FURU fu den Kotoigi di e preiki fayafaya na ini den kondre pe moro preikiman de fanowdu, na sisa di no trow. Wan tu fu den e dini na tra kondre omeni tenti yari kaba. San ben gi den deki-ati fu froisi go na wan tra kondre someni yari na fesi? San den leri di den go dini na wan tra kondre? Fa den libi waka? Wi poti aksi gi wan tu fu den sisa disi. Efu yu na wan sisa di no trow èn yu e angri fu teki prati na wan wroko di e meki yu firi koloku, dan seiker yu o kisi wini fu den sani di den sisa disi e taki. Fu taki en leti, ala den anbegiman fu Gado kan kisi wini fu den sani di den e taki.

Yu e aksi yusrefi efu trutru yu o man dini leki pionier na ini wan tra kondre, aladi yu no trow? Anita di abi 75 yari now, ben e tweifri efu a ben o man du dati. A gro kon bigi na ini Ingrisikondre èn di a ben abi 18 yari a bigin pionier drape. A e taki: „Mi ben lobi fu gi sma leri fu Yehovah, ma noiti mi ben denki taki mi ben o man dini na wan tra kondre. Noiti mi no leri taki wan tra tongo, èn mi ben de seiker taki mi no ben o man leri wan. Sobun, di mi kisi a kari fu go na Gileadskoro, dan mi skreki. Mi no ben man bribi taki wan sma leki mi ben kisi so wan bigi grani. Ma mi ben denki: ’Efu Yehovah feni taki mi man du dati, dan mi o pruberi.’ Dati ben de moro leki 50 yari pasa. Sensi a ten dati, mi e dini leki zendeling na Yapan.” Anita e taki moro fara: „Son leisi mi ai e brenki fu prisiri te mi e taigi den yongu sisa: ’Teki yu tas dan yu kon nanga mi fu du a moro moi wroko di de!’ Mi breiti taki furu fu den du dati.”

Furu sisa di dini na tra kondre ben e frede fosi fu froisi gowe libi a kondre fu den. San gi den deki-ati fu go?

Maureen di abi 64 yari e fruteri: „Di mi ben e gro kon bigi, mi ben e angri fu du wan bun sani nanga mi libi. Mi ben wani yepi trawan.” Di Maureen ben abi 20 yari, a froisi go na Kibek, Kanada, pe moro preikiman ben de fanowdu. Maureen e taki: „Bakaten mi kisi wan kari fu go na Gileadskoro, ma mi ben frede fu go mi wawan na wan presi di mi no ben sabi.” A e taki moro fara: „Mi no ben wani gowe libi mi mama tu di ben musu sorgu mi siki papa. Furu neti mi ben e krei e begi Yehovah fu yepi mi nanga den tori disi. Di mi fruteri mi papa nanga mama fu den broko-ede fu mi, dan den gi mi  deki-ati fu go na a skoro. Mi si tu fa a gemeente fu mi yepi mi papa nanga mama na wan lobi-ati fasi. Di mi si fa Yehovah sorgu gi mi famiri, dan dati yepi mi fu abi a frutrow taki a ben o sorgu gi mi tu. Now mi ben de srekasreka fu go!” Maureen bigin dini leki zendeling na West-Afrika na ini 1979, èn a dini drape moro leki 30 yari. Tide na a dei a e sorgu en siki mama na ini Kanada, ma a e dini ete leki spesrutu pionier. Te Maureen e prakseri den yari di a ben e dini na wan tra kondre, dan a e taki: „Ala ten Yehovah gi mi san mi ben abi fanowdu èn a du dati na a yoisti ten.”

Wendy di abi 65 yari now, bigin pionier na ini Australia di a ben abi 14 yari. A e taki: „Na a ten dati mi ben e syensyen èn mi ben e frede fu taki nanga sma di mi no sabi. Ma di mi bigin pionier dan mi leri fu taki nanga ala sortu sma èn safrisafri mi kisi moro deki-ati. Bakaten mi kon si taki mi no ben e frede moro fu taki nanga sma. Fu di mi ben e pionier, meki mi leri fu frutrow tapu Yehovah èn safrisafri mi no ben e frede moro fu go dini na wan tra kondre. Boiti dati, wan sisa di no ben trow èn di dini moro leki 30 yari leki zendeling na Yapan, aksi mi fu go nanga en na Yapan fu preiki dri mun langa drape. Di mi ben e wroko nanga en, dan mi kisi moro deki-ati fu froisi go na wan tra kondre.” Na ini 1986, Wendy froisi go na Vanuwatu, wan èilanti di de sowan 1770 kilometer na a owstusei fu Australia.

