1. Fu san ede Yehovah meki sma?

WAN heri pisi ten Yehovah ben de en wawan. Ma disi no ben meki a firi sari. Yehovah no abi fu de nanga sma fu de koloku. Toku Gado ben wani gi tra sma libi tu èn a ben wani taki den de koloku. Lobi meki taki Yehovah bigin meki sani.​—Ps. 36:9; 1 Yoh. 4:19.

2. Fa Yesus nanga den engel ben feni den sani di Yehovah meki?

² A fosi sma di Yehovah meki, na en Manpikin Yesus. Baka dati a gebroiki en Manpikin fu „meki ala tra sani”, sosrefi milyunmilyun engel (Kol. 1:16). Yesus ben breiti taki a ben kan wroko makandra nanga en Papa (Odo 8:30). Den engel ben prisiri tu. Den si fa Yehovah nanga Yesus, en tumusi bun wrokoman, meki hemel nanga grontapu. Fa den engel ben feni den sani di Yehovah meki? Di Yehovah ben kaba meki grontapu, den engel „prèise en nanga wan tranga sten”. A no de fu taki dati den ben tan prèise en di den si ala den tra sani di a meki, spesrutu den libisma (Yob 38:7; Odo 8:31). Ala den sani di Yehovah meki e sori taki a abi lobi èn taki a koni.​—Ps. 104:24; Rom. 1:20.

3. Soleki fa 1 Korentesma 15:21, 22 e sori, dan san wi man kisi fu di Yesus dede gi wi?

³ Yehovah ben wani taki libisma ben musu libi fu têgo na tapu a moi grontapu di a ben meki gi den. Ma di Adam nanga Eva trangayesi den lobi-ati Papa, den tyari sondu  nanga dede gi ala den bakapikin fu den (Rom. 5:12). San Yehovah du? Wantewante a taki fa a ben o frulusu libisma (Gen. 3:15). Yehovah ben o seni en Manpikin fu kon dede gi wi, so taki wi kan kon fri fu sondu nanga dede. Na so a ben o man gi têgo libi na ala den sma di ben o bosroiti fu dini en.​—Yoh. 3:16; Rom. 6:23; leisi 1 Korentesma 15:21, 22.

4. Sortu aksi wi o luku na ini na artikel disi?

⁴ Yehovah pramisi taki a o gi den dedewan wan opobaka. Ma disi e meki taki wan tu aksi opo kon. Fu eksempre, fa a o de te sma o kisi wan opobaka? Wi o sabi den sma fu wi te den kon na libi baka? Fa na opobaka o gi wi prisiri? Èn san na opobaka howpu e leri wi fu a lobi, a koni nanga a pasensi fu Yehovah? Wi o poti prakseri na ala den aksi disi.

5. Fu san ede wi kan fruwakti taki sani no o go bruyabruya te sma o kisi wan opobaka?

⁵ Te Yehovah o meki en Manpikin gi milyunmilyun sma wan opobaka, dan wi no e fruwakti taki ala sma o kisi libi baka na a srefi ten. Fu san ede? Fu di efu wantronso bun furu sma o de na grontapu, dan dati o tyari bruya kon. Èn noiti Yehovah e du sani bruyabruya. A sabi taki efu freide musu de, dan sani musu orga bun (1 Kor. 14:33). Di Yehovah nanga Yesus ben sreka a grontapu gi libisma, den no meki ala sani tapu wán dei. Disi e sori taki Yehovah koni èn taki a abi pasensi. Yesus o sori den srefi fasi disi na ini a Dusun Yari Tiri fu en. Makandra nanga den sma di o pasa Armagedon, a o sreka a grontapu gi den sma di o kisi wan opobaka.

