1. Suma wi abi fanowdu, èn fa dati kan yepi wi fu de koloku?

 FU DE trutru koloku no wani taki dati wan sma e prisiri fu wan momenti nomo. Ma a firi disi kan tan en heri libi langa. Fa so? Yesus ben tyari disi kon na krin na ini a Bergitaki fu en. A taki: „Koloku fu den sma di sabi taki den abi Gado fanowdu” (Mat. 5:3). Yesus ben sabi taki libisma meki nanga na angri fu sabi èn fu anbegi Yehovah Gado, a Mekiman fu den. Èn fu di Yehovah na „a koloku Gado”, meki den sma di e anbegi en kan de koloku tu.​—1 Tim. 1:11.

2-3. (a) Suma kan de koloku tu soleki fa Yesus ben taki? (b) Fu san wi o taki na ini na artikel disi, èn fu san ede disi de fanowdu?

² Wi kan de koloku soso te wi abi wan libi sondro problema? Nôno. Na ini a Bergitaki fu Yesus, a ben taki wan fruwondru sani. „Den sma di e sari”, kande fu di den sondu noso fu di den ondrofeni sari sani na ini den libi, kan de koloku. Yesus ben taki dati tu fu „den sma di kisi frufolgu fu di den e du san reti” noso den wan di kisi „porinen” fu di den de bakaman fu Krestes (Mat. 5:4, 10, 11). Ma fa yu kan de koloku trutru na ini den sortu situwâsi dati?

³ Yesus ben leri wi taki a no te wi abi wan libi sondro problema dan wi o de koloku, ma na te wi e leri sabi Gado èn e anbegi En (Yak. 4:8). Fa wi kan du dati? Na ini na artikel disi wi o taki fu dri sani di wi musu du fu man de koloku trutru.

4. San na a fosi sani di wi musu du fu man de koloku trutru? (Psalm 1:1-3)

⁴ A FOSI SANI: Efu wi wani de koloku trutru, dan  wi musu leisi èn studeri Gado Wortu. Yesus ben agersi Gado Wortu nanga nyanyan. Libisma nanga meti abi nyanyan fanowdu fu tan na libi. Ma na libisma wawan kan leisi Gado Wortu. Wi abi dati fanowdu. Dati meki Yesus ben taki: „Sma no musu libi fu brede wawan, ma fu ibri wortu di Yehovah mofo taki” (Mat. 4:4). Fu dati ede wi no musu meki nowan dei pasa sondro taki wi leisi Bijbel, a Wortu fu Gado di warti trutru. A psalm skrifiman ben frustan disi, a taki: ’Koloku fu a man di lobi a wet fu Yehovah. Dei nanga neti a e leisi a wet fu Gado.’​—Leisi Psalm 1:1-3.

5-6. (a) San wi kan leri fu Bijbel? (b) Na sortu fasi wi e kisi yepi te wi e leisi Bijbel?

⁵ Fu di Yehovah lobi wi, meki a sori wi na ini Bijbel san wi musu du fu abi wan koloku libi. Wi e leri san Gado abi na prakseri gi wi. Wi e leri fa wi kan tron mati fu en èn fa wi kan kisi pardon fu wi sondu. Èn wi e leri fu a moi howpu di a pramisi wi gi a ten di e kon (Yer. 29:11). Te wi e studeri Bijbel, dan wi e kon sabi den tru tori disi di e gi wi furu prisiri!

⁶ Wi sabi taki Bijbel abi furu bun rai gi na aladei libi. Te wi e du san Bijbel e taki, dan wi kan de koloku trutru. Te yu e firi brokosaka fu di a libi lai problema, dan teki moro ten fu leisi a Wortu fu Yehovah èn fu denki dipi fu en. Yesus ben taki: „Koloku fu den sma di e yere a wortu fu Gado èn di e du san a wortu e taki!”​—Luk. 11:28.

