1, 2. Sortu rai wi e kisi na Hebrewsma 13:4?

WI ALAMALA wani sori lespeki gi Yehovah. A e frudini en fu kisi lespeki noso grani èn a pramisi taki a o gi wi grani tu (1 Sam. 2:30; Odo. 3:9; Openb. 4:11). A wani tu taki wi e lespeki tra libisma, soleki den tiriman (Rom. 12:10; 13:7). Ma spesrutu na ini a trowlibi Yehovah wani taki wi musu sori lespeki.

² Na apostel Paulus ben skrifi: „Un alamala musu si a trowlibi leki wan lespeki sani. Un no musu doti a trowlibi fu unu” (Hebr. 13:4). Dyaso Paulus no ben taki nomo fa sani musu de na ini a trowlibi. Ma a ben e taigi Kresten fa den ben musu si a trowlibi. Den ben musu si en leki wan warti sani. Na so yu e si a trowlibi tu, spesrutu yu eigi trowlibi?

3. Sortu prenspari rai fu a trowlibi Yesus ben gi? (Luku a prenki na a bigin fu na artikel.)

³ Efu yu e lespeki a trowlibi, dan yu e teki a bun eksempre fu Yesus di ben e lespeki a trowlibi tu. Di den Fariseiman ben aksi Yesus efu wan man mag broko trow nanga en wefi, dan Yesus sori den san Gado ben taki fu a fosi trowlibi. A taki: „Dati meki wan man o gowe libi en papa nanga mama èn den tu sma dati o de wán skin.” Yesus ben taki tu: „San Gado tyari kon na wán nowan sma musu prati.”​—Leisi Markus 10:2-12; Gen. 2:24.

4. Fa Yehovah e si a trowlibi sensi a bigin?

⁴ Sobun, Yesus sori taki na Gado seti a trowlibi èn taki tu sma  di trow musu tan na makandra fu ala ten. Di Gado trow den fosi libisma, Adam nanga Eva, a no taigi den taki den ben kan broko a trow. Sensi a bigin Yehovah ben wani taki „den tu sma” dati ben musu tan na makandra fu têgo.

5. Fa dede kenki a trowlibi?

⁵ Soleki fa yu sabi, dan a sondu fu Adam meki taki furu sani kenki. Wan fu den kenki na taki libisma bigin dede, èn dati ben abi krakti tu tapu a trowlibi. Na apostel Paulus ben skrifi den Kresten taki dede e tyari wan kaba kon na a trowlibi èn taki a patna di de na libi mag trow baka nanga wan tra sma.​—Rom. 7:1-3.

6. Fa Gado e si a trowlibi te wi e luku a Wet di a ben gi den Israelsma?

⁶ A Wet di Gado ben gi den Israelsma ben gi den difrenti rai fu a trowlibi. Na a ten dati, wan man fu Israel ben mag abi moro leki wán wefi. A gwenti disi ben de kaba fosi Gado ben gi den Israelsma a Wet. Ma a Wet disi ben e sorgu taki den no du ogri nanga umasma nanga pikin. Fu eksempre, efu wan man fu Israel ben trow nanga wan srafu èn bakaten a teki ete wan wefi, a ben musu tan sorgu bun gi en fosi wefi. A ben musu sorgu taki a ben abi nyanyan nanga krosi èn a ben musu gi en san en leki wefi abi reti na tapu. Gado ben wani taki a masra ben musu kibri en wefi èn a ben musu sorgu gi en (Eks. 21:9, 10). Na ini a ten disi wi no abi fu hori wisrefi na a Wet fu Moses. Ma a Wet disi e sori wi taki Gado e si a trowlibi leki wan prenspari sani. Disi e yepi wi fu lespeki a trowlibi tu.

7, 8. (a) Soleki fa Deuteronomium 24:1 e sori, dan san a Wet ben e taki fu brokotrow? (b) Fa Yehovah e denki fu brokotrow?