6. Te wi e luku san Tori fu den apostel 24:15 e taki, dan suma o kisi wan opobaka?

 ⁶ San moro prenspari, na taki den sma di o pasa Armagedon o abi fu leri den sma di o kisi wan opobaka san na Gado Kownukondre èn fa Gado wani taki den musu libi. Fu san ede? Fu di furu „sma di no du san reti” o kisi wan opobaka. (Leisi Tori fu den apostel 24:15.) Den o abi fu tyari furu kenki kon fu kan kisi wini fu Krestes en lusu-paiman èn fu kisi têgo libi. Prakseri fa a o de fu gi leri na milyunmilyun sma di no sabi noti fu Yehovah. Disi o de wan bigi wroko. Wi o studeri Bijbel nanga ibri sma aparti, leki fa wi e du now? Den o poti den sma disi na ini gemeente fu kisi leri, so taki den kan yepi den tra sma di musu kisi wan opobaka ete? Wi no sabi. Ma san wi sabi na taki na a kaba fu a Dusun Yari Tiri fu Krestes, „heri grontapu o furu nanga a sabi fu Yehovah” (Yes. 11:9). Na ini den dusun yari dati wi o abi furu wroko fu du, ma a o gi wi prisiri tu!

7. Fu san ede a pipel fu Gado o abi pasensi nanga den sma di o kisi wan opobaka?

⁷ Na ini a Dusun Yari Tiri fu Krestes, ala den anbegiman fu Yehovah o abi fu tan wroko na densrefi fu kan plisi en. Dati meki den o man abi pasensi nanga den sma di o kisi wan opobaka. Den o man yepi den fu feti nanga den sondu firi fu den èn fu libi soleki fa Yehovah wani (1 Petr. 3:8). Den sma di o kisi wan opobaka o si taki a pipel fu Yehovah abi sakafasi èn taki den srefi e „tan meki muiti fu kisi frulusu” (Fil. 2:12). Disi o meki taki den o wani dini Yehovah makandra nanga a pipel fu en.

8. Fu san ede wi kan fruwakti taki wi o sabi den famiri nanga mati fu wi di o kisi wan opobaka?

⁸ Difrenti reide de fu san ede wi kan bribi taki wi o sabi den lobiwan fu wi di o kisi wan opobaka. Te wi e luku den Bijbel tori fu sma di kisi wan opobaka, dan wi kan fruwakti taki den sma di o kisi wan opobaka na ini a ten di e kon o abi a srefi fesi di den ben abi syatu fosi den dede, den o taki leki fa den ben gwenti taki èn den o denki na a srefi fasi ete. Memre taki Yesus ben taki dati te wan sma dede, dan a de neleki a e sribi. Èn te wan sma e kisi wan opobaka, dan a de neleki a e wiki (Mat. 9:18, 24; Yoh. 11:11-13). Te yu wiki wan sma di ben sribi, dan en fesi èn a fasi fa a e taki no kenki. Den e memre ala sani tu. Prakseri na eksempre fu Lasarus. A ben dede fo dei èn dati meki en skin ben bigin pori kaba. Toku di Yesus gi en wan opobaka, den sisa fu en ben sabi taki na en èn Lasarus ben sabi den tu.​—Yoh. 11:38-44; 12:1, 2.

9. Fu san ede den sma di o kisi wan opobaka o abi wan sondu skin ete?

⁹ Yehovah pramisi taki na ini a paradijs nowan sma o taki: „Mi siki” (Yes. 33:24; Rom. 6:7). Sobun, den sma di o kisi wan opobaka o de gosontu. Ma den o abi sondu ete. Efu den sma disi no ben o abi sondu moro, dan den ben o tyari densrefi heri tra fasi èn den famiri nanga mati fu den no ben o sabi den moro. A sori leki na ini a Dusun Yari Tiri fu Krestes ala libisma o kon fri fu sondu safrisafri. Na a kaba fu den dusun yari dati Yesus o gi a Kownukondre baka na en Papa. Na a  ten dati a Kownukondre du ala sani kaba di Yehovah ben wani èn libisma no o abi sondu moro.​—1 Kor. 15:24-28; Openb. 20:1-3.

10. Fa yu o firi te den sma fu yu o kisi wan opobaka?

¹⁰ Prakseri fa a o de te yu o si den lobiwan fu yu baka. Yu o lafu noso yu o krei fu prisiri? Yu o breiti so te taki yu o singi gi Yehovah? Wi kan de seiker taki te wi kisi a moi kado disi, wi o lobi wi Papa nanga en Manpikin moro.

