1-2. San wan sma musu du fosi a dopu?

 NA INI den feifi yari di psa, moro leki wán milyun sma dopu leki Yehovah Kotoigi. Neleki a disipel Timoteyus fu a fosi yarihondro, furu fu den sma disi ben leri sabi waarheid ’sensi di den ben de beibi’ (2 Tim. 3:14, 15). Tra sma leri sabi Yehovah di den ben bigi kba, èn trawan kon sabi en di den kon owru. Wan tu yari psa, wan uma di studeri Bijbel nanga Yehovah Kotoigi dopu di a ben abi 97 yari.

² Efu yu na wan Bijbel studenti, noso efu yu p’pa nanga m’ma na Kotoigi èn den e kweki yu na ini waarheid, dan yu e prakseri fu dopu? Dati na wan heri moi marki di yu kan poti gi yusrefi. Ma fosi yu dopu, yu o abi fu gi yusrefi abra na Yehovah. Na artikel disi o sori san a wani taki fu gi yusrefi abra na Gado. A o yepi yu tu fu kon si fu san ede yu no abi fu frede fu gi yusrefi abra na Gado èn fu dopu.

SAN A WANI TAKI FU GI YUSREFI ABRA NA GADO?

3. Gi wan tu eksempre fu sma na ini Bijbel di ben gi densrefi abra na Yehovah.

³ Bijbel e sori taki te wan sma ben gi ensrefi abra na Gado, dan a sma dati ben poti aparti fu du wan santa wroko. Den Israelsma ben de wan pipel di ben gi densrefi abra na Yehovah. Ma son sma fu a pipel ben gi densrefi abra na Yehovah na wan aparti fasi. Fu eksempre, Aron ben e weri wan „plata pisi gowtu” na fesisei fu a tai-ede fu  en. A pisi gowtu disi di ben santa èn di ben e brenki srefisrefi, ben e sori taki Yehovah ben teki Aron fu dini en na wan aparti fasi. A ben e dini leki granpriester fu Israel (Lef. 8:9). Den Nasireisma ben gi densrefi abra na Yehovah na wan aparti fasi tu. A wortu „Nasireisma” e kmoto fu a Hebrew wortu nazirʹ, san wani taki „A sma di poti aparti”, noso „A sma di gi ensrefi abra”. Den Nasireisma ben musu hori densrefi na den spesrutu wet di ben skrifi gi den na ini a Wet fu Moses.​—Num. 6:2-8.

4. (a) Te yu gi yusrefi abra na Yehovah, dan san e tron a moro prenspari sani na ini yu libi? (b) San a wani taki fu „no teri” yusrefi moro? (Luku a prenki.)

⁴ Te yu gi yusrefi abra na Yehovah, dan yu e besroiti fu tron wan disipel fu Yesus Krestes èn yu e poti a wani fu Gado na a fosi presi na ini yu libi. San disi wani taki? Yesus ben taki: „Efu wan sma wani kon na mi baka, dan a no musu teri ensrefi moro” (Mat. 16:24). Den Griki wortu di vertaal nanga „a no musu teri ensrefi moro” kan vertaal tu nanga „a no musu libi moro gi ensrefi”. Efu yu gi yusrefi abra na Yehovah, dan yu o abi fu weigri fu du iniwan sani di Yehovah no feni bun (2 Kor. 5:14, 15). Disi wani taki dati yu o weigri fu du „den sani di a sondu skin e du”, èn wán fu den sani dati na hurudu (Gal. 5:19-21; 1 Kor. 6:18). A de so taki a libi no o switi moro te yu e gi yesi na den komando disi? Dati no o de so efu yu lobi Yehovah èn efu yu e bribi taki den wet fu en na fu yu eigi bun (Ps. 119:97; Yes. 48:17, 18). Wan brada di nen Nicholas e taki en so: „Yu kan si den wet fu Yehovah leki den isri peipi fu wan straf’oso cel di e tapu yu fu du san yu wani, noso yu kan si den leki den isri peipi fu wan koi di e tapu wan lew fu du ogri nanga yu.”

