Di Yehovah taigi libisma fu „kon lai na grontapu èn basi ala sani na grontapu”, dan dati ben e sori taki heri grontapu ben o tron wan paradijs te fu kaba (Gen. 1:28). Den sma di o libi fu têgo musu gi yesi na a srefi komando dati. Na a bigin, grontapu no o de wan paradijs fu di a dyari fu Eden no de moro. Te Armagedon pasa kaba, dan wantewante wi o abi fu krin den presi na grontapu di libisma pori. Dati o de wan bigi wroko trutru!

A sani disi e meki wi prakseri a wroko di den Israelsma ben musu du di den drai kon baka na Yerusalem. Sowan 70 yari langa, nowan sma ben e libi na ini kondre fu den. Ma Yesaya ben taki dati Yehovah ben o yepi den fu seti a kondre kon bun baka. A profeititori ben taki: „A o meki a sabana fu en tron leki Eden èn den drei presi o tron leki a dyari fu Yehovah” (Yes. 51:3). Yehovah yepi den Israelsma fu seti a kondre fu den kon bun baka. Na so a de tu taki Yehovah o yepi  den wan di o kisi grontapu fu meki a tron wan moi paradijs. Nownow kaba yu kan sori taki yu wani yepi nanga a wroko dati.

Wan fasi fa yu kan du dati, na te yu e du ala san yu man fu hori yu oso nanga yu dyari krin, awinsi den sma na ini yu birti no e du dati. Yu kan yepi tu fu krin a Kownukondre zaal nanga a kongreshal èn yu kan yepi fu sorgu taki den presi disi tan bun. Efu yu man, dan yu kan gi yu nen fu yepi te wan rampu pasa. Na so yu e sori taki yu de srekasreka fu yepi yu brada nanga sisa te nowtu de. Aksi yusrefi: ’Mi kan leri fu du wan tu sani di mi kan gebroiki te mi kisi a grani fu libi fu têgo na grontapu?’

Wantewante baka di na umapikin fu Yairus kisi wan opobaka, dan Yesus taigi sma fu gi a pikin wan sani fu nyan (Mark. 5:42, 43). Kande a no ben de wan hebi wroko fu sorgu gi a meisje dati di ben abi 12 yari. Ma prakseri o furu wroko wi o abi fu du te „ala den sma di de na ini den grebi o yere [Yesus] en sten èn den o komopo drape” (Yoh. 5:28, 29). Aladi Bijbel no e taki finifini fa dati o pasa, toku wi kan frustan taki den sma di o kisi wan opobaka o abi nyanyan, krosi, nanga wan tanpresi fanowdu. Yu kan sori nownow kaba taki yu de srekasreka fu yepi den sma disi? Luku wan tu sani di yu kan du.

Te den brada meki bekènti taki a kring-owruman o kon luku a gemeente, dan yu kan kari en fu kon nyan na yu oso. Te furuten dinari musu gowe libi Betel, noso te wan kring-owruman no e du a kring-wroko moro, dan kande yu kan yepi den fu feni wan presi fu tan. Efu wan kongres noso wan spesrutu kongres e hori na ini a kontren fu yu, dan kande yu kan gi yu nen fu yepi nanga wroko di de fu du fosi a kongres bigin noso baka a kongres. Kande yu kan yepi tu fu gi den sma di kon na a kongres wan switikon.

Soleki fa Tori fu den apostel 24:15 e sori, dan wi kan fruwakti taki milyunmilyun sma o kisi wan opobaka. Furu fu den sma disi no kon sabi Yehovah fosi den dede, ma den o kisi na okasi dati te den kisi wan opobaka. a Getrow futuboi fu Yehovah di abi ondrofeni o gi den sma disi leri (Yes. 11:9). Charlotte di preiki na ini Europa, Zuid-Amerika, nanga Afrika, no man wakti fu du a wroko dati. A e taki: „Mi no man wakti fu gi sma leri te den kisi wan opobaka. Te mi e leisi fu wan sma di dede kaba, dan mi e denki: ’Efu a sma disi ben kon sabi Yehovah, dan a libi fu en ben o de heri tra fasi.’ Mi no man wakti fu fruteri den sma di kisi wan opobaka sani fu Yehovah èn fa den o abi wan moro bun libi efu den e dini en.”

Srefi getrow futuboi fu Yehovah di ben e libi fosi Yesus kon na grontapu, o abi fu leri furu sani. Prakseri fa a o gi wi prisiri èn fa a o de wan bigi grani fu fruteri Danièl fa den profeititori di a ben skrifi kon tru, aladi a no ben e frustan den na a ten fu en (Dan. 12:8). Noso fa yu o feni en fu fruteri Rut nanga Naomi fa a famiri fu den tron afo fu a Mesias? A o gi wi prisiri trutru fu gi sma leri na heri grontapu, sondro den problema nanga den tesi di wi e miti wi now na ini na ogri grontapu disi.

Fa yu kan sori nownow kaba taki yu de srekasreka fu yepi nanga a wroko dati? Wan fasi fa yu kan du dati, na te yu e meki muiti fu tron wan moro bun leriman èn te yu e teki prati doronomo na a preikiwroko (Mat. 24:14). Awinsi yu no man preiki so furu now fu di yu owru kaba, toku yu kan du ala san yu man nownow kaba fu yepi nanga a preikiwroko. Na so yu o sori taki yu de srekasreka fu gi leri na den sma di kisi wan opobaka.

A bun fu poti prakseri na den prenspari aksi disi: A de so trutru taki yu e angri fu kisi grontapu? Yu e angri fu seti grontapu kon bun baka, fu sorgu gi den wan disi kisi wan opobaka èn fu gi den leri? Yu kan sori taki yu de srekasreka fu libi fu têgo na grontapu te yu e yepi nownow kaba fu du den srefi sortu wroko di yu o du na ini a nyun grontapu di yu o kisi!