1, 2. (a) Fu san ede yongu Kresten e wini a feti teige Satan nanga den ogri yeye? (Luku a prenki na a bigin fu na artikel.) (b) San wi o luku na ini na artikel disi?

NA APOSTEL PAULUS ben taki dati Kresten de leki srudati. Wi de na ini wan feti èn wi abi trutru feanti! Wi no e feti nanga libisma, ma nanga Satan èn nanga den ogri yeye. Den feanti disi e feti dusundusun yari kaba èn den na bun fetiman. Dati meki a kan gersi leki noiti wi o man wini a feti disi, spesrutu efu wi yongu. Yu denki taki yonguwan kan wini den tranga feanti disi? Iya, den man èn den e wini tu. Fu san ede? Fu di Yehovah e gi den krakti. Boiti dati, neleki srudati di sabi feti, den weri ’ala den sani di Gado gi den fu feti’.​—Leisi Efeisesma 6:10-12.

² Di Paulus gebroiki na agersitori disi, dan a kan taki a ben abi wan srudati fu Rome na prakseri (Tori 28:16). Na ini na artikel disi wi o luku fu san ede disi na wan bun agersitori. Wi o luku tu fu san ede son yonguwan ben feni en muilek fu weri den fetisani disi èn sortu wini den kisi di den weri den.

3, 4. Fa den tru leri na ini Bijbel de leki a leribuba fu wan srudati fu Rome?

³ Leisi Efeisesma 6:14. Wan srudati fu Rome ben weri wan leribuba di ben abi isri na en tapu. A leribuba disi ben sorgu taki feanti no ben kan sutu en na en mindribere. A ben sorgu tu taki na isri sani di a ben weri fu kibri en borsu ben tan na tapu en presi. Na son leribuba wan srudati ben kan fasi en feti-owru nanga en nefi. Efu a leribuba ben tai steifi, wan srudati no ben abi fu frede fu go feti.

⁴ Na so a de tu taki den tru tori di wi e leri fu Gado Wortu kan kibri wi gi falsi leri (Yoh. 8:31, 32; 1 Yoh. 4:1). Te wi e kon abi moro lobi gi den tru leri na ini Gado Wortu, dan a o moro makelek gi wi fu weri retidu leki wan sani di e kibri wi borsu noso fu libi soleki fa Gado wani (Ps. 111:7, 8; 1 Yoh. 5:3). Boiti dati, te wi e frustan Gado Wortu bun, dan wi o man opo taki gi a bribi fu wi te sma e taki sani di no tru.​—1 Petr. 3:15.

5. Fu san ede wi musu taki san tru?

⁵ Na wan agersifasi den tru leri fu Bijbel musu tai na wi mindribere leki wan leribuba. Te dati de so, dan wi o libi soleki fa Bijbel leri wi èn wi o taki san tru ala ten. Fu san ede wi e meki muiti fu no taki lei? Fu di wan fu den sani di Satan e gebroiki furu na lei èn a kisi furu sma nanga den lei fu en. Lei e tyari takru bakapisi kon gi a sma di e fruteri a lei èn gi a sma di e bribi a lei (Yoh. 8:44). Sobun, awinsi wi na sondusma, wi musu du ala san wi man fu no fruteri lei (Ef. 4:25). Ma a no makelek. Abigail * di abi 18 yari e taki: „Son leisi a kan gersi leki yu o kisi moro problema te yu e taki san tru, spesrutu te wan lei kan puru yu na ini wan muilek situwâsi.” Ma fu san ede Abigail e meki muiti ala ten fu taki san tru? A e taki: „Te mi e taki san tru, dan mi abi wan krin konsensi na fesi Yehovah. Èn mi papa, mi mama nanga den mati fu mi sabi taki den kan frutrow mi.” Victoria di abi 23 yari taki: „Te yu e taki san tru èn te yu e opo taki gi a bribi fu yu, dan kande sma o tapu skreki gi yu. Ma ala ten a e tyari wini kon. Yu e kisi moro deki-ati, yu e tron wan moro bun mati fu Yehovah èn den sma di lobi yu o lespeki yu.” A no de fu taki dati a bun fu ’meki ala sani di tru de leki wan leribuba di tai lontu wi mindribere’.