Wendy de ete na ini Vanuwatu èn now a e wroko na wan vertaal kantoro. A e taki: „A sani di e gi mi furu prisiri, na te mi e si fa grupu nanga gemeente e seti na ini farawe kontren. Mi e si en leki wan tumusi bigi grani taki mi ben man abi wan pikin prati na a wroko fu Yehovah di e du na den èilanti disi.”

Kumiko di abi 65 yari ben e dini leki gewoon pionier na ini Yapan, di a pionier patna fu en aksi en efu a ben wani froisi go na Nepal. Kumiko e taki: „A tan aksi mi ibri tron baka, ma ibri leisi baka mi ben e taki no. Mi ben frede taki mi no ben o man taki a tongo fu den sma drape èn taki mi no ben o man fiti misrefi na den sma. Mi no ben sabi tu pe mi ben o feni a moni fu libi na wan tra kondre. Mi ben e broko mi ede nanga den sani disi ete, di mi kisi mankeri nanga bromfiets èn mi ben musu didon na ati-oso. Di mi ben de na ati-oso, dan mi aksi misrefi: ’Suma sabi san o pasa nanga mi tamara? Kande mi e kisi wan seryusu siki, dan noiti moro mi o man go pionier na wan tra kondre. Fu san ede mi no e go dini drape awinsi wán yari?’ Mi begi Yehovah fayafaya fu gi mi deki-ati fu du a sani disi.” Baka di Kumiko komoto na ati-oso, a go nanga  fakansi na Nepal èn bakaten en nanga en pionier patna froisi go tan drape.

Te Kumiko e prakseri den pikinmoro tin yari di a ben e dini na ini Nepal, dan a e taki: „Den problema di ben e gi mi broko-ede kon lusu wantronso. Mi breiti so te taki mi go dini na wan kondre pe moro preikiman ben de fanowdu. Nofo tron te mi e preiki a Bijbel boskopu na a oso fu wan famiri, dan feifi noso siksi birtisma e kon drape fu arki. Srefi pikin-nengre e aksi mi na wan lespeki fasi fu gi den wan traktaat. A e gi mi furu prisiri fu preiki na ini a kontren disi pe furu sma e arki.”

A no de fu taki dati den sisa di wi ben poti aksi gi, ben kisi fu du nanga problema. San den du di den sani dati miti den?

Diane fu Kanada e taki: „Na a bigin mi ben feni en muilek fu de so fara fu mi famiri.” Now a abi 62 yari èn a e dini leki zendeling na Ivoorkust (now Côte d’Ivoire) 20 yari kaba. A e taki tu: „Mi aksi Yehovah fu yepi mi fu kon lobi den sma fu a kondre drape. Brada Jack Redford, wan fu den leriman fu a Gileadskoro, ben taigi wi taki na a bigin kande wi no o lobi fa sani de na ini a kondre pe wi e dini. Kande wi no o man bribi srefi fa sani de drape, spesrutu te wi o si nanga wi eigi ai fa den sma e pina. Ma a taigi wi tu: ’No luku a situwâsi fu den sma. Luku den sma srefi, luku den fesi nanga den ai. Luku fa den fesi o kenki te den e yere den tru tori fu Bijbel.’ Na dati mi du, èn a ben de wan bigi blesi! Te mi ben e trowstu sma nanga a Kownukondre boskopu, dan mi ben e si na den ai fa den ben breiti!” Sortu tra sani yepi Diane fu fiti ensrefi na a kondre pe a go preiki? A e taki: „Mi leri sabi den Bijbelstudie fu mi moro bun èn mi ben e breiti srefisrefi fu si fa den tron reti-ati futuboi fu Yehovah. A kondre pe mi go dini kon tron mi tanpe. Mi feni papa nanga mama na ini a tru anbegi, sosrefi brada nanga sisa, neleki fa Yesus ben pramisi.”—Mark. 10:29, 30.

