DEN Israelsma ben lobi poku trutru. Bijbel e taki furu leisi fu sma di ben e prei pokusani èn fu sma di ben e singi. Fu taki en leti, wan bigi pisi fu Bijbel na singi. Fu eksempre, den Psalm, Singi fu Salomo, nanga Sari singi ben skrifi fu sma singi den. A buku Music in Biblical Life e taki dati Bijbel „e sori krin taki den Israelsma ben e prei poku na furu difrenti okasi”.

Poku na ini na aladei libi. Den Israelsma ben e prei poku fu sori fa den ben e firi (Yes. 30:29). Umasma ben e prei sek’seki, den ben e singi nanga prisiri, èn den ben e dansi te den ben e poti wan sma leki kownu, te fesa ben de, èn te den srudati ben wini wan feti (Krut. 11:34; 1 Sam. 18:6, 7, 1 Kow. 1:39, 40). Boiti dati, den Israelsma ben gwenti singi sari singi te wan sma ben dede (2 Kron. 35:25). Dati meki wi kan ferstan fu san ede a buku McClintock and Strong’s Cyclopedia ben taki dati „den Hebrewsma ben lobi poku trutru”.

Poku na ini kownu-oso. Den kownu fu Israel ben lobi arki poku. Kownu Saul ben meki David kon na a kownu-oso fu prei a harpu gi en (1 Sam. 16:18, 23). Bakaten di David srefi tron kownu, dan a meki pokusani, a skrifi moi singi, èn a seti wan bigi grupu pokuman fu prei poku na ini a tempel fu Yehovah (2 Kron. 7:6; Amos 6:5). Den sma di ben e singi na ini a kownu-oso fu Salomo, ben de man nanga uma.​—Preik. 2:8.

Poku na ini na anbegi. Ma san moro prenspari, na taki den Israelsma ben e meki poku fu anbegi Yehovah. Fu taki en leti, 4000 pokuman ben e meki poku na ini a tempel na ini Yerusalem (1 Kron. 23:5). Den ben e naki gengen, de ben e prei harpu, nanga trompeti (2 Kron. 5:12). Ma den koni pokuman disi no ben de den wan-enkri sma di ben e anbegi Yehovah nanga poku. Furu Israelsma ben e singi den singi fu den wan di ben e kren go na a foto, te den ben e go na Yerusalem fu teki prati na den fesa di ben e hori ibri yari (Ps. 120–134). Èn soleki fa Dyu skrifiman e taki, dan den Israelsma ben e singi den Hallel-psalm a te den ben e nyan a Paska n’nyan.

Te na a dei fu tide poku prenspari ete gi den futuboi fu Yehovah (Yak. 5:13). Wi e singi gi Yehovah fu prèise en (Ef. 5:19). Wi e firi taki wi na wán te wi e singi gi Yehovah makandra nanga wi brada nanga sisa (Kol. 3:16). Èn te wi e prei noso arki poku di abi fu du nanga Yehovah, noso te wi singi gi en, dan wi e kisi dek’ati èn dati e yepi wi fu hordoro (Tori 16:25). Poku na wan moi fasi fa wi kan sori taki wi e bribi na ini Yehovah èn taki wi lobi en.