1-2. Fa wi du sabi taki a nen fu Yehovah prenspari gi Yesus?

 A NEN fu Yehovah na a moro prenspari sani gi Yesus. Nowan sma du moro leki Yesus fu meki trawan kon sabi Yehovah nen. Na ini a artikel di psa wi leri taki Yesus ben de klarklari fu dede fu sori taki Yehovah santa èn taki alaten a e du san reti (Mark 14:36; Hebr. 10:7-9). Èn baka te Yesus tiri grontapu dusun yari, a o gi Yehovah ala a makti baka di a ben kisi. A o du dati fu di a wani taki na Yehovah musu kisi ala glori (1 Kor. 15:26-28). Ala sani di Yesus du gi Yehovah e sori krin taki a lobi Yehovah trutru.

² Yesus kon na grontapu fu ferteri sma ala sani di Yehovah ben wani taki den sabi (Yoh. 5:43; 12:13). A meki den bakaman fu en kon sabi Yehovah nen (Yoh. 17:6, 26). Te Yesus ben e gi leri èn te a ben e du wondru dan a ben sori den sma krin taki na Yehovah ben e gi en a koni nanga a krakti fu du den sani dati (Yoh. 10:25). Èn di Yesus ben begi Yehovah fu kibri den disipel fu en, dan a aksi Yehovah fu du dati „fu [En] eigi nen ede” (Yoh. 17:11). A de krin taki a nen fu Gado ben de a moro prenspari sani gi Yesus. Sobun, efu wan sma no sabi Yehovah, noso efu a no e gebroiki en nen, dan fa a kan de wan bakaman fu Yesus?

3. San wi o luku na ini a artikel disi?

³ Fu di wi na tru Kresten, meki wi e teki na eksempre fu Yesus èn wi e sori taki wi lobi èn e lespeki a nen fu en P’pa (1 Petr. 2:21). Na ini a artikel disi wi o si fu san ede Yehovah gi den wan di e preiki ’a bun nyunsu fu a Kownukondre’, a nen fu en (Mat. 24:14). Wi o luku tu o prenpari  a nen fu Yehovah musu de gi ibriwan fu wi.

’WAN PIPEL DI BEN O TYARI EN NEN’

4. (a) San Yesus ben taigi den disipel fu en fosi a drai go baka na hemel? (b) Sortu aksi e opo kon?

⁴ Fosi Yesus drai go baka na hemel a taigi den disipel fu en: „Unu o kisi krakti te a santa yeye kon na un tapu èn unu o de kotoigi fu mi na ini Yerusalem, na ini heri Yudea nanga Samaria èn te na den moro fara presi fu grontapu” (Tori 1:8). Sobun, den disipel no ben o preiki a bun nyunsu na ini Israel w’wan, ma na ala presi. Baka wan pisiten sma na ala sei fu grontapu ben o kisi na okasi fu tron bakaman fu Yesus (Mat. 28:19, 20). Ma Yesus ben taki: „Unu o de kotoigi fu mi.” A de so taki den disipel disi ben o abi fu kon sabi a nen fu Yehovah, noso den ben o de kotoigi fu Yesus w’wan? Den sani di psa na ini Tori fu den Apostel Kapitel 15 o yepi wi fu piki den aksi disi.

5. Fa den apostel nanga den owruman na ini Yerusalem sori taki ala sma musu kon sabi Yehovah nen? (Luku a prenki.)

⁵ Na ini a yari 49, den apostel nanga den owruman na ini Yerusalem kon makandra fu ondrosuku efu den sma di no ben de Dyu ben musu besnèi fu man tron Kresten. Na a kba fu a konmakandra, Yakobus, na afu brada fu Yesus, taki: „[Petrus] ferteri finfini fa Gado bigin poti prakseri na den sma di no de Dyu, so taki a ben kan puru wan pipel na den mindri di ben o tyari en nen.” Fu sortu nen Yakobus ben e taki? Te Yakobus e taki moro fara fu a tori disi dan a e gebroiki den wortu fu a profeiti Amos. A e taki: „Na so den wan di tan abra fu a pipel disi kan suku Yehovah fayafaya, makandra nanga ala trakondre sma di e tyari mi nen, na so Yehovah taki” (Tori. 15:14-18). Disi wani taki dati den ben o meki trawan kon sabi a nen fu Yehovah èn sma ben o sabi den leki Kotoigi fu Yehovah.

