1-2. O ten Yehovah o feni na anbegi fu wi bun?

 SAN yu e prakseri te yu e yere a wortu „anbegi”? Kande yu e prakseri wan brada di e saka kindi fu begi èn a e taki nanga Yehovah fosi a go sribi. Noso kande yu e prakseri wan koloku osofamiri di e du na Osofamiri Anbegi.

² Awinsi fa a no fa, den sani disi di den sma e du abi fu du nanga na anbegi fu Yehovah. Yehovah feni na anbegi fu den bun? We, a o feni na anbegi fu den bun efu den e anbegi en soleki fa a wani èn efu den e anbegi en fu di den lobi en èn e lespeki en. Iya, wi lobi Yehovah srefisrefi. Wi sabi taki wi musu anbegi en èn wi wani du dati na a moro bun fasi.

3. San wi o luku na ini na artikel disi?

³ Na ini na artikel disi, wi o leri sortu fasi fu anbegi Yehovah ben feni bun na ini Bijbel ten èn wi o taki fu aiti sani di Yehovah wani taki wi du te wi e anbegi en na ini a ten disi. Te wi o du dati, dan prakseri san yu srefi kan du fu anbegi Yehovah na wan moro bun fasi. Wi o luku tu fu san ede wi o de koloku te wi e anbegi Yehovah na wan fasi di a feni bun.

4. Fa fositen anbegiman fu Yehovah sori lespeki nanga lobi gi en?

⁴ Na ini a ten fosi Krestes, man soleki Abel, Noa, Abraham, nanga Yob sori lespeki nanga lobi gi Yehovah. Fa den du dati? Den gi yesi na Gado, den sori bribi na ini en,  èn den tyari ofrandi gi en. Bijbel no e taigi wi ala den sani di den ben musu du na ini na anbegi fu den. Ma san wi e si krin, na taki den ben e du ala san den man fu gi grani na Yehovah èn fu dati ede a ben feni na anbegi fu den bun. Bakaten, Yehovah gi den bakapikin fu Abraham a Wet fu Moses. A Wet disi ben sori krin fa a ben wani taki den ben musu anbegi en.

5. Fa Yehovah ben wani taki sma anbegi en baka di Yesus dede èn kisi wan opobaka?

⁵ Baka di Yesus dede èn a kisi wan opobaka, dan Yehovah no ben e fruwakti moro taki sma ben musu anbegi en soleki fa a Wet fu Moses ben taki (Rom. 10:4). Kresten ben musu hori densrefi na wan nyun wet, „a wèt fu Krestes” (Gal. 6:2). Fa den ben o sori taki den ben e gi yesi na a wet disi? A no te den ben o hori ala sortu pikinpikin wet di ben e sori san den ben musu du noso te den ben o hori den wet na ede. Ma den ben o sori taki den ben e gi yesi na a wet disi, te den ben o teki na eksempre fu Yesus èn te den ben o du den sani di a ben leri sma. Na so a de tu na ini a ten disi. Kresten e du ala san den man fu waka baka Krestes so taki Yehovah kan feni den bun èn so taki den kan kisi krakti fu tan anbegi en nanga prisiri.​—Mat. 11:29.

6. Sortu wini wi o kisi fu na artikel disi?

⁶ Te wi o luku ibriwan fu den sani di wi musu du na ini na anbegi fu wi, dan a bun fu aksi yusrefi disi: ’Na sortu fasi mi go na fesi?’ Yu kan aksi yusrefi tu: ’Sortu sani mi kan du moro bun na ini na anbegi fu mi?’ Yu kan breiti nanga den sani di yu e du now, ma yu musu aksi Yehovah tu fu yepi yu fu si sortu sani yu kan du moro bun.

