1. Fu san ede yu de nanga tangi yu abi Bijbel?

 WI DE nanga tangi srefisrefi taki Yehovah Gado gi wi Bijbel. Bijbel abi koni rai di e yepi wi fu si san wi musu du te wi abi problema na ini a ten disi. A e gi wi wan moi howpu gi a ten di e kon. Ma san moro prenspari na taki Yehovah e gebroiki Bijbel so taki wi kan kon sabi furu fu den moi fasi fu en. Te wi e prakseri dipi fu den moi fasi fu Yehovah, dan dati e naki wi ati èn wi o wani kon moro krosibei na en.​—Ps. 25:14.

2. Sortu difrenti fasi Yehovah gebroiki fu taki nanga libisma?

² Yehovah wani meki sma kon sabi en. Na ini a ten di pasa, Yehovah taki nanga sonwan fu den futuboi fu en nanga yepi fu dren, fisyun èn son leisi a gebroiki engel srefi fu tyari a boskopu fu en (Num. 12:6; Tori 10:3, 4). Wi no ben o man studeri den dren, den fisyun noso den boskopu fu den engel efu sma no ben skrifi den poti na ini wan buku. Dati meki Yehovah meki sma „skrifi na ini wan buku” san a ben wani wi kon sabi (Yer. 30:2). Fu di „a pasi fu a tru Gado bun dorodoro”, meki wi kan de seiker taki disi ben de a moro bun fasi fu taki nanga wi èn fu yepi wi.​—Ps. 18:30.

3. Fa Yehovah sorgu taki Bijbel de ete te nanga now? (Yesaya 40:8)

³ Leisi Yesaya 40:8. Dusundusun yari kaba, Gado Wortu e gi reti-ati man nanga uma koni rai. Fa dati kan? Dati na wan bun aksi fu di wi no abi den fosi bukulolo fu Bijbel moro. Langa ten pasa Bijbel ben skrifi tapu bukulolo nanga metibuba di ben pori gwe baka wan pisi ten. Ma Yehovah sorgu taki sma skrifi den santa buku abra. Aladi den sma disi di ben meki kopi ben de sondusma, toku den skrifi Bijbel abra soifri. Fu eksempre wan sabiman ben taki fu den Hebrew Buku fu Bijbel: „Wi kan de seiker taki nowan  owruten buku skrifi so soifri abra.” Sobun awinsi Bijbel skrifi wan langa ten pasa tapu sani di kan pori gwe èn awinsi den sma di ben meki den kopi ben de sondusma, toku wi kan de seiker taki a boskopu di wi e leisi na ini Bijbel tide na a prakseri fu a sma di skrifi Bijbel, Yehovah.

4. San wi o luku na ini na artikel disi?

⁴ Yehovah na a sma di e gi wi „ibri bun presenti nanga ibri kado di bun dorodoro” (Yak. 1:17). Bijbel na wan fu den moro bun kado di Yehovah gi wi. Te wan sma gi wi wan kado, dan a kado e sori o bun a sma sabi wi èn o bun a sabi san wi abi fanowdu. Na so a de tu nanga a sma di gi wi Bijbel. Te wi e ondrosuku a kado disi, dan wi e leri moi sani fu Yehovah. Wi leri taki a sabi wi heri bun èn taki a sabi san wi abi fanowdu. Na ini na artikel disi wi o luku san Bijbel e taki fu dri moi fasi fu Yehovah. Dati na a koni fu en, a retidu fu en èn a lobi fu en. Kow go luku fosi fa Bijbel e sori wi taki Gado koni.

5. Fa Bijbel e sori taki Yehovah koni?

⁵ Yehovah sabi taki wi abi koni rai fanowdu. Èn Bijbel, a kado di a gi wi, lai nanga koni rai. Den rai na ini Bijbel e yepi libisma fu kenki den libi. Di Moses ben skrifi den fosi buku fu Bijbel, a taigi den Israelsma: „Un no musu si den sani di mi e taki, leki soso sani, bika den o meki unu tan na libi” (Deut. 32:47). Den wan di ben e gi yesi na Gado Wortu ben kan abi wan koloku libi (Ps. 1:2, 3). Aladi Gado Wortu ben skrifi wan langa ten pasa, toku a abi a krakti fu yepi sma fu abi wan moro bun libi. Fu eksempre na a pisi di nen „Bijbel e kenki sma libi” tapu jw.org wi e feni moro leki 30 eksempre fu sma di ben tyari bigi kenki kon na ini den libi èn den kon abi wan moro bun libi fu di den gi yesi na den rai fu Bijbel.​—1 Tes. 2:13.

