1, 2. (a) Sortu wroko ben moro prenspari gi Yesus èn fu san ede? (b) San wi musu du fu man de bun leriman fu Gado Wortu?

YESUS KRESTES ben de wan temreman nanga wan leriman (Mark. 6:3; Yoh. 13:13). A ben sabi du ala den tu wroko bun. Leki temreman, a ben leri fu gebroiki den wrokosani fu en fu meki sani fu udu. Leki leriman fu a bun nyunsu a ben sabi Gado Wortu bun èn dati meki a ben man yepi sma fu frustan den tru leri na ini Gado Wortu (Mat. 7:28; Luk. 24:32, 45). Di Yesus ben abi 30 yari, a tapu fu du temrewroko fu di a ben sabi taki a moro prenspari wroko na fu gi sma leri fu Gado. A ben taki dati Gado ben seni en kon na grontapu fu fruteri sma a bun nyunsu fu Gado Kownukondre (Mat. 20:28; Luk. 3:23; 4:43). A preikiwroko ben de a moro prenspari sani gi Yesus èn a ben wani taki tra sma kon du a wroko disi makandra nanga en.​—Mat. 9:35-38.

² Furu fu wi a no temreman, ma wi alamala na leriman fu a bun nyunsu. A wroko disi de so prenspari, taki Gado no e meki wi wawan du en. Bijbel e taki dati „wi e wroko makandra nanga Gado” (1 Kor. 3:9; 2 Kor. 6:4). Wi e agri taki „ala sani di [Yehovah] taki, de tru” (Ps. 119:159, 160). Dati meki te wi de na ini a preikiwroko, wi wani sorgu taki wi e „gebroiki a tru leri na ini Gado wortu na wan yoisti fasi”. (Leisi 2 Timoteyus 2:15.) Sobun, meki wi tan du muiti fu gebroiki Bijbel bun. Dati na a moro  prenspari wrokosani di wi e gebroiki fu leri sma den tru tori fu Yehovah, Yesus nanga a Kownukondre. Fu yepi wi fu du a wroko fu wi bun, Yehovah organisâsi gi wi tra wrokosani tu èn wi musu leri fu gebroiki den bun. Den sani disi wi e kari wrokosani fu gi sma leri.

3. San na a moro prenspari sani di wi wani du na ini a syatu pisi ten di wi abi ete fu preiki? Fa Tori fu den apostel 13:48 e yepi wi fu du disi?

³ Den wrokosani di den brada gi wi na fu gi leri, a no fu preiki nomo. Preiki wani taki dati yu e fruteri sma wan boskopu, ma „gi leri” wani taki dati yu e fruklari a boskopu so taki a naki a sma ati èn a sma bigin du san a leri. Na ini a syatu pisi ten di wi abi ete fu preiki, a moro prenspari sani di wi wani du na fu bigin Bijbelstudie èn fu leri sma den tru tori fu Bijbel. Dati wani taki dati wi musu suku den sma di „abi a yoisti denki fu man kisi têgo libi” èn wi musu yepi den fu kon dini Yehovah.​—Leisi Tori fu den apostel 13:44-48.

4. Fa wi kan feni den sma di „abi a yoisti denki fu man kisi têgo libi”?

⁴ Fa wi kan feni den sma di „abi a yoisti denki fu man kisi têgo libi”? Soleki fa a ben de na ini a ten fu den apostel, dan a wan-enkri fasi fa wi kan feni den sma disi na te wi e preiki. Yesus ben taki: ’Awansi na ini sortu foto noso dorpu unu e go, suku suma warti fu yere a boskopu’ (Mat. 10:11). Wi no e fruwakti taki sma di no de seryusu, sma di abi heimemre nanga sma di no e broko den ede nanga Gado o arki a bun nyunsu. Wi e suku sma di de seryusu, di abi sakafasi èn di wani kon sabi den tru leri fu Bijbel. Wi kan agersi a suku di wi e suku sma nanga a temrewroko di Yesus ben e du. A ben e suku den yoisti udu fu meki sani soleki kasi, sturu, doro nanga tyatyari. Te a ben feni a yoisti udu, dan a ben e teki den wrokosani fu en èn a ben e gebroiki a koni fu en fu meki san a wani. Na ini a ten disi wi musu feni reti-ati sma fosi èn baka dati wi musu gebroiki den wrokosani fu wi nanga a koni di wi abi fu yepi den fu tron disipel.​—Mat. 28:19, 20.