7. Fa Yehovah e si en te wi e begi en nanga wi heri ati?

⁷ Wi e anbegi Yehovah te wi e begi en. Bijbel e agersi den begi fu wi nanga switismeri di sma ben meki spesrutu gi Yehovah èn di den ben e tyari leki ofrandi na a tabernakel èn bakaten na a tempel (Ps. 141:2). Te Yehovah ben smeri a switismeri dati, dan a ben e gi en prisiri. Na so a de tu taki te wi e begi Yehovah nanga wi heri ati, dan a sani dati „e gi en prisiri”, srefi efu wi no e gebroiki ala sortu kefalek wortu (Odo 15:8; Deut. 33:10). Wi kan bribi taki Yehovah lobi en te wi e begi en nanga wi heri ati èn te wi e taigi en fa wi lobi en èn fa wi de nanga tangi gi den sani di a du gi wi. A wani taki wi fruteri en den broko-ede fu wi, den sani di wi e howpu na tapu, èn den sani di wi wani. Sobun, fosi yu begi Yehovah, dan a ben o bun fu prakseri san yu o taigi en. Te yu e du dati, dan yu o gi Yehovah, yu hemel Papa, a moro bun „switismeri” di de.

8. Sortu moi okasi wi abi fu prèise Gado?

⁸ Wi e anbegi Yehovah te wi e prèise en (Ps. 34:1). Wi e prèise Yehovah te wi e fruteri trawan fa wi lobi en èn fa wi lobi den sani di a du. Wi o abi furu bun sani fu taki fu Yehovah efu wi de nanga tangi. Efu wi e teki ten fu denki dipi fu ala den bun sani di Yehovah du gi wi, dan ala ten wi o abi wan sani fu prèise en. A preikiwroko e gi wi a moi okasi tu fu „prèise Gado” èn na so „wi e tyari wan ofrandi gi Gado nanga wi mofo” (Hebr. 13:15). Neleki fa wi musu denki bun san wi o taki fosi wi begi Yehovah, na so wi musu denki bun tu san wi o taki fosi wi go na ini a preikiwroko. Wi wani taki na ofrandi di  wi e tyari gi Yehovah, musu de a moro bun wan. Fu dati ede wi e taki nanga faya te wi e preiki gi sma.

9. Sortu blesi wi e kisi te wi e go na den konmakandra, neleki fa a ben de nanga den Israelsma fu owruten? Fruteri fa den konmakandra yepi yu.

⁹ Wi e anbegi Yehovah te wi e go na den konmakandra. Yehovah ben taigi den Israelsma fu owruten: „Dri leisi wan yari ibri mansma na un mindri musu go na fesi Yehovah un Gado, na a presi di a o sori unu” (Deut. 16:16). Te den ben o du dati, dan den ben o abi fu libi den oso nanga den gron sondro taki sma ben de drape fu luku den sani dati. Ma Yehovah ben pramisi den: „Nowan sma o wani teki a kondre fu unu abra te unu e go na fesi Yehovah un Gado” (Eks. 34:24). Fu di den Israelsma ben e frutrow Yehovah nanga den heri ati, meki den ben e go na den fesa disi ibri yari. Den ben e kisi furu blesi te den ben e du dati. Den ben e kon frustan Gado Wet moro bun, den ben kan prakseri den bun sani di Yehovah ben du gi den, èn den ben kan de nanga tra sma di ben lobi Yehovah tu (Deut. 16:15). Wi e kisi den srefi blesi tu te wi e du ala san wi man fu go na den Kresten konmakandra. Prakseri fa Yehovah breiti te wi e sreka wisrefi fu gi syatu piki di e gi trawan deki-ati.

10. Fu san ede a prenspari fu singi na ini na anbegi fu wi?

¹⁰ Wi e anbegi Yehovah te wi e singi nanga wi brada nanga sisa (Ps. 28:7). Singi ben de wan prenspari sani na ini na anbegi fu den Israelsma. Kownu David ben poti 288 Leifisma leki singiman na ini a tempel (1 Kron. 25:1, 6-8). Na ini a ten disi wi kan sori Gado taki wi lobi en te wi e singi prèisesingi gi en. Wi no abi fu de kefalek bun singiman fu man singi gi Yehovah. Luku wan eksempre: Te wi e taki, dan „wi alamala e sondu furu tron”, ma dati no e tapu wi fu taki na ini a gemeente èn na ini a preikiwroko (Yak. 3:2). Na a srefi fasi wi kan singi prèise singi gi Yehovah, awinsi wi feni taki wi no man singi bun.