6-7. (a) Fu san ede Yesus kon na grontapu? (b) San ben de wan moro prenspari reide fu san ede Yesus kon na grontapu?

⁶ A nen fu Yesus wani taki „Yehovah na frulusu” èn Yehovah gebroiki Yesus fu ferlusu ala sma di e bribi na ini en nanga  en Manpkin. Yesus kon na grontapu fu pai a lusu-paiman (Mat. 20:28). Fu di a du dati meki libisma kan kisi pardon fu den sondu èn den o man libi fu têgo.​—Yoh. 3:16.

⁷ Ma fu san ede libisma ben abi wan lusu-paiman fanowdu? Na fu a sani di ben psa na ini a dyari fu Eden. Soleki fa wi si na ini a artikel na fesi, wi fosi p’pa nanga m’ma, Adam nanga Eva, ben opo densrefi teige Yehovah èn na so den lasi a grani di den ben abi fu libi fu têgo (Gen. 3:6, 24). Ma Yesus ben kon na grontapu fu du wan sani di ben prenspari moro leki fu ferlusu libisma. Satan ben ferteri ogr’ati lei fu Yehovah (Gen. 3:4, 5). Sobun, libisma ben musu kon sabi taki den sani di Satan ben taki, na soso lei èn taki Yehovah na wan lob’ati P’pa. Èn Yesus ben de a moro bun sma fu tyari dati kon na krin, fu di a ben e teki presi gi Yehovah èn a ben e du ala san Yehovah ben wani taki a du.

8. San ala bakaman fu Yesus ben o abi fu ferstan?

⁸ Ala bakaman fu Yesus ben o abi fu ferstan taki naYehovah, a P’pa fu Yesus, meki taki den man kisi pardon fu sondu èn kisi têgo libi (Yoh. 17:3). Boiti dati, neleki Yesus den ben o tyari a nen fu Yehovah. Den ben o abi fu ferstan tu fu san ede a prenspari fu santa a nen dati. Den ben musu santa a nen fu Yehovah efu den ben wani kisi ferlusu (Tori 2:21, 22). Sobun, ala bakaman fu Yesus ben o abi fu leri sabi Yehovah nanga Yesus. Wi kan ferstan fu san ede Yesus tapu a begi fu en na ini Yohanes 17, nanga den wortu disi: „Mi meki den kon sabi yu nen èn mi o tan fruteri den fu yu nen, so taki den kan abi a srefi lobi di yu abi gi mi èn mi kan de wán nanga den.”​—Yoh. 17:26.

„UNU NA MI KOTOIGI”

9. Fa wi kan sori taki Yehovah nen prenspari gi wi?

⁹ Den sani di wi leri te nanga now e sori krin taki ala getrow bakaman fu Yesus musu santa a nen fu Yehovah (Mat. 6:9, 10). A nen fu Yehovah musu de a moro prenspari nen gi wi. Den sani di wi e du musu sori dati. Ma san wi kan du fu santa Yehovah nen èn fu sori taki den sani di Satan taki fu Yehovah no tru?

10. San wi e leri na ini kapitel 42 te go miti 44 fu a buku Yesaya? (Yesaya 43:9; 44:7-9) (Luku a prenki.)

¹⁰ Na ini Yesaya kapitel 42 te go miti 44 wi e leri san wi kan du fu santa Yehovah nen. Na ini den kapitel disi Yehovah e aksi den sma di no e anbegi en fu kon nanga beweisi di e sori taki den gado fu den na trutru gado. Neleki fa a de na wan krutu-afersi, na so Yehovah e aksi den sma fu tyari kotoigi kon fu sori taki den gado fu den de na libi. Ma nowan sma man du dati!​—Leisi Yesaya 43:9; 44:7-9.