5. San wi musu kon sabi fu den wrokosani di wi abi fu gi leri? Gi wan eksempre. (Luku den prenki na a bigin fu na artikel.)

⁵ Wan temreman abi difrenti wrokosani èn a sabi gi san a musu gebroiki den. Fu eksempre, Yesus ben e gebroiki difrenti wrokosani. * A ben abi wrokosani fu marki udu, fu koti na udu, fu boro en, fu skafu en èn fu fasi en kon na makandra. Wi abi difrenti wrokosani tu fu gi sma leri èn wi musu kon sabi fa wi musu gebroiki den. Sobun, meki wi go luku fa wi kan gebroiki ibriwan fu den wrokosani di wi kisi.

6, 7. (a) Fa yu gebroiki a jw.org karta? (b) San na tu sani di wi kan du nanga den kari gi den konmakandra?

⁶ Jw.org karta. Den karta disi pikin, ma wi kan gebroiki den bun fu meki sma kon sabi a website fu wi èn suma na wi. Te sma e go tapu a website, dan den kan leri sabi moro fu Yehovah Kotoigi èn den kan aksi wan Bijbelstudie. Te nanga now, moro leki 400.000 sma go tapu jw.org fu aksi wan Bijbelstudie èn hondrohondro sma e du dati ibri dei. A bun fu abi wan tu Jw.org karta na yu so taki yu kan gebroiki den fu taki nanga sma di yu e miti ala dei.

⁷ Kari gi den konmakandra. Na tapu den papira disi skrifi: „Yu wani studeri Bijbel nanga Yehovah Kotoigi?” Dan a e taki dati yu kan „studeri na den konmakandra fu wi” „noso nanga wan sma di e kon na  yu”. Sobun, a kari disi e du tu sani: A e sori sma suma na wi, èn a e gi sma di „sabi taki den abi Gado fanowdu”, wan kari fu studeri Bijbel (Mat. 5:3). A no de fu taki dati ibri sma kan kon na den konmakandra fu wi, awinsi den no e studeri Bijbel. Te den kon, den o si èn yere o furu den kan leri fu Bijbel.