⁷ San a Wet ben e taki fu brokotrow? Noiti Yehovah ben wani taki wan masra nanga en wefi broko trow. Toku a Wet ben e gi wan Israel man pasi fu broko trow efu ’na uma ben du wan sani di no fiti’. (Leisi Deuteronomium 24:1.) A Wet no ben taki san ben kan de a „sani di no fiti”. Ma a musu fu de wan seryusu sani. Kande na uma ben du wan syen sani noso kande a ben tyari ensrefi na wan morsu fasi (Deut. 23:14). Ma a sari taki na a ten fu Yesus, furu Dyu ben e broko trow „fu ala sortu sani ede” (Mat. 19:3). A no de fu taki dati wi no wani teki a denki disi abra.

⁸ A profeiti Maleaki ben sori fa Gado e denki fu brokotrow. Na ini a ten fu Maleaki den man ben abi a gwenti fu broko trow nanga den ’wefi di den ben teki sensi di den ben yongu’, kande fu go trow nanga wan moro yongu uma di ben e dini falsi gado. Maleaki ben skrifi fa Gado ben feni a sani dati. A taki: „Mi no lobi brokotrow kwetikweti” (Mal. 2:14-16). Disi e sori taki a fasi fa Gado ben e denki fu a trowlibi sensi a bigin no kenki. A ben taki dati ’wan man o tai hori na en wefi èn den o tron wán skin’ (Gen. 2:24). Yesus ben abi a srefi denki fu a trowlibi leki en Papa. Dati meki a taki: „San Gado tyari kon na wán nowan sma musu prati.”​—Mat. 19:6.

9. San den sani di Yesus taki na Markus 10:11, 12 wani taki?

⁹ Kande son sma e aksi densrefi: ’San e gi wan Kresten pasi fu broko trow èn fu trow baka nanga wan tra sma?’ Luku san Yesus taki: „Efu wan man broko trow nanga en wefi èn a trow nanga wan tra uma, dan a du sutadu èn a sondu teige a wefi. Efu wan uma broko trow nanga en masra èn a trow nanga wan tra man, dan a du sutadu” (Mark. 10:11, 12; Luk. 16:18). A de krin taki Yesus ben e lespeki a trowlibi èn  a ben wani taki trawan ben musu du dati tu. Efu wan man ben o broko trow nanga en wefi di no waka gi en (noso efu wan uma ben o broko trow nanga en masra di no waka gi en) èn efu a ben o trow nanga wan tra sma, dan a e du sutadu. Disi de so fu di te wan sma e broko trow nanga en patna sondro taki a patna du hurudu, dan gi Gado den trow ete. A e si den leki „wán skin” ete. Boiti dati, Yesus taki dati efu wan man ben o broko a trow nanga en wefi sondro taki a wefi waka gi en, dan a ben o poti en wefi na ini wan situwâsi pe a kan du sutadu. Fa so? Na ini a ten dati, wan uma di ben broko trow ben kan kisi a firi fu trow baka fu di a ben abi wan sma fanowdu fu sorgu en nanga den pikin fu en. Efu a ben o trow nanga wan tra man, dan dati ben o de sutadu.

10. San na a wan-enkri sani di e gi wan sma pasi fu broko trow èn fu trow baka?

¹⁰ Yesus ben sori taki wán sani nomo e gi wan sma pasi fu broko trow. A taki: „Mi e taigi unu taki efu wan man broko trow nanga en wefi, ma a wefi no du hurudu [porneya, na ini Grikitongo] èn a man trow nanga wan tra uma, dan a du sutadu” (Mat. 19:9). Na a srefi sani a ben taki di a ben hori wan prenspari lezing na tapu wan bergi (Mat. 5:31, 32). Na ala tu okasi Yesus taki fu „hurudu”. Hurudu na te tu sma di no trow nanga makandra abi seks, te wan sma e waka gi en trowpatna, te a e seri en skin, te tu mansma abi seks nanga makandra, te tu umasma abi seks nanga makandra, noso te sma abi seks nanga meti. Efu wan man di trow du hurudu, dan en wefi kan bosroiti fu broko a trow noso fu tan nanga en. Efu a broko a trow, dan Gado no o si den moro leki trowpaar.

