Yu ben sabi a sani disi?
Fu san ede trakondre sma ben de na ini a legre fu Kownu David?
NA INI a legre fu Kownu David, yu ben abi man di no ben de Israelsma. Wan tu fu den man dati ben de na Amonsma Seilek, a Hètsma Uria, nanga Yitma di ben de fu Moab a (1 Kron. 11:39, 41, 46). Ma yu ben abi sosrefi ’Kreitisma, Pleitisma, nanga Gatsma’ na ini a legre fu David (2 Sam. 15:18). Soleki fa a sori, dan den Kreitisma nanga den Pleitisma ben de famiri fu den Filisteasma (Esek. 25:16). Den Gatsma ben e kmoto fu a Filistea foto Gat.—Yos. 13:2, 3; 1 Sam. 6:17, 18.
Fu san ede David teki den sortu man disi na ini a legre fu en? A ben de seiker taki den ben e horbaka gi en, èn san moro prenspari, na taki den ben e tai hori na Yehovah. Fu eksempre, wan Bijbel wortubuku e taki disi fu den Kreitisma nanga den Pleitisma: „Di David ben de kownu, den tan horbaka gi David na ini den moro muilek pisi ten fu en libi.” Fa den du dati? Di „den man fu Israel” gwe libi Kownu David fu go waka baka „wan wisiwasi man . . . di ben nen Seiba”, dan den Kreitisma nanga den Pleitisma tan horbaka gi David èn den yepi en fu feti nanga Seiba di ben opo ensrefi teige en (2 Sam. 20:1, 2, 7). Na wan tra okasi, Kownu David en manpkin Adonia pruberi fu tron kownu na presi fu Salomo. Ma den Kreitisma nanga den Pleitisma tan getrow na David èn den yepi en fu poti Salomo leki kownu, fu di na en Yehovah ben teki fu tron kownu baka David.—1 Kow. 1:24-27, 38, 39.
Ete wan trakondre sma di ben e horbaka fayafaya gi David, na a Gatsma Itai. A man disi nanga den 600 fetman fu en ben e horbaka gi Kownu David di en manpkin Absalom opo ensrefi teige en. Absalom pruberi fu kori den man fu Israel fu poti en leki Kownu na presi fu David. David taigi Itai taki a no ben abi fu feti gi en fu di a ben de wan trakondre sma. Ma Itai taki: „Mi lespeki Kownu, neleki fa a de seiker taki Yehovah nanga yu de na libi, na so a de seiker taki mi o tan nanga yu mi heri libi langa, te na dede srefi!”—2 Sam. 15:6, 18-21.
Itai ben e horbaka gi David, a kownu di Yehovah ben salfu
Aladi den Kreitisma, den Pleitisma, nanga den Gatsma ben de trakondre sma, tòg den ben abi bigi lespeki gi a tru Gado Yehovah, èn gi David, a salfuwan fu Yehovah. A musu fu de so taki David ben de nanga tangi taki den getrow man disi ben e horbaka gi en.
a Soleki fa a wet fu Gado e sori na Deuteronomium 23:3-6, dan Amonsma nanga Moabsma no ben mag kon na ini a gemeente fu Israel. Ma disi no ben wani taki dati den trakondre sma disi no ben mag moksi nanga Gado pipel noso taki den no ben mag tan na den mindri. San a wet ben e sori, na taki den sma dati no ben mag tron Israelsma. Luku Inzicht in de Schrift, Deel 1, blz. 109.
