1, 2. (a) San furu brada nanga sisa di e meki a yeye fu Gado tiri den, e taki? (b) Sortu aksi wi o luku na ini na artikel disi?

„FU DI mi e meki a yeye fu Gado tiri mi, meki dati yepi mi nanga den tesi di mi e kisi ala dei”, na so wan sisa na ini Kanada taki. Wan brada na ini Brasyonkondre taki: „Wi abi wan koloku trowlibi 23 yari kaba. Disi e kon fu di wi e pruberi fu si sani soleki fa Gado e si sani.” Wan tra brada fu den Filippijnen taki: „Fu di mi e meki a yeye fu Gado tiri mi, meki mi abi wan korostu firi èn mi man libi bun nanga brada nanga sisa fu difrenti kondre.”

² Den sani di den sma disi taki e sori taki wi e kisi furu wini te wi e meki a yeye fu Gado tiri wi. Dati meki a bun fu aksi wisrefi: ’Fa mi kan meki a yeye fu Gado tiri mi so taki mi kan kisi den blesi disi tu?’ Fosi wi piki na aksi disi, wi musu frustan san Bijbel e taki fu sma di e meki a yeye fu Gado tiri den. Na ini na artikel disi wi o piki dri prenspari aksi: (1) San a wani taki fu meki a yeye fu Gado tiri wi? (2) Sortu eksempre o yepi wi fu tron sma di e meki a yeye fu Gado tiri wi? (3) Te wi e du muiti fu kon abi a ’denki fu Krestes’, dan fa dati o yepi wi fu meki a yeye fu Gado tiri wi?

3. San na a difrenti na mindri wan sma di abi a yeye fu Gado nanga wan sma di abi libisma denki?

³ Na apostel Paulus e yepi wi fu frustan san na a difrenti na mindri „wan sma di abi a yeye fu Gado” nanga „wan sma di abi libisma denki”. (Leisi 1 Korentesma 2:14-16.) „Wan sma di abi libisma denki no e teki den sani fu a yeye fu Gado, bika a e si den sani dati leki don sani. A no man kon sabi den sani dati.” Ma „wan sma di abi a yeye fu Gado, e ondrosuku ala sani”, èn a e „denki soleki fa Krestes e denki”. Paulus e gi wi deki-ati fu de sma di e meki a yeye fu Gado tiri wi. Sortu tra difrenti de na mindri wan sma di e meki a yeye fu Gado tiri en nanga wan sma di abi libisma denki?

4, 5. Fa wi kan sabi efu wan sma abi libisma denki?

⁴ Meki wi luku fosi fa wan sma di abi libisma denki e si sani? So wan sma e teki a denki fu grontapu abra. A e du nomo san a sondu skin wani. Paulus taki dati ’den sma di e trangayesi Gado’ abi a denki fu grontapu (Ef. 2:2). Sma di abi a denki fu grontapu e du san tra sma na den lontu e du. Furu fu den e du nomo san den feni bun èn den no e broko den ede nanga den wet fu Gado. Den sma disi e prakseri nomo fa den kan kisi wan hei posisi èn fa den kan meki moni. Den feni taki den reti fu den prenspari moro di fu ala tra sma.

⁵ Furu tron sma di abi libisma denki e du „den sani di a sondu skin e du” (Gal. 5:19-21). A fosi brifi di Paulus ben skrifi gi den Korentesma e taki fu wan tu tra sani di den sortu sma disi e du. A taki dati den e tyari pratifasi kon, den e gi sma deki-ati fu opo densrefi teige den wan di e teki fesi, den e tyari den brada nanga sisa go na krutubangi, den no abi lespeki gi den wan di e teki fesi èn den e nyan èn dringi pasa marki. Wan sma di abi libisma denki no man dwengi ensrefi fu no du sondu (Odo 7:21, 22). Yudas ben skrifi taki son sma ben o ogri so te, taki den no ben o abi a yeye fu Gado kwetikweti.​—Yud. 18, 19.