6, 7. Fu san ede wi kan agersi den wet fu Yehovah nanga na isri sani di wan srudati ben weri fu kibri en borsu?

⁶ A sani di den srudati fu Rome ben weri fu kibri den borsu ben meki fu smara pisi isri di ben fasi na makandra. Den pisi isri disi ben beni lontu a borsu fu wan srudati. Den isri disi ben aka na makandra nanga pisi leribuba. Den isri disi ben doro te na a skowru fu wan srudati èn den ben fasi tu nanga leribuba. A sani disi di a srudati ben weri fu kibri en borsu ben meki taki a no ben man beni en skin fa a wani èn doronomo a ben musu luku efu ala den pisi isri fasi bun. Ma a fetisani disi ben sorgu taki feti-owru noso peiri no ben boro en ati noso en bere.

⁷ Neleki fa a fetisani disi ben kibri na ati fu wan srudati, na so den wet fu Yehovah e kibri wi ati, noso a sma di wi de na inisei (Odo 4:23). Noiti wan srudati ben o puru  na isri sani di a e weri fu kibri en borsu poti na wan sei, fu weri wan sani di moro swaki. Na so a de tu taki noiti wi ben o wani poti den wet fu Yehovah na wan sei, fu go du san wi feni bun. Wi no koni nofo fu kibri wi eigi ati (Odo 3:5, 6). Fu dati ede wi musu abi a gwenti fu luku efu wi weri a fetisani di Yehovah gi wi fu kibri wi ati.

8. Fu san ede wi musu hori wisrefi na den wet fu Yehovah?

⁸ Yu feni son leisi taki den wet fu Yehovah hebi tumusi gi yu noso taki den e tapu yu fu du san yu wani? Daniel di abi 21 yari taki: „Den leriman nanga den pikin na skoro ben e spotu mi fu di mi e du san mi leri na ini Bijbel. Wan pisi ten mi lasi-ati èn mi ben firi brokosaka.” San yepi en? A e taki: „Te fu kaba mi si sortu wini a e tyari kon fu hori misrefi na den wet fu Yehovah. Son pikin fu mi skoro bigin gebroiki drugs èn trawan gowe libi skoro. A sari fu si fa a libi fu den waka. Yehovah e kibri wi trutru.” Madison di abi 15 yari e taki: „A no makelek fu hori misrefi na den wet fu Yehovah èn son leisi mi e wani du san tra yonguwan lobi fu du.” San a e du te a e firi so? A e taki: „Mi e hori na prakseri taki mi e tyari a nen fu Yehovah èn taki na Satan e tyari den tesi disi kon na mi tapu. Te mi pasa wan tesi, dan mi e firi moro bun.”

9-11. (a) Sortu susu Kresten e weri? (b) San kan meki en moro makelek gi wi fu preiki?

⁹ Leisi Efeisesma 6:15. Efu wan srudati fu Rome no ben weri en susu, dan a no ben o man go feti. A susu ben meki fu dri difrenti pisi leribuba di ben fasi na makandra èn dati meki a ben steifi. Den susu disi ben switi fu waka èn wan srudati no ben abi fu frede taki a ben o grati fadon.

¹⁰ Wan srudati fu Rome ben weri den susu disi fu go feti. Wi leki Kresten no e feti, ma wi e weri ’a bun nyunsu fu freide leki susu na wi futu’ (Yes. 52:7; Rom. 10:15). Toku wi musu abi deki-ati fu preiki te wi e kisi na okasi. Roberto di abi 20 yari e taki: „Mi ben frede fu preiki gi den pikin fu mi klas. Mi denki taki na syen mi ben e syen. Te mi e denki fa mi ben de fosi, dan mi no sabi fu san ede mi ben frede. Ma now mi no e frede fu preiki gi tra yonguwan.”