11. San Yehovah e taigi en pipel na Yesaya 43:10-12?

¹¹ Leisi Yesaya 43:10-12. Yehovah e taigi en pipel: „Unu na mi kotoigi, . . . èn mi na a tru Gado.” Yehovah e aksi den fu piki na aksi disi: „Wan tra Gado de boiti mi?” (Yes. 44:8). Wi abi a bigi grani fu piki na aksi disi. Nanga yepi fu den  sani di wi e taki èn e du wi e sori sma taki nowan tra Gado de boiti Yehovah. Nowan nen prenspari moro di fu en. Èn nanga a fasi fa wi e libi, wi e sori taki wi lobi Yehovah trutru èn taki wi e tai hori na en awinsi Satan e meki en muilek gi wi. Na so wi e yepi fu santa a nen fu Yehovah.

12. Fa a profeititori na ini Yesaya 40:3, 5 kon tru?

¹² Te wi e santa a nen fu Yehovah, dan wi e teki na eksempre Yesus Krestes. Yesaya ben taki tu dati wan sma ben o „sreka [noso, „krin”, ftw.] a pasi fu Yehovah” (Yes. 40:3). Fa dati kon tru? Yohanes a Dopuman sreka a pasi gi Yesus di ben kon na ini a nen fu Yehovah èn di ben e taki na ini a nen fu Yehovah (Mat. 3:3; Mark 1:2-4; Luk. 3:3-6). A srefi profeititori ben taki: „A glori fu Yehovah o de fu si” (Yes. 40:5). Fa so? Di Yesus kon na grontapu, dan a ben e teki presi so bun  gi Yehovah, taki a ben de neleki Yehovah srefi ben kon na grontapu.​—Yoh. 12:45.

13. Fa wi kan teki na eksempre fu Yesus?

¹³ Neleki Yesus, wi na Kotoigi fu Yehovah. Wi e tyari a nen fu Yehovah èn wi e ferteri ala sma di wi e miti fu den bigi sani di a du. Ma fu man du disi na wan yoisti fasi, dan wi musu meki sma kon sabi ala den sani tu di Yesus du fu santa a nen fu Yehovah (Tori 1:8). Yesus na a moro prenspari Kotoigi fu Yehovah èn wi e teki na eksempre fu en (Openb. 1:5). San na wan tra fasi fa wi kan sori taki a nen fu Yehovah prenspari gi wi?

TRA FASI FA WI E SORI TAKI A NEN FU YEHOVAH PRENSPARI GI WI

14. Soleki fa Psalm 105:3 e sori, dan fa wi e si a nen fu Yehovah?

¹⁴ Wi breiti taki wi mag tyari Yehovah nen. (Leisi Psalm 105:3.) Yehovah e prisiri te wi e meki bigi gi a nen fu en (Yer. 9:23, 24; 1 Kor. 1:31; 2 Kor. 10:17). Wi e si en leki wan bigi grani fu ferteri trawan taki Yehovah santa èn taki ala ten a e du san reti. Noiti wi musu syen fu taigi sma na wi wrokope, pkin na ini wi klas, birtisma, nanga trawan taki wi na Yehovah Kotoigi! Didibri wani taki wi tapu fu ferteri trawan fu Yehovah en nen (Yer. 11:21; Openb. 12:17). Fu taki en leti, Satan nanga den wan di a e gebroiki fu ferteri lei, wani taki sma fergiti a nen fu Yehovah (Yer. 23:26, 27). Ma fu di wi lobi a nen fu Yehovah, meki wi wani prèise en „heri dei”.​—Ps. 5:11; 89:16.

