Nicolas nanga Céline ben kisi fu du nanga wan tra problema. Den ben teki a toewijzing di den ben kisi fu a bijkantoro fu Fransikondre, èn den froisi go na wan nyun gemeente. Den e taki: „Na a bigin, wi ben e prisiri srefsrefi, ma dan wi bigin misi den mati fu wi. Wi no ben leri sabi den brada nanga sisa na ini a nyun gemeente so bun ete. a Te yu e kisi den sortu problema disi, dan san yu kan du fu de koloku èn fu tan du a diniwroko fu yu? Fa tra sma kan yepi yu? Fa yu kan kisi dek’ati èn fa yu kan de wan dek’ati gi trawan na ini yu nyun gemeente?

FO GRONPRAKSERI DI KAN YEPI YU FU FITI YUSREFI

1. Fertrow tapu Yehovah (Ps. 37:5). Kazumi di e libi na ini Yapan, ben de na ini wan gemeente 20 yari langa, ma a froisi gwe libi a gemeente di en masra ben musu go wroko na wan tra presi. Fa a „poti [en] libi na ini Yehovah anu”? A e taki: „Ibri tron baka mi ben e taigi Yehovah fa mi ben e frede, fa mi ben e firi leki mi de mi w’wan, èn fa mi ben e broko mi ede. Ibri leisi te mi ben du dati, dan a ben e gi mi a krakti di mi ben abi fanowdu.”

Fa yu kan kon abi moro fertrow na ini Yehovah? Neleki fa wan bon abi watra nanga tra sani fanowdu fu man gro bun, na so wi musu du san de fanowdu fu tranga a bribi fu wi. Nicolas, di wi ben kari kba, kon si taki te a e denki dipi fu den eksempre fu Abraham, Yesus, nanga Paulus, dan dati e yepi en fu kon abi moro fertrow taki Yehovah o yepi en. Den man disi no ben meki noti tapu den fu du a wani fu Yehovah. Te yu abi a gwenti fu studeri Bijbel, dan dati o yepi yu te kenki e kon na  ini yu libi èn yu kan gebroiki den sani di yu e leri fu gi trawan na ini yu nyun gemeente dek’ati.

2. No teki yu owru gemeente gersi nanga a nyunwan (Preik. 7:10). Di Jules froisi gwe libi Benin fu go tan na Amerkankondre, dan a ben musu fiti ensrefi na wan kulturu di ben de heri tra fasi leki a di fu en. A e taki: „Mi ben e firi leki ala leisi te mi ben e leri sabi wan sma, mi ben musu ferteri en ala sani fu mi.” Fu di a no ben gwenti a sani disi, meki a bigin wai pasi gi den brada nanga sisa. Ma di a leri sabi den brada nanga sisa moro bun, dan a kenki a denki fu en. A e taki: „Mi e bribi taki awinsi pe wi de na grontapu, ala sma na a srefi. A wan-enkri sani di e difrenti, na taki den e taki èn e du sani tra fasi. Dati meki a prenspari fu teki sma leki fa den de.” Sobun, no teki na owru gemeente fu yu gersi nanga a nyunwan. Wan pionier sisa di nen Anne-Lise, ben taki en so: „Mi no froisi fu di mi ben wani go feni den srefi sani di mi ben libi na baka, ma mi froisi fu di mi wani leri nyun sani.”

Sosrefi owruman musu luku bun fu no teki na nyun gemeente fu den gersi nanga na owruwan. Awinsi den brada na ini a nyun gemeente e du sani tra fasi, tòg dati no wani taki ala ten taki den no e du sani na a yoisti fasi. Dati meki a bun fu kon sabi san na a situwâsi fu a kontren drape, fosi yu e bigin taigi sma fa den kan du sani tra fasi (Preik. 3:1, 7b). A moro bun fu de wan bun eksempre gi den brada nanga sisa, leki te yu e pruberi fu dwengi den fu si sani soleki fa yu e si sani.​—2 Kor. 1:24.

3. Wroko makandra nanga yu nyun gemeente (Fil. 1:27). Aladi a e teki furu muiti nanga ten fu froisi go na wan tra gemeente, tòg a prenspari taki yu no e wakti fu go na den konmakandra na ini yu nyun gemeente. Èn efu yu man, a bun go na den konmakandra na ini a Kownukondre zaal, na presi fu teki prati nanga yepi fu Internet. Den brada nanga sisa na ini yu nyun gemeente musu si yu ibri wiki so taki den kan leri sabi yu èn so taki den kan yepi yu.” Lucinda froisi go na wan bigi foto na ini Zuid-Afrika makandra nanga den tu meisje fu en. A e taki: „Den mati fu mi taigi mi fu tron bun mati fu den brada nanga sisa na ini a nyun gemeente, fu wroko nanga den na ini a preikiwroko èn fu teki prati na den konmakandra. Wi gi den brada primisi tu fu hori preikiwroko konmakandra na ini wi oso.”