¹¹ Furu yonguwan kon si taki te den sreka densrefi bun fu preiki a bun nyunsu, dan a moro makelek gi den fu preiki. San yu kan du fu de srekasreka? Julia di abi 16 yari taki: „Mi e poti buku na ini mi skorotas èn mi e arki bun te den pikin fu mi klas e taki fa den e denki èn san den e bribi. Dan mi e prakseri san kan yepi den. Te mi de srekasreka, dan mi man taki fu sani di kan yepi den.” Maria di abi 23 yari e taki: „Efu yu abi switifasi èn efu yu e arki bun, dan yu o sabi pikinso san e miti tra yonguwan. Mi e sorgu taki mi e leisi ala den artikel gi yonguwan. Na so mi kan sori den pikin wan sani na ini Bijbel noso tapu jw.org di kan yepi den.” Te yu sreka yusrefi bun, dan a de neleki yu e weri susu di fiti bun.

12, 13. San na wan fu den ’faya peiri’ di Satan e sutu kon na wi tapu?

¹² Leisi Efeisesma 6:16. Wan srudati fu Rome ben abi wan bigi langa skelt. A ben langa fu en skowru te go miti en kindi. A ben kibri en gi feti-owru, lansri nanga peiri.

¹³ San na wan fu den ’faya peiri’ di Satan e sutu kon na yu tapu? Satan wani meki yu  bribi lei fu Yehovah. A wani taki yu denki taki Yehovah no lobi yu èn taki a no e broko en ede nanga yu. Aida di abi 19 yari ben abi a firi taki sma no kan lobi en. A e taki: „Furu leisi mi ben e firi leki Yehovah no de krosibei fu mi èn taki a no wani de mi mati.” San a e du te a e firi so? Aida e taki: „Den konmakandra yepi mi fu kon abi wan tranga bribi. Fosi te mi ben go na den konmakandra, mi ben e sidon nomo èn mi no ben e gi piki fu di mi ben denki taki nowan sma wani yere san mi abi fu taki. Ma now mi e sreka gi den konmakandra èn mi e pruberi fu gi tu noso dri piki. A no makelek gi mi, ma mi e firi bun te mi e du en. Den brada nanga sisa e gi mi furu deki-ati. Ibri leisi te mi komoto fu wan konmakandra, mi e firi taki Yehovah lobi mi.”

14. San wi kan leri fu na ondrofenitori fu Aida?

¹⁴ Na ondrofenitori fu Aida e leri wi wan prenspari sani: Den skelt fu den Rome srudati ben bigi a srefi. Ma a no de so nanga a bribi fu wi. A kan kon moro tranga noso a kan kon moro swaki. Na wisrefi e bepaal dati (Mat. 14:31; 2 Tes. 1:3). Dati meki a prenspari taki wi e tranga wi bribi.

15, 16. Fu san ede wi kan agersi a howpu di wi abi nanga wan helm?

¹⁵ Leisi Efeisesma 6:17. Den srudati fu Rome ben e weri wan helm fu kibri den ede, den neki nanga den fesi. Son helm ben abi wan anu so taki a srudati ben kan syow en.

¹⁶ Neleki fa a helm ben e kibri na ede fu  wan srudati, na so „a howpu di wi abi taki wi o kisi frulusu” e kibri wi frustan nanga a denki fu wi (1 Tes. 5:8; Odo 3:21). A howpu di wi abi e yepi wi fu tan poti prakseri na den pramisi fu Gado èn fu si den problema fu wi na a yoisti fasi (Ps. 27:1, 14; Tori 24:15). Ma efu wi wani taki a howpu fu wi kibri wi, dan wi musu abi a bribi taki Yehovah o du san a pramisi. Na agersi fasi wi musu weri wi helm tapu wi ede, wi no musu tyari en na ini wi anu.

