Mi gebore na ini 1934. Mi p’pa nanga m’ma ben kmoto fu Switserland èn den ben froisi kon na Ontario, na ini Kanada. Den go libi na ini a foto Timmins, pe furu sma ben e wroko na ini den mijn drape. Na a ten fu 1939, mi m’ma bigin leisi a Waktitoren tijdschrift èn a bigin go na den konmakandra fu Yehovah Kotoigi. A ben e tyari mi nanga den siksi brada nanga sisa fu mi go nanga en. Fosi yu denki a tron wan Kotoigi fu Yehovah.

Mi p’pa no ben breiti taki mi m’ma tron wan Kotoigi, ma mi m’ma ben lobi a waarheid èn a ben besroiti fu tai hori na Yehovah. A tai hori na Yehovah srefi na ini den yari syatu baka 1940 di lanti fu Kanada ben tapu a wroko fu Yehovah Kotoigi. Ala ten mi m’ma ben e sori lespeki nanga swit’fasi gi mi p’pa, awinsi mi p’pa ben e taigi en hati sani. A moi eksempre fu mi m’ma yepi mi nanga den tra brada nanga sisa fu mi fu teki a waarheid tu. Wi ben breiti srefsrefi di mi p’pa no ben e libi so takru moro nanga wi.

Na ini a zomer fu 1950, mi go na a Toename der Theocratie Kongres na ini New York City. Drape mi miti brada nanga sisa fu difrenti kondre èn mi arki den interview fu den sma di ben klari Gileadskoro. A sani disi meki taki mi ben de fayafaya fu du moro na ini a diniwroko fu Yehovah. Now, mi ben wani go na ini a furuten diniwroko, awinsi san psa. Di mi doro baka na oso, dan mi gi mi nen wantewante fu tron wan gewoon pionier. A bijkantoro fu Kanada skrifi baka fu taigi mi taki mi ben musu dopu fosi. Mi du dati tapu 1 oktober 1950. Wán mun baka dati, mi tron wan gewoon pionier èn mi kisi mi fosi toewijzing. Mi ben musu go dini na ini Kapukasing. A foto dati ben de omeni kilometer moro fara fu pe mi ben e tan na a ten dati.

 Na a mofoyari fu 1951, a bijkantoro aksi wan tu Kotoigi di ben man taki Fransitongo efu den ben wani go dini na ini a distrikt Kibek pe sma ben e taki Fransitongo. Moro preikiman ben de fanowdu drape. Mi ben man taki Fransitongo nanga Ingrisitongo, sobun, mi besroiti fu teki a toewijzing èn mi ben musu go dini na ini a foto Rouyn. Mi no ben sabi nowan sma drape. Mi ben abi soso na adres pe mi ben musu go, soleki fa mi ben ferteri kba. Mi nanga Marcel tron bun mati èn fo yari langa mi dini nanga prisiri na ini Kibek, teleki mi tron wan spesrutu pionier.

Di mi ben de na ini Kibek, dan mi ben breiti srefsrefi di mi kisi a kari fu go na a di fu 26 klas fu Gileadskoro na ini South Lansing, New York. Di mi klari a skoro tapu 12 februari 1956, dan mi kisi a toewijzing fu go dini na ini Gana b, na West-Afrika. Ma fosi mi ben man go drape, mi ben musu drai go baka na Kanada fu wakti mi papira fu man go na Gana. Mi ben denki taki dati ben o teki wan tu wiki nomo, ma sani no waka soleki fa mi ben ferwakti.

Te fu kba mi wakti seibi mun langa na ini a foto Toronto pe mi ben e tan, fosi mi kisi mi papira. Na a ten dati, a famiri Cripps ben feni en bun taki mi tan na den oso èn mi kon leri sabi Sheila, na umapkin fu den. Wi kon lobi makandra. Di mi ben de fu aksi en fu trow nanga mi, dan mi kisi mi visum. Mi nanga Sheila begi Yehovah èn wi besroiti taki mi ben o go na mi toewijzing. Ma wi ben o tan skrifi makandra èn wi ben o wakti fu si efu wi ben o man trow wan dei. A besroiti di wi ben teki no ben makelek, ma bakaten wi kon si taki a ben de a yoisti besroiti.

Baka di mi teki waka wan heri mun langa nanga loko, sipi, nanga opolani, dan mi doro na ini Accra, na Gana. Mi ben musu dini drape leki distrikt-opziener. Disi wani taki dati mi ben musu go na difrenti gemeente na ini Gana, na ini Ivoorkust di ben de krosbei, èn na ini Togo. Nofo tron mi ben e teki waka mi w’wan na ini wan jeep di ben de fu  a bijkantoro. Mi ben lobi go luku den brada nanga sisa.

