1, 2. Fu sortu trobi Genesis e taki èn fu san ede a bun fu taki fu den?

NA INI Bijbel yu e leisi tori pe sma e meki trobi nanga makandra. Oiti yu prakseri fu den tori disi? Fu eksempre, luku den fosi kapitel fu Genesis: Kain e kiri Abel (Gen. 4:3-8), Lamek e kiri wan yongu man fu di a man naki en (Gen. 4:23), den skapuman fu Abraham nanga Lot e meki trobi nanga makandra (Gen. 13:5-7), Hagar e wisiwasi Sara èn Sara e kisi atibron nanga Abraham (Gen. 16:3-6), Ismael e opo ensrefi teige ala sma èn den sma disi e opo densrefi teige en.​—Gen. 16:12.

² Fu san ede Bijbel e taki fu den trobi disi? We, wán sani na taki den tori disi e yepi wi leki sondu libisma fu kon si fu san ede wi musu tan suku freide nanga tra sma. Den e sori tu fa wi kan du disi. Wi e kisi furu wini te wi e leisi Bijbel tori di e taki fu sma di ben de leki wi èn di ben e kisi problema tu. Wi e si sortu muiti den ben meki fu lusu trobi èn dati kan yepi wi fu du a srefi te wi e kisi son problema. Ala den sani disi e yepi wi fu si san wi musu du èn san wi no musu du te wi wani suku freide nanga trawan.​—Rom. 15:4.

3. Sortu tori wi o luku na ini na artikel disi?

³ Na ini na artikel disi wi o luku fu san ede futuboi fu  Yehovah musu meki muiti fu lusu trobi èn fa den kan du dati. Wi o luku tu sortu Bijbel rai kan yepi den èn fa den kan tan abi wan bun matifasi nanga trawan èn nanga Yehovah Gado.

4. Sortu denki panya na heri grontapu èn san na a bakapisi?

⁴ Satan abi a moro bigi frantwortu fu den trobi nanga dyugudyugu di de na mindri libisma. Na ini Eden a ben feni taki nowan libisma abi Gado fanowdu. A ben taki dati ibri sma kan bosroiti gi ensrefi san bun èn san ogri, èn taki den abi a reti fu du dati (Gen. 3:1-5). Ma wi kan si krin san na a bakapisi fu dati. Grontapu lai nanga sma di no wani taki trawan taigi den san den musu du. Fu dati ede furu sma abi heimemre, den e denki densrefi nomo èn den lobi strei nanga makandra. Iniwan sma di e teki a denki disi abra, e sori taki a e horibaka gi san Satan ben taki na ini Eden. Fu taki en leti, so wan sma feni taki a no fowtu fu suku yu eigi bun awinsi sortu bakapisi dati kan abi gi trawan. Te wan sma abi a denki disi, dan dati kan tyari soso strei kon. Wi musu hori na prakseri tu taki „wan man di ati e bron esi e meki trobi kon èn wan sma di ati faya e meki furu fowtu”.​—Odo 29:22.

5. Fa Yesus ben sori sma san den musu du te den no e agri nanga makandra?

⁵ Na a tra sei, Yesus ben leri sma fu suku freide, srefi te dati no ben o tyari wini kon gi den. Na ini a takimakandra di a hori na tapu wan bergi, a ben sori na wan heri moi fasi san sma ben musu du te den no e agri nanga makandra noso te sani e pasa di kan tyari trobi kon. Fu eksempre, a ben gi den bakaman fu en deki-ati fu de safri-ati sma, fu suku fu libi bun nanga trawan, fu no du sani di kan meki trawan kisi atibron, fu lusu trobi esi-esi èn fu lobi den feanti.​—Mat. 5:5, 9, 22, 25, 44.

6, 7. (a) Fu san ede a prenspari fu lusu trobi wantewante? (b) San ala futuboi fu Yehovah musu aksi densrefi?

