moni, ma a no ben wani. A dei na en baka, a wefi fu a man go na a trowpaar disi. Fu di a ben warderi san Haykanush du, meki a ben wani nomonomo taki a teki a dyamanti linga di a ben tyari kon gi en.

Neleki a famiri disi, furu sma ben o fruwondru tu fu si fa Haykanush nanga en masra sori taki den eerlijk. Ma yu denki taki Yehovah ben fruwondru? Fa a ben feni en di a si taki den ben de eerlijk? Sortu wini den kisi fu di den ben de eerlijk?

A no muilek fu gi wan piki tapu den aksi disi. Fu san ede? Den futuboi fu Yehovah e bribi taki a e feni en moro prenspari taki den e sori den moi fasi fu en, fu di disi warti moro dyamanti, gowtu noso tra gudu. Iya, san Yehovah e si leki warti sani, a no dati libisma e si leki warti sani (Yes. 55:8, 9). Dati meki den futuboi fu Yehovah e meki furu muiti fu sori den moi fasi fu en fu di dati na a moro prenspari sani gi den.

Wi kan si disi te wi e leisi san Bijbel e taki fu koni èn fu sma di abi a koni fu man si sani krin. Odo 3:13-15 e taki: „Koloku fu a sma di kon abi koni. Koloku fu a sma di kisi a koni fu man si sani krin, bika te wan sma abi koni leki gudu, dan dati moro bun leki fu abi solfru leki gudu. Te wan sma abi furu koni, dan dati moro bun leki gowtu. Koni warti moro koraal-ston èn nowan tra sani di e gi yu prisiri, kan kon de a srefi leki koni.” A de krin taki gi Yehovah, den moi fasi disi warti moro iniwan gudu di de.

Dan san a wani taki fu de eerlijk?

We, Yehovah srefi eerlijk. A „no man lei” (Tit. 1:2). A ben meki na apostel Paulus skrifi gi den Hebrew Kresten fu en ten: „Tan begi gi wi, bika wi sabi taki wi abi wan krin konsensi, fu di wi wani du ala sani nanga wan krin ati.”​—Hebr. 13:18.

Yesus Krestes de eerlijk tu. Wan leisi Granpriester Kayafas bari taki: „Na ini a nen fu a libilibi Gado, mi e fruplekti yu fu taki efu yu na Krestes, a Manpikin fu Gado!” Yesus taigi en eerlijk taki en na a Mesias, aladi a ben sabi taki a Sanhedrin ben kan krutu en taki a no sori lespeki gi Gado èn den ben kan kiri en srefi.​—Mat. 26:63-67.

Fa a de nanga wi? Efu wi de na ini wan situwâsi pe wi kan kisi wini te wi no e fruteri sma ala sani noso te wi e drai a tori pikinso, wi o de eerlijk tu?

A tru taki a muilek fu de eerlijk na ini den lasti dei disi pe furu sma ’lobi densrefi  nomo èn den lobi moni’ (2 Tim. 3:2). Te moni problema de noso te a no makriki fu feni wroko, dan a muilek gi sma fu de eerlijk. Furu fu den e denki taki te den de na ini so wan situwâsi, den mag fufuru, lei, bedrigi trawan noso du tra kruka sani. Na ala sei sma e denki so. Dati meki te den e si taki den kan meki wan moni, den feni taki den no kan de eerlijk. Srefi son Kresten ben e denki so èn den teki fowtu bosroiti fu di den ben „gridi fu feni wini na wan fasi di no fiti”. Disi meki taki den lasi a bun nen di den ben abi na ini a gemeente.​—1 Tim. 3:8; Tit. 1:7.

Ma furu Kresten e teki na eksempre fu Yesus. Den sabi taki te den abi den moi fasi fu Gado, dan dati moro prenspari leki iniwan gudu noso wini di den kan kisi. Dati meki Kresten yonguwan no e spiek fu kisi bun cijfer na skoro (Odo 20:23). A tru taki a no ala ten sma o gi wi sani te wi de eerlijk, leki fa den ben gi Haykanush wan sani. Ma te wi de eerlijk, dan Gado o feni dati bun èn a o meki taki wi abi wan krin konsensi, wan sani di warti trutru.