11. Soleki fa Psalm 48:13 e sori, dan fu san ede wi musu poti wan spesrutu ten fu studeri Bijbel leki osofamiri?

¹¹ Wi e anbegi Yehovah te wi e studeri en Wortu èn te wi e leri wi pikin sani fu en. Na a Sabat-dei den Israelsma no ben e wroko, ma den ben e gebroiki a dei dati spesrutu fu tron moro bun mati fu Yehovah (Eks. 31:16, 17). Sma di ben lobi Yehovah ben leri den pikin fu den sani fu Yehovah èn fu den bun sani di a ben du gi den. Na ini a ten disi, wi musu poti wan spesrutu ten tu fu leisi èn studeri Gado Wortu. Disi abi fu du nanga na anbegi fu wi èn a e yepi wi fu tron moro bun mati fu Yehovah (Ps. 73:28). Te wi e studeri leki osofamiri, dan dati kan yepi wi pikin fu tron moro bun mati fu Yehovah, wi lobi Papa na hemel.​—Leisi Psalm 48:13.

12. Te wi e luku fa Yehovah ben si a bow-wroko fu a tabernakel, dan san wi e leri fu dati?

¹² Wi e anbegi Yehovah te wi e bow konmakandra presi èn te wi e sorgu gi den. Bijbel e taki dati a bow fu a tabernakel nanga den sani na ini, ben de santa wroko (Eks. 36:1, 4). Na ini a ten disi Yehovah e si a bow fu Kownukondre zaal nanga tra presi fu na organisâsi, leki santa wroko tu. Son brada nanga sisa yepi furu nanga a wroko disi. Wi e warderi a tranga wroko di den sma disi e du fu meki a Kownukondre wroko go na fesi. A no de fu taki dati den e du a preikiwroko tu.  Kande sonwan fu den wani tron pionier srefi. Gemeente owruman kan sori taki den e horibaka gi a bow te den de klariklari fu meki den brada nanga sisa disi di e wroko tranga, tron pionier efu den doro den marki. Awinsi wi sabi du bow-wroko noso wi no sabi du dati, wi alamala kan yepi fu hori den gebow disi krin èn fu sorgu taki den tan bun.

13. Fa wi musu si a bijdrage di wi e gi fu horibaka gi a Kownukondre wroko?

¹³ Wi e anbegi Yehovah te wi e gi bijdrage fu horibaka gi a Kownukondre wroko. Na den alayari fesa, den Israelsma no ben musu go nanga leigi anu (Deut. 16:16). Den ben musu luku san den ben man gi èn na dati den ben musu tyari gi Yehovah. Na so den ben e sori taki den ben de nanga tangi gi ala den sani di Yehovah ben du gi den. Fa wi kan sori taki wi lobi Yehovah èn taki wi de nanga tangi gi den sani di a e du gi wi? Wan fasi, na fu gi moni fu horibaka gi a gemeente fu wi èn gi a wroko di e du na heri grontapu. Ma toku wi musu hori na prakseri san na apostel Paulus ben taki: „Te wan sma de klariklari fu gi, dan dati bun spesrutu te a gi san a man gi. A no musu gi san a no man gi” (2 Kor. 8:4, 12). Yehovah breiti srefisrefi nanga san wi man gi en, awinsi dati no furu.​—Mark. 12:42-44; 2 Kor. 9:7.

14. Soleki fa Odo 19:17 e sori, dan fa Yehovah e si en te wi e yepi wi brada nanga sisa di de na nowtu?

¹⁴ Wi e anbegi Yehovah te wi e yepi wi Kresten brada nanga sisa di de na nowtu. Yehovah ben pramisi taki a ben o blesi den Israelsma di ben e yepi den pôtiwan (Deut. 15:7, 10). Iya, ibri leisi te wi e yepi wan brada noso wan sisa di de na nowtu, dan Yehovah e si dati leki wan bun di wi du gi en. (Leisi Odo 19:17.) Fu eksempre, di den Kresten na ini Filipi ben seni sani gi Paulus di ben de na strafu-oso, dan Paulus taki dati den sani dati ben de leki „wan ofrandi di fiti èn di e plisi Gado” (Fil. 4:18). Prakseri den sma na ini yu gemeente èn aksi yusrefi: ’Mi kan yepi wan fu den?’ Yehovah breiti te a e si taki wi e gebroiki wi ten, wi krakti, wi koni, nanga den sani di wi abi fu yepi den wan di de na nowtu. A e si dati leki wan sani di abi fu du nanga na anbegi fu wi.​—Yak. 1:27.