17, 18. (a) Fa Satan wani kori wi fu puru wi helm tapu wi ede? (b) Fa wi kan sori taki wi no e meki Satan kori wi?

¹⁷ Fa Satan kan kori wi fu puru wi helm na tapu wi ede? Luku fa a ben wani kori Yesus. Satan ben sabi taki Yesus ben abi a howpu taki a ben o tiri libisma te fu kaba. Ma Yesus ben o abi fu wakti teleki Yehovah poti en leki Kownu. Fosi a ten dati doro a ben o pina èn a ben o dede. Sobun Satan ben wani sori Yesus taki a no ben abi fu wakti solanga fu tron kownu. A taigi Yesus taki efu a ben anbegi en wán leisi nomo, a ben kan tiri grontapu wantewante (Luk. 4:5-7). Satan sabi tu taki Yehovah pramisi wi moi sani na ini a nyun grontapu. Ma wi abi fu wakti èn kande now wi o kisi furu problema. Dati meki Satan wani kori wi fu du sani soso fu kan abi wan switi libi nownow kaba. A wani taki wi feti baka gudu so taki wi kan abi ala sani now. A wani taki wi poti a Kownukondre na a di fu tu presi.​—Mat. 6:31-33.

¹⁸ Furu yongu Kresten no meki Satan kori den. Karina di abi 20 yari e taki: „Mi sabi taki na Gado Kownukondre wawan kan lusu ala wi problema.” Fa a howpu disi yepi en? „A howpu di mi abi taki grontapu o tron wan paradijs e yepi mi fu no frigiti taki den sani fu a grontapu disi na fu wan pisi ten nomo.” A e taki moro fara: „Mi no e gebroiki mi koni fu meki en na ini a grontapu disi. Ma mi e gebroiki mi ten nanga mi krakti fu wroko gi Yehovah.”

19, 20. Fa wi kan leri fu gebroiki Bijbel moro bun?

¹⁹ A feti-owru di wan Rome srudati ben abi ben langa sowan 50 centimeter. Den srudati disi ben sabi feti nanga den feti-owru disi fu di den ben e oefen ala dei.

²⁰ Paulus ben taki dati a Wortu fu Gado de leki wan feti-owru di Yehovah gi wi. Ma wi musu leri fu gebroiki en bun efu wi wani opo taki gi a bribi fu wi èn efu wi wani taki a kenki wi denki (2 Kor. 10:4, 5; 2 Tim. 2:15). Fa yu kan leri fu gebroiki en moro bun? Sebastian di abi 21 yari e taki: „Te mi e leisi Bijbel, dan fu ibri kapitel mi e skrifi wán vers di mi lobi. Now mi abi wan heri lijst fu den vers disi. Disi yepi mi fu frustan moro bun fa Yehovah e denki.” Daniel, di wi ben taki fu en kaba, e taki: „Te mi e leisi Bijbel, dan mi e luku sortu tekst kan yepi den sma di mi e miti na ini a preikiwroko. Mi kon si taki den sma e arki bun te den si taki yu lobi Bijbel trutru èn taki yu e du muiti fu yepi den.”

21. Fu san ede wi no abi fu frede Satan nanga den ogri yeye?

²¹ Soleki fa den yonguwan di kari na ini na artikel disi e taki, dan wi no abi fu frede Satan nanga den ogri yeye. Den na tranga feanti, ma wi kan wini den. Den no o libi fu têgo tu. Heri esi Krestes o trowe den go na ini wan dipi peti èn den no o man kori nowan sma na ini den dusun yari te Krestes o tiri. Baka dati den o kisi pori (Openb. 20:1-3, 7-10). Wi sabi suma na wi feanti. Wi sabi den triki fu en èn san a wani du. Ma wi man kakafutu gi en fu di Yehovah e yepi wi!