11. Te wi luku san Yesus taki na ini Yohanes 5:28, 29, dan san o pasa nanga den sma di o gi yesi na Gado?

¹¹ Prakseri fa den sma di o kisi wan opobaka o prisiri te den o kenki den maniri fu den fu man gi yesi na Gado. Den wan di tyari kenki kon o man libi fu têgo na ini a paradijs. Ma den wan di no wani saka densrefi na ondro Gado no o kisi na okasi fu pori a freide na ini a paradijs.​—Yes. 65:20; leisi Yohanes 5:28, 29.

12. Fa Yehovah o blesi ala sma na grontapu?

¹² Te Gado Kownukondre o tiri, dan ala den anbegiman fu Gado o ondrofeni san skrifi na Odo 10:22. Drape skrifi: „A blesi fu Yehovah, na dati e meki sma kon gudu èn a no e meki den firi sari.” A santa yeye fu Yehovah o yepi en pipel fu kon kisi den srefi fasi fu Yesus èn fu kon fri fu sondu (Yoh. 13:15-17; Ef. 4:23, 24). Ala dei wi o kon moro gosontu èn wi o tron moro bun sma. A libi o switi na a ten dati (Yob 33:25). Ma sortu wini wi e kisi te wi e meki ten fu denki dipi fu na opobaka?

13. Fa Psalm 139:1-4 e sori o bun Yehovah sabi wi èn fa wi o si disi te a o gi sma wan opobaka?

¹³ Soleki fa wi si kaba, dan den sma di o kisi wan opobaka o man memre a libi fu den èn den o abi den srefi fasi ete. San disi e leri wi? A e sori taki Yehovah lobi wi so te taki a e memre ala sani di wi e denki, di wi e firi, di wi e taki èn di wi e du. Dati meki te a o gi sma wan opobaka, a o makelek gi en fu meki den memre ala sani di den ben du fosi den dede èn a o meki den abi den srefi fasi baka. Kownu David ben sabi taki Yehovah sabi ala sani fu wi. (Leisi Psalm 139:1-4.) Te wi e prakseri o bun Yehovah sabi wi, dan fa dati kan gi wi deki-ati?

14. Te wi e prakseri taki Yehovah sabi ala sani fu wi, dan fa dati musu meki wi firi?

¹⁴ Awinsi Yehovah sabi ala sani fu wi, toku wi no abi fu frede taki a o luku soso den swakifasi fu wi. Fu san ede? Yehovah lobi wi. Ibriwan fu wi warti gi en. A e memre ala sani di pasa nanga wi èn di meki taki wi de soleki fa wi de now. Dati e trowstu wi! Noiti wi musu denki taki wi wawan de. Ibri miniti fu ibri dei Yehovah de leti na wi sei èn a e luku fa a kan yepi wi.​—2 Kron. 16:9.

15. Fa na opobaka howpu e sori taki Yehovah koni srefisrefi?

¹⁵ Te sma frede fu dede, dan den sma di de ondro a makti fu Satan kan gebroiki dati fu meki den tori den mati fu den noso fu du sani di den sabi taki den no bun. Ma den no kan tapu skreki gi wi. Wi sabi taki efu den feanti fu  wi kiri wi, Yehovah kan gi wi libi baka (Openb. 2:10). Wi sabi taki nowan sani di den e du kan pori wi matifasi nanga Yehovah (Rom. 8:35-39). Na opobaka howpu e sori taki Yehovah koni srefisrefi! Fu di wi abi a howpu disi, meki wi no e frede te den bakaman fu Satan e taki dati den o kiri wi. A howpu disi e gi wi a deki-ati fu tan gi yesi na Yehovah.

