1-2. Soleki fa 1 Petrus 4:7, 8 e sori, dan san o yepi wi fu horidoro na ini muilek ten?

NOW di a kaba de so krosibei, wi kan fruwakti taki wi o kisi hebi tesi (2 Tim. 3:1). Fu eksempre, baka wan verkiezing na ini wan kondre na ini Afrika, sma bigin feti nanga makandra èn wan heri pisi ten dyugudyugu ben de. Siksi mun langa den brada nanga sisa fu wi no ben man go pe den ben wani, fu di feti ben de na ini a kondre. San yepi den na ini a muilek ten dati? Sonwan fu den ben go tan nanga tra brada nanga sisa di ben tan na ini wan kontren pe feti no ben de. Wan brada taki: „Na ini a muilek situwâsi disi, mi ben breiti taki mi ben abi mati di ben yepi mi. Wi ben gi makandra deki-ati.”

² Te „a bigi banawtu” bigin wi o breiti taki wi abi bun mati di lobi wi (Openb. 7:14). Dati meki a prenspari taki wi meki muiti fu abi bun mati nownow. (Leisi 1 Petrus 4:7, 8.) Wi kan leri furu fu Yeremia di ben abi mati di yepi en fu tan na libi na ini a muilek pisi ten fosi Yerusalem kisi pori. * Fa wi kan teki na eksempre fu Yeremia?

3. (a) San ben kan meki taki Yeremia de en wawan? (b) San Yeremia taigi en sekretarsi Baruk èn san ben de a bakapisi?

³ Sowan 40 yari Yeremia ben tan na mindri sma di ben trangayesi Yehovah. A kan taki sonwan fu den sma disi ben de birtisma nanga famiri fu en na Anatot, a foto pe a  ben e tan (Yer. 11:21; 12:6). Toku a no ben de en wawan. A ben taigi Baruk, a sekretarsi fu en di ben horibaka gi en, fa a ben firi. Fu di den sani disi skrifi na ini Bijbel meki wi srefi sabi fa a ben firi (Yer. 8:21; 9:1; 20:14-18; 45:1). Yeremia ben fruteri Baruk ala den sani di ben miti en èn Baruk ben skrifi den. Fu di den ben wroko so furu nanga makandra, meki den ben kon lobi makandra èn lespeki makandra.​—Yer. 20:1, 2; 26:7-11.

4. San Yehovah ben aksi Yeremia fu du èn fa a sani disi meki taki en nanga Baruk tron bun mati?

⁴ Furu yari langa Yeremia warskow den Israelsma taki Yerusalem ben o kisi pori (Yer. 25:3). Fu yepi a pipel fu sori berow, Yehovah aksi Yeremia fu skrifi ala den warskow di a ben gi den ala den yari, na tapu wan bukulolo (Yer. 36:1-4). A kan taki Baruk nanga Yeremia wroko wan tu mun langa fu klari a wroko di Gado ben gi den. A ben musu fu de so taki den taki furu nanga makandra èn taki den gi makandra deki-ati.

5. Fa wi du sabi taki Baruk ben de wan bun mati fu Yeremia?

⁵ Baka di den kaba skrifi a bukulolo, Yeremia ben seni en mati Baruk fu tyari a boskopu gi den sma (Yer. 36:5, 6). Baruk du san Yeremia taigi en aladi ogri ben kan miti en. A musu fu de so taki Yeremia ben breiti taki Baruk ben go na a tempel èn taki a leisi a bukulolo gi a pipel (Yer. 36:8-10). Den granman fu Yuda yere san Baruk du èn den taigi en fu leisi a bukulolo gi den (Yer. 36:14, 15). Den granman ben o taigi Kownu Yoyakim san Yeremia taki. Ma fosi den du dati den taigi Baruk: „Yu nanga Yeremia musu go kibri, so taki nowan sma sabi pe unu de” (Yer. 36:16-19). Dati ben de bun rai di den gi en!

