1-2. Sortu problema furu anbegiman fu Yehovah abi èn san den problema disi kan du nanga den?

PRAKSERI den dri situwâsi disi: Datra e taigi wan yongu brada taki a abi wan takru siki di o meki a kon swaki safrisafri. Wan brada di abi sowan 50 yari lasi en wroko aladi a ben e du en wroko bun. A e du muiti fu feni wan tra wroko, ma a no feni wan ete. Wan owru sisa di dini Yehovah furu yari kaba no man du so furu moro gi Yehovah.

² Efu yu abi problema leki den wan disi, dan kande yu e firi leki yu no warti noti moro. Den sani disi kan meki wi lasi prisiri, den kan gi wi a firi leki wi no warti noti èn den kan meki en muilek gi wi fu feni en nanga trawan.

3. Fa Satan nanga den sma di abi a denki fu en e si a libi?

³ Sma fu a grontapu disi abi a srefi denki di Satan abi fu a libi. Gi Satan libisma no warti noti. Na wan ogri-ati fasi a pramisi Eva taki a ben o kon fri efu a trangayesi Gado, aladi a ben sabi taki Eva ben o dede efu a ben o du dati. Ala ten den bisnis, a politiek nanga den kerki fu a grontapu disi ben de na ini a makti fu Satan. Dati meki a no e fruwondru wi taki furu bisnisman, politiekman  nanga kerki fesiman no abi lespeki gi a libi fu sma èn den no e broko den ede nanga den.

4. San wi o luku na ini na artikel disi?

⁴ Ma Yehovah wani taki wi musu denki bun fu wisrefi èn a e yepi wi te sani e miti wi di kan meki wi kisi a firi leki wi no warti noti (Ps. 136:23; Rom. 12:3). Na artikel disi o sori fa Yehovah e yepi wi na ini den situwâsi disi: (1) Te wi kon siki, (2) te wi abi moni problema èn (3) te wi e firi taki wi no e du nofo gi Yehovah fu di wi kon owru. Ma meki wi luku fosi fu san ede ibriwan fu wi kan de seiker taki wi warti gi Yehovah.

5. San e sori yu taki libisma warti gi Yehovah?

⁵ Aladi wi meki fu doti, toku wi warti srefisrefi gi Yehovah (Gen. 2:7). Luku wan tu reide fu san ede wi sabi taki wi prenspari gi Yehovah. A meki wi na so wan fasi taki wi kan sori den fasi fu en (Gen. 1:27). Na a fasi disi a poti wi moro hei leki iniwan tra sani na grontapu. A gi wi a frantwortu tu fu sorgu gi grontapu èn fu basi den meti.​—Ps. 8:4-8.

6. Sortu tra sani e sori taki sondu libisma warti gi Yehovah?

⁶ Srefi baka di Adam sondu Yehovah tan lobi libisma. A lobi wi so te taki a gi en Manpikin Yesus leki wan frulusu-ofrandi gi den sondu fu wi (1 Yoh. 4:9, 10). A lusu-paiman disi o meki taki Yehovah gi wan opobaka na „den sma di du san reti èn na den sma di no du san reti” (Tori 24:15). En Wortu Bijbel e sori taki wi warti gi en awinsi wi siki, awinsi wi pôti èn awinsi wi kon owru.​—Tori 10:34, 35.

7. Sortu tra sani e gi anbegiman fu Yehovah na overtoigi taki den warti gi Yehovah?

⁷ Wi abi tra reide fu bribi taki wi warti gi Yehovah. A hari wi kon na en èn a si fa wi gi yesi na a bun nyunsu (Yoh. 6:44). Di wi bigin kon krosibei na Yehovah, a bigin kon krosibei na wi (Yak. 4:8). Yehovah e du furu muiti tu fu gi wi leri. Disi e sori tu taki wi warti gi en. A sabi fa wi de now èn sortu tra moi fasi wi kan kon abi te fu kaba. Èn a e piri-ai gi wi na wan lobi-ati fasi (Odo 3:11, 12). Ala den sani disi e sori krin taki wi warti gi Yehovah!

8. Fa den wortu na Psalm 18:27-29 kan yepi te wi abi problema?

⁸ Son sma ben e wisiwasi Kownu David, ma David ben sabi taki Yehovah ben lobi en èn taki a ben horibaka gi en. Disi yepi David fu horidoro na ini muilek situwâsi èn fu tan abi prisiri (2 Sam. 16:5-7). Te wi e firi brokosaka noso te wi abi problema, dan Yehovah kan yepi wi fu si sani tra fasi èn fu pasa iniwan tesi. (Leisi Psalm 18:27-29.) Te Yehovah e horibaka gi wi, dan noti kan tapu wi fu dini en nanga prisiri (Rom. 8:31). Meki wi poti prakseri na dri situwâsi pe a de tranga fanowdu fu memre taki Yehovah lobi wi èn taki wi warti gi en.