⁶ Efu wi ben o weigri fu suku freide nanga trawan, dan na fu soso wi ben o dini Gado. Na fu soso wi ben o begi en, go na den konmakandra, go na ini a preikiwroko noso du den tra sani di wi leki Kresten musu du (Mark. 11:25). Wi no kan de mati fu Gado efu wi no wani gi trawan pardon fu den sondu fu den.​—Leisi Lukas 11:4; Efeisesma 4:32.

⁷ Ibri Kresten musu prakseri bun san a wani taki fu gi trawan pardon èn fu libi na ini freide nanga den. Yu e gi trawan pardon nanga yu heri ati? Yu breiti fu de makandra nanga den? Yehovah e fruwakti taki den futuboi fu en e gi trawan pardon. Efu yu konsensi e piki yu taki yu musu wroko na a swakifasi disi, dan begi Yehovah fu a yepi yu. Wi hemel Tata o arki wi te wi e begi en nanga sakafasi èn a o piki wi.​—1 Yoh. 5:14, 15.

8, 9. San wi musu du te wan sma du wan sani di hati wi?

⁸ Fu di wi alamala na sondusma, meki a o pasa wan dei taki wan sma o taki noso du wan sani di o hati yu. Yu kan de seiker fu dati (Preik. 7:20; Mat. 18:7). San yu o du te a sani disi miti yu? Luku san pasa wan leisi: Wan tu Kotoigi ben de na wan fesa. Ne wan sisa go taki tu brada odi. Ma wan fu den brada ben firi fruferi fa a fasi fa a sisa taki den odi. Di den tu brada ben de den wawan, a brada  disi bigin krutu a sisa fu san a du. Ma a tra brada sori en taki a sisa disi dini Yehovah moro leki 40 yari kaba aladi a libi no ben de makriki gi en. A ben de seiker taki a sisa no ben wani hati den firi. Baka di a tra brada prakseri fu a tori pikinso, a taki: „Yu abi leti.” Baka dati a libi a tori so.

⁹ San a tori disi e leri wi? A de na yu fu luku san yu o du te wan sani pasa di kan tyari trobi kon. Wan sma di lobi trawan, no o luku den pikinpikin fowtu fu den. (Leisi Odo 10:12; 1 Petrus 4:8.) Yehovah e si en leki wan ’moi sani te yu no e prakseri den fowtu fu trawan moro’ (Odo 19:11; Preik. 7:9). Sobun, te wan sma du wan sani nanga yu di hati yu, dan aksi yusrefi: ’Mi kan libi a tori disi so? Mi musu fu taki fu a tori?’

10. (a) San wan sisa du di trawan taki hati sani fu en? (b) Sortu Bijbeltekst yepi a sisa disi fu no lasi en prisiri?

¹⁰ A kan hebi gi wi fu no taki noti te sma e krutu wi. Luku a tori fu wan pionier sisa di wi o kari Lucy. Son brada nanga sisa ben taki ala sortu fruferi sani fu a fasi fa a ben du a preikiwroko èn fa a ben gebroiki en ten. Fu di a sani disi ben hati Lucy, meki a go suku rai na wan tu lepi brada. A e taki: „A Bijbel rai di den gi mi yepi mi fu no bruya tumusi te sma e taki sani, ma fu poti prakseri na san Yehovah e denki fu mi.” Lucy kisi deki-ati di a leisi Mateyus 6:1-4. (Leisi en.) Den tekst disi ben memre en taki a moro prenspari sani na taki a musu prisiri na ati fu Yehovah. A e taki: „Srefi te sma e taki hati sani fu a fasi fa mi e preiki, mi no e lasi mi prisiri fu di mi sabi taki mi e du ala san mi man fu meki Yehovah prisiri nanga mi.” Awinsi trawan e taki hati sani fu Lucy now, a no e poti prakseri moro na den sani dati.

