1. Fu san ede son sma no wani studeri?

NA INI a ten disi furu sma musu wroko tranga fu meki nofo moni fu sorgu densrefi. Furu brada nanga sisa e wroko heri dei soso fu kan sorgu gi den osofamiri. Furu tra sma de na pasi omeni yuru langa fu go na wroko èn fu drai kon baka na oso. Èn trawan musu du hebi wroko. Na a kaba fu ibri dei den brada nanga sisa disi weri! Te den doro oso, den weri so te taki den no wani studeri.

2. O ten yu e studeri?

² Ma fu taki en leti, wi musu meki ten fu studeri Gado Wortu nanga den buku di wi e kisi fu Yehovah en organisâsi. Wi musu du dati efu wi wani abi wan bun matifasi nanga Yehovah èn efu wi wani kisi têgo libi (1 Tim. 4:15, 16). Son sma e opo fruku mamanten ibri dei fu studeri, fu di na a ten dati den tra sma e sribi ete èn den man denki krin fu di den no weri. Trawan e meki pikinso ten na a kaba fu a dei fu studeri èn fu denki dipi.

3-4. Sortu kenki den brada tyari kon èn fu san ede?

³ A no de fu taki dati yu e agri taki a prenspari fu meki ten fu studeri. Ma san yu musu studeri? Kande yu e prakseri: ’So furu sani de fu leisi. Mi no man leisi ala sani.’ Son sma man leisi ala den buku èn den man luku ala den felem di wi e kisi. Ma furu brada nanga sisa no e feni ten fu du dati. A Tiri Skin sabi disi. Dati meki no so langa pasa, den teki a bosroiti fu no meki so furu buku moro èn fu no poti so furu sani moro tapu Internet.

⁴ Fu eksempre, wi no e meki a Yaribuku fu Yehovah Kotoigi moro fu di furu moi ondrofenitori de kaba na tapu  a jw.org^® website èn na a JW Broadcasting^® programa di e kon ala mun. Now wi e kisi dri Ontwaakt! nomo na ini wan yari nanga dri Waktitoren gi a preikiwroko. Den brada no tyari den kenki disi kon, so taki wi kan abi moro ten fu du sani di no abi fu du nanga na anbegi fu Yehovah. Den tyari den kenki disi kon so taki wi kan poti prakseri na „den moro prenspari sani” (Fil. 1:10). Meki wi luku now fa yu kan sabi san moro prenspari èn fa yu kan kisi wini fu a studeri di yu e studeri Bijbel.

5-6. Sortu prenspari sani wi musu studeri?

⁵ San na a moro prenspari sani di wi musu studeri? A no de fu taki dati wi musu pruberi fu studeri Gado Wortu ibri dei. A pisi di wi musu leisi na ini Bijbel gi a mindriwiki konmakandra no furu so moro, fu di den brada wani taki wi abi moro ten fu denki dipi fu san wi e leisi èn fu ondrosuku sani. Wi no e leisi a pisi disi nomo fu di den brada taigi wi. Wi e leisi en fu di wi wani taki a boskopu fu Bijbel doro wi ati èn fu di wi wani tron moro bun mati fu Yehovah.​—Ps. 19:14.

⁶ Sortu tra sani wi musu studeri? Wi wani sreka gi A Waktitoren-studie, gi a gemeente Bijbelstudie nanga den tra pisi fu a mindriwiki konmakandra. Wi musu leisi A Waktitoren gi a preikiwroko, a studie-Waktitoren nanga na Ontwaakt!

7. Yu musu lasi-ati te yu no man leisi noso luku ala den sani di wi e kisi tapu wi website noso na tapu JW Broadcasting?

⁷ Ma kande yu e aksi yusrefi fa a de nanga ala den tra sani di de na tapu jw.org^® nanga JW Broadcasting^®. Den sani dati furu! Meki wi luku wan agersitori di o yepi wi fu si san wi kan du: Te yu go na ini wan restaurant pe den e seri ala sortu switi nyanyan, yu no o man nyan ala san den abi. Dati meki yu o bai wan tu sani nomo. Na so a de tu taki yu no abi fu lasi-ati te yu no man leisi noso luku ala den sani di wi e kisi tapu den website fu wi. Luku èn leisi san yu man. Wi o si now fa wi kan studeri èn fa wi kan kisi wini te wi e du dati.