6. Fu san ede wi kan taki dati nowan tra buku de leki Bijbel?

⁶ Nowan tra buku de leki Gado Wortu. Fu san ede wi kan taki dati? Fu di a sma di skrifi a buku disi na Yehovah Gado, na Almaktiwan, a de fu têgo èn a koni moro ala sma. Sma e leisi furu tra buku aladi den skrifiman no de na libi moro, ma a no ala ten sma kan gebroiki den rai di skrifi na ini den buku dati. Na a tra sei, den koni rai na ini Bijbel e wroko ala ten èn den rai disi yepi sma na ini owruten èn na ini a ten disi. Te wi e leisi a santa buku disi èn wi e denki dipi fu en, dan a Skrifiman fu Bijbel e gebroiki en makti santa yeye fu yepi wi fu si fa wi kan fiti den Bijbel rai na ini wi libi (Ps. 119:27; Mal. 3:16; Hebr. 4:12). Iya, a Skrifiman fu a Bijbel di de na libi e angri fu yepi yu. A sani disi musu gi wi deki-ati fu leisi Bijbel ibri dei.

7. Fa Bijbel yepi Gado pipel na ini owruten fu libi na ini wánfasi?

⁷ Wan tra sani di e sori taki Bijbel abi a koni fu Gado, na taki Bijbel yepi a pipel fu Gado fu libi na ini wánfasi. Di den Israelsma go na ini a Pramisi Kondre, dan den go tan na difrenti pisi fu a kondre. Sonwan fu den ben tron fisiman, trawan ben e kweki kaw nanga skapu èn trawan baka ben prani aleisi, froktu nanga gruntu. A ben kan pasa makelek taki den Israelsma di ben e tan na a wan pisi fu a kondre no ben e broko den ede nanga den tra Israelsma di ben e tan na wan tra pisi fu a kondre. Ma Yehovah ben seti sani so taki den Israelsma ben man kon makandra na difrenti okasi fu arki te trawan ben e leisi a Wortu fu en èn te den ben fruklari san  a wani taki (Deut. 31:10-13; Neh. 8:2, 8, 18). Prakseri fa wan Israelsma di ben gi yesi na Gado ben e firi te a ben doro na Yerusalem èn a ben si milyunmilyun brada nanga sisa fu en fu ibri pisi fu a kondre! Na a fasi disi Yehovah ben e yepi en pipel fu tan libi na ini wánfasi. Bakaten di a Kresten gemeente ben seti, yu ben abi man nanga uma di ben taki furu difrenti tongo. Sonwan fu den ben gudu, trawan ben pôti èn sonwan ben kisi hei skoro leri aladi trawan no ben kisi dati. Ma fu di den alamala ben lobi Gado Wortu, meki den ben e anbegi Yehovah na ini wánfasi. Den wan di ben tron bribiman ben kan kon frustan Gado Wortu fu di den ben kisi yepi fu den brada nanga sisa èn fu di den ben kon makandra.​—Tori 2:42; 8:30, 31.

8. Fa Bijbel e yepi Gado pipel na ini a ten disi fu libi na ini wánfasi?

⁸ A koni Gado fu wi e tan gi wi leri èn a e gebroiki Bijbel so taki en pipel kan de na ini wánfasi. Bijbel e fruteri wi ala den tru tori fu Yehovah di wi musu kon sabi. Wi abi a gwenti fu go na den gemeente konmakandra fu wi, den kring konmakandra nanga den kongres fu man leri moro fu Bijbel. Te wi kon makandra, dan wi e arki te sma e leisi Gado Wortu èn te den e fruklari en. Bijbel na wan prenspari sani di Yehovah e gebroiki fu yepi en pipel fu „dini en makandra leki wán man”.​—Sef. 3:9.