15. Fu san ede a tru anbegi a no wan hebi gi wi?

¹⁵ A e teki ten nanga krakti fu anbegi Yehovah, ma toku na anbegi fu en a no wan hebi gi wi (1 Yoh. 5:3). Fu san ede? Wi e anbegi Yehovah fu di wi lobi en. Prakseri wan yongu pikin di wani gi en papa wan sani. Kande a e teki omeni yuru fu teken wan sani gi en papa. A no e hati a pikin taki a gebroiki someni ten fu teken a sani. Fu di a lobi en papa, meki a breiti fu gi en a sani di a teken. Na so a de nanga wi tu. Fu di wi lobi Yehovah, meki wi breiti fu gebroiki wi ten nanga wi krakti fu anbegi en.

16. Soleki fa Hebrewsma 6:10 e sori, dan fa Yehovah e si a muiti di ibriwan fu wi e du fu meki en ati prisiri?

¹⁶ Lobi-ati papa nanga mama no e fruwakti a srefi fu ibriwan fu den pikin fu den. Den e frustan taki ibri pikin de tra fasi èn taki sonwan fu den no man du san den trawan man du. Na so a de tu taki wi hemel Papa e frustan taki sonwan fu wi no man du san trawan man du. Kande yu man du moro leki furu sma di yu sabi èn  di yu lobi. Noso kande yu no man du so furu leki trawan fu di yu kon owru, fu di yu e siki, noso fu di yu abi tra frantwortu na ini yu osofamiri. No lasi-ati (Gal. 6:4). Yehovah no o frigiti a wroko di yu du gi en. Te yu e du ala san yu man gi en èn te yu e du dati fu di yu lobi en, dan a o breiti nanga dati. (Leisi Hebrewsma 6:10.) Yehovah man si na ini yu ati san yu ben o wani du gi en. A wani taki wi de koloku èn taki wi breiti nanga den sani di wi man du gi en na ini na anbegi fu wi.

17. (a) San wi kan du efu a muilek gi wi fu du son sani di wi musu du na ini na anbegi fu wi? (b) Fa wan fu den sani na ini a faki „ Fa yu kan de moro koloku” yepi yu?

¹⁷ Ma san wi kan du efu a muilek gi wi fu studeri Bijbel, fu go na ini a preikiwroko, noso fu du wan fu den tra sani di wi taki fu en na ini na artikel disi? O moro wi o du den sani disi, o moro wi o lobi fu du den èn o moro wi o kisi wini fu den. A de neleki te yu ben o oefen fu du wan sani, noso te yu ben o leri fu prei gitara. Efu wi e du a sani disi wanwan leisi, dan wi no o man du en bun. Ma kon meki wi dati yu e du en ibri dei. Kande biginbigin yu o du en wan tu miniti nomo èn bakaten yu o du en moro langa. Te wi e si den bun bakapisi fu a muiti di wi e du, dan nofo tron wi o wani du den sani disi èn den o gi wi prisiri trutru. Na so a de tu nanga na anbegi fu wi.

18. San na a moro prenspari sani di wi kan du èn san o pasa te wi e du dati?

¹⁸ A moro prenspari sani di wi kan du, na fu anbegi Yehovah nanga wi heri ati. Te wi e du dati, dan wi o libi wan koloku libi èn wi o abi a howpu fu anbegi Yehovah fu ala ten (Odo 10:22). Fu di wi sabi taki Yehovah e yepi den anbegiman fu en te den abi problema, meki wi no e bruya (Yes. 41:9, 10). Wi abi furu reide fu de koloku te wi e anbegi wi lobi Papa di warti fu kisi ’a glori, nanga a grani’ fu ala den sani di a meki.​—Openb. 4:11.