8. Fa wi kan studeri wan studie-artikel na ini A Waktitoren bun èn fa dati o tyari wini kon gi wi?

⁸ Te yu e studeri yu musu pruberi fu frustan san yu e leisi, so taki yu kan leri wan sani fu en. Yu no musu leisi frafra soso fu man hari strepi na den piki. Fu eksempre, te yu o sreka a studie-Waktitoren luku a faki na a bigin fu na artikel di e sori san yu o leri na ini na artikel. Baka dati, luku a nen fu na artikel, den edeprakseri nanga den aksi fu luku baka san wi leri. Baka dati teki yu ten fu leisi na artikel bun. Poti prakseri na a fosi zin fu ibri paragraaf. Nofo tron a zin disi e sori fu sortu sani a paragraaf e taki. Te yu e leisi na artikel, dan prakseri fa ibri paragraaf e horibaka gi na edeprakseri èn gi a nen fu na artikel. Skrifi ibri wortu di yu no sabi noso iniwan sani di yu wani ondrosuku moro fini.

9. (a) Fu san ede a prenspari fu poti prakseri na den Bijbeltekst na ini den studie-artikel èn fa wi kan du dati? (b) Soleki fa Psalm 77:12 e sori, dan san wi musu du, boiti taki wi e leisi den tekst?

⁹ Te wi e studeri A Waktitoren na a gemeente konmakandra, dan dati e yepi wi fu frustan Bijbel. Fu dati ede, poti prakseri na den Bijbeltekst, spesrutu den  tekst di wi o leisi na a Waktitoren-studie. Luku fa son wortu noso pisi fu a tekst e horibaka gi a paragraaf. Boiti dati, meki ten fu denki dipi fu den tekst di yu e leisi èn luku fa yu kan gebroiki den na ini yu libi.​—Leisi Psalm 77:12.

10. Soleki fa Hebrewsma 5:14 e sori, dan fu san ede papa nanga mama musu meki ten fu leri den pikin fa den musu studeri èn fa den musu ondrosuku sani?

¹⁰ Te papa nanga mama e hori na Osofamiri Anbegi ibri wiki, dan den musu hori en na so wan fasi, taki den pikin e prisiri fu du en. Papa nanga mama musu luku na fesi san den o du ibri wiki na a Osofamiri Anbegi. Ma disi no wani taki dati den musu prei Bijbel drama noso du tra kefalek sani ibri leisi. Osofamiri kan luku a JW Broadcasting programa di e kon ibri mun noso den kan meki wan moi sani nanga makandra soleki na ark fu Noa. Ma a prenspari tu fu leri den pikin fa den musu studeri. Den musu leri fu sreka densrefi gi den gemeente konmakandra noso den musu leri san den kan du te den e kisi tesi na skoro. (Leisi Hebrewsma 5:14.) Efu den abi a gwenti fu studeri na oso, dan a o moro makriki gi den fu sidon arki bun na den gemeente konmakandra, den kring konmakandra èn na den kongres, spesrutu te den lezing no abi felem. Fu sabi o langa den kan studeri nanga den pikin fu den, papa nanga mama musu luku omeni yari den pikin abi èn o langa den man sidon pî.

11. Fu san ede a prenspari fu leri den Bijbelstudie fu wi fu studeri bun?

¹¹ Wi musu leri den Bijbelstudie fu wi tu fa den musu studeri. Te den no e studeri so langa ete, dan wi breiti te wi e si taki den e sreka densrefi gi a Bijbelstudie noso gi den konmakandra. Ma wi musu leri den tu fa den kan ondrosuku sani èn fa den kan studeri bun te den de den wawan. Dan te den e kisi problema, den no o lon go suku yepi wantewante na wan sma fu a gemeente, ma den o sabi fa fu ondrosuku sani na ini den buku fu wi fu sabi san den musu du.

12. Fu san ede wi e studeri?

¹² Efu yu no lobi studeri, dan kande yu e denki taki noiti yu o kon lobi en. Ma yu kan kon lobi en. Na ini a bigin, yu no abi fu studeri langa. Ma te yu kon gwenti en, dan pikinsopikinso yu o bigin studeri  moro langa. Pruberi fu leri wan sani te yu e studeri. A moro prenspari reide fu san ede wi e studeri, na fu tron wan moro bun mati fu Yehovah. Ma wi kan studeri tu fu man piki wan aksi di wan sma ben poti gi wi noso fu feni rai di kan yepi wi fu lusu wan problema.

