„Ibri bun presenti nanga ibri kado di bun dorodoro e kon fu tapusei, bika a e saka kon fu a Tata fu den leti na hemel” (Yakobus 1:17). A tekst disi e sori taki wi hemel Tata, Yehovah Gado e gi libisma furu bun sani. Ma fu ala den kado di Gado gi libisma, wan de di prenspari moro ala trawan. Sortuwan na dati? Luku san Yesus e taki na Yohanes 3:16, wan tekst di furu sma sabi: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”

Gado gi wi en wan-enkri Manpikin. Dati na a moro bigi kado di iniwan fu wi ben kan kisi. Fu san ede? Fu di a kado disi e meki taki wi kan kon fri fu sondu, owrudei nanga dede (Psalm 51:5; Yohanes 8:34). Awinsi o furu muiti wi e du, wisrefi no ben o man kon fri fu sondu. Ma fu di Gado lobi wi so te, meki a seti sani fu meki wi kon fri. Yehovah Gado gi en wan-enkri Manpikin Yesus Krestes leki wan lusu-paiman. Na so a gi libisma na okasi baka fu libi fu têgo. Ma san na a lusu-paiman? Fu san ede a ben de fanowdu? Fa wi kan kisi wini fu en?

Wan lusu-paiman na wan paiman di wan sma e pai fu bai wan sani baka di ben lasi, noso fu bai wan sma kon fri. Bijbel e sori taki di Gado meki wi fosi papa nanga mama, Adam nanga Eva, den no ben abi sondu. Den nanga den pikin di den ben o kisi bakaten ben o libi fu têgo na ini wan paradijs na grontapu (Genesis 1:26-28). A sari taki den lasi a grani dati fu di den trangayesi Gado èn den tron sondusma. San ben de a bakapisi? Bijbel e taki: „Wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu” (Romesma 5:12). Na presi taki Adam gi den pikin fu en libi, a meki taki den tron sondusma èn dati meki den e dede.

Wan lusu-paiman musu abi a srefi waarde fu a sani di ben lasi. Di Adam trangayesi Gado fu espresi, a sondu, èn dati meki a lasi a libi di Gado ben gi en, wan libi sondro sondu. Soleki fa Bijbel e sori, dan a sani disi meki taki den bakapikin fu Adam tron srafu fu sondu nanga dede. Dati meki na wan sma di no ben abi sondu, Yesus Krestes, ben kan gi en libi fu meki wi kon fri fu sondu nanga dede (Romesma 5:19; Efeisesma 1:7). Na fu di Gado pai a lusu-paiman disi, meki libisma abi a howpu baka fu kisi a libi di Adam nanga Eva lasi. Dati na têgo libi na ini wan paradijs na grontapu.​—Openbaring 21:3-5.

Fu di a lusu-paiman e meki taki wi kan libi fu têgo baka, meki disi na a moro bigi kado di Gado gi libisma. Fu man gi wi a ’kado disi di bun dorodoro’ Yehovah poti prakseri na den fo sani di kari na ini na artikel na fesi. Te wi o luku den sani disi, dan dati o yepi wi fu abi furu warderi gi a moro bun kado di Gado gi wi.

A gi wi wan sani di wi wani trutru. Libisma abi a firi fu libi (Preikiman 3:11). Wisrefi no man  du noti fu tan na libi, ma a lusu-paiman meki taki wi kan libi fu têgo. Bijbel e taki: „A pai fu sondu na dede, ma a kado di Gado e gi sma na têgo libi nanga yepi fu Krestes Yesus wi Masra.”​—Romesma 6:23.

A gi wi wan sani di wi abi fanowdu. Libisma no ben o man pai a lusu-paiman. Bijbel e taki: „A paiman di musu pai fu bai wan sma baka, hei so te, taki noiti wan libisma o man pai en” (Psalm 49:8). Dati meki na Gado wawan ben kan yepi wi fu kon fri fu sondu nanga dede. „Nanga yepi fu a lusu-paiman di Krestes Yesus pai èn di e tyari frulusu kon”, Gado gi wi san wi ben abi fanowdu.​—Romesma 3:23, 24.

A gi wi en na a yoisti ten. Bijbel e taki: „Krestes dede gi wi, aladi wi ben de sondari ete” (Romesma 5:8). Efu Gado gi wi a lusu-paiman „aladi wi ben de sondari ete”, dan wi kan de seiker taki a lobi wi trutru. Disi meki taki wi abi wan moi howpu tu, aladi wi e firi den bakapisi fu sondu ete.

Fu san ede a gi wi a kado? Bijbel e sori fu san ede Gado gi wi en Manpikin leki wan lusu-paiman: „Disi na a fasi fa Gado sori taki a lobi wi: Gado ben seni en wan-enkri Manpikin kon na grontapu, so taki a kan yepi wi fu kisi libi. A lobi disi no wani taki dati na wi ben lobi Gado, ma taki en ben lobi wi.”​—1 Yohanes 4:9, 10.

Fa yu kan sori taki yu abi furu warderi gi a moro bigi kado di Gado gi wi? No frigiti taki na ini Yohanes 3:16 Yesus e taki dati na soso den sma di „e bribi” na ini en o kisi frulusu. Bijbel e sori taki bribi na „te wan sma e fruwakti taki den sani di a e howpu, o kon tru nomonomo” (Hebrewsma 11:1). Fu man abi a bribi dati, wi musu kon sabi san Bijbel e leri. Dati meki wi e gi yu deki-ati fu kon leri sabi Yehovah Gado, a sma di gi yu a kado disi di „bun dorodoro”. Yu musu kon sabi tu san yu musu du fu man kisi a têgo libi di a lusu-paiman fu Yesus e gi sma.

Yu kan leri ala den sani disi te yu e studeri den Bijbel tori di de tapu www.jw.org/srn. Yehovah Kotoigi o breiti fu yepi yu. Wi de seiker taki te yu leri sabi sortu wini a kado disi e tyari kon, yu o ’taki Gado tangi taki a frulusu yu nanga yepi fu wi Masra Yesus Krestes!’​—Romesma 7:25.