Anne di abi 46 yari, e dini na Asia, na ini wan kondre pe lanti tapu a wroko fu wi. A e fruteri: „Na ini den yari di mi ben e dini na difrenti kondre, mi ben e libi makandra nanga sisa di ben de fu difrenti kulturu èn den ben abi heri tra fasi leki mi. Son leisi a sani dati ben e meki taki wi no ben e frustan makandra bun, èn wi ben e mandi nanga makandra. Te dati ben e pasa, dan mi ben e pruberi fu leri sabi den moro bun, so taki mi ben man frustan a kulturu fu den moro bun tu. Mi ben e du moro muiti tu  fu abi moro pasensi nanga den èn fu sori moro lobi gi den. Mi breiti taki a muiti di mi meki ben yepi èn na so mi meki furu bun mati di yepi mi fu horidoro na ini den kondre pe mi ben go dini.”

Na ini 1993, Ute fu Doisrikondre go dini leki zendeling na Madagaskar. A abi 53 yari now. A e fruteri: „Na a bigin, a ben muilek fu leri taki a tongo fu drape, mi no ben man nanga a faya weer, èn mi ben kisi malaria nanga tra sortu siki. Ma mi kisi furu yepi. Den sisa fu drape, den pikin fu den, nanga den Bijbelstudie fu mi teki den ten fu leri mi a tongo. A zendeling patna fu mi sorgu mi nanga lobi di mi ben siki. Ma san moro prenspari, na taki Yehovah yepi mi. Mi ben gwenti taki nanga en fu den sani di ben e gi mi broko-ede. Dan mi ben e wakti nanga pasensi teleki a piki den begi fu mi. Son leisi mi ben e wakti wan tu dei, son leisi wan tu mun. Ma Yehovah lusu ibriwan fu den problema fu mi.” Now Ute e dini na Madagaskar 23 yari kaba.

Neleki tra brada nanga sisa di e go preiki pe yepi de fanowdu, sisa di no trow èn di e dini na tra kondre, gwenti taki dati den kisi furu blesi na ini den libi. San na wan tu fu den blesi di den kisi?

Heidi fu Doisrikondre, abi 73 yari èn sensi 1968, a e dini leki zendeling na Ivoorkust. A e taki: „A sani di gi mi furu prisiri, na fu si fa den Bijbelstudie fu mi e ’tan du san den leri’. Sonwan fu den Bijbelstudie fu mi e dini now leki pionier nanga gemeente owruman. Furu fu den e kari mi Mama noso Owma. Wan fu den owruman disi, makandra nanga en frow nanga en pikin, e si mi leki den famiri. Na so Yehovah gi mi wan manpikin, wan umapikin, nanga dri granpikin.”—3 Yoh. 4.

Karen fu Kanada, di abi 72 yari now, dini moro leki 20 yari na West-Afrika. A e taki: „A zendeling libi leri mi fu de klariklari fu gi misrefi, fu sori lobi gi trawan, èn fu abi pasensi. Boiti dati, fu di mi e wroko makandra nanga sma fu difrenti kondre, meki mi leri fu fiti misrefi. Mi leri taki difrenti fasi de fu du son sani. A de wan bigi blesi trutru taki mi abi lobi mati now na heri grontapu! Aladi a libi fu wi èn a wroko di wi e du kon kenki, toku wi tan mati.”

Margaret fu Ingrisikondre abi 79 yari now èn a e dini leki zendeling na Laos. A e fruteri: „Fu di mi e dini na ini wan tra kondre, meki mi si nanga mi eigi ai fa Yehovah e hari sma fu ala ras nanga kulturu kon na ini en organisâsi. A sani dati tranga a bribi fu mi srefisrefi. Mi abi ala frutrow taki Yehovah e tiri na organisâsi fu en èn taki den sani di a abi na prakseri o kon tru.”

A tru taki sisa di no trow èn di e dini na ini wan tra kondre abi wan moi prati na a Kresten diniwroko. A fiti taki wi e prèise den sisa disi (Krut. 11:40). San moro prenspari, na taki moro nanga moro sisa e go du a wroko disi (Ps. 68:11). Yu man tyari kenki kon fu teki na eksempre fu den sisa na ini na artikel disi? Efu yu man du dati, dan a no de fu taki dati yu o „tesi èn si taki Yehovah bun”.—Ps. 34:8.