16. San yu musu aksi yusrefi èn fa den piki tapu den aksi dati e sori o furu yu e frutrow tapu Yehovah?

¹⁶ Efu feanti fu Yehovah e taki dati den o kiri yu, yu e frutrow taki Yehovah o gi yu wan opobaka? Fa yu kan sabi efu yu o frutrow tapu Yehovah te so wan sani miti yu? Aksi yusrefi: ’Den pikin bosroiti di mi e teki ala dei e sori taki mi e frutrow tapu Yehovah?’ (Luk. 16:10) Wi kan aksi wisrefi tu: ’A fasi fa mi e libi e sori taki mi e bribi taki Yehovah o gi mi san mi abi fanowdu te mi e poti a Kownukondre na a fosi presi?’ (Mat. 6:31-33) Efu a piki tapu den aksi disi na „iya”, dan disi e sori taki yu e frutrow tapu Yehovah èn taki yu de srekasreka gi iniwan tesi di yu o kisi.​—Odo 3:5, 6.

17. (a) Fa wi kan sori taki wi de nanga tangi taki Yehovah abi pasensi? (b) Fa wi kan sori taki wi de nanga tangi gi a pasensi fu Yehovah?

¹⁷ Yehovah bosroiti kaba tapu sortu dei èn sortu yuru a o pori na ogri grontapu disi (Mat. 24:36). A no o lasi pasensi èn a no o du noti fosi a dei dati doro. A e angri fu wiki den dedewan, ma a abi pasensi (Yob 14:14, 15). A e wakti a yoisti ten fu gi den libi baka (Yoh. 5:28). Wi abi bun reide fu de nanga tangi gi a pasensi fu Yehovah. Prakseri disi: Fu di Yehovah abi pasensi, meki wi nanga furu tra sma e „kisi na okasi fu sori berow” (2 Petr. 3:9). Yehovah wani taki so furu sma leki a kan kisi têgo libi. Sobun, meki wi sori taki wi de nanga tangi taki Yehovah abi pasensi. Fa wi kan du dati? Wi musu du ala san wi man fu suku sma di abi „a yoisti denki fu man kisi têgo libi”. Wi musu yepi den fu lobi Yehovah èn fu dini en (Tori 13:48). Dan den o kisi wini fu a pasensi fu Yehovah neleki wi.

18. Fu san ede wi musu abi pasensi nanga tra sma?

¹⁸ Na a ten fu den dusun yari, Yehovah  o wakti nanga pasensi teleki wi kon fri fu sondu. Solanga den dusun yari no pasa, Yehovah o tan gi wi pardon fu den sondu fu wi. Sobun, neleki Yehovah wi musu abi pasensi nanga tra sma èn wi musu si den bun fasi fu den. Luku na eksempre fu wan sisa. A masra fu en e kisi momenti pe a e broko en ede pasa marki nanga son sani. A siki disi meki taki a masra fu en no ben e go moro na den konmakandra. A sisa e taki: „Disi no ben makelek gi mi. A libi fu wi ben kenki èn wi no ben man du den sani moro di wi ben wani du.” Toku a sisa disi tan sori lobi gi en masra èn a ben abi pasensi nanga en. A ben frutrow tapu Yehovah èn ala ten a tan yepi en masra. Neleki Yehovah a no ben e tan prakseri den problema, ma a ben e poti prakseri na den bun sani fu en masra. A sisa e taki: „Mi masra abi moi fasi èn a e du ala san a man fu kon betre baka safrisafri.” A prenspari srefisrefi taki wi abi pasensi nanga den sma fu wi osofamiri èn fu wi gemeente di abi problema!

19. San wi musu du?

¹⁹ Yesus nanga den engel ben breiti di Gado meki grontapu. Ma prakseri fa den o prisiri te grontapu kon furu nanga sma di no abi sondu, di lobi Yehovah èn di e dini en. Prakseri fa den wan di o go na hemel fu tiri makandra nanga Krestes o prisiri te den e si fa libisma e kisi wini fu a wroko fu den (Openb. 4:4, 9-11; 5:9, 10). Prakseri o switi a o de te wi no o krei moro fu di wi abi pen, fu di wi siki, fu di wi e sari noso fu di wan sma fu wi dede (Openb. 21:4). Teleki a ten dati doro wi musu tan teki na eksempre fu wi Papa di lobi wi, di koni èn di abi pasensi. Efu yu e du dati, dan yu o tan prisiri awinsi sortu tesi yu e kisi (Yak. 1:2-4). Wi de nanga tangi trutru taki Yehovah pramisi taki a o ’gi sma wan opobaka’!​—Tori 24:15.