9. Sortu fasi wi musu abi fu frustan a boskopu fu Bijbel? (Lukas 10:21)

 ⁹ Poti prakseri na wan tra buweisi di e sori taki Yehovah koni. Yehovah sorgu taki furu pisi fu en Wortu skrifi na so wan fasi taki soso sma di abi sakafasi kan frustan en. (Leisi Lukas 10:21.) Sma fu ala presi e leisi Bijbel. Wan sabiman taki: „Sma e leisi Bijbel moro iniwan tra buku èn te den e leisi en den e poti prakseri na en moro leki iniwan tra buku.” Ma soso den wan di abi sakafasi kan frustan en trutru èn den kan fiti den sani di skrifi na ini.​—2 Kor. 3:15, 16.

10. San na wan tra sani fa Bijbel e sori taki Yehovah koni?

¹⁰ Wan tra sani de tu fa wi e si a koni fu Yehovah na ini Bijbel. Yehovah no e gebroiki en Wortu nomo fu gi wi leri leki grupu, ma a e gebroiki en tu fu trowstu ibriwan fu wi èn fu gi ibriwan fu wi leri. Te wi e leisi a Wortu fu Yehovah, dan wi kan si taki a e broko en ede nanga ibriwan fu wi (Yes. 30:21). Te wi abi wan problema èn wi e bigin leisi Bijbel, dan nofo tron wi e leisi wan vers di e sori leki a skrifi spesrutu gi wi. Toku Bijbel skrifi so taki milyunmilyun sma kan frustan dati. Fa a du kon taki den sani di skrifi na ini Bijbel na soifri san yu abi fanowdu? Dati kan, fu di a sma di skrifi en na a moro koni sma fu hemel nanga grontapu.​—2 Tim. 3:16, 17.

11. Fa Gado sori taki a no e desko di a meki sma skrifi Bijbel?

¹¹ Retidu na wan tra fasi fu Yehovah (Deut. 32:4). Wan sma di e du san reti no e desko trawan èn Yehovah no e desko sma (Tori 10:34, 35; Rom. 2:11). Wi kan si taki Yehovah no e desko fu di a meki sma skrifi Bijbel na ini a tongo di furu sma ben e taki na ini a ten dati. Den fosi 39 buku fu Bijbel ben skrifi moro furu na ini Hebrewtongo fu di a pipel fu Gado na ini a ten dati ben frustan a tongo dati. Ma na ini a ten fu den fosi Kresten, furu sma ben taki Grikitongo. Dati meki den lasti 27 buku fu Bijbel ben skrifi na ini a tongo dati. Yehovah no ben bosroiti taki a Wortu fu en ben musu skrifi na ini wán tongo nomo. Na ini a ten disi sowan aiti milyard sma e tan na grontapu èn den e taki bun furu tongo. Fa a kan taki so furu sma kan leri sabi Yehovah?

12. San na wan fasi fa Danièl 12:4 e kon tru na ini den lasti dei disi?

¹² Nanga yepi fu na profeiti Danièl, Yehovah ben pramisi taki na ini a ten fu a kaba sma ben o kon „sabi bun furu tru tori”. Furu fu den ben o frustan den „tru tori” dati di skrifi na ini Bijbel. (Leisi Danièl 12:4.) Wan sani di yepi furu sma fu kon frustan Bijbel na di sma vertaal, print èn prati Bijbel nanga den buku di e taki fu Bijbel. Bijbel vertaal moro iniwan tra buku èn bijna ala sma kan feni wan. Son leisi a diri srefisrefi fu bai wan Bijbel fu den bedrijf di e vertaal Bijbel. Ma te nanga now Yehovah pipel vertaal a heri Bijbel noso pisi fu en na ini moro leki 240 tongo èn ala sma kan feni wan sondro fu pai gi dati. A bakapisi na taki sma fu ala kondre kan kon sabi ’a bun nyunsu fu a Kownukondre’ fosi a kaba kon (Mat. 24:14). A Gado fu wi di lobi retidu wani gi so furu sma leki a kan na okasi fu kon leri sabi en nanga yepi fu en Wortu. A e du a sani disi fu di a lobi wi alamala srefisrefi.

