1, 2. (a) Fu san ede wi kan fruwakti taki wi o kisi broko-ede? (Luku a prenki na a bigin fu na artikel.) (b) San wi o luku na ini na artikel disi?

WI E libi na ini wan ten pe sma abi furu broko-ede. Satan Didibri abi bigi atibron èn a „e waka lontu leki wan lew di e bari, fu di a e suku fu swari wan sma” (1 Petr. 5:8; Openb. 12:17). Dati meki a no musu fruwondru wi taki son leisi srefi wi leki anbegiman fu Gado e broko wi ede nanga sani. Na ini owruten, srefi den anbegiman fu Yehovah, soleki Kownu David, ben e „pina” ten na ten (Ps. 13:2). Memre taki na apostel Paulus ben e ’broko en ede tu nanga ala den gemeente’ (2 Kor. 11:28). Ma san wi kan du te wi abi furu broko-ede?

² Wi lobi hemel Papa yepi den anbegiman fu en na ini owruten èn a o yepi wi tu nanga den broko-ede fu wi. Bijbel e gi wi a deki-ati disi: „Trowe ala un hebi na en tapu, bika a e broko en ede nanga unu” (1 Petr. 5:7). Ma fa wi kan du dati? Meki wi go luku fo sani di kan yepi wi fu no broko wi ede tumusi: (1) Wi musu begi Gado nanga wi heri ati, (2) wi musu leisi Gado Wortu èn wi musu denki dipi fu en, (3) wi musu begi Yehovah fu gi wi en santa yeye, èn (4) wi musu taki nanga wan sma di wi e frutrow. Te wi o taki fu den fo sani disi, dan luku sortuwan fu den kan yepi yu.

3. Fa yu kan „trowe yu hebi na tapu Yehovah”?

³ A fosi sani di wi musu du, na taki wi musu taigi Yehovah san de na tapu wi ati. Kande wan sani e pasa èn yu no sabi san yu musu du, kande yu e frede, noso kande yu e broko yu ede. Te dati de so, dan taigi yu lobi hemel Papa fa yu e firi. A psalm skrifiman David ben begi Yehovah: „Mi Gado, mi e begi yu, poti prakseri na a begi fu mi.” Na ini a srefi psalm dati a e taki tu: „Trowe yu hebi na tapu Yehovah, dan en srefi o horibaka gi yu” (Ps. 55:1, 22). Baka te yu du ala san yu man fu lusu wan problema, dan a moro bun fu begi Gado leki fu broko yu ede nanga a problema. Ma fa begi kan yepi yu fu no broko yu ede tumusi nanga den problema fu yu?​—Ps. 94:18, 19.

4. Fu san ede a prenspari fu begi te wi abi broko-ede?

⁴ Leisi Filipisma 4:6, 7. Te wi e tan begi Yehovah fayafaya komoto fu wi ati, dan Yehovah o arki wi. Fa a o du dati? Yehovah o gi wi wan korostu firi te wi lai broko-ede èn te wi e firi brokosaka. Furu sma ondrofeni a sani disi. Di den ben abi broko-ede, dan Gado yepi den fu kon abi so wan korostu firi taki den srefi no man frustan fa dati kan. Yu kan ondrofeni dati tu. „A freide fu Gado” kan yepi yu fu pasa iniwan tesi di e miti yu. Yehovah e firi gi yu èn dati meki yu kan abi frutrow na ini a pramisi disi: „No luku leki yu e frede, bika mi na yu Gado. Mi o meki yu kon tranga. Mi o yepi yu trutru.”​—Yes. 41:10.

5. Fa Gado Wortu kan gi wi wan korostu firi?

⁵ A di fu tu sani di kan yepi wi fu kisi wan korostu firi na te wi e leisi Bijbeltekst èn te wi e denki dipi fu den. Fu san ede a prenspari fu du dati? Bijbel abi koni rai fu Gado di kan yepi yu fu no du sani di o tyari broko-ede kon gi yu, èn a kan yepi yu tu fu no broko yu ede tumusi nanga sani. Wan tra sani, na taki yu o sabi san yu musu du te yu abi broko-ede. No frigiti taki Bijbel kan yepi wi èn taki a kan gi wi krakti fu di a abi den koni wortu fu wi Mekiman. A bun fu denki dipi fu Gado Wortu awinsi na deiten noso na neti, èn fu luku fa yu kan gebroiki den bun rai na ini. Te yu e du dati, dan yu o kisi furu deki-ati. Yehovah sori krin taki te wi e leisi en Wortu, wi o ’abi deki-ati èn wi no o frede’. Boiti dati, wi ’no o meki sma tapu skreki gi wi èn wi no o beifi’.​—Yos. 1:7-9.