9. Fa wi kan firi te wi siki?

⁹ Te wi siki, dan dati kan meki wi lasi-ati èn wi kan firi leki wi no man du noti moro. Kande wi e firi syen te sma e si taki wi siki noso te wi musu kisi yepi fu tra sma. Srefi te sma no sabi taki wi siki, wi kan firi syen fu di wi no man du ala sani moro. Na ini den muilek ten  dati Yehovah e gi wi deki-ati. Fa a e du dati?

10. Te wi e luku san Odo 12:25 e taki, dan san kan yepi wi te wi siki?

¹⁰ Te wi siki, wi kan firi prisiri baka „te sma e taki switi” nanga wi. (Leisi Odo 12:25.) Na ini Bijbel, Yehovah meki sma skrifi wortu di e memre wi taki wi warti gi en awinsi wi siki (Ps. 31:19; 41:3). Efu wi e leisi Gado Wortu ala dei, dan Yehovah o yepi wi fu no broko wi ede te wi siki.

11. Fa Yehovah yepi wan brada?

¹¹ Luku na ondrofenitori fu George. * Di George ben yongu, a kisi wan siki di ben kon moro ogri esi-esi èn di meki a firi leki a no warti noti. George e taki: „Mi no ben sabi taki na so a siki ben o meki mi firi. A siki e meki taki sma e luku mi wan fasi èn dati e meki mi firi syen. Di a siki kon moro ogri, mi bigin prakseri fa mi libi ben o kenki. Mi lasi-ati srefisrefi èn mi begi Yehovah fu yepi mi.” Fa Yehovah yepi en? George e taki: „Fu di mi ben e broko mi ede nanga a siki fu mi, meki mi no ben man poti prakseri langa na san mi ben leisi. Ma mi kisi a rai fu leisi syatu tekst na ini den Psalm di e sori taki Yehovah lobi den futuboi fu en. Mi e leisi den tekst dati wan tu leisi ibri dei. Den e gi mi trowstu. Bakaten sma ben e si taki mi ben e lafu moro. Den taki srefi taki den e kisi deki-ati fu di mi de nanga prisiri. Mi si taki Yehovah piki den begi fu mi! A yepi mi fu kenki a fasi fa mi ben e denki fu misrefi. Te mi e leisi en Wortu, dan mi e poti prakseri na den pisi di e sori fa a e denki fu mi, aladi mi siki.”

12. Efu yu siki, dan fa yu kan kisi yepi fu Yehovah?

 ¹² Efu yu siki, dan yu kan de seiker taki Yehovah sabi fa yu e firi. Begi en fu yepi yu fu no frigiti taki yu warti gi en awinsi yu siki. Baka dati, suku tekst di Yehovah poti na ini Bijbel fu trowstu yu. Poti prakseri na tekst di e sori yu o furu Yehovah lobi den futuboi fu en. Te yu e du den sani disi, dan yu o si taki Yehovah e du bun gi ala sma di e tan dini en awinsi na ini sortu situwâsi den de.​—Ps. 84:11.

13. Fa wan osofamiri edeman kan firi te a lasi en wroko?

¹³ Ibri osofamiri edeman wani gi en osofamiri san den abi fanowdu. Ma kon meki wi taki dati wan brada lasi en wroko aladi a ben du en wroko bun. A e meki muiti fu feni wan tra wroko, ma a no man feni wan. A situwâsi disi kan meki a firi leki a no warti noti. Fa a kan kisi deki-ati te a e prakseri den pramisi fu Yehovah?

14. Fu san ede Yehovah e du san a pramisi?

¹⁴ Ala ten Yehovah e du san a pramisi (Yos. 21:45; 23:14). Wan tu reide de fu san ede a e du dati. Wan reide na taki efu Yehovah no du san a pramisi, a o kisi porinen. Fu eksempre, Yehovah pramisi taki a o sorgu gi den futuboi fu en èn a e si en leki wan plekti fu du san a pramisi (Ps. 31:1-3). Boiti dati, Yehovah sabi taki a ben o hati wi efu a no ben o sorgu gi den memre fu en osofamiri. A pramisi wi taki a o gi wi san wi abi fanowdu fu man libi èn fu man tan dini en. Noti kan tapu Yehovah fu du san a pramisi!​—Mat. 6:30-33; 24:45.