6. Fa wi kan sabi efu wan sma abi a yeye fu Gado?

⁶ Ma san a wani taki fu de „wan sma di abi a yeye fu Gado”? So wan sma e suku fu de wan mati fu Gado. A e meki a santa yeye fu Gado tiri en èn a e du muiti fu „teki na eksempre fu Gado” (Ef. 5:1). A e meki muiti fu sabi fa Yehovah e denki èn fu si sani soleki fa Yehovah e si sani. Gado de wan trutru sma gi en. Tra fasi leki wan sma di abi a denki fu libisma, wan sma di abi a yeye fu Gado e pruberi fu libi soleki fa Yehovah wani taki sma musu libi (Ps. 119:33; 143:10). So wan sma no e du den sani di a sondu skin wani, ma a e pruberi fu kon abi „den fasi di a yeye e meki sma kisi” (Gal. 5:22, 23). Fu frustan a tori disi moro bun, dan luku na eksempre disi: Te wan sma lobi poku, dan son leisi wi e taki dati a sma na soso poku a e prakseri. Te a abi fu du nanga sma di abi a yeye fu Gado, dan wi kan taki tu dati so wan sma lobi prakseri sani di abi fu du nanga Gado.

7. San Bijbel e taki fu sma di e meki a yeye fu Gado tiri den?

⁷ Bijbel e taki bun fu sma di e meki a yeye fu Gado tiri den. Mateyus 5:3 e taki: „Koloku fu den sma di sabi taki den abi Gado fanowdu, bika den o kisi a Kownukondre fu hemel.” Romesma 8:6 e sori sortu wini wi e kisi te wi e meki a yeye fu Gado tiri wi. A e taki: „Te wan sma e poti prakseri na sani di a skin wani, dan a bakapisi fu dati na dede. Ma te wan sma e poti prakseri na sani di abi fu du nanga a yeye, dan a bakapisi fu dati na libi nanga freide.” Sobun, te wi e poti  prakseri na sani di abi fu du nanga Gado, dan wi o abi freide nanga Gado, wi o firi korostu èn wi o abi a howpu fu kisi têgo libi.

8. Fu san ede wi musu meki muiti fu kon abi a denki fu Gado èn fu tan si sani soleki fa en e si sani?

⁸ Wi e libi na ini wan ogri grontapu. Fu di grontapu lai nanga sma di no abi a denki fu Gado, meki wi musu du tranga muiti fu kibri a denki fu wi. Efu wi no e furu wi frustan nanga den prakseri fu Yehovah, dan grontapu o furu wi frustan nanga a denki fu libisma èn wi o wani du san a sondu skin wani. San wi kan du fu no meki dati pasa? Fa wi kan kon abi a denki fu Gado moro nanga moro?

9. (a) San kan yepi wi fu tron sma di e meki a yeye fu Gado tiri wi? (b) Sortu bun eksempre wi o luku?

⁹ Te wan pikin e teki a bun eksempre fu en papa nanga mama, dan a kan tron wan bigisma di e teki koni bosroiti. Efu wi wani tron sma di e meki a yeye fu Gado tiri wi, dan wi musu teki na eksempre fu sma di ben de bun mati fu Yehovah. Na a tra sei, na eksempre fu sma di ben abi a denki fu libisma e leri wi san wi no musu du (1 Kor. 3:1-4). Bijbel e taki fu sma di de bun eksempre èn sma di no de bun eksempre. Ma fu di wi wani tron sma di e meki a yeye fu Gado tiri wi, meki wi o poti prakseri na den bunwan. Wi o taki fu Yakob, Maria nanga Yesus.

10. Fa Yakob sori taki a ben meki a yeye fu Gado tiri en?

¹⁰ Luku na eksempre fu Yakob. Neleki furu fu wi, a libi no ben makelek gi Yakob. En eigi brada Esau ben wani kiri en. A papa fu en wefi pruberi fu bedrigi en furu leisi. Aladi den sani disi miti Yakob, toku a tan meki a yeye fu Gado tiri en. A ben abi a bribi taki Gado ben o du san a pramisi Abraham èn a ben sabi taki Gado ben o gebroiki  en osofamiri fu meki a pramisi dati kon tru. Dati meki a tan sorgu bun gi den (Gen. 28:10-15). Yakob no gi pasi taki a denki fu den sma na en lontu meki a frigiti a pramisi fu Yehovah. Fu eksempre, di a ben frede taki Esau ben o kiri en, a begi Gado: „Puru mi na a anu fu mi brada . . . Yu ben taki: ’Mi o blesi yu fu tru èn mi o meki den bakapikin fu yu kon furu leki den aisanti fu se’” (Gen. 32:6-12). Yakob ben abi wan tranga bribi na ini den pramisi fu Yehovah èn a sori dati nanga a fasi fa a ben e libi.