5. (a) Fa yu e gi yusrefi abra na Yehovah? (b) San na a difrenti te wan sma e gi ensrefi abra na Gado èn te a e teki dopu? (Luku a prenki.)

 ⁵ Fa yu e gi yusrefi abra na Yehovah? Yu e pramisi en na ini begi taki yu o anbegi en w’wan èn taki yu o poti a wani fu en na a fosi presi na ini yu libi. Fu taki en leti, yu e pramisi Yehovah taki yu o lobi en ’nanga yu heri ati, nanga yu heri libi, nanga yu heri frustan, èn nanga ala yu krakti’ (Mark. 12:30). Yu e gi yusrefi abra na Yehovah na ini begi te yu de yu w’wan èn yu nanga Yehovah w’wan sabi dati. Ma te yu e dopu, dan tra sma o man si dati. Den sma di de drape o man si taki yu gi yusrefi abra na Gado. Te yu gi yusrefi abra na Gado dan dati na wan seryusu pramisi. Yu musu du ala san yu man fu hori yusrefi na a pramisi dati, èn Yehovah e ferwakti dati tu fu yu.​—Preik. 5:4, 5.

FU SAN EDE YU E GI YUSREFI ABRA NA YEHOVAH?

6. Fu san ede wan sma e besroiti fu gi ensrefi abra na Yehovah?

⁶ A moro prenspari reide fu san ede yu e gi yusrefi abra na Yehovah, na fu di yu lobi en. A lobi disi a no wan firi nomo. Na presi fu dati, yu lobi Yehovah fu di yu „kon frustan sani moro krin” èn fu di yu „kon sabi finifini san na den tru tori fu Gado” (Fil. 1:9). Fu di yu studeri Gado Wortu, meki yu e bribi taki (1) Yehovah na wan trutru sma, (2) Bijbel na a Wortu fu en di skrifi nanga yepi fu en santa yeye, èn (3) a e gebroiki na organisâsi fu en fu meki a wani fu en kon tru.

7. San wi musu du fosi wi gi wisrefi abra na Yehovah?

 ⁷ Den sma di e gi densrefi abra na Yehovah musu sabi san na den moro prenspari leri na ini Gado Wortu èn den musu hori densrefi na den wet fu en. Den e du ala san den man fu ferteri trawan san den leri (Mat. 28:19, 20). A lobi di den abi gi Yehovah kon moro tranga, èn den wani dini en nanga den heri ati. A no so a de nanga yu? Efu yu lobi Yehovah nanga yu heri ati, dan yu no o gi yusrefi abra na en soso fu di yu wani taki a sma di e studeri Bijbel nanga yu e prisiri nanga yu. A no fu dati ede yu o dopu. Yu no o dopu tu soso fu plisi yu p’pa nanga m’ma noso fu di ala den mati fu yu e dopu.

8. Te yu de nanga tangi, dan fa dati kan yepi yu fu gi yusrefi abra na Yehovah? (Psalm 116:12-14)

⁸ Te yu e prakseri ala den sani di Yehovah du gi yu, dan yu o de nanga tangi èn yu o wani gi yusrefi abra na en. (Leisi Psalm 116:12-14.) A fiti taki Bijbel e kari Yehovah a Sma di e gi „ibri bun presenti nanga ibri kado di bun dorodoro” (Yak. 1:17). A moro prenspari sani di Yehovah gi wi, na a srakti-ofrandi fu en Manpkin, Yesus. Denki a tori! A lusu-paiman meki taki yu kan tron wan mati fu Yehovah. Èn a gi yu a howpu fu libi fu têgo (1 Yoh. 4:9, 10, 19). Te yu gi yusrefi abra na Yehovah, dan dati na wan fu den moro bun fasi fa yu e sori en taki yu de nanga tangi gi a lobi di a sori gi yu. Boiti dati, yu e sori tu taki yu de nanga tangi gi ala den tra blesi di a gi yu (Deut. 16:17; 2 Kor. 5:15). Efu yu wani sabi moro fini fa yu kan sori taki yu de nanga tangi, dan luku les 46 penti 4 fu a Yu kan de koloku fu têgo!-buku, di abi sosrefi a dri miniti felem di nen Kado di yu kan gi Gado.