13. (a) Fruteri san wan yonguwan kan du fu sori den pikin na skoro san a e bribi. (b) Fa yu kan fiti a rai di skrifi na Kolosesma 4:6?

¹³ Fu eksempre, efu yu na wan yonguwan di e go na skoro, dan kande den pikin fu yu klas wani sabi fu san ede yu no e singi gi a fraga. Kande yu wani sori den san Bijbel e taki fu a tori, ma yu no sabi fa. Efu dati de so, dan yu musu studeri fu a tori! Yu kan du den tu sani disi: (1) Pruberi fu frustan moro krin fu san ede yu no musu de wan pisi fu grontapu, èn (2) leri fu gebroiki Bijbel moro bun fu sori sma san yu e bribi (Yoh. 17:16; 1 Petr. 3:15). Yu kan aksi yusrefi: ’San den pikin fu mi klas taki fu sori fu san ede den e singi gi a fraga?’ Baka dati, ondrosuku finifini san den buku fu wi e taki fu a tori disi. Yu o si taki a no muilek so fu sori den san yu e bribi. Furu sma e singi gi a fraga fu di wan sma di den e lespeki taigi den fu du dati. Efu yu feni wán noso tu sani di yu kan sori den, dan yu kan yepi wan sma di wani sabi moro fu Bijbel.​—Leisi Kolosesma 4:6.

14-16. (a) San yu kan du fu leri moro fu wan Bijbel buku di yu no sabi so bun? (b) Sori fa den Bijbeltekst na ini a paragraaf kan yepi yu fu frustan a buku Amos moro bun. (Luku sosrefi a faki „ Kon sabi den sma fu Bijbel moro bun”.)

¹⁴ Kon meki wi taki dati na wan fu den gemeente konmakandra wi o leisi èn taki fu wan fu den syatu Bijbel buku di den profeiti skrifi. Dati na den buku Hosea te go miti Maleaki. San yu kan du efu yu no sabi en so bun ete? A fosi sani di yu kan du, na fu kisi na angri fu sabi moro fu a profeiti di skrifi a buku. Fa yu kan du dati?

¹⁵ Yu kan aksi yusrefi a sani disi: ’San mi sabi fu a sma di skrifi a buku? Suma a ben de, pe a ben e libi èn sortu wroko a ben e du?’ Te yu sabi moro fu a skrifiman, dan yu kan frustan moro bun fu san ede a gebroiki son wortu noso son agersitori. Te yu e leisi a buku, dan pruberi fu si fa den sani di a skrifi e sori fa a ben de.

¹⁶ Baka dati, yu kan luku o ten a buku skrifi. Yu kan feni dati na bakasei fu a Bijbel​—Nyun-Grontapuvertaling, na a pisi „Moro sani fu den Buku fu Bijbel”. Boiti dati, yu kan luku pisi 3A nanga 3B fu a pikin brochure Studeri Gado Wortu moro fini. Drape yu kan si na ini sortu pisi ten den profeiti nanga den kownu fu Bijbel ben e libi. Efu a Bijbel buku di yu e studeri abi profeititori na ini, dan a ben o bun fu kon sabi fa den sma ben e libi na a ten dati. Sortu ogri den sma ben e du èn fa a profeiti ben wani yepi den? Suma ben e libi na a srefi ten fu a profeiti? Fu sabi moro bun fa a situwâsi ben de, dan yu musu luku san tra Bijbel buku e taki. Fu eksempre, efu yu wani frustan san ben e pasa na a ten fu a profeiti Amos, dan yu kan leisi wan tu vers na ini den buku 2 Kownu nanga 2 Kroniki. Yu kan feni den vers disi na den verwijstekst fu Amos 1:1. Yu kan leisi a buku fu Hosea tu, di ben e libi na a ten fu Amos. Ala den sani disi kan yepi yu fu frustan fa sani ben de na a ten fu Amos.​—2 Kow. 14:25-28; 2 Kron. 26:1-15; Hos. 1:1-11; Amos 1:1.