Te yu e wroko skinskin nanga den brada nanga sisa na ini a gemeente, dan yu o man tranga yusrefi èn yu o de wan dek’ati tu gi trawan. Anne-Lise, di wi ben kari kba, ben kisi a rai fu den owruman fu pruberi fu go na ini a preikiwroko nanga ala sma na ini a nyun gemeente fu en. San ben de a bakapisi? A e taki: „Heri esi mi kon si taki dati na a moro bun fasi fa yu kan fiti yusrefi na ini a gemeente.” Boiti dati, te yu e yepi fu krin a Kownukondre zaal èn fu hori en bun, dan dati e sori taki yu e si a gemeente leki yu gemeente. O moro yu e wroko makandra nanga a gemeente, o moro den brada nanga sisa o kon gwenti yu èn yu o firi taki disi na yu nyun famiri.

 4. Meki nyun mati (2 Kor. 6:11-13). A moro bun fasi fa yu kan meki mati, na te yu e poti prakseri na sma. Dati meki a bun fu kon na a Kownukondre zaal fosi den konmakandra bigin èn fu no gwe wantewante baka zaal. Na so yu o abi nofo ten fu taki nanga sma. Pruberi fu kon sabi fa den sma nen. Te yu e hori den nen fu den brada nanga sisa na ede èn te yu e sori swit’fasi gi den, dan den o wani leri sabi yu èn den o wani tron bun mati fu yu.

No broko yu ede efu den brada nanga sisa fu a nyun gemeente o lobi yu, ma meki den kon sabi yu leki fa yu de trutru. Du neleki fa Lucinda e taki: „Now wi abi bun mati, fu di wi no wakti teleki sma kari wi kon na den oso, ma wi fosi kari den kon na wi oso.”

„TEKI MAKANDRA NANGA PRISIRI”

Son sma e frede te den e waka go na ini wan Kownukondre zaal di lai nanga sma di den no sabi. Fa yu kan meki en moro makelek gi den sma di e froisi kon na yu gemeente? Na apostel Paulus ben taki: „Teki makandra nanga prisiri neleki fa Krestes ben teki wi nanga prisiri” (Rom. 15:7). Te owruman e teki na eksempre fu Krestes, dan den kan yepi nyun sma fu firi switi na ini a zaal. (Luku a faki „ San o yepi yu fu fiti yusrefi na ini wan nyun gemeente?”) Ma ala sma na ini a gemeente, sosrefi den pkin, kan yepi nyun sma fu firi switi na ini a gemeente.

Wan fasi fa wi kan gi trawan wan switikon, na te wi e kari den kon na wi oso. Ma wi kan du tra sani tu fu yepi den. Fu eksempre, di wan sisa ben froisi go na wan tra gemeente no so langa psa, dan wan tra sisa fu a gemeente dati teki en ten fu tyari en go na foto fu sori en fa a kan teki bus nanga trein. A sani disi ben naki na ati fu a sisa èn a yepi en fu firi switi na ini a nyun presi pe a ben go tan.

WAN OKASI FU GRO

Wan yongu fowru kan frede fu frei gwe libi a nesi fu en. Na so a de tu taki te yu e froisi go na wan nyun gemeente, dan kande yu o frede fu leri sabi nyun sma. Ma te yu e teki dek’ati, dan yu o  man frei hei èn yu o man go na fesi na ini a diniwroko fu Yehovah. „Te yu froisi go na wan tra gemeente, dan yu e leri furu sani”, na so Nicolas nanga Céline e taki. „Wi ben musu kon abi nyun fasi fu man fiti wisrefi na nyun sma èn na wan nyun presi.” Jean-Charles di ben kari na a bigin fu na artikel, e ferteri fa en famiri kisi wini di den froisi. A e taki: „Den pkin fu wi go na fesi trutru na ini a nyun gemeente. Baka wan tu mun nomo, a meisje fu wi bigin abi prati na den mindriwiki konmakandra, èn a boi fu wi tron wan preikiman di no dopu ete.”

Ma san yu kan du efu a situwâsi fu yu no e gi yu okasi fu froisi go na wan tra gemeente pe moro preikiman de fanowdu? We, yu kan fiti sonwan fu den rai na ini na artikel disi na ini a gemeente pe yu de. Na so a o gersi leki yu de na ini wan nyun gemeente. Aladi yu e fertrow tapu Yehovah, a bun fu tan wroko fayafaya makandra nanga yu gemeente. Seti sani fu wroko nanga trawan na ini a preikiwroko, meki nyun mati, noso tron moro bun mati fu den wan di yu sabi kba. Kande yu kan du wan sani fu yepi den wan di nyun noso den wan di abi yepi fanowdu. Bijbel e sori taki tru Kresten lobi makandra. Dati meki yu o tron wan moro bun mati fu Yehovah te yu e sori lobi gi trawan (Yoh. 13:35). Yu kan de seiker taki „Gado e prisiri nanga den sortu ofrandi dati”.​—Hebr. 13:16.

Aladi a no ben makelek ala ten, tòg furu Kresten e prisiri fu de na ini wan tra gemeente èn den abi bun bakapisi. Yu kan abi a srefi ondrofeni dati. „Mi ben man meki furu mati di mi froisi go na wan tra gemeente”, na so Anne-Lise e taki. Now Kazumi srefi ondrofeni taki te yu froisi, „dan yu o ferwondru fu si fa Yehovah o yepi yu”. Èn fa a de nanga Jules? A e taki: „Den mati di mi meki yepi mi fu firi switi na ini a gemeente pe mi de. Now mi e si a nyun gemeente leki mi famiri èn mi no ben o wani gwe.”