6. San Yeremia nanga Baruk du di sma ben gens den?

 ⁶ Di Kownu Yoyakim yere san Yeremia skrifi a atibron so te, taki a bron a bukulolo èn a seni sma fu go teki Yeremia nanga Baruk. Ma Yeremia no ben frede. A gi Baruk wan tra bukulolo èn Baruk skrifi ala den sani di Yeremia ben taki èn „di ben skrifi na ini a fosi bukulolo di Kownu Yoyakim fu Yuda ben bron na ini a faya”.​—Yer. 36:26-28, 32.

7. San pasa di Yeremia nanga Baruk ben wroko nanga makandra?

⁷ Te sma e yepi makandra fu pasa wan tesi, dan nofo tron den e tron moro bun mati. Na so a ben de nanga Yeremia nanga Baruk. Baka di Kownu Yoyakim bron a bukulolo den ben wroko makandra fu skrifi wan trawan. A sani disi meki taki den kon sabi makandra moro bun. Fa na eksempre fu Yeremia nanga Baruk e sori wi san wi kan du fu tron bun mati fu trawan?

8. San kan meki taki a muilek gi wi fu meki mati, ma fu san ede wi musu tan meki muiti fu du dati?

⁸ Efu wan sma ben du wan hati sani nanga wi na ini a ten di pasa, dan kande a muilek gi wi fu taigi trawan fa wi e firi (Odo 18:19, 24). Noso kande wi e feni taki a e aksi tumusi furu fu wi fu meki mati. Toku wi musu meki muiti fu du dati. Efu wi wani taki wi brada nanga sisa yepi wi te problema miti wi, dan wi musu tron bun mati fu den nownow. Wan prenspari fasi fa wi kan du dati na fu taigi den fa wi e denki èn fa wi e firi.​—1 Petr. 1:22.

9. (a) Fa Yesus ben sori taki a ben frutrow den mati fu en? (b) Fu san ede yu e tron moro bun mati fu sma te yu e fruteri den fa yu e denki èn fa yu e firi? Gi wan eksempre.

⁹ Yesus ben sori taki a ben frutrow den mati fu en. A ben taigi den san de na tapu en ati èn a no ben kibri noti gi den (Yoh. 15:15). Wi kan teki na eksempre fu en te wi e taigi wi mati san e gi wi prisiri, san e gi wi broko-ede èn san e meki wi lasi-ati. Arki bun te wan sma e taki nanga yu. Kande yu o si taki unu e denki èn e firi a srefi fasi fu son sani. Kande yu o si tu taki unu wani du den srefi sani na ini a libi. Luku wan eksempre fu wan sisa di nen Cindy èn di abi 29 yari. A ben tron mati fu Marie-Louise, wan sisa di e pionier èn di abi 67 yari. Cindy nanga Marie-Louise ben wroko ala fodewroko mamanten ini a preikiwroko èn den ben e taki ala sortu tori nanga makandra. Cindy e taki: „Mi lobi fu taki fu seryusu tori nanga den  mati fu mi fu di dati e yepi mi fu kon sabi den èn fu frustan den moro bun.” Te yu e fruteri den mati fu yu fa yu e denki èn fa yu e firi èn te yu e arki den te den e taki, dan yu o tron moro bun mati fu den.​—Odo 27:9.

10. Soleki fa Odo 27:17 e sori, dan san kan pasa te wi e wroko makandra nanga wi brada nanga sisa na ini a preikiwroko?

¹⁰ Neleki fa a ben de nanga Yeremia nanga Baruk, wi e kon sabi wi brada nanga sisa moro bun te wi e wroko makandra nanga den èn te wi e si den bun fasi fu den. (Leisi Odo 27:17.) Fu eksempre, te yu de na ini a preikiwroko makandra nanga wan brada noso sisa, dan fa yu e firi te yu e si fa a e taki nanga deki-ati fu a bribi fu en? Fa yu e firi te yu e si fa a e taki fayafaya fu Yehovah èn fu den sani di Yehovah o du? A sani disi kan meki taki yu kon lobi en moro.