15. San a wani taki fu kari a nen fu Yehovah?

¹⁵ Wi e tan kari a nen fu Yehovah (Yoèl 2:32; Rom. 10:13, 14). Te wi e kari a nen fu Yehovah, dan dati no wani taki nomo dati wi sabi Gado nen èn taki wi e gebroiki en. Wi e kon sabi taki Gado abi firi, wi e kon sabi den fasi fu en, èn wi kan tron mati fu en. Wi e leri fu fertrow na en tapu, èn fu suku yepi nanga rai na en (Ps. 20:7; 99:6; 116:4; 145:18). Te wi e kari a nen fu Yehovah, dan dati wani taki tu dati wi e ferteri sma san na a nen fu en èn san na den moi fasi fu en. Èn wi e yepi trawan fu kenki den libi so taki Yehovah kan feni den bun.​—Yes. 12:4; Tori 2:21, 38.

16. Fa wi kan sori taki Satan na wan leiman?

¹⁶ Wi de klarklari fu nyan pina so taki Yehovah kan kisi glori (Yak. 5:10, 11). Te wi e tai hori na Yehovah awinsi wi musu nyan pina, dan wi e sori taki Satan na wan leiman. Di Yob ben de na libi, dan Satan ben taki disi fu den wan di e anbegi Yehovah: „Te wan sma de fu dede, a o gi ala san a abi fu man tan na libi” (Yob 2:4). Satan ben taki dati sma ben o dini Yehovah soso te a sani ben o waka bun nanga den, ma taki den ben o drai baka gi en te den ben o kisi problema. Yob sori taki a sani di Satan taki no tru kwetkweti! Wi srefi na ini a ten disi abi a grani fu sori taki wi no o drai baka gi Yehovah noiti, awinsi a libi e kon muilek gi wi. Wi kan abi a dyaranti taki Yehovah o kibri wi fu en eigi nen ede.​—Yoh. 17:11.

17. Na sortu tra fasi wi kan gi Yehovah glori soleki fa 1 Petrus 2:12 e sori?

¹⁷ Wi e sori lespeki gi a nen fu Yehovah (Odo. 30:9; Yer. 7:8-11). Fu di sma sabi wi leki Yehovah Kotoigi, meki a fasi fa wi e tyari wisrefi kan gi a nen fu Yehovah grani noso a kan pori a nen fu en.  (Leisi 1 Petrus 2:12.). Dati meki wi wani du ala san wi man fu gi Yehovah grani nanga yepi fu den sani di wi e taki èn e du. Na so wi e sori taki wi e lespeki a nen fu Yehovah glori, aladi wi na sondu sma.

18. San na wan tra fasi fa wi kan sori taki a nen fu Yehovah prenspari gi wi? (Luku a futuwortu.)

¹⁸ Wi e gi Yehovah nen grani awinsi fa sma e denki fu wi (Ps. 138:2). Fu san ede a sani disi prenspari? Fu di sma no lobi te wi e du sani di e prisiri Yehovah ati, èn nofo tron den e taki ogri fu wi. a Di Yesus dede, dan sma ben e si en leki wan ogr’ati man èn den ben e teige en. Ma Yesus ben de klarklari fu dede na a fasi disi, so taki Yehovah ben kan kisi grani. Yesus no ben e broko en ede tumsi nanga a fasi fa sma ben o denki fu en (Hebr. 12:2-4). A wan-enkri sani di ben prenspari gi en, na fu du a wani fu Gado.​—Mat. 26:39.

19. O prenspari a nen fu Yehovah de gi wi, èn fu san ede?

¹⁹ Wi e si en leki wan grani fu anbegi Yehovah èn fu tyari a nen fu en. Fu di Yehovah nen prenspari gi wi, meki wi o tan prèise en awinsi trawan e taki ogri fu wi. Wi o gi Yehovah nen grani awinsi fa trawan e denki fu wi. Sobun, meki wi tan prèise Yehovah nen, awinsi fa Satan e pruberi fu tapu pasi gi wi. Na so wi e sori taki a nen fu Yehovah na a moro prenspari sani gi wi, neleki fa a ben de gi Yesus Krestes.