YU KLARI KBA FU GI YUSREFI ABRA ÈN FU DOPU?

9. Fu san ede wan sma no musu meki sma dwengi en fu gi ensrefi abra na Gado?

⁹ Kande yu feni taki yu no klari ete fu gi yusrefi abra èn fu dopu. Kande yu musu tyari wan tu kenki kon ete na ini yu libi fu man gi yesi na ala den wet fu Yehovah, noso kande yu abi moro ten fanowdu fu tranga a bribi fu yu (Kol. 2:6, 7). A no ala Bijbelstudenti e go na fesi na a srefi fasi èn a no ala yonguwan klari kaba fu gi densrefi abra na Yehovah èn fu dopu. Pruberi fu kon si sortu kenki yu musu tyari kon ete èn du muiti fu tyari den kon. No teki yusrefi gersi nanga trawan.​—Gal. 6:4, 5.

10. San yu kan du te yu e si taki yu no klari ete fu gi yusrefi abra èn fu dopu? (Luku sosrefi a faki „ Gi den wan di kweki na ini waarheid”.)

¹⁰ Awinsi yu e si taki yu no klari ete fu gi yusrefi abra na Yehovah, tan si dati leki wan marki di yu wani doro. Begi Yehovah fu yepi yu fu tyari kenki kon na ini yu libi (Fil. 2:13; 3:16). Yu kan de seiker taki Yehovah o yere a begi fu yu èn taki a o piki en tu.​—1 Yoh. 5:14.

FU SAN EDE SON SMA E TWEIFRI FU GI DENSREFI ABRA ÈN FU DOPU?

11. Fa Yehovah o yepi wi fu tan gi yesi na en?

¹¹ Son sma klari kba fu gi densrefi abra èn fu dopu, ma toku den e tweifri ete. Kande den e frede taki baka te den dopu, den o du wan seryusu sondu èn den brada o puru den fu a gemeente. Efu yu e frede gi a sani dati, dan yu kan de seiker taki Yehovah o gi yu ala san yu abi fanowdu fu tan ’tyari yusrefi na wan fasi di a feni bun, so taki yu kan tan prisiri en dorodoro’ (Kol. 1:10). A o gi yu a krakti tu fu du san reti. A yepi furu tra sma kba  fu du san reti (1 Kor. 10:13). Dati na wán reide fu san ede a no e psa so furu taki den brada e puru sma fu a gemeente. Yehovah e yepi a pipel fu en fu tan gi yesi na en.

12. Fa wi kan wai pasi gi seryusu sondu?

¹² Ibri sondu sma e kisi tesi fu du san no bun (Yak. 1:14). Ma na yu musu besroiti san yu o du te yu e kisi tesi. Son sma e taki dati wi no man basi den firi fu wi èn taki wi no man yepi te wi e du son sani di no bun. Ma dati no tru. Yu man leri fu basi den takru lostu fu yu. Sobun, awinsi yu e kisi tesi, toku yu kan besroiti fu no du wan sani di no bun. Dati meki a bun fu begi ibri dei. Tan studeri Gado Wortu. Go na den Kresten konmakandra. Ferteri trawan fu a bribi fu yu. Te yu abi a gwenti fu du den sani disi, dan yu o kisi krakti fu tan gi yesi na Yehovah, soleki fa yu pramisi en. Èn no fergiti noiti taki Yehovah o yepi yu fu du dati.​—Gal. 5:16.