Te satra nanga sonde, mi ben abi toewijzing na den kring konmakandra. Wi no ben abi kongreshal. Sobun, den brada ben e meki wan daki fu bambutiki èn den ben e tapu den nanga palmtaki so taki sma ben kan feni kibri gi a faya son. Fu di ijskasi no ben de gi a kukru, meki den brada ben e hori libilibi meti krosbei èn den ben e srakti den fu bori leki nyan gi den sma di ben de na a konmakandra.

Wan tu sani psa na den bigi konmakandra dati di ben meki wi lafu. Wan leisi, Herb Jennings, c di ben de wan zendeling tu, ben e hori wan lezing di wan bulu lusu kmoto na a presi pe sma ben kan go teki n’nyan. A bulu lon psa na fesi den sma di ben e sdon arki a lezing. Herb no taki go doro èn a gersi leki a bulu ben bruya. Ma fo steifi brada ben man hori a bulu èn den brada nanga sisa ben e bari fu prisiri di den tyari en go baka na a presi pe sma ben kan go teki n’nyan.

Na ini a wiki di a kongres ben e hori, wi sori den sma na ini den dorpu krosbei a felem De Nieuwe-Wereldmaatschappij in actie. A felem disi ben e sori fa sani ben orga fosi na ini Yehovah en organisâsi. A felem ben de fu si tapu wan bigi weti duku di wi ben e tai na mindri tu postu noso tu bon. Den dorpu sma ben lobi a felem. Gi furu fu den, disi ben de a fosi leisi di den ben si wan felem. Den naki anu bun tranga di den si den pisi pe sma ben e teki dopu. A felem dati yepi den sma di ben luku en fu kon si taki Yehovah Kotoigi de na ini wánfasi èn taki wi de na heri grontapu.

Baka di mi ben dini sowan tu yari na ini Afrika, mi ben breiti fu de na a internationaal kongres di hori na ini New York City na ini 1958. Mi ben breiti srefsrefi fu si Sheila di ben kmoto fu Kibek pe a ben e dini leki spesrutu pionier. Wi ben e skrifi brifi gi makandra, ma now di wi ben de makandra baka, mi aksi en fu trow nanga mi. A ben feni dati bun. Mi skrifi Brada Knorr d èn mi aksi en efu Sheila ben kan go na Gileadskoro so taki a ben kan kon dini makandra nanga mi na ini Afrika. Brada Knorr ben feni dati bun. Te fu kba, Sheila doro na ini Gana. Wi trow na ini Accra, tapu 3 oktober 1959. Wi ben e firi taki Yehovah ben blesi wi trutru fu di wi ben poti en na a fosi presi na ini wi libi.

Na Ini 1961 wi kisi a toewijzing fu go dini na ini Kamerun. Fu di den brada ben aksi mi fu yepi opo wan nyun bijkantoro drape, meki mi ben abi furu fu du. Mi ben musu teki fesi na ini a wroko drape, sobun, mi ben musu leri furu. Ma na ini 1965 Sheila kon de nanga bere. Mi musu taki eerlijk taki wan pisi ten a ben muilek gi wi fu si wisrefi leki p’pa nanga m’ma. Ma te fu kba wi no ben man wakti fu a pkin gebore èn wi bigin seti sani fu drai go baka na Kanada. Ma dan wan tumsi sari sani miti wi.

Sheila lasi a bere. Datra taigi wi taki a beibi ben de wan boi. Disi ben de moro leki 50 yari psa, ma wi noiti no fergiti en. Aladi wi ben e sari srefsrefi fu a sani di psa, tòg wi tan na ini a toewijzing fu wi fu di wi ben lobi den sma drape trutru.

Na ini Kamerun, sma ben gwenti ferfolgu den brada nanga sisa fu wi fu di den ben e weigri fu teki sei na ini politiek. Na a ten fu verkiezing, dan a situwâsi ben muilek srefsrefi. Tapu 13 mei 1970 lanti drape tapu a wroko fu Yehovah Kotoigi. Wi ben e howpu so te taki a sani disi no ben o psa. Lanti teki a moi nyun bijkantoro gebow abra pe wi ben froisi go tan feifi mun na fesi. Na ini wán wiki, ala den zendeling, sosrefi mi nanga Sheila, ben musu gwe libi a kondre. A hati wi taki wi ben musu libi den brada nanga sisa na baka, fu di wi ben lobi den. Wi ben e broko wi ede nanga den fu di wi no ben sabi san ben o psa nanga den.

Wi tan siksi mun na a bijkantoro na ini Fransikondre. Drape mi tan du ala san mi ben man fu sorgu gi den sani di den brada nanga sisa fu wi na ini Kamerun ben abi fanowdu. Na ini december fu a yari dati, wi kisi a toewijzing fu go dini na a bijkantoro fu Nigeria di ben bigin sorgu gi a wroko na ini Kamerun. Den brada nanga sisa na ini Nigeria gi wi wan switikon èn wi ben prisiri fu dini wan tu yari drape.