7. San kan yepi yu fu kisi furu wini te yu e leisi Gado Wortu?

 ⁷ Te yu e leisi Gado Wortu, dan teki yu ten fu kon lobi den sani di yu e leisi. Luku wan eksempre. Oiti a sani disi pasa nanga yu? Wan sma e bori wan sani di yu lobi kefalek. Ma fu di yu no abi ten fu nyan noso yu e prakseri tra sani, meki yu e swari a nyanyan gaw-gaw sondro fu tesi en bun. Te yu kaba, yu e si o esi yu nyan èn yu ben winsi taki yu ben teki yu ten fu tesi ibri hap fu a nyanyan. Oiti yu leisi Bijbel so esi taki yu no teki a ten fu frustan san Yehovah wani leri yu? Teki yu ten fu leisi Gado Wortu so taki yu kan kon lobi en. Pruberi fu si den presi na ini yu prakseri, prakseri den sten fu den sma, èn denki fu den sani di yu leisi. Te yu e du disi, dan dati o meki yu de moro koloku.

8. Fa „a koni srafu di de fu frutrow” e du a wroko di den kisi? (Luku sosrefi a futuwortu.)

⁸ Yesus poti „a koni srafu di de fu frutrow” fu sorgu taki sma kisi leri fu Gado Wortu na a yoisti ten èn wi kan taki dati wi e kisi furu leri trutru * (Mat. 24:45). Gado Wortu na a moro prenspari sani di a koni srafu disi e gebroiki fu gi den leri disi (1 Tes. 2:13). Na so fasi wi e kon sabi fa Yehovah e denki fu sani soleki fa a skrifi na ini Bijbel. Na fu dati ede wi e leisi den Waktitoren nanga Ontwaakt! èn den artikel tapu jw.org. Wi e sreka wisrefi gi den mindriwiki konmakandra nanga den konmakandra di e hori na ini a weekend. Èn ibri mun wi e luku a JW Broadcasting^® efu a de. Efu wi e tan leisi èn studeri Bijbel, dan wi o man du a di fu tu sani di o yepi wi fu de koloku trutru.

9. San na a di fu tu sani di wi musu du fu de koloku trutru?

⁹ A DI FU TU SANI: Efu wi wani de koloku trutru, dan wi musu gi yesi na den wet fu Yehovah. A psalm skrifiman ben taki: „Koloku fu ibriwan sma di abi lespeki gi Yehovah èn di e waka a pasi fu en” (Ps. 128:1). Efu wi abi lespeki gi Yehovah, dan wi no o du nowan sani di no e plisi en (Odo 16:6). Sobun, wi e tan meki muiti fu fiti wisrefi na san Gado feni bun èn san a no feni bun, soleki fa a skrifi na ini Bijbel (2 Kor. 7:1). Wi o de koloku te wi e du sani di Yehovah lobi èn te wi e wai pasi gi sani di a no wani si na ai kwetikweti.​—Ps. 37:27; 97:10; Rom. 12:9.

10. San na wi frantwortu soleki fa Romesma 12:2 e sori?

¹⁰ Leisi Romesma 12:2. Wan sma kan sabi taki Yehovah abi a reti fu bosroiti san bun èn san no bun, ma a musu gi yesi tu na den wet fu Gado. Fu eksempre, wan sma kan sabi taki lanti abi a reti fu taki o tranga a mag rèi tapu strati. Ma kande a no wani gi yesi na a wet dati. Dati meki a e rèi moro tranga leki san a wet taki. Nanga a fasi fa wi e tyari wisrefi wi kan sori taki wi e bribi trutru taki a moro bun fasi fu libi gi wi na fu gi yesi na den wet fu Yehovah (Odo 12:28). David ben bribi dati. Dati meki a ben taki fu Yehovah: „Yu o sori mi fa mi musu libi. Mi e firi prisiri te mi si taki yu feni mi bun. Te mi de na yu reti-anusei, dan mi o prisiri fu ala ten.”​—Ps. 16:11.