6. Fa den sani di Yesus taki kan de wan trowstu gi yu?

⁶ Na ini Gado Wortu, wi kan leisi fa Yesus ben taki na wan switi fasi nanga sma. Den sani di a ben e taki èn ben e leri sma, ben e gi den arkiman fu en krakti baka. Bun furu sma ben lobi fu kon na en fu di a ben e gi den wan korostu firi, a ben e tranga den swakiwan, èn a ben e trowstu den wan di ben lasi-ati. (Leisi Mateyus 11:28-30.) A sori taki a ben e firi gi den wan di ben abi wan swaki bribi, di ben e sari, èn di ben abi yepi fanowdu (Mark. 6:30-32). Neleki fa Yesus pramisi fu yepi den apostel di ben e teki waka nanga en, na so a kan yepi wi tu na ini a ten disi. Yu no abi fu de makandra nanga Yesus fu man kisi wini fu a yepi fu en. Leki Kownu na hemel, Yesus e tan broko en ede nanga wi. Sobun, te yu e broko yu ede nanga sani, dan a kan sori sari-ati gi yu èn a kan „yepi” yu „na a yoisti ten”. Iya, den sani di Yesus taki kan yepi yu te yu abi broko-ede èn den kan gi yu howpu nanga deki-ati.​—Hebr. 2:17, 18; 4:16.

7. Sortu wini yu e kisi te yu aksi Gado fu gi yu en santa yeye èn a e piki a begi fu yu?

⁷ Yesus pramisi wi taki wi Tata na hemel o gi wi santa yeye te wi e aksi en fu dati (Luk. 11:10-13). Disi na a di fu dri sani di kan yepi wi te wi abi broko-ede. Nanga yepi fu a yeye disi wi kan kweki den moi fasi fu na almakti Gado. (Leisi Galasiasma 5:22, 23; Kol. 3:10.) Te yu e kweki den fasi di a yeye fu Gado e meki wi kisi, dan yu o man feni en moro bun nanga trawan. Sobun, yu o si taki nofo tron yu o man wai pasi gi situwâsi di ben kan gi yu broko-ede. Wi o luku syatu now fa den fasi di a yeye e meki wi kisi kan yepi yu.

8-12. Fa den fasi di a yeye fu Gado e meki wi kisi kan yepi yu?

⁸ „Lobi, prisiri, freide.” Te yu e du muiti fu sori lespeki gi sma, dan nofo tron yu e si taki yu no e mandi so esi, yu no e lasi-ati makriki, èn yu no e broko yu ede tumusi nanga sani. Fa so? We, te yu lobi trawan, te yu e firi gi den, èn te yu e lespeki den, dan yu no du noso taki sani di kan gi yu broko-ede bakaten.​—Rom. 12:10.

⁹ „Langa pasensi, switifasi, bun-ati.” Yu o man abi freide nanga trawan te yu e gi yesi na a rai disi: „Sori switifasi gi makandra èn abi sari-ati nanga makandra. Un musu gi makandra pardon nanga un heri ati” (Ef. 4:32). Te yu e du dati, dan yu o man wai pasi gi situwâsi di kan gi yu problema. Boiti dati, yu o sabi moro bun san fu du te yu e kisi fu du nanga den swakifasi fu trawan.

¹⁰ „Bribi.” Na ini a ten disi, furu sma e broko den ede nanga moni èn nanga den gudu fu den (Odo 18:11). Dati meki wi musu abi a frutrow taki Yehovah lobi wi èn taki a o sorgu gi wi. Dati o yepi wi fu no broko wi ede tumusi nanga den sani dati. Fa so? Yu no o broko yu ede tumusi nanga moni noso gudu te yu ’breiti nanga den sani di yu abi now’, soleki fa na apostel Paulus e taki. Paulus e taki tu: „Bika Gado taki: ’Mi no o libi yu kwetikweti èn noiti mi o gowe fu yu.’ Na so fasi wi kan abi deki-ati èn wi kan taki: ’Yehovah na mi yepiman. Mi no o frede. San libisma kan du mi?’”​—Hebr. 13:5, 6.