11-12. Gi wan eksempre di e sori taki te wi e preiki nanga makandra, dan wi kan tron moro bun mati.

¹¹ Wi o luku tu ondrofenitori di e sori taki sma kan kon lobi makandra moro te den e preiki nanga makandra. Adeline, wan sisa di abi 23 yari, ben aksi Candice, wan fu den mati fu en, fu go preiki na ini wan kontren pe gemeente no e preiki furu. Adeline e taki: „Wi ala tu ben firi taki a sani dati ben o yepi wi fu tan du ala san wi man du gi Yehovah. Wi ben wani preiki nanga moro faya èn wi ben wani abi moro prisiri na ini a preikiwroko.” Sortu wini den kisi fu di den ben wroko nanga makandra? Adeline e taki: „Na a kaba fu ibri dei wi ben e taki fa wi ben e firi, san wi ben lobi fu den takimakandra di wi ben abi nanga sma èn fa Yehovah ben yepi wi na ini a preikiwroko. Wi ben lobi taki fu den sani disi èn wi kon sabi makandra moro bun.”

¹² Laïla nanga Marianne, tu sisa di no trow èn di e libi na ini Fransikondre, go  preiki feifi wiki na Bangui, a mamafoto fu Republiek Centraal-Afrika. Laïla e taki: „Mi nanga Marianne no ben agri ala ten nanga makandra, ma fu di wi ben e taki bun nanga makandra èn fu di wi ben sori trutru lobi, meki wi tron moro bun mati. Mi si taki Marianne man fiti ensrefi makriki na difrenti situwâsi, a lobi den sma fu a kondre èn a e du a preikiwroko fayafaya. Disi meki taki mi kon abi moro lespeki gi en.” Yu no abi fu froisi go na wan tra kondre fu kan kisi den wini disi. Ma ibri leisi te yu e du a preikiwroko makandra nanga wan brada noso sisa fu yu gemeente, dan yu o abi na okasi fu kon sabi en moro bun èn fu tron moro bun mati fu en.

13. San e pasa son leisi te wi e preiki furu nanga wi brada nanga sisa?

¹³ Son leisi te wi e preiki furu nanga wi brada nanga sisa, dan wi e kon sabi den bun fasi fu den, ma wi e kon sabi den swakifasi fu den tu. San kan yepi wi fu tan bun mati awinsi den e meki fowtu? Meki wi luku baka san wi kan leri fu Yeremia. San yepi en fu si den bun fasi fu den mati fu en èn fu gi den pardon?

14. San Yeremia ben leri fu Yehovah èn fa dati ben yepi en?

¹⁴ Yeremia skrifi a Bijbel buku di e tyari a nen fu en èn a kan tu taki a skrifi den Bijbel buku 1 Kownu nanga 2 Kownu. A wroko dati yepi en fu si o furu sari-ati Yehovah abi gi sondu libisma. Fu eksempre, a ben sabi taki di Kownu Akab ben sori berow gi den sondu fu en, Yehovah no strafu a famiri fu en di a ben de na libi ete (1 Kow. 21:27-29). Yeremia ben sabi tu taki Manase ben du moro bigi sondu leki Akab. Toku Yehovah gi Manase pardon fu di a ben abi berow (2 Kow. 21:16, 17; 2 Kron. 33:10-13). A musu de so taki den tori disi yepi Yeremia fu sori pasensi nanga sari-ati gi den mati fu en, neleki fa Yehovah e du dati.​—Ps. 103:8, 9.