Na ini 1973 wi ben musu teki wan muilek besroiti. Sheila kon abi problema nanga a gosontu fu en. Di wi ben de na ini New York gi wan kongres, dan a bigin krei èn a taigi mi: „Mi no man moro! Mi skin weri èn doronomo mi e sikisiki.” A ben dini moro leki 14 yari makandra nanga mi na ini West-Afrika. Mi ben breiti so te taki a ben e tan wroko gi Yehovah, ma wi ben musu tyari wan tu kenki kon. Baka di wi taki fu a situwâsi fu wi, dan wi begi Yehovah fayafaya fu yepi wi. Ne wi besroiti fu drai go baka na Kanada pe Sheila ben kan kisi moro bun datrayepi. Na so wi gwe libi a zendelingwroko èn wi kmoto na ini a furuten diniwroko. Disi ben de wan fu den moro muilek besroiti di wi ben teki oiti èn wi ben e sari trutru.

Baka di wi doro na ini Kanada, dan mi feni wan wroko na wan bun mati fu mi di ben e seri oto na ini wan foto na a noordsei fu Toronto. Mi nanga Sheila yuru wan apartement, èn wi bai ini-oso sani di sma ben gebroiki kba. Na so wi ben man bigin wan nyun libi sondro fu meki paiman. Wi ben wani tan libi wan simpel libi, fu di wi ben e howpu taki wan dei wi ben o man go baka na  ini a furuten diniwroko. Èn wi ferwondru fu si taki wi ben man du dati moro esi srefi leki san wi ben denki.

Tapu satra mi ben e yepi nanga a bow fu a nyun kongreshal na ini a foto Norval, na Ontario. Baka wan pisiten den brada aksi mi fu dini leki opziener fu a kongreshal. Sheila ben e firi moro bun èn a ben feni taki a ben o man du a wroko disi. Dati meki wi froisi go tan na ini a apartement fu a kongreshal na ini yuni 1974. Wi ben breiti so te taki wi ben de baka na ini a furuten diniwroko.

Wi ben breiti taki Sheila ben e kon betre dei fu dei. Tu yari baka dati, wi ben man teki wan toewijzing fu go du kringwroko. A kring ben de na ini Manitoba, wan distrikt na ini Kanada pe a kowru srefsrefi na ini winter ten. Ma a waran lobi fu den brada nanga sisa drape ben e du wi bun trutru. Wi leri taki a no abi trobi pe wi e dini. San prenspari, na taki wi e tan dini Yehovah awinsi pe wi de.

Baka di wi ben du a kringwroko wan tu yari, dan wi kisi a kari na ini 1978 fu go dini na Kanada Betel. Syatu baka dati, mi leri wan prenspari les di no ben makelek. Mi ben musu hori wan Fransitongo lezing na wan spesrutu konmakandra na ini Montreal. A lezing disi ben o teki wán nanga afu yuru. Ma a sari taki te fu kba a lezing no ben e hari den arkiman moro. Dati meki wan brada fu a Dienstafdeling gi mi rai fu a tori disi. Fu taki en leti, na a ten dati mi ben denki taki mi ben de wan bun takiman. Sobun, mi no ben breiti nanga a rai di a gi mi. Mi nanga en no ben man feni en. Mi ben feni taki a ben krutu mi tumsi èn taki a no ben taigi mi san mi ben du bun. Fu di mi no ben lobi a fasi fa a brada disi ben taki nanga mi èn fu di mi no ben lobi fa a ben de, meki mi no ben agri nanga a rai fu en.

Wan tu dei baka dati, wan brada fu a Bijkantoro Komte taki nanga mi fu a tori. Mi taigi en taki mi no ben tyari misrefi na wan bun fasi di mi kisi a rai èn taki mi ben sari taki sani ben waka so. Baka dati, mi taki nanga a brada di ben gi mi rai. A ben de klarklari fu gi mi pardon èn a no hori mi na ati. A sani disi leri mi fu abi sakafasi ala ten èn noiti mi o fergiti dati (Odo 16:18). Mi begi Yehovah furu leisi fu a sani disi èn mi besroiti taki noiti moro mi o mandi te wan sma e gi mi rai.

Now mi e dini moro leki 40 yari na Kanada Betel èn sensi 1985, mi abi a grani fu dini ini a Bijkantoro Komte. Na ini februari 2021, mi lobi wefi Sheila dede. Mi e misi en trutru èn now mi srefi abi problema nanga mi gosontu. Ma fu di mi abi so furu fu du na ini a diniwroko fu Yehovah, meki mi ’no e tan prakseri den problema di e miti mi’ (Preik. 5:20). A tru taki furu problema miti mi na ini mi libi, ma den sani di gi mi prisiri furu moro den problema dati. Mi de koloku trutru fu di mi du furuten diniwroko 70 yari langa èn fu di mi poti Yehovah na a fosi presi na ini mi libi. Mi e begi taki den yongu brada nanga sisa fu wi e tan poti Yehovah na a fosi presi na ini den libi tu. Mi de seiker taki dati na a wan-enkri fasi fa den o man de koloku èn kisi furu blesi.