Fu san ede Yesus taki a sani di David skrifi na Psalm 22:1?

Wan fu den lasti sani di Yesus taki fosi a dede, na den wortu di skrifi na Mateyus 27:46 nanga Markus 15:34: „Mi Gado, mi Gado, fu san ede yu gowe libi mi?” Di Yesus taki dati, dan a meki den wortu di David skrifi na Psalm 22:1 kon tru. A no ben o bun fu denki taki Yesus ben taki den wortu disi fu di a ben e sari fu san ben miti en, noso fu di a ben lasi bribi na ini Gado fu wan pisi ten. Yesus ben frustan heri bun fu san ede a ben musu dede èn a ben de klariklari fu dede (Mat. 16:21; 20:28). A ben sabi tu taki na a ten di a ben o dede, Yehovah no ben o kibri en gi nowan sani moro. A ben o abi fu puru iniwan „skotu lontu en” (Yob 1: 10). Yehovah du disi fu meki Yesus sori taki a ben o tan gi yesi na en te na dede, awinsi fa a ben hebi gi en.​—Mark. 14:35, 36.

Sobun, fu san ede Yesus taki den wortu fu a Psalm disi? Aladi wi no sabi seiker, toku wi o luku wan tu reide fu san ede Yesus ben kan taki a san dati. *

Kande Yesus taki den wortu disi, fu sori taki Yehovah no ben o kibri en gi dede. Yesus ben o abi fu pai a lusu-paiman sondro taki Yehovah yepi en. A ben o abi fu du dati so taki „a ben kan dede gi ala sma”.​—Hebr. 2:9.

A kan tu taki Yesus gebroiki wan tu wortu fu a psalm dati fu meki sma poti prakseri na  a heri psalm. Na a ten dati den Dyu ben gwenti leri furu fu den psalm na ede. Te den ben e yere wán vers fu wan psalm, dan nofo tron den ben e prakseri a heri psalm. Efu na dati Yesus ben wani, dan a ben o yepi den Dyu bakaman fu en fu prakseri den someni profeititori na ini a psalm disi di abi fu du nanga sani di pasa na a ten di a dede (Ps. 22:7, 8, 15, 16, 18, 24). Den ben o memre tu taki den lasti vers fu a psalm disi ben abi fu du nanga Yehovah di o tiri leki Kownu te na den moro farawe presi fu grontapu.​—Ps. 22:27-31.

Kande Yesus taki den wortu disi fu di a ben wani sori taki a no ben frudini a strafu di a ben kisi. Fosi den kiri Yesus, a Grankrutu fu den Dyu kari wan krutu pe den krutu en taki a ben taki ogri fu Gado (Mat. 26:65, 66). A krutu dati ben e hori esi-esi, latilati neti, sondro fu hori densrefi na den wet fu a kondre (Mat. 26:59; Mark. 14:56-59). Sobun, di Yesus taki den wortu fu Psalm 22:1, dan a ben de neleki a ben taki: ’Mi Gado, mi Gado, fu san ede yu gowe libi mi, aladi mi no du nowan ogri?’ Kande Yesus ben taki a san disi fu sori taki a no ben frudini a strafu di a ben kisi.

A kan tu taki Yesus ben wani memre trawan taki aladi Gado gi pasi taki David pina, toku dati no ben wani taki dati Yehovah no ben feni en bun moro. A sani di David ben aksi no ben e sori taki a bribi fu en ben kon swaki. Baka di a poti na aksi, dan a taki dati a ben e bribi taki Yehovah ben o man frulusu en èn dati meki Yehovah tan blesi en (Ps. 22:23, 24, 27). Na so a de tu taki, aladi Yesus „a Manpikin fu David” ben pina na a pinapostu, toku dati no ben wan taki dati Yehovah no ben feni en bun moro.​—Mat. 21:9.

Kande Yesus taki den wortu disi fu di a ben sari srefisrefi taki en Papa ben abi fu libi en, soso fu gi en na okasi fu sori taki a ben o tan gi yesi na en Papa awinsi san pasa. Noiti Yehovah ben wani taki en Manpikin pina èn dede. A sani dati kon de fanowdu baka di Adam nanga Eva trangayesi Gado. Yesus no ben du nowan ogri, ma a ben musu pina èn dede fu sori taki Satan ben de wan leiman, èn fu pai a lusu-paiman di ben o bai baka san Adam ben lasi (Mark. 8:31; 1 Petr. 2:21-24). Disi ben kan pasa soso te Yehovah ben o tapu fu kibri Yesus fu wan pisi ten. Ma disi ben o de a fosi leisi di Yehovah ben o du dati.

Kande Yesus ben pruberi fu yepi den bakaman fu en fu kon frustan fu san ede Yehovah ben gi pasi taki a dede na a fasi disi. * Yesus ben sabi taki furu sma ben o naki futu te a ben o dede leki ogriman na a pinapostu (1 Kor. 1:23). Efu den bakaman fu en ben frustan fu san ede a ben musu dede, dan den no ben o si en leki wan ogriman, ma leki wan Frulusuman.​—Gal. 3:13, 14.

Awinsi sortu reide Yesus ben abi fu taki den wortu di skrifi na Psalm 22:1, a de krin taki a ben frustan taki ala den sani disi ben e pasa nanga en fu di dati ben de a wani fu Yehovah. Syatu baka di Yesus taki den wortu fu a psalm disi, a taki: „A kaba!” (Yoh. 19:30; Luk. 22:37) Iya, di Yehovah tapu fu kibri Yesus na a momenti dati, dan Yesus kisi na okasi fu du ala san a ben kon du na grontapu. Boiti dati, a ben man du „ala san a wèt di Gado ben gi Moses, den leri fu den Profeiti, nanga den Psalm” ben taki fu en.​—Luk. 24:44.