Luku na eksempre fu Gagik. A brada disi e taki: „Fosi mi tron wan Kresten, mi ben e wroko gi wan bigi bedrijf. Fu di a man di ben abi a bedrijf no ben wani pai a belasting di a ben musu pai, meki a no ben e skrifi soifri omeni moni a ben e meki. Fu di mi ben de wan fu den driktoro fu a bedrijf, meki den ben fruwakti fu mi taki mi pai a belasting man tyuku, so taki a no ben o luku den kruka sani di a bedrijf ben e du. Fu di mi ben gwenti du disi, meki sma ben e si mi leki wan bedrigi man. Ma di mi leri sabi a tru anbegi, mi no ben wani du a sani disi moro aladi mi basi ben e pai mi bun. Na presi fu dati, mi opo mi eigi bedrijf, mi meki lanti sabi taki mi abi wan bedrijf èn sensi a ten dati mi e pai ala mi belasting.”​—2 Kor. 8:21.

Gagik e taki: „Fu di mi no e meki so furu moni moro, meki a no ben makriki gi mi fu sorgu gi mi osofamiri. Ma mi de moro koloku now. Mi abi wan krin konsensi na fesi Yehovah, mi de wan bun eksempre gi den tu boi fu mi èn mi kisi grani na ini a gemeente. Now den belasting man nanga tra bisnis man, sabi taki mi eerlijk.”

Yehovah lobi sma di e du san a e leri den èn di e sori den moi fasi fu en, soleki fu de eerlijk (Tit. 2:10). A ben meki Kownu David skrifi a moi sani disi: „Mi ben de wan yongu man, ma now mi kon owru. Toku mi no si noiti taki Gado libi wan reti-ati sma en wawan. Noiti mi no si taki den pikin fu en e waka e suku nyanyan.”​—Ps. 37:25.

A tori fu Rut e sori taki disi de so trutru. Rut no gowe libi Naomi, a mama fu en masra, ma a tan nanga en srefi di a kon owru. Rut froisi go na Israel pe a ben kan dini a tru Gado (Rut 1:16, 17). Di a ben de na Israel, a ben de eerlijk èn a ben e wroko tranga te a ben e piki nyanyan na den gron soleki fa a Wet ben e sori. Neleki fa David ondrofeni bakaten, Yehovah no gowe libi Rut nanga Naomi di den ben de na nowtu (Rut 2:2-18). A moi fu si taki Yehovah du moro leki fu sorgu nomo gi Rut. A meki a tron na afo fu Kownu David èn fu a Mesias srefi.​—Rut 4:13-17; Mat. 1:5, 16.

Son futuboi fu Yehovah kan de na ini wan situwâsi pe a no makriki fu wroko nofo moni fu sorgu gi densrefi. Ma den no e pruberi fu feni moni na wan kruka fasi.  Na presi fu dati, den e meki muiti fu wroko tranga. Na so den e sori taki den moi fasi fu Gado, soleki fu de eerlijk, warti moro iniwan gudu.​—Odo 12:24; Ef. 4:28.

Neleki Rut, na so Kresten na heri grontapu sori taki den e bribi taki Yehovah man yepi den. Den e frutrow tapu a Gado di pramisi na ini Bijbel: „Mi no o libi yu kwetikweti èn noiti mi o gowe fu yu” (Hebr. 13:5). Ibri leisi baka, Yehovah sori taki a man yepi den mofinawan di ala ten e sori taki den de eerlijk. Ala ten a du san a pramisi èn a sorgu taki den ben man feni san den abi fanowdu.​—Mat. 6:33.

Iya, libisma kan si dyamanti nanga tra gudu, leki warti sani. Ma wi kan de seiker taki gi wi hemel Tata a moro prenspari te wi de eerlijk èn te wi e sori den tra moi fasi fu en. Den fasi disi warti moro iniwan diri ston!