11. Fa wi du sabi taki Maria ben meki a yeye fu Gado tiri en?

¹¹ Meki wi luku na eksempre fu Maria now. Fu san ede Yehovah teki en fu tron a mama fu Yesus? Na fu di a ben meki a yeye fu Gado tiri en. Fa wi du sabi dati? Leisi san Maria taki di a go luku den famiriman fu en, Sakaria nanga Elisabet. (Leisi Lukas 1:46-55.) Wi kan si taki Maria ben lobi Gado Wortu èn taki a ben sabi den Hebrew Buku fu Bijbel bun (Gen. 30:13; 1 Sam. 2:1-10; Mal. 3:12). Luku tu taki baka di Maria nanga Yosef trow, den no ben abi seks teleki Yesus gebore. San disi e sori wi? A e sori wi taki a wroko di Gado ben gi den ben prenspari moro den eigi firi (Mat. 1:25). Boiti dati, Maria ben e luku ala den sani di ben e pasa na ini a libi fu Yesus èn a ben arki den koni sani di Yesus ben e taki. Ma a no dati wawan. Maria „ben hori ala den wortu disi na prakseri” (Luk. 2:51). A de krin taki a ben wani sabi fa den sani di Gado ben taki fu a Mesias ben o kon tru. Yu no feni taki na eksempre fu Maria e gi wi deki-ati fu poti a wani fu Gado na a fosi presi na ini wi libi?

12. (a) Fa Yesus teki na eksempre fu en Papa? (b) Fa wi kan teki na eksempre fu Yesus? (Luku a prenki na a bigin fu na artikel.)

¹² Ma fu ala sma di libi na grontapu, suma na a moro bun eksempre? Dati na Yesus. Di a ben e du en diniwroko na grontapu a sori taki a ben wani teki na eksempre fu en Papa, Yehovah. A ben e denki neleki Yehovah, a ben e firi neleki en èn a ben du sani neleki en. A ben e du a wani fu Gado èn a ben e lespeki den wet fu en tu (Yoh. 8:29; 14:9; 15:10). Fu eksempre, luku fa Yehovah ben e firi soleki fa a profeiti Yesaya ben skrifi. Dan agersi dati nanga a fasi fa Yesus ben e firi, soleki fa Markus skrifi. (Leisi Yesaya 63:9; Markus 6:34.) Te wi e miti sma di abi yepi fanowdu, dan wi e pruberi fu sori sari-ati gi den neleki fa Yesus ben e du dati? Boiti dati, neleki Yesus wi musu gebroiki wi ten fu du a preikiwroko èn fu leri sma a bun nyunsu (Luk. 4:43). Iya, sma di e meki a yeye fu Gado tiri den, abi sari-ati èn den e pruberi fu yepi tra sma.

13, 14. (a) San wi kan leri fu brada nanga sisa di e meki a yeye fu Gado tiri den? (b) Gi wan eksempre.

¹³ Boiti den eksempre na ini Bijbel, furu brada nanga sisa na ini a ten disi e pruberi fu teki na eksempre fu Krestes. Kande yu si taki den e du a preikiwroko fayafaya, taki den gwenti kari sma kon na den oso, taki den e sori sari-ati èn taki den abi tra moi fasi. Neleki wi, den na sondusma tu, ma den e meki tranga muiti fu kon abi moi fasi èn fu du a wani fu Yehovah. Rachel, wan sisa na ini Brasyonkondre, e taki: „Mi ben lobi den modo fu grontapu. Dati meki mi no ben weri krosi di fiti. Ma di mi studeri Bijbel, dan dati yepi mi fu kenki kon tron wan sma di abi a denki fu Gado. A no ben makelek fu tyari kenki kon, ma fu di mi du dati, meki mi kon de moro koloku èn mi e du wan bun sani nanga mi libi now.”