15. (a) Sortu tesi den Kresten na ini a ten fu den apostel kisi? (b) Sortu dyaranti Psalm 37:18, 19 e gi wi?

 ¹⁵ Te wi e hori na prakseri fu san ede Yehovah e du san a pramisi, dan wi kan de seiker taki a o yepi wi te a muilek gi wi fu meki nofo moni. Luku na eksempre fu den Kresten na a ten fu den apostel. Di a gemeente na ini Yerusalem kisi hebi frufolgu „ala den disipel, boiti den apostel, panya na ini den kontren fu Yudea nanga Samaria” (Tori 8:1). Prakseri san ben de a bakapisi: Moni problema! Den Kresten lasi den oso, den wroko nanga den bisnis. Toku Yehovah no gowe libi den èn den no lasi prisiri tu (Tori 8:4; Hebr. 13:5, 6; Yak. 1:2, 3). Yehovah yepi den Kresten dati èn a o yepi wi tu.​—Leisi Psalm 37:18, 19.

16. San kan meki wi kisi a firi taki wi no e du nofo gi Yehovah?

¹⁶ Te wi e kon owru, dan wi kan bigin firi taki wi no e du nofo gi Yehovah. Kande Kownu David ben abi den srefi firi disi di a ben kon moro owru (Ps. 71:9). Fa Yehovah kan yepi wi?

17. San wi kan leri fu na ondrofenitori fu wan sisa di nen Joan?

¹⁷ Luku na ondrofenitori fu wan sisa di nen Joan. Wan konmakandra ben o hori pe den ben o leri wan tu brada nanga sisa fa fu sorgu gi a Kownukondre zaal èn Joan ben kisi wan kari fu go tu. Ma a no ben wani go. A taki: „Mi owru, mi masra dede kaba èn mi no sabi du noti. Fa Yehovah kan gebroiki mi dan? Mi no o man du noti.” A neti na fesi Joan taigi Yehovah fa a ben e firi. Di a doro na  a Kownukondre zaal a tra dei, a ben e tweifri ete efu a ben musu de drape. Na a konmakandra, wan fu den takiman sori krin taki wan fu den moro prenspari sani gi Yehovah, na taki wi de klariklari fu wroko gi en. Joan taki: „Na ini misrefi mi ben e denki: ’Mi wani wroko gi Yehovah!’ Mi bigin krei fu di mi frustan taki Yehovah piki a begi fu mi. A ben gi mi a dyaranti taki mi warti gi en èn taki a de klariklari fu gi mi leri!” Joan taki moro fara: „Di mi ben e go na a konmakandra mi ben senwe èn mi ben brokosaka. Ma baka a konmakandra mi ben abi deki-ati èn mi ben abi a firi taki mi warti gi Yehovah!”

18. Fa Bijbel e sori taki Yehovah e tan warderi a wroko di wi e du gi en awinsi wi kon owru?

¹⁸ Te wi e kon owru, wi kan de seiker taki wi kan wroko gi Yehovah ete (Ps. 92:12-15). Yesus leri wi taki awinsi wi no man du furu, Yehovah e warderi a wroko di wi e du gi en (Luk. 21:2-4). Sobun, poti prakseri na san yu man du. Fu eksempre, yu man taki fu Yehovah, yu man begi gi yu brada nanga sisa èn yu man gi trawan deki-ati fu tan dini Yehovah. Yehovah gi yu a grani fu wroko makandra nanga en. A no du dati fu di a luku san yu man du, ma fu di yu de klariklari fu gi yesi na en.​—1 Kor. 3:5-9.

19. Te wi e luku san Romesma 8:38, 39 e taki, dan fu san wi kan de seiker?

¹⁹ Wi de nanga tangi trutru taki wi e dini Yehovah, wan Gado di e warderi den anbegiman fu en. A meki wi fu du a wani fu en èn na a tru anbegi e meki taki wi de koloku trutru (Openb. 4:11). Grontapu kan feni taki wi no warti noti, ma Yehovah no e si wi so (Hebr. 11:16, 38). Te wi e firi brokosaka fu di wi siki, fu di wi abi moni problema noso fu di wi kon owru, dan meki wi hori na prakseri taki noti kan prati wi fu a lobi fu wi hemel Papa.​—Leisi Romesma 8:38, 39.