Furu sma abi wan siki di abi krakti tapu den frustan
„Ala ten mi e frede, srefi te mi wawan sidon na ini wan kamra.”
„Te mi e firi heri bun, dan mi e broko mi ede fu di mi sabi taki a fasi fa mi e firi kan kenki wantronso. A wan momenti mi e prisiri srefisrefi, ma a tra momenti mi e firi brokosaka.”
„Mi e pruberi fu focus tapu den sani di mi musu du tide. Ma son leisi mi e bigin broko mi ede wantronso nanga wan lo tra sani.”
Den sma di taki den sani disi e feti nanga siki di abi krakti tapu den frustan. Oiti yu ben firi so? Yu abi wan famiri noso wan mati di abi a problema disi?
No denki taki na yu wawan e firi so. Furu sma ini a ten disi e feti nanga wan siki di abi krakti tapu den frustan, noso den abi wan lobiwan di e feti nanga so wan siki.
A de krin taki wi e libi na ini „muilek ten di tranga fu pasa” èn dati meki sma e pina na ala sortu fasi (2 Timoteyus 3:1). Ondrosukuman kon si taki wán fu ibri aiti sma na heri grontapu abi wan siki di abi krakti tapu den frustan. A COVID-19 siki di panya na heri grontapu meki taki na ini a yari 2020 a nomru fu sma di abi wan angststoornis, depressie nanga den sortu siki disi kren nanga 78 milyun. a
A bun fu sabi taki furu sma ini a ten disi abi wan angststoornis nanga depressie. Ma san moro prenspari na fu sabi san yu nanga den lobiwan fu yu kan du fu firi moro bun.
San a wani taki fu de gosontu na frustan sei?
Wan sma di gosontu na frustan sei e firi bun èn a man du den sani fu na aladei libi. So wan sma man teki pikinso stress, a man du en wroko bun èn a de tevrede nanga a fasi fa en libi e waka.
Te sma abi siki soleki depressie nanga angststoornis dan dati . . .
-
NO wani taki dati wan sma swaki.
-
MA NA wan siki di e meki taki wan sma e broko en ede furu, a e bruya a sma en frustan, èn a e kenki a fasi fa a sma e firi èn e tyari ensrefi.
-
A kan meki en muilek gi so wan sma fu abi mati èn fu du den sani di a musu du ini na aladei libi.
-
A kan abi krakti tapu sma fu difrenti yari, kulturu, ras, lo nanga bribi. Èn a kan abi krakti tu tapu sma di kisi skoro, sma di no kisi furu skoro, pôtisma nanga gudusma.
Suku yepi te yu abi wan fu den siki disi
Son leisi wan sma e bigin tyari ensrefi heri tra fasi leki san a ben gwenti. Kande a e sribi heri dei noso a no man sribi bun èn kande a e nyan bun furu now, noso bijna a no e nyan. A kan tu taki a sma e broko en ede doronomo nanga ala sortu sani, noso taki a e firi brokosaka doronomo. Te den sani disi e pasa nanga wan sma, dan a kan taki a musu suku datrayepi fu kon frustan fu san ede a fasi fa a e firi e kenki so èn san kan yepi en.
Yesus Krestes, a moro koni man di oiti ben libi, ben taki: „Gosontu sma no abi datra fanowdu, ma na siki sma abi datra fanowdu” (Mateyus 9:12). Te wan sma di e feti nanga depressie nanga den sortu siki dati kisi a yoisti datrayepi, dan dati kan yepi en fu firi moro bun èn fu libi wan koloku libi. Efu wan sma abi den problema disi wan pisi ten kaba, noso efu den e kon moro hebi, dan a ben o bun efu a no draidrai fu suku datrayepi. b
Aladi Bijbel no de wan datrabuku, toku den sani di skrifi na ini kan yepi wi te wi kisi fu du nanga den sortu siki disi. Wi e gi yu a deki-ati fu leisi den artikel na ini a tijdschrift disi di e taki fa Bijbel kan yepi wi nanga a problema disi.
a Angststoornis na wan siki di e meki taki wan sma kan bigin frede wantronso aladi a no abi nowan reide fu frede. So wan sma e frede so te taki a no sabi san a musu du, a e bruya helemaal. Depressiviteit noso depressie na wan siki di e meki taki wan sma firi brokosaka doronomo, èn a kan firi leki a no wani libi moro, ma en srefi no e frustan fu san ede a e firi so.
b A Waktitoren no e taigi sma sortu datrayepi den musu teki. Ibri sma musu ondrosuku sani bun, fosi den bosroiti sortu datrayepi den o teki.
Kande yu lobi den tori disi tu
PRENSPARI LERI FU BIJBEL
Fu san ede Gado e gi pasi taki libisma e pina?
Bijbel e gi wi wan bun piki èn a e trowstu wi.
TAN NA AI!
Moro nanga moro yongu sma e kisi siki di abi krakti tapu den frustan—San Bijbel e taki?
Bijbel abi bun rai gi yonguwan di e firi brokosaka.