11-12. (a) Te wi abi problema noso wi lasi-ati, dan nanga san wi musu luku bun? (b) Fa den wortu fu Filipisma 4:8 kan yepi wi te wi musu bosroiti san wi o du na ini wi prisiriten?

¹¹ Te wi abi problema noso wi lasi-ati,  dan kande wi wani go du wan sani di o yepi wi fu no broko wi ede moro. Dati kan. Ma wi musu luku bun taki wi no go du sani di Yehovah e teige.​—Ef. 5:10-12, 15-17.

¹² Na ini a brifi di na apostel Paulus ben seni gi den Filipisma, a gi den Kresten deki-ati fu tan prakseri sani „di reti, . . . di krin, . . . di e meki sma sori lobi, . . . [èn] di bun”. (Leisi Filipisma 4:8.) Paulus no ben taki spesrutu fu sani di wi e du fu abi prisiri. Ma toku den wortu fu en musu abi krakti tapu san wi e bosroiti fu du na ini wi prisiriten. Pruberi a sani disi: Ala presi pe yu e si a wortu „sani” na ini a tekst di Paulus skrifi, dan leisi „singi”, „felem”, „buku”, noso „video game”. Fu eksempre: ’Tan prakseri singi „di reti, . . . felem di krin, . . . buku di e meki sma sori lobi, . . . èn video di bun’. Disi kan yepi yu fu si krin sortuwan bun na ini Gado ai èn sortuwan no bun kande. Wi wani tyari wisrefi na so wan fasi taki wi e hori wisrefi ala ten na den hei wet fu Yehovah (Ps. 119:1-3). Dan nanga wan krin konsensi wi kan du a di fu dri sani di kan yepi wi fu de koloku trutru.​—Tori 23:1.

13. San na a di fu dri sani di wi musu du fu de koloku trutru? (Yohanes 4:23, 24)

¹³ A DI FU DRI SANI: Sorgu taki na anbegi fu Yehovah e kon na tapu a fosi presi na ini yu libi. Yehovah na wi Mekiman. Dati meki wi musu anbegi en (Openb. 4:11; 14:6, 7). Fu dati ede wi musu si en leki a moro prenspari sani fu anbegi Yehovah na a fasi di a feni bun. Dati wani taki dati wi musu anbegi en „nanga yepi fu a santa yeye èn nanga yepi fu san tru”. (Leisi Yohanes 4:23, 24.) Wi wani taki a santa yeye fu Gado musu tiri wi na ini na anbegi fu wi, so taki wi man hori wisrefi na den tru leri na ini en Wortu. Na anbegi fu wi musu kon na tapu a fosi presi, srefi te wi e tan na ini wan kondre pe den tapu a wroko fu wi. Nownowde moro leki 100 fu wi brada nanga sisa de na strafu-oso soso fu di den de Yehovah Kotoigi. * Ma nanga prisiri den e du ala san den man fu begi, fu studeri, èn fu fruteri trawan fu wi Gado èn fu en Kownukondre! Te sma e krutu wi noso te den e frufolgu wi, dan wi de koloku fu di wi sabi taki Yehovah de nanga wi èn taki a o blesi wi.​—Yak. 1:12; 1 Petr. 4:14.