15. Di Baruk ben meki tra sani puru en prakseri na a wroko fu en, dan fa Yeremia sori pasensi neleki Yehovah?

¹⁵ Wan pisi ten Baruk ben meki tra sani puru en prakseri na a wroko fu en. San Yeremia du? Yeremia no ben denki taki yepi no ben de moro gi Baruk. Ma na wan switi fasi a fruteri en sortu rai Yehovah ben abi gi en (Yer. 45:1-5). San wi kan leri fu a tori disi?

16. Te wi e luku san Odo 17:9 e taki, dan san wi musu du efu wi wani tan bun mati fu wi brada nanga sisa?

¹⁶ Wi no kan fruwakti taki wi brada nanga sisa no o meki fowtu. Fu dati ede, te wi tron mati nanga wan sma kaba, dan wi musu tan meki muiti fu tan bun mati. Efu den mati fu wi e meki fowtu, dan kande wi o abi fu gi den rai fu Gado Wortu na wan switi fasi èn wi o abi fu taki krin nanga den (Ps. 141:5). Èn efu den du wan hati sani nanga wi, dan wi musu gi den pardon. Te wi gi den pardon kaba, dan wi no musu taki moro fu a tori. (Leisi Odo 17:9.) Na ini a muilek ten disi a prenspari srefisrefi fu poti prakseri na den bun fasi fu wi brada nanga sisa, na presi fu poti prakseri na den swakifasi fu den! Te wi e du dati, dan wi o tron moro bun mati fu den èn na a ten fu a bigi banawtu wi o abi den mati dati fanowdu.

17. Fa Yeremia sori taki a ben de wan trutru mati?

¹⁷ A profeiti Yeremia ben sori taki a ben de wan bun mati te den mati fu en ben abi  problema. Di sma ben trowe Yeremia na ini wan dipi peti di ben lai nanga tokotoko, dan Ebed-Meilek di ben wroko na ini kownu-oso go puru en fosi a dede. Ma Ebed-Meilek ben kon frede taki den granman ben o kiri en. Di Yeremia kon sabi disi, a no sidon nomo e howpu taki sani waka bun nanga en mati. Aladi Yeremia ben de na strafu-oso, a du ala san a man fu trowstu en mati. A taigi Ebed-Meilek taki Yehovah ben o frulusu en.​—Yer. 38:7-13; 39:15-18.

18. Soleki fa Odo 17:17 e sori, dan san wi musu du te wi mati abi problema?

¹⁸ Na ini a ten disi wi brada nanga sisa e kisi ala sortu tesi. Furu fu den e kisi fu du nanga rampu, noso tra ogri e miti den. Te dati e pasa, dan sonwan fu wi kan meki den brada nanga sisa disi kon tan nanga wi. Kande trawan kan gi moni. Ma wan sani di wi alamala kan du na taki wi kan aksi Yehovah fu yepi wi brada nanga sisa. Efu wi kon sabi taki wan brada noso sisa lasi-ati, dan kande wi no sabi san wi musu taki noso du. Ma wi alamala kan yepi en. Fu eksempre, wi kan meki ten fu go luku en. Te a e taki, wi kan arki en nanga pasensi. Wi kan fruteri en tu sortu tekst e gi wi deki-ati (Yes. 50:4). San prenspari, na taki yu de klariklari fu yepi yu mati te den abi yu fanowdu.​—Leisi Odo 17:17.

19. Te wi e du muiti fu tron bun mati fu makandra now, dan fa dati o yepi wi na ini a ten di e kon?

¹⁹ Nownow wi musu du muiti fu tron bun mati fu wi brada nanga sisa èn fu tan bun mati fu den. Fu san ede? Feanti o fruteri lei, fu di den o wani tyari pratifasi kon na wi mindri. Den o pruberi fu tyari trobi kon na wi mindri. Ma den no o abi bun bakapisi. Den no o man pori a lobi di wi abi gi makandra. Nowan sani di den o du o man pori a matifasi di wi abi nanga makandra. Fu taki en leti, wi no o de mati na ini a ten disi nomo, ma wi o de mati fu têgo!