8. Fu san ede a prenspari taki sma e kon na den konmakandra fu wi, awinsi na wán leisi nomo? Fruteri wan ondrofenitori.

⁸ A prenspari taki wi e tan kari sma kon na den konmakandra fu wi. A no abi trobi efu na wán leisi nomo den kon. Fu san ede? Fu di te den kon, den kan si taki Yehovah Kotoigi e leri sma den tru tori fu Bijbel èn den e yepi sma fu kon sabi Gado, aladi den falsi kerki no e du dati (Yes. 65:13). Ray nanga Linda, wan trowpaar fu Amerkankondre ben ondrofeni disi wan tu yari pasa. Den ben bosroiti taki den ben o bigin go na kerki. Den ben e bribi na ini Gado èn den ben wani kon sabi en moro bun. Dati meki den bigin go na ibriwan fu den kerki na ini a foto fu den. Furu kerki ben de na ini a foto. Ma a trowpaar disi ben e luku tu sani te den ben go na den kerki. A fosi sani na taki den ben e luku efu den ben o leri wan sani te den ben drape. Èn a di fu tu sani na taki den ben e luku efu den sma ben e weri krosi di fiti. Baka wan tu yari, den ben go na ala den kerki fu a foto, ma den no ben feni san den ben e suku. Den no ben leri noti èn den sma no ben weri krosi di fiti. Baka di den komoto na a lasti kerki, Linda go na wroko èn Ray go na oso. Di Ray ben de na pasi e go na oso, a rèi pasa wan Kownukondre zaal. A ben prakseri: ’Meki mi go luku san e pasa inisei.’ Dati ben de a moro moi sani di a ondrofeni! Ala sma na ini a Kownukondre zaal ben sori switifasi gi en èn den ben weri krosi di fiti. Ray ben sidon na a fosi rèi èn a ben lobi san a ben leri! Ray ben si taki Gado de trutru na wi mindri. Disi e memre wi na san na apostel Paulus ben taki fu sma di ben kon fu a fosi leisi na wan Kresten konmakandra (1 Kor. 14:23-25). Baka dati Ray go ibri sonde na den konmakandra èn bakaten a bigin go na ibri mindriwiki konmakandra. Linda srefi bigin go na den konmakandra. Aladi den ben pasa 70 yari, den bigin studeri Bijbel nanga den Kotoigi èn den teki dopu.

9, 10. (a) Fu san ede den traktaat makelek fu gebroiki? (b) Fruteri fa wi kan gebroiki a traktaat San na a Kownukondre fu Gado?

⁹ Traktaat. Wi abi aiti traktaat di e yepi wi fu bigin wan takimakandra na wan makelek fasi. Wi bigin druk den traktaat disi na ini 2013 èn sensi a ten dati wi druk feifi milyard fu den! Ala den traktaat disi meki na a srefi fasi. Sobun, te yu leri wroko nanga wán fu den, dan yu man wroko nanga den alamala. Fa yu kan gebroiki wan fu den traktaat disi fu bigin wan takimakandra nanga wan sma?

¹⁰ Kande yu wani wroko nanga a traktaat San na a Kownukondre fu Gado? Sori a sma na aksi na fesisei fu a traktaat, dan aksi en: „Oiti yu aksi yusrefi san na a Kownukondre fu Gado? Yu ben o taki dati . . . ?” Baka dati yu kan aksi a sma sortuwan fu den dri piki a ben o teki. Na presi fu taigi en efu a piki fu en bun noso efu a fowtu, yu kan opo a traktaat, dan yu kan taki fu a pisi „San Bijbel e taki?” Leisi den tu tekst Danièl 2:44 nanga Yesaya 9:6, 7. Efu a sma abi ten, yu kan taki go doro nanga en. Na a kaba fu yu takimakandra, yu kan go na a pisi di nen „Prakseri fu a sani disi” na bakasei fu a traktaat. Dan poti na aksi: „Fa a libi o de te Gado Kownukondre o tiri?” Yu kan piki na  aksi disi te yu o go wan tra leisi na a sma. Te yu go baka na a sma, dan yu kan sori a sma les 7 fu a brochure Gado abi bun nyunsu gi wi! Disi na wan fu den wrokosani di wi e gebroiki fu bigin studeri Bijbel nanga sma.

11. Fu san ede den brada meki den tijdschrift, ma san wi musu kon sabi fu den tijdschrift disi?

¹¹ Tijdschrift. A Waktitoren nanga na Ontwaakt! prati moro iniwan tra tijdschrift na grontapu èn den vertaal na ini moro tongo leki ala tra tijdschrift! Fu di sma na ini difrenti kondre e leisi den tijdschrift fu wi, meki den brada e skrifi artikel di e hari a prakseri fu ala sortu sma. Wi musu gebroiki den tijdschrift disi fu yepi sma fu poti prakseri na den moro prenspari sani fu a libi. Ma wi musu kon sabi fosi gi suma wi kan prati A Waktitoren èn gi suma wi kan prati na Ontwaakt!