13. Fu san ede wi kan taki dati Bijbel e sori taki Yehovah lobi wi? (Yohanes 21:25)

¹³ Bijbel e yepi wi fu frustan taki a moro prenspari fasi fu Yehovah na lobi (1 Yoh. 4:8). Poti prakseri na san Yehovah meki sma skrifi na ini Bijbel èn san a no meki sma skrifi. A gi wi soifri san wi abi fanowdu fu abi wan bun matifasi nanga en, fu abi wan koloku libi nownow kaba èn fu sabi san wi musu du fu kisi têgo libi. Ma fu di Yehovah lobi wi, meki a no poti sani na ini Bijbel di wi no abi fanowdu fu anbegi en.​—Leisi Yohanes 21:25.

14. Na sortu tra fasi Bijbel e sori taki Yehovah lobi wi?

¹⁴ Yehovah sori tu taki a lobi wi fu di a e taki nanga wi na wan fasi di e meki wi firi bun. Na ini Bijbel Yehovah no gi wi wan lo wet fu sori wi san wi musu du èn san wi no musu du na ini wi libi. Na presi fu dati a e gebroiki ondrofenitori fu sma, span profeititori nanga koni rai fu yepi wi fu teki koni bosroiti. Na a fasi disi Gado Wortu e gi wi deki-ati fu lobi Yehovah nanga wi heri ati èn gi yesi na en.

15. (a) Fa Bijbel e sori taki Yehovah e broko en ede nanga wi? (b) Te yu e luku a fowtow, dan fu sortu sma fu Bijbel a meisje, a yongu brada èn na owru sisa e prakseri? (Gen. 39:1, 10-12; 2 Kow. 5:1-3; Luk. 2:25-38)

¹⁵ Bijbel e sori taki Yehovah e broko en ede trutru nanga wi. Fa so? Na ini en Wortu yu abi furu tori fu sma di ben sori fa den ben e firi. Wi kan frustan fa den sma disi ben e firi fu di den ben „abi den srefi firi leki wi” (Yak. 5:17). Ma san moro prenspari na fa Yehovah ben libi nanga  den sma disi. A e yepi wi fu frustan taki „Yehovah lobi sma trutru èn taki a abi sari-ati”.​—Yak. 5:11.

16. San wi e leri fu Yehovah te wi e leisi fu sma na ini Bijbel di ben meki fowtu? (Yesaya 55:7)

¹⁶ Bijbel e taki fu wan tra fasi fa Yehovah sori taki a lobi wi. En Wortu e gi wi a dyaranti taki Gado no o gwe libi wi te wi e meki fowtu. Den Israelsma ben e sondu ibri tron baka teige Yehovah. Ma te den ben sori trutru berow, dan Yehovah ben e gi den pardon. (Leisi Yesaya 55:7.) Den fosi Kresten ben sabi tu taki Gado ben lobi den srefisrefi. Nanga yepi fu a santa yeye na apostel Paulus ben gi den brada nanga sisa fu en a deki-ati fu gi wan man ’pardon nanga den heri-ati èn fu trowstu en’ fu di a ben sori trutru berow baka di a ben du seryusu sondu (2 Kor. 2:6, 7; 1 Kor. 5:1-5). A moi fu sabi taki Yehovah no e gwe libi den anbegiman fu en te den e meki fowtu! Na presi fu dati a e yepi den na wan lobi-ati fasi, a e piri-ai gi den èn a e gi den a kari fu tron mati fu en baka. A pramisi fu du dati tu gi ala sma di e sori trutru berow na ini a ten disi.​—Yak. 4:8-10.

17. Fu san ede Bijbel na so wan prenspari kado?

¹⁷ Yehovah gi wi wan moi kado. Fu san ede meki en Wortu prenspari so? Soleki fa wi leri, dan Bijbel e sori taki Gado koni, taki a e du san reti èn taki a lobi wi srefisrefi. Bijbel e buweisi taki Yehovah wani taki wi kon sabi en èn a wani taki wi tron en mati.

18. Fa wi kan sori Yehovah taki wi de nanga tangi gi Bijbel, a „kado di bun dorodoro”?

¹⁸ Wi no wani frigiti taki Gado Wortu na wan „kado di bun dorodoro” (Yak. 1:17). Sobun meki wi tan sori warderi gi a kado disi. Wi kan du dati te wi e begi fosi wi e leisi en santa wortu èn e denki dipi fu en. Te wi e du dati, dan wi kan de seiker taki a Skrifiman fu Bijbel o blesi a muiti di wi e meki èn wi „o kon leri sabi Gado”.​—Odo 2:5.