11, 12. (a) San wan Kresten musu du te a e denki taki en brada „abi wan sani nanga” en? (b) San wi kan leri fu a fasi fa Abraham koti wan trobi? (Luku a prenki na a bigin fu na artikel.)

¹¹ „Wi alamala e sondu furu tron” (Yak. 3:2). Kon meki wi taki dati yu yere taki wan brada mandi fu wan sani di yu taki noso du. San yu musu du? Yesus ben taki: „Te yu e tyari yu ofrandi go na a altari èn drape yu e memre taki yu brada abi wan sani nanga yu, dan libi yu ofrandi drape na fesi na altari èn go meki en bun nanga yu brada fosi. Baka dati yu kan gi yu ofrandi te yu drai kon baka” (Mat. 5:23, 24). Teki a rai disi fu Yesus èn go taki nanga yu brada. Hori na prakseri fu san ede yu e go taki nanga en. A no fu di yu wani sori en taki na en du wan sani, ma na fu sori en taki yu e frustan taki yu du wan sani di hati en èn yu wani meki en bun baka nanga en. A moro prenspari sani gi wi na taki wi musu libi na ini freide nanga wi brada nanga sisa.

¹² Wan Bijbel tori di e sori fa futuboi fu Gado ben lusu wan problema di ben kan tyari bigi trobi kon, na a tori fu Abraham nanga en neef Lot. Na a bigin fu na artikel wi ben taki pikinso fu en kaba. Den tu man disi ben abi furu meti. Soleki fa a sori, dan den skapuman fu den ben meki trobi nanga makandra fu di nofo weigron no ben de gi den meti fu den. Fu di Abraham ben wani koti a trobi, meki a taigi Lot taki en fosi ben kan luku na sortu pisi fu a kontren a ben wani go libi nanga en osofamiri (Gen. 13:1, 2, 5-9). Na so Abraham gi wi wan moi eksempre. Na presi fu suku en eigi bun, a ben suku freide. A lasi di a du a sani disi? Kwetikweti. Wantewante baka  di a sani disi pasa, Yehovah pramisi Abraham taki a ben o gi en furu blesi (Gen. 13:14-17). Noiti Gado o meki den futuboi fu en lasi furu sani te den e du san a wani èn te den e sori lobi fu di den wani lusu wan trobi. ^[1]

13. San wan brada du di wan tra brada taigi en wan tu hati sani èn san wi kan leri fu a tori disi?

¹³ Luku wan eksempre fu a ten disi. Di wan brada tron fesiman fu wan kongres afdeling, a bel wan tra brada fu aksi en efu a ben wani yepi na a kongres. Ne a brada taigi en wan lo hati sani, dan a anga a telefon. San meki a du dati? We, fu di en ati ben bron ete nanga a brada di ben de fesiman fu a kongres afdeling fosi. A brada di ben de fesiman now no ben firi wan fasi di a tra brada bari en, ma a ben si tu taki a no ben kan libi a tori so. Wán yuru baka dati, a bel a brada baka, dan a taigi en taki den no ben miti ete èn a aksi en efu den ben man taki fu a tori makandra. Wán wiki baka dati, den miti na wan Kownukondre zaal. Baka di den begi, den taki fu a tori wan heri yuru langa èn a tra brada fruteri en san ben pasa. A fesiman arki nanga pasensi èn a sori a brada wan tu moi Bijbeltekst. Baka dati den tu brada meki en bun baka nanga makandra. A bakapisi ben de taki a brada disi go yepi na a kongres èn now a breiti taki a fesiman arki en nanga pasensi èn na wan switifasi.

14, 15. (a) O ten wi musu du san skrifi na Mateyus 18:15-17? (b) Sortu dri sani Yesus taki dati wi musu du èn fu san ede wi musu du den?