¹¹ „Safri-ati, a dwengi di wan sma man dwengi ensrefi.” Prakseri fa a e yepi wi te wi e sori den fasi dati. Na so wi no o du sani di kan meki taki wi kisi broko-ede. Boiti dati, te wi e puru ’takru bita-ati, faya-ati, atibron, babari nanga kosikosi na wi mindri’, dan wi o kisi wini fu dati.​—Ef. 4:31.

¹² A tru taki yu abi sakafasi fanowdu fu man saka yusrefi na ondro „a bigi èn makti Gado” èn fu ’trowe ala yu hebi na en tapu’ (1 Petr. 5:6, 7). Ma te yu leri fu abi sakafasi, dan Gado o feni yu bun èn a o yepi yu (Mika 6:8). Te yu e hori na prakseri san yu man èn san yu no man, dan yu no o broko yu ede tumusi nanga sani, fu di yu o frutrow tapu Gado.

13. San Yesus ben wani taki nanga den wortu: „Noiti un musu broko un ede”?

¹³ Na Mateyus 6:34 (leisi en) wi e leisi a prenspari rai di Yesus e gi: „Noiti un musu broko un ede.” Ma kande yu feni en muilek fu gi yesi na a rai disi. San Yesus ben wani taki nanga den wortu dati? A no ben wani sori wi taki wan futuboi fu Gado no o kisi broko-ede noiti. Wi sabi kaba san David nanga Paulus ben taki fu a tori disi. Ma Yesus ben e yepi den disipel fu en fu frustan taki te den e broko den ede  tumusi nanga sani, dan dati no e lusu problema. Ibri dei abi en eigi problema. Dati meki Kresten no abi fu broko den ede nanga sani di pasa kaba, noso nanga sani di o pasa na ini a ten di e kon. Fa a rai fu Yesus kan yepi yu fu no broko yu ede tumusi?

14. San yu kan du te yu e broko yu ede nanga sani di yu ben du fosi?

¹⁴ Son leisi wan sma e broko en ede, fu di a e prakseri den fowtu di a ben meki fosi. Kande a abi konsensi fonfon fu wan sani di a ben du, awansi na omeni yari pasa. Ten na ten, Kownu David ben e firi leki ’den fowtu fu en ben e sungu en’. A ben taki: „Fu di mi geme na ini mi ati, meki mi bari tranga” (Ps. 38:3, 4, 8, 18). San ben de a moro bun sani di David ben kan du? San a du? A ben abi a frutrow taki Yehovah ben o sori sari-ati gi en èn taki a ben o gi en pardon. Nanga overtoigi a taki: „Koloku fu a sma di kisi pardon, baka di a opo ensrefi teige Gado.”​—Leisi Psalm 32:1-3, 5.

15. (a) Fu san ede yu no musu broko yu ede tumusi nanga problema di yu abi now? (b) Sortu sani yu kan du fu no broko yu ede tumusi? (Luku a faki „ Wan tu sani di kan yepi wi fu no broko wi ede tumusi”.)

¹⁵ Tra leisi baka, a kan taki yu e broko yu ede nanga den problema di yu abi now. Fu eksempre, di David ben skrifi Psalm 55, a ben frede taki sma ben o kiri en (Ps. 55:2-5). Ma aladi a ben e broko en ede nanga a sani dati, toku a no lasi frutrow na ini Yehovah. David ben gwenti begi Yehovah fayafaya fu den problema fu en, ma a ben e frustan tu taki en srefi ben musu du muiti fu lusu a problema fu en (2 Sam. 15:30-34). Yu kan leri wan sani fu David. Na presi taki yu e broko yu ede tumusi nanga sani, dan du san yu man fu lusu a problema èn abi a frutrow taki Yehovah o yepi yu moro fara.