11. Fu san ede wan Kresten kan bosroiti fu no broko trow, awinsi en patna du hurudu?

¹¹ Luku taki Yesus no taki dati wan sma musu broko trow efu en patna du hurudu (porneya). Fu eksempre, wan wefi kan bosroiti fu tan nanga en masra aladi en masra du hurudu. Kande fu di a lobi a man ete, meki a wani gi en pardon èn a wani wroko makandra nanga en fu abi wan bun trowlibi baka. Wi kan frustan tu taki efu a  broko a trow èn a no trow baka, dan a kan kisi fu du nanga tra broko-ede. A o man sorgu ensrefi? Fa a o du nanga den seksfiri fu en? A o sari fu di en wawan de? Fa den pikin o firi te a broko trow? A o moro muilek gi en fu kweki den pikin na ini a tru anbegi efu a broko trow? (1 Kor. 7:14) A de krin taki wan sma di wani broko trow fu di en patna waka gi en kan abi seryusu problema.

12, 13. (a) San ben pasa na ini a trowlibi fu Hosea? (b) Fu san ede Hosea teki Gomer baka èn san disi e leri wi fu a trowlibi?

¹² A libi fu a profeiti Hosea kan leri wi furu fu a fasi fa Gado e si a trowlibi. Gado ben taigi Hosea fu teki wan wefi (Gomer) di ben o tron ’wan uma di ben o du hurudu èn di ben o meki pikin nanga wan tra man’. Gomer „kon de nanga bere èn bakaten a kisi wan manpikin gi Hosea” (Hos. 1:2, 3). Bakaten a kisi wan meisje nanga wan boi nanga wan tra man. Aladi Gomer du hurudu moro leki wán leisi, toku Hosea no broko a trow. Te fu kaba Gomer gowe libi Hosea èn a tron wan srafu. Toku Hosea bai en baka (Hos. 3:1, 2). Yehovah ben e gebroiki na eksempre fu Hosea fu sori fa a ben gi den Israelsma pardon furu leisi aladi den ben drai baka gi en fu go anbegi falsi gado. San wi kan leri fu a trowlibi fu Hosea?

¹³ Efu wan Kresten en trowpatna du hurudu, dan a musu teki wan bosroiti. Yesus taki dati so wan Kresten mag broko trow èn a mag trow baka. Ma a kan gi en trowpatna pardon tu. Dati no ben o de wan fowtu sani. Hosea ben teki Gomer baka. Di Gomer ben de baka nanga Hosea, a no ben mag abi seks nanga wan tra man. Fu wan pisi ten, Hosea ’no ben didon’ nanga Gomer (Hos. 3:3). Ma a musu de so taki te fu kaba Hosea ben abi seks baka nanga en wefi. Disi ben e sori fa Gado ben de klariklari fu teki den Israelsma baka èn fu tan si den leki en pipel (Hos. 1:11; 3:3-5). San disi e leri wi fu a trowlibi? Efu wan sma bigin abi seks baka nanga en trowpatna di ben du hurudu, dan dati e sori taki a gi en pardon (1 Kor. 7:3, 5). Efu a du dati, a no kan broko a trow moro. Sobun, den musu meki muiti now fu yepi makandra fu si a trowlibi leki fa Gado e si en.

14. Soleki fa 1 Korentesma 7:10, 11 e sori, dan san kan pasa na ini wan trowlibi?

¹⁴ Ala Kresten musu pruberi fu lespeki a trowlibi, neleki Yesus nanga Yehovah. Ma fu di wi abi sondu, meki son sma no e du dati (Rom. 7:18-23). Dati meki a no musu fruwondru wi taki son Kresten na ini a ten fu den apostel ben abi problema na ini den trowlibi. Paulus ben skrifi taki „wan wefi no musu prati fu en masra”. Ma toku son leisi dati ben e pasa.​—Leisi 1 Korentesma 7:10, 11.

15, 16. (a) San trowpaar musu du awansi den abi problema na ini a trowlibi, èn fu san ede den musu du dati? (b) Fa a de te wan Kresten trow nanga wan sma di no e dini Yehovah?