17-18. Gebroiki den eksempre na ini a paragraaf noso yu eigi eksempre fu sori fa yu kan prisiri moro fu studeri Bijbel te yu e poti prakseri na sani di no sori so prenspari.

¹⁷ Te wi e leisi Bijbel, dan a bun efu wi e angri fu kon sabi moro. Kon meki wi taki dati yu e leisi kapitel 12 fu a profeititori fu Sakaria, di e taki na fesi fu a dede fu a Mesias (Sak. 12:10). Te yu e leisi vers 12, yu e leisi taki „den sma fu Natan” ben o bari krei te a Mesias ben o dede. Na presi fu leisi pasa den wortu disi esi-esi, dan teki ten fu prakseri fu den. Yu kan aksi yusrefi: ’San den sma fu Natan abi fu du nanga a Mesias? Fa mi kan kon sabi moro fu a tori disi?’ We, yu kan ondrosuku sani moro fini. Wan verwijstekst e tyari yu go na 2 Samuel 5:14 pe yu kan leisi taki Natan ben de wan fu den manpikin fu Kownu David. Wan tra verwijstekst, Lukas 3:31, e sori taki Yesus na wan bakapikin fu Natan, fu a sei fu Maria, en mama. (Luku wp16.3 9 ¶1-3.) Now yu feni a tori disi moi! Yu sabi taki Bijbel ben taki na fesi taki Yesus ben o de wan bakapikin fu David (Mat. 22:42). Aladi David ben abi moro leki 20 manpikin, Sakaria e sori taki na den sma fu Natan ben o sari trutru taki Yesus dede. Na den moi sani disi yu o kon sabi te yu e ondrosuku sani moro fini!

¹⁸ Luku wan tra eksempre. Na ini a fosi kapitel fu Lukas wi e leisi taki na engel Gabrièl go na Maria èn a taigi en a sani disi fu a manpikin di a ben o kisi: „A o de wan prenspari sma èn den o kari en a Manpikin fu a Moro Heiwan. Yehovah Gado o gi en a kownusturu fu en papa David. A o tiri fu têgo leki Kownu fu a famiri fu Yakob” (Luk. 1:32, 33). Kande  wi ben o poti moro prakseri na a fosi pisi fu a boskopu fu Gabrièl, pe a taki dati sma ben o kari Yesus „Manpikin fu a Moro Heiwan”. Ma Gabrièl ben taki tu dati Yesus ben o ’tiri leki Kownu’. Wi kan aksi wisrefi san Maria ben e prakseri fu a sani dati di Gabrièl taki. A ben denki taki Gabrièl taki dati Yesus ben o tron Kownu na ini a presi fu Kownu Herodes noso fu iniwan tra tiriman na ini Israel di ben o kon baka Herodes? Efu Yesus ben o tron kownu, dan Maria ben o tron mama fu wan kownu èn en famiri ben o libi na ini wan kownu-oso. Ma nowan presi na ini Bijbel wi e leisi taki Maria taigi Gabrièl so wan sani. Wi no leisi tu taki Maria aksi Yesus fu kisi wan hei posisi na ini a Kownukondre, neleki fa tu disipel fu Yesus ben aksi en (Mat. 20:20-23). A pikin sani disi e sori taki Maria ben de wan uma di ben abi sakafasi trutru!

19-20. Te wi e luku san Yakobus 1:22-25 nanga 4:8 e sori, dan fu san ede wi musu studeri?

¹⁹ Hori na prakseri taki a moro prenspari reide fu san ede wi e studeri Bijbel nanga den buku fu Yehovah en organisâsi, na fu tron moro bun mati fu Yehovah. Wi wani si moro krin tu sortu sma wi de trutru èn sortu kenki wi musu tyari kon so taki Gado kan feni wi bun. (Leisi Yakobus 1:22-25; 4:8.) Ibri leisi fosi wi o studeri wi musu aksi Yehovah fu gi wi en santa yeye. Wi musu aksi en fu yepi wi fu kisi wini trutru fu den sani di wi e studeri èn fu si wisrefi soleki fa en e si wi.

²⁰ Meki wi alamala de leki a futuboi fu Gado di kari na ini Psalm 1:2, 3: „A lobi a wèt fu Yehovah. Dei nanga neti a e leisi a wèt fu Gado nanga wan safri sten. . . . Ala sani di a man e du, o waka bun.”