¹⁴ Nofo tron te tu Kresten e kisi wan trobi, dan den srefi kan sidon taki nanga makandra fu lusu a trobi èn a fiti taki den e du dati. Ma Yesus ben taki dati son leisi a de fanowdu fu aksi a gemeente  fu yepi den. (Leisi Mateyus 18:15-17.) San kan de a bakapisi te wan sma e weigri fu arki en brada, den tra sma di sabi a tori, nanga a gemeente? Efu a no wani arki den, dan den musu si en „leki wan grontapusma èn leki wan sma di e teki belasting-moni gi lanti”. Na ini a ten disi wi ben o taki dati den musu puru en fu a gemeente. Disi e sori taki a „sondu” di a sma du, a no wan pikin sani, ma na wan seryusu sani. Aladi a de (1) wan trobi di den tu sma srefi kan lusu, toku a de (2) wan seryusu sani tu pe wan sma kan puru fu a gemeente efu a trobi no e lusu. Kande a sma du wan kruka sani nanga wan trawan noso kande a lei fu di a wani gi a sma porinen. Den dri sani di Yesus kari na Mateyus 18:15-17 abi fu du soso nanga den sortu sondu disi. Ma den no abi fu du nanga sondu soleki hurudu, homo-sekslibi, afkodrei, te wan sma drai baka gi a tru bribi noso nanga tra seryusu sondu. Na soso den owruman abi a frantwortu fu luku den tori disi.

¹⁵ A rai di Yesus gi wi na fu yepi wi fu sori lobi te wi wani lusu wan trobi nanga wi brada (Mat. 18:12-14). A fosi sani di wi musu du fu lusu a trobi, na taki wi musu taki nanga makandra sondro fu kari trawan kon na ini a tori. Kande a de fanowdu fu taki nanga a sma moro leki wán leisi. Efu wi no man lusu a trobi, dan wi kan aksi wán noso tu sma di sabi a tori fu kon nanga wi. Noso wi kan aksi wan tra lepi sma di man luku efu trutru a trawan du wan sondu. Efu yu man lusu a trobi na a fasi disi, dan yu „wini yu brada”. Soso te yu pruberi omeni leisi fu yepi a trawan èn a no wani arki, yu kan go na den owruman fu taki fu a tori.

16. Fu san ede wi kan taki dati a rai fu Yesus bun èn taki a e yepi wi fu sori lobi?

¹⁶ A no e pasa furu taki wan trobi e kon so bigi taki wi musu du ala den dri sani di Yesus kari na Mateyus 18:15-17. A moi fu si taki brada nanga sisa man lusu wan trobi, fosi a kon so fara taki wan sma di no abi berow musu puru fu a gemeente. Nofo tron a sma di meki a fowtu e frustan taki a du wan sani di no bun èn taki a musu kenki. A tra sma e si taki a no abi fu mandi moro nanga a sma di hati en firi èn a e gi en pardon. Ma awinsi san pasa, Yesus ben sori taki den owruman no musu kon na ini a tori efu a no de fanowdu. Den o du dati soso te a sma du den tu fosi sani di Yesus kari èn efu nofo buweisi de di e sori san pasa trutru.

17. Sortu blesi wi o kisi te wi e „suku freide” nanga makandra?

¹⁷ Solanga wi de na ini a grontapu disi, libisma o tan hati den firi fu makandra fu di den na sondusma. Dati meki a disipel Yakobus ben skrifi: „Efu wan sma no e sondu nanga en mofo, dan a bun dorodoro èn a man basi en heri skin tu” (Yak. 3:2). Efu wi wani lusu trobi, dan wi musu du ala san wi man fu ’suku freide èn wi musu du muiti fu feni en’ (Ps. 34:14). Fu di wi na sma di e suku freide, meki wi o man libi bun nanga tra Kresten èn wi o meki taki wánfasi de na ini a gemeente (Ps. 133:1-3). Boiti dati, wi o abi wan bun matifasi nanga Yehovah, „a Gado di e gi freide” (Rom. 15:33). Soso den wan di e sori lobi te den e lusu trobi, o kisi den blesi disi.