12. Gi suma na Ontwaakt! meki èn fa a tijdschrift disi kan yepi sma?

¹² Na Ontwaakt! meki gi sma di no sabi furu fu Bijbel noso di no sabi noti fu en. Kande den no sabi noti fu a Kresten bribi, kande den no e frutrow kerki noso a kan taki den no sabi fa Bijbel kan yepi den na ini den eigi libi. Wan prenspari sani di den brada wani du nanga na Ontwaakt!, na fu overtoigi sma taki Gado de (Rom. 1:20; Hebr. 11:6). A tijdschrift disi kan yepi wan sma tu fu kon bribi taki Bijbel na ’a wortu fu Gado trutru’ (1 Tes. 2:13). Den dri Ontwaakt! fu 2018 nen: „De weg naar geluk”, „Tips voor een gelukkig gezin” nanga „Omgaan met verlies”.

13. (a) Gi suma A Waktitoren gi a preikiwroko meki? (b) Sortu bun bakapisi yu ben abi di yu wroko nanga A Waktitoren no so langa pasa?

¹³ A Waktitoren gi a preikiwroko meki fu yepi sma di e lespeki Gado nanga en Wortu. A kan taki den sma disi sabi wan tu sani fu Bijbel kaba, ma den no e frustan den leri fu en bun. A Waktitoren kan yepi den fu kon frustan den leri disi moro bun (Rom. 10:2; 1 Tim. 2:3, 4). Den dri Waktitoren fu 2018 e piki den aksi disi: „Bijbel kan yepi wi na ini a ten disi?”, „San o pasa na ini a ten di e kon?” nanga „Gado e broko en ede nanga yu?”

14. (a) Fa den fo felem kan yepi sma? (b) Sortu bun bakapisi yu kisi di yu sori sma den felem disi?

¹⁴ Felem. Na ini a ten fu Yesus wan temreman no ben abi masyin. Ma na ini a ten disi, temreman abi masyin fu koti udu, fu boro en èn fu skafu en. Na so a de tu nanga a wroko di wi e du. Boiti den traktaat, den tijdschrift nanga den buku fu wi, wi abi moi felem tu fu sori sma. Fo fu den felem disi na: Fu san ede wi musu studeri Bijbel?, Fa wi e studeri Bijbel nanga sma?, San wi e du na ini wan Kownukondre zaal?, nanga Yehovah Kotoigi​—Suma na wi? Den brada meki langawan nanga syatuwan fu den felem disi. Wi kan gebroiki den syatuwan di no pasa tu miniti te wi o taki nanga wan sma a fosi leisi. Den langawan wi kan gebroiki te wi o go baka na a sma èn te wan sma abi moro ten fu taki. Den moi felem disi kan gi sma deki-ati fu studeri Bijbel èn fu go na den konmakandra.

15. Fa sma e feni en te den luku den felem fu wi na ini den eigi tongo? Fruteri wan ondrofenitori.

¹⁵ Luku na ondrofenitori disi. Wan sisa miti wan uma di ben froisi kon fu Mikronesia èn di e taki Yaptongo. A sisa sori en a felem Fu san ede wi musu studeri Bijbel? na ini a tongo fu en. Di a felem bigin prei, na uma taki: „Disi na mi tongo. Mi no man bribi! A fasi fa a man e taki mi kan yere taki en na fu na èilanti fu mi. A e taki mi tongo!” Baka  dati na uma taki dati a o leisi èn luku ala sani di jw.org abi na ini en tongo. (Luku Tori fu den apostel 2:8, 11.) Luku wan tra ondrofenitori fu wan sisa na ini Amerkankondre. A seni wan link fu a srefi felem gi en brada pikin di e libi na ini wan tra kondre. Di a yonguman luku a felem na ini a tongo fu en, a seni wan e-mail gi en tante. A taki: „Mi ben lobi a pisi di e taki dati na Didibri e rigeri heri grontapu. Mi aksi wan Bijbelstudie tapu a website.” A man disi e libi na ini wan kondre pe a wroko fu wi tapu!