¹⁴ Reylene fu den Filippijnen ben abi wan tra problema. Aladi a ben e dini Yehovah, toku a ben de nomonomo fu teki hei  skoroleri èn fu abi wan bun wroko so taki a ben kan meki en na ini a grontapu. A taki: „Mi no ben meki muiti moro fu go na fesi na ini na anbegi. Ma mi bigin firi leki mi ben misi wan sani na ini mi libi, wan sani di prenspari moro mi wroko. Dati meki mi kenki a fasi fa mi ben e denki èn mi bigin dini Yehovah fayafaya baka.” Now Reylene na wan bun eksempre gi wi fu di a e bribi san Yehovah pramisi na Mateyus 6:33, 34. Reylene taki: „Mi de seiker taki Yehovah o sorgu gi mi!” Kande yu abi den sortu brada nanga sisa disi na ini yu gemeente. Te wi e si fa den e teki na eksempre fu Krestes, dan wi wani teki na eksempre fu den tu, a no so?​—1 Kor. 11:1; 2 Tes. 3:7.

15, 16. (a) San wi musu du efu wi wani de leki Krestes? (b) San o yepi wi fu „denki soleki fa Krestes e denki”?

¹⁵ Fa wi kan teki na eksempre fu Krestes? Na ini 1 Korentesma 2:16 skrifi taki wi musu „denki soleki fa Krestes e denki”. Èn Romesma 15:5 e taki dati wi musu „abi a srefi denki di Krestes Yesus ben abi”. Sobun, efu wi wani de leki Krestes, dan wi musu kon sabi fa a e denki èn sortu fasi a abi. Baka dati wi musu waka soifri na en baka. A matifasi di Yesus ben abi nanga Gado ben de a moro prenspari sani gi en. Sobun, te wi e meki muiti fu de leki Yesus, dan wi o kon de moro bun mati fu Yehovah. Dati meki a prenspari taki wi leri fu denki leki Yesus.

¹⁶ San o yepi wi fu du dati? Den disipel fu Yesus ben si den wondru di a ben du, den ben yere den sani di a ben e leri sma, den ben e si fa a ben e libi nanga ala sortu sma èn fa a ben e meki Gado Wortu tiri en. Den ben taki: „Wisrefi si ala den sani di a du” (Tori 10:39). Noiti wi si Yesus. Ma Yehovah meki sma skrifi den Evangelietori di e yepi wi fu kon sabi sortu fasi Yesus ben abi èn fa a ben e denki. Te wi e leisi den buku Mateyus, Markus, Lukas nanga Yohanes èn te wi e denki dipi fu den, dan wi o kon sabi fa Krestes ben e denki. Dati o yepi wi fu „waka soifri na en baka” èn fu kon „abi a srefi denki di a ben abi”.​—1 Petr. 2:21; 4:1.

17. Sortu wini wi o kisi te wi e leri fu denki leki Krestes?

¹⁷ Sortu wini wi o kisi te wi e denki leki Krestes? Neleki fa gosontu nyanyan e gi a skin krakti, na so a de tu taki te wi e meki muiti fu kon abi a denki fu Krestes, dan wi bribi o kon tranga. Safrisafri wi o kon sabi sortu bosroiti Yesus ben o teki na ini wan spesrutu situwâsi. Disi o yepi wi fu teki bosroiti di Gado feni bun èn di o meki taki wi tan abi wan krin konsensi. Yu no feni taki wi abi bun reide fu kon abi „den fasi fu Masra Yesus Krestes”?​—Rom. 13:14.

18. San yu leri fu na artikel disi?

¹⁸ Na ini na artikel disi wi luku fa wi kan meki a yeye fu Gado tiri wi. Wi si tu taki wi kan leri fu sma di de bun eksempre. Boiti dati, wi si taki te wi e „denki soleki fa Krestes e denki”, dan wi e kon abi a denki fu Yehovah èn wi e tron moro bun mati fu en. Ma moro sani de di wi kan leri. Fu eksempre: Fa wi kan kon sabi efu wi na lepi Kresten di e meki a yeye fu Gado tiri wi? San wi kan du fu tron moro lepi Kresten? Te wi na lepi Kresten, dan fa dati o yepi wi na ini na aladei libi? Na ini a tra artikel wi o kisi piki tapu den aksi disi.