16. Te yu e luku san a nen fu Gado wani taki trutru, dan fa dati kan tranga a bribi fu yu?

¹⁶ Son leisi wan Kresten e broko en ede nanga sani di o pasa na ini a ten di e kon. Ma yu no abi fu broko yu ede te yu no sabi fa sani o waka. Fu san ede? Nofo tron wi e kon si taki sani no ogri so, leki fa wi ben denki. Boiti dati, nowan problema de di Yehovah no man lusu èn fu dati ede yu kan trowe ala yu hebi na en tapu. A nen fu en wani taki „A e meki kon tron” (Eks. 3:14). Te wi e luku san a nen fu Gado wani taki trutru, dan dati e gi wi a dyaranti taki Gado man sorgu taki den sani di a abi na prakseri gi den futuboi fu en e kon tru. Yu kan de seiker taki Gado o blesi den reti-ati futuboi fu en èn taki a o yepi den te den e broko den ede nanga sani di den ben du fosi, nanga problema di den abi now, èn nanga sani di kan miti den na ini a ten di e kon.

17, 18. Te yu e fruteri trawan fa yu e firi, dan fa dati kan yepi yu fu no broko yu ede moro?

¹⁷ A di fu fo sani di kan yepi yu fu no  broko yu ede tumusi, na te yu e taki nanga wan sma di yu e frutrow. Kande yu trowpatna, wan bun mati, noso wan gemeente owruman kan yepi yu fu si sani na wan yoisti fasi. Bijbel e taki: „Tumusi furu broko-ede o meki wan sma lasi-ati, ma te sma e taki switi nanga en, dan a e firi prisiri” (Odo 12:25). Te yu e fruteri trawan krin fa yu e firi, dan dati kan yepi yu fu si sani na a yoisti fasi èn yu o sabi moro bun san fu du. Bijbel e taki: „Te sma no e taki krin nanga makandra, ala sani e bruya, ma te furu raiman de, sani e waka bun.”​—Odo 15:22.

¹⁸ Yehovah e gebroiki den gemeente konmakandra tu fu yepi Kresten di abi broko-ede. Drape yu kan taki nanga Kresten brada nanga sisa di e broko den ede nanga yu èn di wani gi makandra deki-ati (Hebr. 10:24, 25). Te wi e „gi makandra deki-ati” na a fasi dati, dan dati o tranga a bribi fu wi èn wi o sabi moro bun san fu du te wi e broko wi ede nanga sani.​—Rom. 1:12.

19. Fu san ede yu kan abi a frutrow dati a matifasi di yu abi nanga Gado o tranga yu?

¹⁹ Luku fa wan gemeente owruman na ini Kanada kon si o prenspari a de fu trowe en hebi na Yehovah tapu. A ben de wan skoromeester èn a wroko fu en ben e gi en furu broko-ede. Boiti dati, a ben abi wan siki di ben e meki taki son leisi a ben e bruya. San yepi a brada disi? A e taki: „A moro prenspari sani na taki mi e du tranga muiti fu abi wan bun matifasi nanga Yehovah fu di mi si taki na dati e yepi mi te mi e broko mi ede nanga sani. Te problema e miti wi, dan a prenspari srefisrefi taki wi kisi yepi fu mati èn fu wi Kresten brada nanga sisa. Mi e fruteri mi wefi krin fa mi e firi. Den tra owruman fu mi gemeente èn a kring-opziener yepi mi bun furu fu kon si sani na a yoisti fasi. Mi go na datra, mi leri gebroiki mi ten na wan moro bun fasi, èn mi teki ten fu rostu èn fu oefen mi skin. Safrisafri mi no ben e broko mi ede so furu moro nanga sani. Te sani de di mi no man kenki, dan mi e libi dati gi Yehovah.”

20. (a) Fa wi kan trowe wi hebi na Gado tapu? (b) San wi o luku na ini a tra artikel?

²⁰ Na ini na artikel disi, wi si fu san ede a prenspari taki wi e begi nanga wi heri ati, taki wi e leisi a Wortu fu Gado, èn taki wi e denki dipi fu den sani di wi e leisi. Na so wi e trowe wi hebi na Gado tapu. Wi si tu fu san ede a prenspari fu kweki den fasi di a yeye e meki wi kisi, fu taki nanga wan sma di wi e frutrow, èn fu abi demakandra nanga Kresten brada nanga sisa di e gi wi deki-ati. Na ini a tra artikel wi o taki fu den blesi di Yehovah o gi wi na ini a ten di e kon.​—Hebr. 11:6.