16. Fruteri fu san ede den brada meki den brochure disi: (a) Arki Gado èn libi fu têgo. (b) Gado abi bun nyunsu gi wi! (c) Suma e du a wani fu Yehovah na ini a ten disi?

¹⁶ Brochure. Fa wi kan leri wan sma den tru tori fu Bijbel efu a sma no man leisi bun èn efu a no abi buku di e taki fu Bijbel na ini en eigi tongo? Wi kan gebroiki a brochure Arki Gado èn libi fu têgo. * Wan moi wrokosani fu bigin Bijbelstudie na a brochure Gado abi bun nyunsu gi wi! Yu kan sori sma den 14 tori di skrifi na bakasei fu a brochure, dan yu e aksi den fu sortuwan den wani taki. Yu kan bigin studeri a les dati nanga a sma. Yu pruberi disi di yu tyari gobaka? Wan tra brochure di wi kan gebroiki fu gi sma leri na Suma e du a wani fu Yehovah na ini a ten disi? A brochure disi meki fu yepi den Bijbelstudie fu wi fu kon sabi moro fu na organisâsi. Efu yu wani sabi fa fu gebroiki a brochure disi na ibri Bijbelstudie, dan luku Wi Kresten libi nanga a preikiwroko​—Studie-buku fu maart 2017.

17. (a) Fu san ede den brada meki den tu buku di wi e gebroiki fu studeri Bijbel nanga sma? (b) San ibri sma di teki dopu musu du èn fu san ede?

¹⁷ Buku. Te yu bigin studeri Bijbel nanga wan sma nanga den brochure fu wi, dan iniwan ten yu kan bigin nanga a buku San Bijbel kan leri wi? A buku disi o yepi a sma fu kon sabi den prenspari leri fu Bijbel moro bun. Te yu kaba nanga a buku dati èn te a Bijbelstudie e go na fesi, dan yu kan tan studeri nanga en na ini a buku Meki Gado tan lobi yu. A buku disi o yepi a Bijbelstudie fu kon sabi fa a kan gebroiki Bijbel rai na ini en libi. No frigiti taki awinsi wan sma dopu kaba, a musu studeri ala den tu buku disi teleki a kaba den. Disi o yepi en fu kon abi wan tranga bribi na ini Yehovah èn fu tan gi yesi na en.​—Leisi Kolosesma 2:6, 7.

18. (a) Sortu rai 1 Timoteyus 4:16 e gi wi èn san o de a bakapisi te wi e teki a rai dati? (b) San wi musu pruberi fu du te wi e gebroiki den wrokosani di wi kisi fu gi sma leri?

¹⁸ Leki Yehovah Kotoigi wi kisi a frantwortu fu leri sma „a tru boskopu. Dati na a bun nyunsu” di kan meki taki sma kisi têgo libi (Kol. 1:5; leisi 1 Timoteyus 4:16). Fu yepi wi du a wroko disi, den brada gi wi den wrokosani di wi abi fanowdu fu gi sma leri. (Luku a faki „ Wrokosani di wi abi fu gi sma leri”.) Meki wi du ala san wi man fu gebroiki den wrokosani disi bun. Ibri preikiman kan bosroiti sortu traktaat, tijdschrift, brochure noso buku a wani gebroiki na ini a preikiwroko èn o ten a wani du dati. Ma hori na prakseri taki wi no musu prati den sani disi nomo. Èn efu sma no wani sabi noti fu a boskopu fu wi, wi no musu libi den na baka. A wroko fu wi na fu yepi reti-ati sma di abi sakafasi èn di sabi taki den abi Gado fanowdu, fu tron disipel fu Krestes. Sobun, wi e suku sma di „abi a yoisti denki fu man kisi têgo libi”.​—Tori 13:48; Mat. 28:19, 20.