13. San wi kan leri fu Yosef?

¹³ A o moro makelek gi yu fu tan gi yesi na Yehovah efu yu e besroiti na fesi san yu o du te yu kisi tesi. Bijbel e taki fu difrenti sma di ben du dati, aladi den ben de sondu sma neleki wi. Fu eksempre, a wefi fu Potifar ben e dwengi Yosef ibri leisi baka fu abi seks nanga en. Ma Yosef ben sabi kba san a ben o du. Bijbel e taki dati a „weigri” èn a taki: „Fa mi kan du so wan bigi ogri èn sondu teige Gado?” (Gen. 39:8-10) A de krin taki Yosef ben sabi kba san a ben o du srefi fosi a wefi fu Potifar pruberi fu tesi en. A sani dati ben meki en moro makelek gi en fu du san bun di a kisi tesi.

14. Fa wi kan leri fu kakafutu gi tesi?

¹⁴ Fa yu kan kakafutu gi tesi neleki fa Yosef ben du dati? Yu kan besroiti nownow kba san yu o du te yu e kisi tesi. Leri fu kakafutu wantewante gi sani di Yehovah no lobi kwetikweti èn weigri srefi fu prakseri den sani dati (Ps. 97:10; 119:165). Na so yu no o degedege èn yu no o naki futu te fu kba.

15. Fa wan sma kan sori taki a e „suku [Yehovah] fayafaya”? (Hebrewsma 11:6)

¹⁵ Kande yu sabi taki yu feni a waarheid èn kande yu wani dini Yehovah nanga yu  heri ati. Ma tòg yu feni taki yu no klari ete fu gi yusrefi abra na en èn fu dopu. Yu kan leri fu Kownu David. Yu kan begi Yehovah: „Mi Gado, ondrosuku mi èn kon sabi mi ati. Luku mi finifini èn kon sabi den sani di e moro mi. Luku efu wan sani de di kan hati mi bakaten. Sori mi a pasi fu têgo libi” (Ps. 139:23, 24). Yehovah e blesi den wan di „e suku en fayafaya”. Te yu du san de fanowdu fu man gi yusrefi abra na en èn fu dopu, dan yu e sori Yehovah taki yu e suku en fayafaya.​—Leisi Hebrewsma 11:6.

TAN KON MORO KROSIBEI FU YEHOVAH

16-17. Fa Yehovah e hari sma di kweki na ini waarheid kon moro krosibei na en? (Yohanes 6:44)

¹⁶ Yesus ben taki dati na Yehovah e hari den disipel fu en kon na en. (Leisi Yohanes 6:44.) Prakseri fa a sani disi moi èn san disi wani taki gi yu. Yehovah e si wan bun sani na ini ibri sma di a e hari kon na en. A e si ibri sma leki en „spesrutu gudu” (Deut. 7:6). Na so a e si yu tu.

¹⁷ Ma kande yu na wan yonguwan di kweki na ini waarheid. Kande yu feni taki yu e dini Yehovah soso fu di yu p’pa nanga m’ma e du dati. Kande yu feni taki Yehovah no hari yu kon na en. Ma Yehovah e poti prakseri na ibri sma aparti na ini a osofamiri. A e hari ibri sma kon na en, srefi ibri sma di kweki na ini waarheid. Boiti dati, Bijbel e taki: „Kon krosibei na Gado èn a o kon krosibei na unu” (Yak. 4:8; 1 Kron. 28:9). Sobun, te yu e meki muiti fu kon krosibei na Yehovah, dan en o kon moro krosibei na yu, soleki fa Yakobus 4:8 e sori.​—Luku 2 Tesalonikasma 2:13.

18. San wi o luku na ini a tra artikel? (Psalm 40:8)

¹⁸ Te yu gi yusrefi abra na Yehovah èn te yu e dopu, dan yu e sori taki yu abi a denki fu Krestes. A ben de klariklari fu du iniwan sani di en P’pa ben aksi fu en (Leisi Psalm 40:8; Hebr. 10:7). Na ini a tra artikel, wi o luku san o yepi yu fu tan gi yesi na Yehovah baka te yu dopu.