¹⁵ Paulus no ben e taki fu san ede son wefi ben prati fu den masra. Ma wi sabi taki a no fu di a masra fu den ben du hurudu. Bika efu a man ben du hurudu, a wefi ben mag broko a trow èn trow baka nanga wan tra man. Ma efu wan wefi ben prati fu en masra, dan Paulus ben taki dati „a musu tan sondro masra, noso a musu meki en bun baka nanga en masra”. Sobun, gi Yehovah den tu sma dati ben trow ete. Paulus ben taki dati awinsi sortu problema a trowpaar abi, efu nowan fu den du hurudu, dan den musu du muiti fu meki en bun baka nanga makandra, fu lusu den problema fu den èn fu tan na makandra. Den kan aksi den owruman fu a gemeente tu fu yepi den. Den owruman no o teki sei, ma den kan gi bun rai fu Bijbel.

 ¹⁶ Ma fa a de efu a trowpatna fu wan Kresten no e dini Yehovah? Efu den abi problema na ini a trowlibi, dan a ben o bun fu prati? Soleki fa wi si kaba, dan a wan-enkri sani di e gi wan sma pasi fu broko trow na hurudu. Ma Bijbel no e taki o ten wan sma ben kan prati fu en trowpatna. Paulus ben skrifi: „Efu wan uma abi wan masra di no de na bribi èn efu a masra wani tan nanga en, dan na uma no musu gowe libi en masra” (1 Kor. 7:12, 13). Na ini a ten disi wi musu gi yesi tu na a rai disi.

17, 18. Fu san ede son Kresten tan nanga den trowpatna awinsi den ben abi problema na ini a trowlibi?

¹⁷ Ma a pasa son leisi taki „wan masra di no de na bribi” e sori taki a no „wani tan nanga en” wefi. Kande a e fon en wefi so te, taki en wefi e frede taki a o kisi mankeri noso taki a o lasi en libi. Kande a no wani sorgu gi en wefi nanga den pikin noso kande a e meki en muilek gi en fu gi yesi na Gado noso fu dini En. Na ini den sortu situwâsi dati, awinsi a man e taki dati a „wani tan nanga” en wefi, a wefi kan bosroiti fu prati nanga en masra. Ma tra Kresten di de na ini a srefi sortu situwâsi bosroiti fu tan nanga den masra. Den horidoro èn den pruberi fu meki a trowlibi fu den waka moro bun. Fu san ede den teki so wan bosroiti?

¹⁸ Efu wan trowpaar ben o prati na ini so wan situwâsi, dan a trow no broko. Den ben kan kisi den srefi problema di wi taki fu den kaba. Na apostel Paulus ben kari wan tra reide fu san ede a bun taki wan trowpaar tan na makandra. A skrifi: „A masra di no de na bribi, kon santa fu di en wefi de na bribi, èn a wefi di no de na bribi, kon santa fu di en masra de na bribi. Efu dati no ben de so, dan den pikin fu unu no ben o krin. Ma now den santa” (1 Kor. 7:14). Furu Kresten bosroiti fu tan nanga den patna di no e dini Yehovah, awinsi a no e go na ini a trowlibi. Sonwan fu den ben breiti taki den tan nanga den patna awinsi den ben abi problema, fu di bakaten a patna fu den tron wan Yehovah Kotoigi.​—Leisi 1 Korentesma 7:16; 1 Petr. 3:1, 2.

19. Fu san ede so furu koloku trowpaar de na ini a Kresten gemeente?

¹⁹ Yesus gi rai di abi fu du nanga brokotrow èn na apostel Paulus ben gi rai di abi fu du nanga a prati di trowpatna e prati. Den ala tu ben wani taki anbegiman fu Yehovah musu lespeki a trowlibi. Na heri grontapu wi abi furu trowpaar na ini den gemeente di abi wan koloku trowlibi. Kande furu trowpaar de na ini yu gemeente di de koloku tu. Den brada lobi den wefi èn den sisa e lespeki den masra. Den alamala e sori taki den e lespeki a trowlibi. A e gi wi prisiri taki milyunmilyun masra nanga wefi e sori taki den wortu disi fu Gado tru: „Wan man o gowe libi en papa nanga en mama. A o tai hori na en wefi èn den tu sma dati o tron wán skin.”​—Ef. 5:31, 33.