14. San ben pasa nanga wan yongu brada na ini Tayikistan, èn fu san ede?

¹⁴ Son brada nanga sisa fu wi ondrofeni tumusi muilek situwâsi, ma toku den ben de koloku trutru fu di den du den dri sani di wi taki fu den didyonsro. Luku san pasa nanga Jovidon Bobojonov fu Tayikistan, di a ben abi 19 yari èn a no ben wani go na ini a legre. Tapu 4 oktober 2019 den go na en oso èn nanga tranga den grabu en tyari go na strafu-oso pe den hori en wan tu mun langa neleki en na wan ogriman. Wan tu TV nanga radio station na ini difrenti kondre ben panya a nyunsu fu na ogri sani disi di ben pasa nanga en. Den ben fruteri taki sma ben fon en fu di den ben wani dwengi en fu meki wan sweri leki srudati fu a kondre èn fu weri srudatikrosi. Baka dati, krutubangi leisi strafu gi Jovidon èn den  seni en go na wan strafuman-kampu teleki a presidenti fu a kondre gi primisi te fu kaba fu lusu en. A heri pisi ten dati, Jovidon tan getrow èn a tan koloku. Fa a du dati? Ala ten a ben hori na prakseri taki a ben abi Gado fanowdu.

15. Fa Jovidon tan leri sani fu Yehovah di a ben de na strafu-oso?

¹⁵ Di Jovidon ben de na strafu-oso, a tan leri sani fu Yehovah, aladi a no ben abi wan Bijbel noso iniwan fu den buku fu wi. Fa a ben man du dati? Brada nanga sisa fu a foto ben tyari nyanyan gi en èn den ben skrifi a deitekst na tapu den saka pe den ben poti a nyanyan gi en. Na so fasi a ben man leisi Bijbel èn denki dipi fu en ibri dei. Baka di a komoto na strafu-oso, a ben gi a rai disi na den wan di no ondrofeni hebi tesi ete: „A de tumusi prenspari taki yu gebroiki a ten di yu fri fu kon sabi moro fu Yehovah. Leisi en Wortu nanga den buku fu wi.”

16. Na sortu sani Jovidon ben poti prakseri?

¹⁶ A brada fu wi gi yesi na den wet fu Yehovah. A no ben e tan poti prakseri na firi di no bun èn a no go du ogri. Na presi fu dati, a tan poti prakseri na Yehovah èn na sani di Yehovah feni bun. Jovidon  ben e luku den moi sani di Gado meki èn a ben warderi den sani dati. Ibri mamanten te a ben wiki a ben yere den fowru e singi. Na neti a ben e luku a mun nanga den stari. A taki: „Den sani disi ben de kado fu Yehovah. Den meki mi firi prisiri èn den gi mi deki-ati.” Te wi de nanga tangi gi den Bijbel leri èn gi den sani di Yehovah gi wi fu tan na libi, dan dati e prisiri wi ati èn a prisiri dati kan gi wi a krakti fu horidoro.

17. Fa den wortu na ini 1 Petrus 1:6, 7 kan yepi wan sma di de na ini wan srefi sortu situwâsi leki Jovidon?

¹⁷ Jovidon ben poti na anbegi fu Yehovah na tapu a fosi presi. A ben sabi o prenspari a de fu tai hori na a tru Gado. Yesus ben taki: „Na Yehovah yu Gado, yu musu anbegi èn na en wawan yu musu dini” (Luk. 4:8). Wan tu legre komandanti nanga srudati ben wani taki Jovidon drai baka gi a bribi fu en. Ma na presi fu dati, Jovidon begi fayafaya ibri dei nanga ibri neti. A ben aksi Yehovah fu yepi en fu no gi abra, ma fu tan getrow. Aladi den du takru sani nanga Jovidon, toku a tai hori na Gado. Den ben tyari en gowe èn den ben fon en poti na strafu-oso, ma now a kan prisiri srefisrefi fu di a kon abi wan sani di a no ben abi fosi. A kon abi wan moro tranga bribi fu di a bribi fu en kisi tesi.​—Leisi 1 Petrus 1:6, 7.

18. Fa wi kan tan koloku?

¹⁸ Yehovah sabi san wi abi fanowdu fu de koloku trutru. Efu yu e du den dri sani di de fanowdu fu de koloku trutru, dan yu kan tan koloku awinsi muilek sani miti yu. Dan yu o man taki tu: „Koloku fu den sma di abi Yehovah leki Gado!”​—Ps. 144:15.